Read Eastern Krahn :Gale'tia-chlee-deh: 1 Bible Online

:Gale'tia-chlee-deh: 1 - Eastern Krahn bible

:Gale'tia-chlee-deh: 1

¹'Mor :Poror' :oo', :or no-a :Yusu' 'Klae-a'a: dboo-nyor. 'An dboo-nyor-deh: :daa, eh :se :gwlor-nyor: :or :se-eh' 'on 'nyi, 'de mor eh :se-' :gwlor-nyor-' :yi-dih: :ke. Jorwor: eh 'wluh 'de :Yusu' 'Klae bo, 'dekorn: :a :Baa' Nyorsoa :or za-or 'de nma-dih-deh 'di-:.

²'Mor-: 'dekorn: :a-a' 'Klae :de-di'-boi'-a' klehkpeh :on :ne-a dha 'on bo-: :a :mor 'ye a-uh, a :mor 'dhu-a 'chore-nyor⧾-a' klehkpeh :on :ne-a :Gale'tia-bluhba ken.

³Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo.

⁴Eh no Nyorsoa :or no-a :a :Baa' or-a' ken dih 'worn-dih-deh: 'de 'Klae 'ye or-a' 'jeh 'kwla :za, or 'ye gban 'i 'dhu-dih-eh: 'do :a-a' deh⧾-zon⧾-a' dhih bo, 'de eh 'ye 'o :a deh⧾-zon:⧾ :en :ne-a dha 'kmo bo :naa, en-' 'gegeye 'zorn :za.

⁵Dhih-a' 'i 'beh-a' 'do Nyorsoa bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

⁶:Yee' deh a no-a, eh :florn-dih: 'on-: worn. Deh no-eh, Nyorsoa :or 'da-a a-uh, 'de eh :yi-dih:-a :Yusu' 'Klae-a' mla-', a :se 'o :gwle, a 'wluh 'o or-a' :gwie 'i, 'de a kpon tubo-wlu:⧾ 'sluh⧾ dih.

⁷Tubo-wlu:⧾ :daa a kpon-a dih, en :se tubo-wlu:⧾ 'jeh. Deh no-eh 'de 'an za-a deh :daa-', eh-: 'dhu, nyor⧾ :noo' :noo', mo-: :an 'beh-dih a-a' :porluh⧾ 'worn dih, 'de an vorn on 'ye tubo-wlu:⧾ 'jeh :en kor-a 'Klae 'i dih gweh, 'de on 'ye 'de sih ne po.

⁸Jorwor: :mor eh 'dhu :a mor-' :eh beh 'enjor: :or 'wluh-a 'de Nyorsoa 'bli yai'-: 'de :a-a' nyor 'ye tubo-wlu⧾ po, 'de en :ne :yih :a po-a 'de a bo :zai', 'de en 'ye :ao', en se :gwie :due' kpa, :yee' 'nyi Nyorsoa po nyor :dao' 'chlo bo.

⁹:Yee' deh :a :za-a-' :zai', eh-: 'an za de :neheh', :mor nyor po tubo-wlu⧾ 'de a bo, 'de en 'ye :ao', en :ne :yih :a po-a 'de a bo :zai', en se :gwie :due' kpa, :yee' 'nyi Nyorsoa po nyor :dao' 'chlo bo.

¹⁰:Mor a :taa 'ye, :yee' eh gweh 'an 'bhorn :gwlor-nyor⧾ 'ye 'on dhih bo po :e? 'Kei:. 'On :se-eh' 'bhorn. Nyorsoa, or-: 'an 'bhorn :or 'ye 'on dhih bo po. :Ae' 'an vorn 'on 'ye-eh' no :gwlor-nyor⧾ 'ye 'on-' :ybeh? :Mor 'on :taa vorn, 'on 'ye-eh' no 'gboror:, :yee' 'on :se-' 'Klae-a' 'bhoi-yu :no i :dee'.

¹¹'Nyi 'on zela a :gwluhuh', 'an 'Klae :de-di'-boi'-a:, tubo-wlu:⧾ 'jeh 'an po-a, en :se 'dlan⧾ :yih :gwlor-nyor⧾-a po-a :dha :due', 'de an po-a.

