Read Eastern Krahn 2 'Korli-chlee-deh: 2 Bible Online

2 'Korli-chlee-deh: 2 - Eastern Krahn bible

2 'Korli-chlee-deh: 2

¹:Yee' eh-: :korn dhih, 'de 'on :na-dih-eh 'dlu 'di dih, 'on :ne-' a 'ye 'da yi :neheh', 'de eh :ne-eh' no 'de a-a' :porluh⧾ :ne-' 'zorn 'kpa.

²Deh no-eh, :mor 'on no deh, 'de eh 'ye a-a' :porluh⧾ 'zorn po, :yee' :or mu-eh :no, 'de 'on 'ye 'mona-' 'kpa :eh? Eh :se a :mor :ne-a :due' :e?

³'On 'chle a bo 'weh, deh no-eh, 'on :se-' 'bhorn, 'on 'ye a 'ye 'da yi :naa. Deh no-eh, nyor⧾ :an mu-eh :no, 'de 'mona 'ye-a' 'on dih 'yi-dih:, 'on :se-' 'bhorn on 'ye-eh' no, 'de 'an :porluh 'ye 'zorn 'kpa. 'On yubo-eh' deh 'jeh, :mor 'mona :taa 'on no, :yee' 'mona-a mu a-a' klehkpeh :no :ke.

⁴Deh no-eh, ti 'on 'chle-a a bo, :yee' 'an :porluh-a 'beh-dih 'on 'worn dih 'gabaa, 'de 'on 'ble 'pa 'do 'an :porluh ken, 'de 'an 'vin 'gabaa. 'On :se-' a bo 'chle, eh 'ye a-a' :porluh⧾ 'zorn po. Jorwor: 'an 'bhorn a 'ye-eh' yubo: :ka 'on no-a a-a' :ybeh-a' 'gabaa.

⁵Nyor :or no-eh, 'de 'an :porluh 'ye-a' 'zorn 'kpa, eh :se 'on :due' or :se-eh' no, jorwor: a-a' klehkpeh :oo', or no-eh'. A 'bor, eh :se a-a' klehkpeh. (Deh :korn-a dhih 'an za-a-' deh :daa, 'on :se-' 'bhorn deh or se-a no, 'on 'ye-eh 'o or 'dlu po.)

⁶Nyor :dao', 'kle 'ye-eh: a-a' :dha :dhulu' po-a 'o or 'dlu, eh :dhie: 'i.

⁷:Yee' 'do eh-a' dha, a 'ma-dih: or-a' deh⧾-zon⧾-a' dhih bo, 'de a 'ye-or :porluh 'di dih dhe, or-a' :porluh :ne-' 'zorn 'kpa, 'de or :ne-' :keheh' 'kpa.

⁸:Yee' 'an bale a 'weh. A :to-dih-eh or 'i :ka a ybeh-or' deh 'jeh.

⁹'Chlee-deh: 'on 'chle-a 'de a bo, 'on 'chle-eh', 'on 'ye a 'dhen, :eh beh a 'beh-dih: a 'ye 'o 'an wlu⧾-a' klehkpeh dih dhe-:.

¹⁰:Mor eh 'dhu a 'ma-dih: nyor-a' deh⧾-zon⧾-a' dhih bo, :yee' 'an 'jeh :ke, 'on 'ma-dih: or-a' deh⧾-zon⧾-a' dhih bo 'weh :ke. :Mor 'on 'ma-dih: nyor-a' deh⧾-zon⧾-a' dhih bo, :mor deh :ne 'o :eh :korn-a dhih 'on 'ye-a' bo 'ma-dih:, :yee' 'on no-eh 'do 'Klae ybei', 'do a-a' dhih bo.

¹¹'On no deh :daa 'weh, 'de 'ku :ne-' 'kpih 'ble 'do :a ken. Deh no-eh, :a yubo: :gbeheh: 'ku 'dhu-a 'weh.

¹²:Yee' :yeh 'on 'si-a 'Tloa-gwlor dih, 'on 'ye-a tubo-wlu:⧾ 'jeh, :en kor-a 'Klae 'i po, :yee' 'on 'ye-eh' :ka or :za-a 'o :kpaa' 'do 'on bo, 'on 'ye-a :koan no 'do or bo.

¹³Jorwor: 'an :porluh-a 'neneh 'de-: dih, deh no-eh, 'on :se-' 'an 'Klae :de-di' Talor' 'ye 'de mor. :Yee' eh-: no-eh, 'de 'on kpa nyor⧾ :on :ne-a 'o wlu, 'on 'wluh 'o on bo, 'on mu 'Masordo'nia-bluhba ken.

¹⁴Jorwor: 'on po Nyorsoa-a' 'zio. Deh no-eh, or-: no-eh, 'de 'Klae du deh⧾-zon⧾-a' tuh, 'de :a 'ble 'for 'de or-a' tuh :du-eh: :dao' 'di. :A :mor Nyorsoa :yi-dih: 'de 'Klae-a' deh-' dih 'worn-eh: gweh deh⧾-a' klehkpeh 'dlu, :eh gweh-a :pofi'orn 'i.

¹⁵Deh no-eh, :a gweh deh⧾ :en po-a 'no 'jeh no :en 'Klae-a za-dih-a 'slaa 'do Nyorsoa ybei', :en mu-a 'de nyor⧾ :on :ne-a 'o 'puh-a' :gwie 'i-: 'dekorn: :yuh :on :ne-a 'o gbe :zie-eh-a' :gwie 'i-: bo.

¹⁶'Do :yuh :on :ne-a 'o gbe :zie-eh-a' :gwie 'i bo, on 'duo: 'no 'jeh :po-deh: :daa 'weh, eh 'ye 'no-zon no, :eh mu-a 'de 'meh-a' bo. Jorwor: :yuh :on :ne-a 'o 'puh-a' :gwie 'i, on 'duo-eh 'weh, eh 'ye 'no 'jeh :po-deh no, :eh mu-a 'de 'kmo :sie: :febeh' bo. :Or 'beh-dih: :or 'ye :koan: :daa no :naa :eh?

¹⁷:Ka nyor⧾ :noo'-a no-a, :a se :ao' :ne, :on 'duo:-a Nyorsoa-a' wlu-', :on 'ye-uh'-a 'doror' :po-dih:. Jorwor: :ka Nyorsoa dbo :a-uh, :yee' :a no 'Klae-a' 'bhoi-nynuu: :an za-a :dhehehn-dhih-' 'de nyor⧾ bo, 'do Nyorsoa ybei'.