Read Eastern Krahn 2 'Korli-chlee-deh: 8 Bible Online

2 'Korli-chlee-deh: 8 - Eastern Krahn bible

2 'Korli-chlee-deh: 8

¹:Yee' 'Klae :de-di'-boi'-a:, :a 'bhorn :a 'ye a :gwluhuh' zela: deh Nyorsoa-a' mla no-a 'do 'chore-nyor:⧾ :on :ne-a 'Masordo'nia-bluhba ken bo.

²'Mo 'dhen-eh: :doru' eh-: :yi-dih-uh ya dih, 'de 'kle 'ye-eh: on :yi-dih:-a 'di bo. On no nyor⧾ :on se-a deh-a' :za-da 'ble 'jeh ka, jorwor: an-a' :porluh⧾ 'pehn-: dih 'gabaa, on 'ye nyor⧾ deh 'nyi 'do :porluh-a' 'worn :nmor-eh bo.

³:Yee' 'on 'beh-dih: 'on 'ye-eh' ken dih zela:, deh on 'beh-dih:-a on 'ye-a 'nyi, eh-: 'o on 'nyi, 'de :porluh-a' dih 'pehn ka 'di. 'De mor :yih on 'nyi-a, en :zi 'o ken dih. An-a' 'jeh 'yor-eh:,

⁴on bale: :a 'weh deh 'jeh, on 'ye 'for 'ble 'de Nyorsoa-nyor:⧾ :on :ne-a :Judi'a-bluhba ken, an-a' :za-dih-eh 'di.

⁵'De mor deh⧾ :daa on no-a, :a :se-' :ao' en-' :gwlii' :dhe-eh no. :Zai' on :za an-a' 'jeh 'kwla 'de :Gwlor :baa' bo. 'De on :za an-a' 'jeh 'kwla 'noror :a bo, 'de Nyorsoa-a' 'ton :korn ka 'di.

⁶Talor', or-: :za 'wlii: :za-deh: :daa glu 'de a 'nyne-'. :Yee' 'do eh-a' dha, :a bale-or', or 'ye-eh' 'dlu bo kpa, 'de or 'ye a-' :za-dih: a 'ye :ybeh-dih-eh: :daa :eh :ne :ao' 'i gweh.

⁷:Yee' a :mor :ne 'o a 'bei' 'dlu, 'do dhih 'jeh-' :po-eh 'di-: Nyorsoa-a' tubo-wlu:⧾ 'jeh :po-eh-: deh-' dih 'worn-eh-: :porluh-a' sin-a' 'do nyor⧾-' :za-dih-eh-: 'dekorn: :ybeh-eh: a 'ble-a 'do :a bo-:. :Yee' eh-a' dhih, a 'ye-eh bo, a 'ye-eh' no, a 'ye 'o a 'bei' 'dlu :ne 'do 'nyii'-deh:⧾ :daa, en-' 'nyi-a' bo :ke.

⁸Eh :se 'tele' 'on :se-' a 'nyi. Jorwor: :ka 'chore-nyor:⧾ :on :ne-a 'Masordo'nia-bluhba ken, an-a' :porluh⧾-a no-a sin-a', on 'ye-a 'nyi, eh-: 'o 'an po-dih-eh 'i. 'An 'bhorn a 'ye-eh 'on 'i :to-dih: :ka a-a' :ybeh-dih-eh 'dhu-a :ybeh-dih-eh: 'jeh-'.

⁹Deh no-eh, a yubo: :ybeh-eh: :klaba' :a-a' :Gwlor :baa' :Yusu' 'Klae 'ble-a 'do :a bo 'weh. Keen' :mloror' or bhan-', jorwor: :a-a' dhih-a' 'bleh 'bleh, eh-: no-eh, 'de or no se deh-a' :za-da 'ble-nyor. Or no deh :daa 'weh, 'de :a 'ye bhan 'de Nyorsoa-a' deh 'i yubo-eh 'di.

¹⁰'Do zon :on zi-a 'di, a :mor no :zai'-nyor⧾ :or 'bhorn :or 'ye 'o 'nyii'-deh :to, 'de a no-eh. 'Slen 'an 'bhorn 'on 'ye a 'dhu, me-: :dhe dih. Eh mu 'yi dih :nmor,

¹¹a 'ye deh a 'dhu-a glu 'i gweh. :Yee' 'nyi a-a' :porluh⧾ sin a 'ye-eh' 'i gweh, :ka a-a' :porluh⧾-a no-a sin-a', a 'ye-eh' no. :Ka a no-a deh⧾-a' 'ye-a', 'ka-: a 'ye 'nyi-a' no.

¹²:Yee' :mor eh 'dhu a-a' :porluh⧾ :taa sin, a 'ye nyor⧾ deh 'nyi, deh :yeh a 'beh-dih:-a, a 'ye-a 'nyi, :mor a 'nyi-eh, Nyorsoa-a mu-eh ken dih 'worn-dih:. Deh a se-a 'ble, or :se-eh' :gwlii' dhe, a 'ye-eh' nyor⧾ 'nyi.

