Read Eastern Krahn 2 'Korli-chlee-deh: 6 Bible Online

2 'Korli-chlee-deh: 6 - Eastern Krahn bible

2 'Korli-chlee-deh: 6

¹:Yee' :ka :a :ne-Nyorsoa-a no-dih-a :koan :dha :due' :naa, :yee' :a bale a 'weh, a po 'de 'kpih, a 'ye Nyorsoa-a' mla :daa or po a bo, deh-' :no-dih:.

²Deh no-eh, Nyorsoa 'dae: 'de or-a' 'chlee-deh 'di, :Yeh ti nyni-a 'o, 'on 'ye a-' :za-dih:, :yee' 'on :to a :dou'⧾ bo 'weh. 'De mor :yeh ti nyni-a 'o, 'on 'ye a 'puh-dih:, :yee' 'on :za-dih: a-uh' 'weh. :Yee' 'an 'Klae :de-di'-boi'-a:, a :gbee'e:. Ti nyni 'o 'weh Nyorsoa 'ye a-' :za-dih:. 'De mor Nyorsoa-a' nyor⧾ 'puh-dih-ti :wor :dhe dih.

³:A-a' po 'o deh 'do :gwie 'i, :eh 'ye-a' nyor⧾ 'gbele:, 'de :eh 'ye-eh' no 'de nyor⧾ 'ye-a :a-a' :koan: :daa 'bhun dih :wlu-dih:.

⁴Jorwor: deh⧾-a' klehkpeh :a no-a, :a :to-dih-eh nyor⧾ 'i 'weh :ka :a 'dhu-a Nyorsoa-a' 'bhoi-nynuu-', 'de :a se-a sea, 'de 'kle 'ye-eh-: :a-a' 'jeh 'worn 'ye-eh-: 'dekorn: 'worn dih 'beh-dih-eh-: 'di.

⁵Blaa-tu⧾-: :kasue 'di :po-eh-: gwlor vorn 'kpunu: 'kpun :a-a' dhih-: :a-a' :koan: :dhulu' :no-dih-eh-: :a-a' 'mo-: 'dekorn: 'moeh-: me-: :a 'ye.

⁶:Yee' :a-a' :porluh⧾-a' :vlehehn'-' :gweh-eh-: Nyorsoa-a' tubo-wlu:⧾ 'jeh-a' dih 'worn-eh-: :porluh-a' dih :kpon-eh-: 'dekorn: :porluh-a' 'yi dih :nmor-eh-: me-: :a no, 'de :a :to-dih-eh nyor⧾ 'i :ke, :ka :a 'dhu-a Nyorsoa-a' 'bhoi-nynuu-', :eh :yi-dih:-a or-a' Gban 'i :ne :Zulu-' 'do :ybeh-eh: 'jeh :a 'ble-a 'do nyor⧾ bo 'di.

⁷:Yee' tubo-wlu:⧾ 'jeh :en no-a dhih-a' 'yor-eh-: 'dekorn: Nyorsoa-a' 'kpih or 'nyi :a-uh-: me-: :a no, 'de :a :to-dih-eh nyor⧾ 'i :ke. :Yee' :a 'ble :a-a' 'yi 'sleh-deh: :eh 'ye :a-a' :vorn-dih-deh no, eh-: :a no, 'de :a kpon nyor⧾, 'de mor :a kan-dih :a-a' 'jeh ken :ke.

⁸Nyor⧾ :noo', mo-: :an 'dhu 'o :a-uh, 'de :noo'-a po :a yaa'e. Nyor⧾ :noo', mo-: :an 'jle-dih :a-uh, 'de :noo'-a po :a dhih bo. Nyor⧾ :noo'-a 'da-dih :a nyor⧾ dih :bo-dih-nyor:⧾. Jorwor: :a za-' dhih-a' 'yor-eh:.