¹²'On se-ih 'de nyor-beh-nyor-beh 'kwa :za. 'De mor :gwlor-nyor se-ih' 'on :torne:. :Yusu' 'Klae-a' 'yor-eh: 'o, or-: :to-dih-ih 'on 'i.

¹³A 'beh-dih: a 'ye-eh' 'worn, deh⧾ 'an no-a :dee', ti 'an za-a Nyorsoa :weheh' :ka :Jueh'-nyor⧾-a no-a or-a' :weheh' :za-eh. 'De 'on 'ye-dih: Nyorsoa-a' 'chore 'kle 'gabaa, 'de 'an vorn-eh bo :dee', 'on 'ye-eh' ya gba.

¹⁴'De :ka 'an no-a Nyorsoa-a' :weheh' :za-eh 'de :Jueh'-nyor⧾-a' 'tele' 'di, :yee' 'mor :ne 'o 'on 'bei' :Jueh'-nyor⧾-a' :dha :dhulu' 'dlu, :on :ne 'on 'beh-dih:-a 'do ti :dao' 'i. :Porluh: 'on 'ble-a, 'do 'tele' :a :za-a 'de :a :bai'-a' :bai' 'kwa :dee', mo-: 'beh 'i 'gabaa.

¹⁵Jorwor: Nyorsoa-a' mla, or-: no-eh, 'de or gan 'on :weh, 'de jorwor: 'an mu 'wluh-:. 'De or 'da 'on, 'on 'ye or-a' :koan no. :Yee' :yeh ti nyni-a 'o,

¹⁶or 'ye-a or-a' 'Yu 'on 'i :to-dih:, 'de 'on 'ye-a or-a' tubo-wlu:⧾ po, 'de nyor⧾ :on :se-a :Jueh'-nyor⧾ bo, :yee' 'on :se-' nyor dih dhele: or 'ye :ka 'on 'ye-a eh-a' no-a' no :gwluhuh' zela:.

¹⁷'De mor 'on :se-' :Julu'slehn mu, 'on :se 'de :yuh :on no-a :Yusu'-a'a: dboo-nyor⧾ :zai' 'do 'on ken, an-a' nyor bo mu, or 'ye 'on deh :torne:. Deh :due' 'on no-a, eh-: 'dhu 'on mu 'de 'bluhba: an 'da-dih-a :Ale'bia ken. 'Do :wor 'on :sie-dih:, 'de 'on 'bili:-' dih, 'on yi 'kwi :gwlor an 'da-dih-a :Dama'kor de.

¹⁸:Yee' eh kpa zon⧾ taan :weh, 'de 'an mu :Julu'slehn :mu, 'an mu :Piteh' 'ye 'da :mu, 'on 'ye-or' yubo:. 'We-a' :bhue: 'yor :mm', me-: 'on no 'do or bo.

¹⁹:Yee' :dele' ka, 'on :se-' :Yusu'-a'a: dboo-nyor: :noror' 'ye. Jorwor: 'Jeen :due' 'on 'ye. 'Jeen: :dao' or no :a-a' :Gwlor :baa'-a' dei'.

²⁰Deh⧾ 'an 'chle a bo, :mor en 'dhu sih-', Nyorsoa, or-: mu-eh bo dih zela:.

²¹:Yeh 'on 'wluh-a 'o, :yee' 'on mu 'Silia-bluhba-a' 'for-: 'dekorn: :Sele'sia-bluhba-a' 'for-: ken dih.

²²:Yee' 'do ti :dao' 'i, 'chore-nyor:⧾ :on :ne-a :Judi'a-bluhba ken, :on :ne-a 'Klae-', on 'see 'an nyior-tu 'ye :zai'.

²³Deh⧾ nyor⧾ :noo'-a za-a-' 'do 'an dhih bo, en :due' me-: an 'worn, :en 'dhu-a, Nyor-kpalu: :or 'ye-dih:-a :a 'kle :dee', or-: zela nyor⧾ :gwluhuh' :naa, :ka on 'ye-a 'Klae-a' dhih dhih 'jeh-' :po-eh no, :eh :korn-a dhih or vorn-a :dee', or 'ye-a nyor⧾ :on po-a 'Klae-a' dhih dhih 'jeh-' ya gba.

²⁴:Yeh on 'worn-ih'-a, :yee' an po Nyorsoa-a' 'nyne ya, 'do deh or 'bili:-a 'on-' dih, eh-a' dhih.