Read Eastern Krahn 2 'Korli-chlee-deh: 3 Bible Online

2 'Korli-chlee-deh: 3 - Eastern Krahn bible

2 'Korli-chlee-deh: 3

¹:Mor :a :taa deh :daa-' za, :yee' :a 'beh-dih: :a-a' 'jeh 'i :dele' ka :e? :Yee' :a :korn :a 'ye 'chlee-deh⧾ 'ble, :en 'ye-a :a 'kwla :za, 'de a 'ye :a yubo:, :ka :a no-a nyor⧾ 'jeh, :ka nyor⧾ :noo'-a no-a :e? :Ae' :a 'ye a dih dhele:, a 'ye 'chlee-deh⧾ 'chle, :en 'ye :a 'kwla :za 'de nyor⧾ :noo' bo :e?

²A-a' 'jeh 'yor-eh:, a :mor 'dhu :a-a' 'chlee-deh-' :eh :ne-a 'o :a :porluh⧾ ken, 'de nyor⧾-a' klehkpeh 'ye-eh' yubo:, 'de on 'ye-eh' zlo.

³Eh 'worn-eh-: dih :ka eh 'dhu-a 'Klae-a' 'jeh 'yor-eh-' :or 'chle-a 'chlee-deh: :daa, 'de or :dbo-dih: :a bo. Or :se-' 'chlee-deh-tu-a' 'ni no, or :se-eh' 'chle. Jorwor: 'kmo :ne-Nyorsoa-a' :Zulu: mo-: or no. Or :se-eh' 'chle 'do sobu' ken. Jorwor: 'do :gwlor-nyor⧾-a' :porluh⧾ ken :oo', or 'chle-dih-eh.

⁴Deh :korn-a dhih :a za-a deh⧾ :daa-', eh-: 'dhu, :a :kpa-dih: Nyorsoa :gwluhuh', :eh :yi-dih:-a 'Klae-'.

⁵:A se :a-a' 'jeh-a' 'kpih :gwlii' dhe, 'do :koan: :daa, or-a' no-a' bo. Jorwor: Nyorsoa :oo', or-: no-eh, 'de :a 'beh-dih: or-a' no-a'.

⁶Nyorsoa :oo' or-: no-eh, 'de :a 'beh-dih: or-a' kuo :dele'-a' :koan-a' no-a'. Kuo :dele' :daa, or :se-' 'tele' :eh 'chle-eh 'i kor, jorwor: eh kor Nyorsoa-a' :Zulu 'i. Deh no-eh, 'tele' :eh 'chle-eh, eh ya 'de 'meh-a'. Jorwor: or-a' :Zulu-a ya 'de :febeh'.

⁷:Mose'-a' 'tele', eh 'chle-eh:-' 'do sobu'⧾ ken. Eh :za-eh: 'kwla, 'de Nyorsoa-a' dhih-a' 'i 'beh-a' 'di. Or-a' dhih-a' 'i 'beh-a' :dao', or-: no-eh, 'de :Mose'-a' 'yuba-a fan, keen' :mloror' dhih-a' 'i 'beh-a' fan-a' :dao', or :gweh worn, jorwor: 'Ezlea-nyor⧾ se or-a' ya pobo-eh 'beh-dih: 'gboror:. :Yee' :mor 'tele' :daa :eh chehn-a nyor⧾ wlu 'ken, on 'ye-a' 'meh, eh :taa 'de dhih-a' 'i 'beh-a' :or :ne :ao' ya,

⁸:yee' dha dhih-a' 'i 'beh-a' :or :korn-a 'de Nyorsoa-a' :Zulu-a' :koan bo, or mu :na-dih: :eh?

⁹:Yee' :mor kuo :soa: :or :ya-a: 'de nyor⧾-a' zabe 'i :chehn-eh, or no :ao' dhih-a' 'i 'beh-a' 'ble-a', :yee' dha kuo :dele' :or no-eh, 'de :a no-a 'yi 'sleh-nyor⧾ 'do Nyorsoa ybei', or mu :na-dih: :eh?

¹⁰:A 'beh-dih: :a 'ye :ao', dhih-a' 'i 'beh-a' :or fan-a deh 'jeh :naa, or-a' dhih, eh-: no-eh, 'de dhih-a' 'i 'beh-a' :a 'da-dih-a faan-deh :dee', 'de nyor⧾ 'bor or-a' 'ye-a' :naa.

¹¹:Yee' :mor deh :eh mu-a worn :gweh, eh no :ao' dhih-a' 'i 'beh-a' 'ble-a', :yee' :yeh :eh mu-a 'kmo :sie:, dha eh mu :na-dih: :eh?

¹²:Yee' :ka :a 'ble-a deh :gwlii' :dhe-eh: :daa, :yee' :a ku-' :gwluhuh'.

¹³:A se :Mose' gweh, :or no-a 'yli-eh :or 'zile:-a or-a' 'yuba :dee', 'de 'Ezlea-nyor⧾ :ne-' or-a' 'yuba: :or fan-a, or-a' worn :gweh-eh 'ye.

¹⁴Jorwor: an-a' :porluh⧾ :kpe ken dih, 'de eh :yeh-dih: 'zean'-we-eh: :daa ken. :Mor on :taa kuo :soa-chlee-deh zlo, :yee' 'yli-eh-for: :dao', or 'jli-eh: an-a' :porluh⧾ ken 'gboror:. Deh no-eh, 'Klae-a' dhih 'jeh-' :po-eh:, eh-: mu-eh :no, 'de 'yli-eh-for: :dao', or 'ye 'o 'wluh 'klein'.

¹⁵'De mor 'ka-: eh :ne 'zean' :ke. :Mor on :taa :Mose'-a' 'tele'-chlee-deh zlo, :yee' 'yli-eh-for: :dao', or 'jli an-a' :porluh⧾-: ken 'gboror:.

¹⁶Jorwor: :mor nyor⧾ 'bili:-' dih 'noror :Gwlor :baa' bo, :yee' 'yli-eh-for: :dao', or 'wluh 'o 'weh.

¹⁷:Yee' :Gwlor :baa' :oo' :a 'da, or-: 'dhu Nyorsoa-a' :Zulu-'. 'De mor :dha :Gwlor :baa'-a' :Zulu :ne-a, :yee' 'do :wor 'gegeye 'zorn 'wluh-eh :ne.

¹⁸:Yee' :a-a' klehkpeh :or no-a 'Klae-a' nyor⧾, :a se 'yli-eh-for: :dao' 'dlu dih 'wla, 'de :a :to-dih: :Gwlor :baa'-a' dhih-a' 'i 'beh-a' nyor⧾ 'i. 'De :a :za-dih: or-a' tu-', :a gweh-or, 'de dhih-a' 'i 'beh-a' :or 'kpuhba-a ken dih 'di, :eh 'wluh-a 'de or bo, :or 'dhu-a Nyorsoa-a' :Zulu-'.