Read Eastern Krahn 2 'Korli-chlee-deh: 13 Bible Online

2 'Korli-chlee-deh: 13 - Eastern Krahn bible

2 'Korli-chlee-deh: 13

¹:Yee' 'an kpor⧾-a' taan neh :wor :dhe dih 'an yi a 'ye 'da. :Yee' Nyorsoa-a' 'chlee-deh 'da, :Mor :on po nyor dhih 'dlu, :yee' nyor⧾ 'sororn', nyor⧾ taan, dhe-eh ken dih, ti or no-eh, 'de :on 'ye-or' dhih 'dlu po.

²Ti 'on yi-a 'de a bo 'do kpor⧾-a' 'sororn' neh 'di, 'on zela: a :gwluhuh' 'weh, 'dekorn: nyor⧾-a' klehkpeh-: :ka :mor nyor :or se-a deh⧾-zon:⧾ :no-eh dih 'tali:, 'an mu-or 'kle 'ye-eh 'dlu :po. Jorwor: :ka 'on :tehn-a bo :naa, 'an zela a :gwluhuh' :neheh'.

³Eh-: mu a 'i :to-dih: :ka 'an wlu-dih-a 'do 'Klae gor-'. :Mor or po a 'kle 'ye-eh 'dlu, :yee' eh :se or-a' 'kpih-a: chehn :deh. Jorwor: or-a' 'kpih, me-: :ne 'de a 'nyne-'.

⁴:Yee' ti or 'ye-a' 'o tu 'i :kor-dih-eh:, :yee' or se 'kpih 'ble. Jorwor: Nyorsoa-a' 'kpih 'nyi-or :febeh', 'de or :ne 'kmo :neheh'. :A se 'kpih ken :ne, :ka 'Klae no-a :dee'. Jorwor: 'do a-a' dhih bo, :a mu Nyorsoa-a' 'kpih 'kmo :ne-dih:, :ka 'Klae no-a :ke.

⁵:Yee' a pobo: 'o a-a' 'jeh-a' :porluh⧾ ken, a 'ye a-a' 'jeh-a' zabe zi, :eh beh a :ne-dih: 'Klae-a' dhih 'jeh-' :po-eh 'kmo-:. A yubo-eh' 'jeh ka, or :ne a-uh' :e? :Mor eh 'dhu a se-or dhih 'jeh-' po, :yee' 'on :se-' :mleheh' 'da.

⁶'On dhe-eh :gwlii' a mu-eh yubo: :ka :a 'dhu-a :Yusu'-a'a: dboo-nyor⧾ 'jeh ka, 'de :a zi-a 'de eh 'di.

⁷'An :dou'⧾ se 'de :ne, :mor 'on se :Yusu'-a'a: dboo-nyor: 'jeh gweh 'de a 'yli 'de. Deh :due' :eh :korn-a dhih 'an wlu-a 'de Nyorsoa bo, eh-: 'dhu, a :ne-' deh-zon no. Deh :due' 'an 'bhorn-a a 'ye-a' no 'klein', eh-: 'dhu a 'ye deh :eh 'sleh-a 'i no. Eh :se :yee' 'an vorn 'on 'ye :Yusu'-a'a: dboo-nyor: 'jeh gweh :deh.

⁸Deh no-eh, deh :eh 'beh-dih:-a :eh 'ye-a tubo-wlu:⧾ 'jeh :daa dih :ku-dih:, eh-: :a no. :A se 'beh-dih: :a 'ye deh no :eh 'ye-ih'-a ya gba.

⁹:Mor eh gweh :a-a' 'kpih-a: chehn 'de nyor⧾ 'yli 'de, 'de a 'ye :kmu, :yee' 'mona-a: no :a-uh. Eh-: :korn dhih :a wlu 'de Nyorsoa bo, a 'ye 'de 'kpih po 'de 'Klae-a' deh 'di.

¹⁰:Yee' deh :korn-a dhih 'an 'chle-a 'chlee-deh: :daa 'de a bo, :dha 'on :tehn-dih:-a a bo :dueh'leh:, eh-: 'dhu, 'on :se-' 'bhorn :mor 'on 'yle, 'on 'ye 'kpih :Gwlor :baa' 'nyi-a 'on no 'do a 'dlu, 'de 'on 'ye 'i :kma 'do a ken. 'Kpih :daa, or 'nyi-a 'on, eh :se 'on 'ye a 'kor-dih: :deh. Jorwor: en 'ye-eh' no, 'de a 'ye ku.

¹¹:Yee' 'an 'Klae :de-di'-boi'-a:, 'an kpa a wlu o. A vorn a 'ye 'yi 'sleh-nyor⧾ no. A :to 'an bale-wlu⧾ :dou'⧾ bo. A 'worn-dih: a 'bei' bo :due' :due'. A :ne-dih: ken dih kpon-dih-eh-a' 'kmo. :Yee' Nyorsoa :or 'ble-a :ybeh-dih-eh-: 'dekorn: wlu-' dih 'worn-eh-: or mu 'o a bo :ne.

¹²A kpa 'de a 'bei' :bhluun'⧾-' :due' :due', a 'ye-uh' :gble-dih: 'de :porluh⧾-a' :vlehehn'-' :gweh ka 'di. Nyorsoa-nyor⧾-a' klehkpeh, on 'da, mo-: 'ye a-uh.

¹³:Yee' :Gwlor :baa' :Yusu' 'Klae-a' mla-: Nyorsoa-a' :ybeh-dih-eh-: 'dekorn: :dha :due' :na-dih-eh: :eh or-a' Gban 'i :ne :Zulu no-a 'de :eh :ne-a 'de a 'nyne-: 'nyi en :ne 'o a-a' klehkpeh bo o.