¹³Eh :se :yee' :a 'bhorn nyor⧾ :noo' 'ye 'o eh 'zorn 'wluh, 'de eh-a' 'gbeh 'ye 'o a :mor :mloror' 'dlu :ne :deh. Jorwor: :a 'bhorn deh⧾-a' klehkpeh 'ye 'beh-dih:.

¹⁴:Yee' deh a 'ble-a :naa, eh :dhie: 'i. :Mor a 'nyi-eh on, :yee' on 'beh-dih: on 'ye deh on se-a 'ble 'ye. :Yee' :mor ti :zi-dih: 'o ken dih, :yee' an-a' :neh on 'ble-a :eh :dhie:-a 'i, 'de on 'ye a 'nyi :ke, :mor eh 'dhu a se deh 'ble. :Yee' deh⧾-a' klehkpeh-a mu 'beh-dih:.

¹⁵:Ka eh no-a 'chle-eh 'de Nyorsoa-a' 'chlee-deh 'di, eh no-a, :Yee' nyor :yor :or po-a dii-deh:⧾ :dhulu' :dha :due', or-a' 'ye 'o deh ken. 'De mor nyor :yor :or po-a dii-deh⧾-yor-bei :dha :due', or 'ye deh 'weh :ke.

¹⁶A 'nyi :a po Nyorsoa-a' 'zio, :or no-eh, 'de :ka 'an :porluh-a no-a sin-a', 'on 'ye a-' :za-dih:, 'de Talor'-a' no-a no :ao' sin-a' :ke.

¹⁷Ti :a bale-or, or 'ye-a 'de a bo yi, :yee' or 'worn-dih-eh ken dih 'weh. Or-a' :porluh-a sin-', or 'ye-eh' no :dee' see, 'do or-a' 'jeh bo, 'de :a mu 'de or bo :wlu.

¹⁸:Yee' Talor'-: 'dekorn: 'Klae :de-di' :due'-: mo-: :a dbo 'de a bo :naa. 'De-di'-nyor-kpalu-a' 'jeh :dao', 'chore-nyor⧾-a' klehkpeh 'ble or-a' 'nyne 'jeh, 'do or-a' Nyorsoa-a' tubo-wlu:⧾ 'jeh-a' :po-eh-a' :koan bo.

¹⁹Or-a' 'jeh :dao', or-: 'chore-nyor⧾-a' klehkpeh :za, or :ne :a 'ye mu, :a 'ye 'nyii'-deh: :daa kpa, :en mu-a 'de dhih-a' 'i 'beh-a' :ya 'do :Gwlor :baa' bo, 'de :en mu-eh nyor⧾ 'i :to-dih:, :ka :a-a' :porluh⧾-a sin-a, :a 'ye-a nyor⧾ bo 'kpa.

²⁰:A :se-' 'bhorn nyor⧾ 'ye :a dhih 'bhun :za-dih: 'do :ka :a no-a 'nyii'-deh:⧾ :dhulu' :daa en-' nyor⧾ 'nyi-eh: bo, eh-: :korn dhih :oo'.

²¹Deh no-eh, deh :a 'bhorn-a :a 'ye-a' no, eh-: 'dhu :a :se-' 'bhorn :a 'ye deh :eh 'sleh-a 'i no 'do :Gwlor :baa' :due' ybei'. Jorwor: :a 'bhorn :a 'ye-eh' no 'do :gwlor-nyor⧾ ybei' :ke.

²²:Yee' :a dbo 'Klae :de-di' :noror', or-: :ne an yi-dih 'de. :A 'dhen-or-: dih 'do kpor⧾ :dhulu' 'di, 'de or :to-dih: :a 'i :ka or-a' :porluh-a sin-a or 'ye-a a bo 'kpa. :Yee' :ka or :kpa-dih:-a a :gwluhuh' 'gabaa :naa, :yee' or-a' :porluh-a sin-' 'gabaa, eh :zi 'o ken dih, or 'ye-eh' no.

²³:Yee' Talor' :mloror', or :ne 'an na-dih :dha :due', 'de or no 'on 'be :koan: :no-nyor 'do a-a' dhih bo. Jorwor: :a-a' 'Klae :de-di'-boi' :on :ne-a 'sororn' :on :ne or yi-a 'de a bo, mo-: 'chore-nyor⧾ 'dhu 'o, 'de on :ya 'de dhih-a' 'i 'beh-a' 'do 'Klae bo.

²⁴:Yee' 'do eh-a' dha, a :to-dih-eh nyor⧾ :daa 'i, 'do 'chore-nyor⧾ ybei', :ka a ybeh-uh-a 'jeh ka, 'de on 'ye-eh' yubo: deh :korn-a dhih :a 'beh-dih:-a :a-a' 'jeh 'i, 'do a-a' dhih bo.