Read Eastern Krahn 2 'Korli-chlee-deh: 5 Bible Online

2 'Korli-chlee-deh: 5 - Eastern Krahn bible

2 'Korli-chlee-deh: 5

¹:Yee' :a yubo-eh', :a-a' yau: :daa :a 'ti-a 'de 'di, :mor on 'meh, :eh gweh-a :ka 'taa: 'por :gbalie blu-a, :yee' Nyorsoa-a mu 'gbu :noo' 'ble-: 'do :a bo 'de or 'bli yai', :a 'ye 'de on 'di 'ti, 'gbu or-a' 'jeh 'yor-eh po-a :an mu-a 'kmo :sie: :ka ti-a mu-a 'dlu-' :tehn.

²:Yee' :yeh :a :ne-a 'noror yau: :daa 'di 'gboror:, :yee' :a 'vin-dih 'di dih. Deh no-eh, :a 'bhorn :a 'ye yau: :yuh :on :ne-a 'de Nyorsoa 'bli yai'-' pa.

³:A 'bhorn :a 'ye 'de :a-a' yau: :dele' 'di :ne. :Yee' :a mu yau 'ble-: 'do ti-a' klehkpeh bo.

⁴:Yee' :yeh :a :ne-a 'noror yau: :yuh :daa 'di, :yee' :a 'vin-dih 'di dih :eh gweh-a :ka :a 'ble-a 'gbeh :a 'ye-a' kpa. Eh :se :a 'bhorn :a 'ye :a-a' yau: :a 'ble-a dha yao 'zorn, dih 'tali: :deh. Jorwor: :a 'bhorn :yuh :on :korn-a 'de Nyorsoa 'bli yai' bo, :a 'ye-uh' pa. :Yee' :a-a' yau: :an mu-a 'meh-:, on 'ye yau: :yuh :on :se-a' 'meh-: i :za-dih:.

⁵Nyorsoa :oo', or-: po :a-a' yau 'kpa 'do deh :daa bo. 'De or po 'o or-a' :Zulu 'do :a :porluh⧾ ken, eh 'ye :a 'i :to-dih: :ka deh⧾-a' klehkpeh or 'ble-a 'do :a bo, or mu-ih :a 'nyi-:.

⁶:Yee' eh-a' dhih, :a-a' :porluh⧾-a' 'worn, en-' 'kpa 'zorn, keen' :mloror' :a yubo-eh' :ka :mor :a :ne-a 'noror yau: :daa 'di, :yee' :a :tehn-dih:-a :Gwlor :baa' 'bli bo dih.

⁷:Yee' or-a' dhih 'jeh-' :po-eh:, eh-: no-eh, 'de :a :ne 'kmo. Eh :se or-a' 'ye-a' :se-eh' no.

⁸:A-a' :porluh⧾ :se-' 'zorn 'kpa. Eh mu :a 'ton :korn :a 'ye yau: :daa dih 'tali:, 'de :a 'ye 'de :Gwlor :baa' 'bli yai' mu.

⁹:Yee' 'do eh-a' dha, :a 'bhorn :a 'ye deh no, :eh 'ye-a or-a' :porluh dih 'pehn-dih:, :a-a' :yeh :ne 'noror yau: :on :ne-a 'noror yao 'zorn 'di-: 'de mor :a-a' :yeh :ne 'de :yuh :ne-a 'de Nyorsoa 'bli yai' 'di-:.

¹⁰Deh no-eh, :a-a' klehkpeh :a :korn :a 'ye dih :nyna 'do 'Klae-a' zabe: :zi :kpala' ybei' :due' :due' :gbor. Deh⧾ :a-a' klehkpeh :a no-a ti :a :ne-a 'kmo dha yao 'zorn, :eh beh deh-zon: :a no-: :eh beh deh 'jeh :a no-: :a mu eh-a' geli' :za-dih-deh 'ye-: :due' :due'.

¹¹:Yee' :a yubo: deh :Gwlor :baa'-a' :fano: :ple-eh :bleh-dih:-a 'i 'weh. :Yee' 'do eh-a' dha, :a vorn-' nyor⧾ 'ye tubo-wlu:⧾ :daa dhih 'jeh-' po. Nyorsoa yubo: deh⧾-a' klehkpeh :en :ne-a 'o :a :gwlii' 'weh. 'De 'on dhe-eh :gwlii', a yubo: nyor⧾ :a 'dhu-eh:-' 'weh :ke.

