Read Eastern Krahn 2 'Korli-chlee-deh: 4 Bible Online

2 'Korli-chlee-deh: 4 - Eastern Krahn bible

2 'Korli-chlee-deh: 4

¹:Yee' 'do eh-a' dha, :a-a' :porluh⧾ :se-' 'zorn 'kpa. Deh no-eh, :koan: :daa :a no-a, Nyorsoa-a' :wehlih: :korn-eh: 'o :eh no-eh, 'de :a no-or.

²:A :dhe-dih: dhen-deh:⧾ :en nyor⧾-a no-a 'de 'zile: ka 'di, 'for 'i. :A-a' :bo-dih: nyor⧾ dih. 'De mor :a-a' :za-dih: Nyorsoa-a' wlu :gwliin'. Jorwor: dhih :en no-a dhih-a' 'yor-eh, me-: :a za-'. 'De mor :a no-eh' 'do Nyorsoa ybei', 'de nyor⧾-a' klehkpeh 'ye :a-a' dhih 'worn-dih:.

³:Yee' :mor eh 'dhu tubo-wlu:⧾ 'jeh :a po-a, en :kma 'i, nyor⧾ :noo' 'ye-ih' dih 'worn, :yee' nyor⧾ :on :ne-a 'o gbe :zie-eh-a' :gwie 'i, mo-: 'o :on 'dhu nyor⧾-', :an-a' 'worn-ih' dih.

⁴Deh no-eh, 'ku :yuh 'kmo-a 'da-dih-a nyorsoa, :on korn-uh-a wlu 'ken, mo-: kan nyor⧾ :on se-a Nyorsoa-a' tubo-wlu:⧾ 'jeh, dhih 'jeh-' po, an-a' deh-' dih 'worn-eh 'i. Zorn-pli: :en fan-a 'do on ken, an-a' 'ye-ih, :en 'wluh-a 'de Nyorsoa-a' tubo-wlu:⧾ 'jeh bo :en za-a 'Klae-a' dhih-a' 'i 'beh-a' dhih-', :or :ne-a 'de Nyorsoa-a' tu 'di.

⁵Eh :se :a-a' 'jeh 'yor-eh-a' tubo-wlu:⧾ :a :se-' po. Jorwor: tubo-wlu:⧾ :a po-a, :a 'da :Yusu' 'Klae, or-: no :Gwlor :baa'. Deh :due' :a za-a-' 'do :a-a' 'jeh 'bhun, eh-: 'dhu :a no 'bhoi-nynuu: 'do a bo, 'do :Yusu'-a' dhih bo.

⁶Nyorsoa :or no-a, zorn-pli-a mu :fan 'de :kule-', or-a' 'jeh :dao', or-: no-eh, 'de or-a' zorn-pli-a fan 'do :a :porluh⧾ ken, :a 'ye or-a' dhih-a' 'i 'beh-a' dih 'worn :eh fan-a 'do 'Klae 'yuba 'i.

⁷:Yee' :a gweh maa-yabo' :or :korn-a 'di Nyorsoa-a' bhaan-deh: :daa, eh :dhe-a 'di dih. Eh-: :to-dih-eh nyor⧾ 'i, :ka 'kpih :kolu'⧾ :daa, en se-a 'de :a bo 'wluh, jorwor: en 'wluh-a 'de Nyorsoa bo.

⁸Nyor⧾-a 'beh-dih :a 'worn dih 'for⧾-a' klehkpeh bo. Jorwor: eh se :a-a' du-a' 'beh-dih:. :Mor ti :nee' :ne 'o, :yee' deh⧾ :nee' :kpe-dih: 'o :a :gwlii' dih. Jorwor: :a 'ble :gwlii' :dhe-deh: 'gboror:.

⁹:Gwlor-nyor⧾-a 'ye-dih :a 'kle. Jorwor: Nyorsoa :se-' :a dih 'tali:. Nyor⧾-a no-eh', :a 'ga-: dih. Jorwor: :a :se-' gbe :zie:.

¹⁰:Yee' 'do ti-a' klehkpeh bo, :a na 'de 'meh-a' 'worn dih :or :ne :Yusu'-a' 'meh-a goor-dih:-a. :Yee' :ka :a :ne-a 'kmo 'gboror: eh-: :to-dih-eh nyor⧾ 'i :ka :Yusu' :ne-a 'kmo :ke.

¹¹:Yee' 'do :a-a' 'kmo :ne-eh-a' klehkpeh bo, :a-a' :febeh' :ne 'de ji-a' 'worn :Yusu'-a' dhih, 'de :a-a' yau: :daa :an mu-a 'meh-:, on 'ye-eh' nyor⧾ 'i :to-dih: :ka :Yusu' :ne-a 'kmo.

¹²:Yee' deh :a na-a 'de 'meh-a' 'worn dih 'do ti-a' klehkpeh bo, eh-: no-eh, 'de a :ne 'kmo 'de Nyorsoa-deh 'di.

¹³Eh 'chle-eh:-' 'de Nyorsoa-a' 'chlee-deh 'di, eh 'da, 'On po-eh' dhih 'jeh. Eh-: :korn dhih 'an wlu. :Yee' :ka :a 'ble-a dhih 'jeh-' :po-eh: :ne-a :due', :yee' :a-a' 'jeh :ke, :a po-eh' dhih 'jeh. Eh-: :korn dhih :a wlu.

¹⁴Deh no-eh, :a yubo-eh', Nyorsoa :or :za-a: 'de :Gwlor :baa' :Yusu' 'de nma-dih-deh 'di, or mu :a 'kmo bo :ya :ke, :mor :a 'meh, :ka or no-a :Yusu'-a' dhih. 'De or 'ye a mor-: 'dekorn: :a mor-: kpa 'do or ybei'.

¹⁵A-a' dhih :oo', 'de deh⧾-a' klehkpeh :daa, en :no-eh:. :Yee' :ka Nyorsoa-a' mla mu-a :gwlor-nyor:⧾ :doru'-a ken :yeh-dih-eh :no, 'de on 'ye-a' 'puh, eh-: mu-eh :no, 'de Nyorsoa-a' 'zio :po-eh 'ye ken dih 'kpuhba:, eh 'ye-or' dhih-a' 'i 'beh-a' 'nyi.

¹⁶:Yee' eh-a' dhih, :a-a' :porluh⧾ :se-' 'zorn 'kpa. Keen' :mloror' :a-a' yau :ne 'o 'zorn-a' :gwie 'i. Jorwor: :a-a' :porluh⧾-a 'kpa-' :dele' 'gwie-: :glaa'e-:.

¹⁷'Worn dih 'beh-eh-yu-beh: :daa :eh :se-a 'o :gwle i, :a 'ye-a :naa, eh mu :a 'kmo :sie: :febeh' :eh 'ble-a dhih-a' 'i 'beh-a' :eh 'beh-a 'i, :eh :zi-a 'o 'kle 'ye-eh: :daa, 'nyi-:.

¹⁸:Yee' 'do eh-a' dha, deh⧾ :a-a' 'yli-eh 'ye-a, eh :se 'de en bo, :a :se-' :a-a' :porluh⧾ po. Jorwor: :yih :a-a' 'ye-a, 'de en bo, 'do :wor :a po :a-a' :porluh⧾. 'De mor deh⧾ :a-a' 'yli-eh 'ye-a, en :se 'o :gwlee-deh:. Jorwor: :yih :a-a' 'ye-a, me-: no 'kmo :sie-deh⧾.