⁹Nyor⧾ :noo' 'da :a se deh-' 'dhu-eh:. Jorwor: nyor⧾-a' klehkpeh yubo: :a 'weh. :A na-dih 'de 'meh-a' 'worn dih. Jorwor: :a :ne-' 'kmo 'gboror:. Nyor⧾-a 'ye-dih :a 'kle 'do ti-a' klehkpeh bo. Jorwor: :a :se-' 'meh.

¹⁰:Mor :a-a' :porluh⧾ 'kpa 'zorn, :yee' 'ka-: eh :ne, 'de :a no 'mona 'gboror:. :A no nyor⧾ :on se-a deh-a' :za-da 'ble. Jorwor: :a :mor no-eh, 'de nyor⧾ :dhulu'-a bhan 'de Nyorsoa-a' deh 'i yubo: ka 'di. :A gweh nyor⧾ :on se-a deh 'ble. Jorwor: 'de Nyorsoa-a' yubo: ka 'di, :a :mor 'ble deh⧾-a' klehkpeh.

¹¹:Yee' a :mor 'Korli-nyor:⧾, :a kan-dih: :a-a' :porluh⧾ 'i 'de a bo. 'De :a wlu 'de a bo deh 'jeh. :A :se-' a deh dih 'zile:.

¹²:A :se-' :a-a' :porluh⧾ 'i kan 'do a bo. Jorwor: a :mor 'o :or kan a-a' :porluh⧾ 'i 'do :a bo.

¹³:Yee' 'an wlu 'de a bo :ka :baa'-a no-a 'de or-a' 'yu bo :wlu-eh. Eh-a' dhih, a kan-dih: a-a' :porluh⧾ 'i 'do :a bo, :ka :a no-a :a-a' no-a' 'i kan-dih-eh :ke 'do a bo.

¹⁴:Yee' nyor⧾ :on se-a 'Klae-a' dhih dhih 'jeh-' po, on :ne a-a' :no-' deh :due'. :Kaa deh 'jeh-: deh-zon-: en no 'bei' :eh? 'De mor :kaa zorn-pli-: 'dekorn: :kule-: en na-dih :dha :due' :eh?

¹⁵:Kaa 'Klae-: 'dekorn: 'ku-: an mu ken dih kpon-dih-eh :no :eh? :Kaa nyor⧾ :on po-a :Yusu'-a' dhih dhih 'jeh-: 'dekorn: nyor⧾ :on se-a or-a' dhih 'jeh-' po-: :kaa an mu wlu :due' 'ble-a' :no :eh?

¹⁶'De mor wlu-' dih 'worn-eh-a' :yeheh :eh :ne 'o zuu⧾-: 'dekorn: Nyorsoa-a' 'sla-: 'nyne bo :eh? Deh no-eh, :a :mor 'dhu 'kmo :ne-Nyorsoa-a' 'sla-', :ka Nyorsoa no-a eh-a' :za-a', or no-a, 'An mu 'de 'an-a: nyor⧾ 'nyne-' 'ti-:, 'de 'on 'ye dih zi-dih: 'de on 'nyne-'. 'Mor-: mu an-a' Nyorsoa :no, 'de on 'ye 'an-a: nyor⧾-' 'dhu-eh: :ke.

¹⁷:Yee' 'do eh-a' dha, :Gwlor :baa' 'dae: :neheh', A 'wluh 'de nyor⧾ :on se-a 'an dhih dhih 'jeh-' po 'nyne-', 'de a 'ye-uh bo dih :tehn-dih:. Deh :eh se-a :vlehehn'-' :gweh 'do 'on ybei', a-a' 'tuh-eh:-' dih. :Mor a se-eh dih 'tuh, :yee' 'an mu a dih :kpon.

¹⁸:Yee' 'an mu a :Baa' :no, 'de a 'ye 'an-a: nyor⧾-kpalu⧾-nynuu-: 'dekorn: 'nynor⧾-kpao'⧾-nynuu-: no. 'Ka-: 'mor :or 'dhu-a :Gwlor :baa'-' :or 'ble-a 'kpih-a' klehkpeh kwa 'da.