¹²Eh :se :a vorn-' :a 'ye :a-a' 'jeh 'i 'beh-dih: 'de a bo :dele' ka :deh. Deh :a no-a, eh-: 'dhu :a 'bhorn :a 'ye a 'kpih 'nyi, 'de eh 'ye a buh⧾ gbor po, 'do :a-a' dhih bo. 'De a 'ye nyor⧾ :an pobo-a nyor⧾-a' ken-ku ya, 'de :an-a' pobo-a 'o nyor⧾-a' :porluh⧾ ken, :an 'beh-dih-a an-a' 'jeh 'i, an-a' wlu-a' kpa :za-eh 'beh-dih:.

¹³:Yee' :mor eh 'dhu sena, or :taa :a no 'jeh ka, :ka nyor⧾ :noo' 'da-a, :yee' Nyorsoa-a' dhih :oo', 'de sena-a no :a-uh. Jorwor: :mor sena se :a no, :yee' eh po 'o a deh 'jeh ka.

¹⁴:Yee' :ybeh-eh 'Klae 'ble-a 'do :a bo, eh-: :korn :a wlu 'ken. Deh no-eh, :a yubo-eh 'i :ka :mor nyor :due' 'meh-a 'do nyor⧾-a' klehkpeh-a' dhih bo, :yee' eh gweh nyor⧾-a' klehkpeh 'meh-' :ke.

¹⁵'De mor or 'meh-' 'do nyor⧾-a' klehkpeh-a' dhih bo, 'de :yuh :on :ne-a 'kmo, on :ne-' an-a' 'jeh-a' 'ton :korn deh no :neheh', jorwor: on 'ye 'Klae-a' deh 'kmo :ne-dih:. Deh no-eh, an-a' dhih :oo', 'Klae 'meh, 'de Nyorsoa za-or 'de nma-dih-deh 'di.

¹⁶:Yee' :eh 'wluh-a dha, 'de :eh mu-a 'dlu bo, :a :se-' :toror' :or :ne-a dha 'kmo bo :no i, 'de :a :se-' nyor⧾-a' zabe :zi i, nyor⧾ on 'dhu-eh:-'. Keen' :mloror' 'do ti :en zi-a 'di, :toror' :or :ne-a dha 'kmo bo, or-: :a no, 'de :a zi 'Klae-a' zabe. Jorwor: :yeh :daa :naa, :a :ne-a ken, :a-a' no-eh :neheh'.

¹⁷:Yee' 'do eh-a' dha, :mor nyor :ne 'Klae-', :yee' or no nyor :dele'. Deh⧾ :soa: klehkpeh, en zi-'. :Yee' deh⧾ :dele', me-: or :ne-dih: 'kmo :naa.

¹⁸Nyorsoa, or-: no deh⧾-a' klehkpeh :daa 'do :a bo. 'De mor deh 'Klae no-a, eh-: no-eh, 'de :a mor-: Nyorsoa-: :a 'worn-eh: wlu-' dih. :Koan: Nyorsoa 'nyi :a-uh, or-: 'dhu, :a 'ye-eh' no, 'de nyor⧾-a' klehkpeh :ne or 'ye wlu-' dih 'worn-eh:.

¹⁹Deh 'an 'da-a, eh-: :dhe dih. Nyorsoa :yi-dih: 'Klae-', 'de or vorn, or :ne nyor⧾-a' klehkpeh :on :ne-a dha 'bluhba ken, on 'ye wlu-' dih 'worn-eh:. Or 'tali: an-a' deh⧾-zon⧾-a' dhih-: dih. 'De or 'nyi :a tubo-wlu⧾ :a 'ye-ih' po, :ka or 'bhorn-a or :ne nyor⧾-a' klehkpeh on 'ye-a wlu-' dih 'worn-eh:.

²⁰:Yee' eh-a' dhih, :a :mor wlu-dih 'o 'Klae 'gor-'. :A :mor 'o Nyorsoa :yi-dih:-' 'de or bale nyor⧾-a' klehkpeh. :A bale a 'weh 'do 'Klae-a' 'gor bo, a 'nyi a mor-: 'dekorn: Nyorsoa-: a 'worn-eh: wlu-' dih.

²¹:A-a' dhih, eh-: no-eh, 'de Nyorsoa 'duo: 'Klae-' or 'ye deh⧾-zon:⧾ :no-nyor no, :or se-a deh-zon-a' deh 'i yubo:, 'de :a 'ye 'Klae-' :yi-dih:, :a 'ye 'yi 'sleh-nyor⧾ no, 'do Nyorsoa ybei'.