Read Eastern Krahn :Gale'tia-chlee-deh: 2 Bible Online

:Gale'tia-chlee-deh: 2 - Eastern Krahn bible

:Gale'tia-chlee-deh: 2

¹:Yee' :yeh zon⧾-a' :bhue: 'yor :nyieh zi-a, :yee' 'an mu :Julu'slehn de. :Yeh 'on :taa mu, :yee' 'on kpa :Bana'ba-: 'dekorn: Talor'-: 'weh.

²Deh no-eh, 'de 'on mu-a, eh-: 'dhu, Nyorsoa :to-dih-eh 'on 'i 'weh, :ka 'on :korn 'on 'ye-a 'de mu. :Yeh 'on mu-a 'de, :yee' 'mor-: 'dekorn: 'chore-a' nyor⧾ :na-dih-nyor⧾-a' 'bleh 'bleh :due'-: :a :mor :dhe dih. 'De 'on zela: tubo-wlu:⧾ 'jeh 'an po-a 'de nyor⧾ :on :se-a :Jueh'-nyor⧾ bo, en-' dhih ken dih. Deh no-eh, 'on :se-' 'bhorn :koan: 'on no-a-: 'dekorn: :yor 'an no-a :naa-: or 'ye deh 'plo no.

³Keen' :mloror' Talor' :or :ne 'on :yi-dih:-a 'de, or no 'Glii-yu:. Jorwor: on :se-or' 'kpih :kpa-dih: or 'ye :bhlororn' 'meh.

⁴Jorwor: nyor⧾ :noo' :an 'da-dih-a an-a' 'jeh 'Klae-a' dhih 'jeh-' :po-nyor⧾, mo-: za-eh 'blo. An 'bhorn or 'ye :bhlororn' 'meh. Nyor⧾ :dao', on yi :a 'yli-eh 'zorn dih :bla 'da 'noror :a 'nyne-', 'de on 'ye-eh' 'ye :ka :a van-dih:-a dih 'de :a-a' 'Klae-a' deh 'di. An 'bhorn :a 'ye 'ge-nynuu no.

⁵:A :se-eh' ken dih 'worn-dih: klehkpeh klehkpeh. Deh no-eh, :a 'bhorn Nyorsoa-a' tubo-wlu:⧾ 'jeh :en no-a dhih-a' 'yor-eh, a 'ye-ih' 'dlu bo kpa.

⁶:Yee' :yuh nyor⧾-a 'da-dih-a 'chore-a' nyor⧾ :klaba'⧾, deh no-eh, 'de 'on po-a wlu :daa, eh-: 'dhu, eh se deh-' 'dhu-eh: 'do 'on bo, nyor⧾ on 'dhu-eh. Deh no-eh, Nyorsoa-a' pobo: nyor-a' ken ku ya, 'de or-a' zi or-a' zabe. Nyor⧾ :daa, on :se 'o deh :dele' :neheh' 'do tubo-wlu:⧾ 'jeh :daa 'an po-a, ken po.

⁷Jorwor: on 'ye-eh' :ka Nyorsoa 'nyi-a 'on tubo-wlu:⧾ 'jeh :po :koan: :daa, 'on 'ye-ih'-a po 'de nyor⧾ :on :se-a :Jueh'-nyor⧾ bo, :ka or no-a 'de or 'nyi-a or-a' tubo-wlu:⧾ :po :koan :Piteh', or 'ye-ih'-a po 'de :Jueh'-nyor⧾ bo :ke.

⁸Deh no-eh, Nyorsoa-a' 'kpih, me-: no-eh, 'de 'on no :Yusu'-a'a: dboo-nyor 'de nyor⧾ :on :se-a :Jueh'-nyor⧾ bo, :ka or-a' 'kpih no-eh, 'de :Piteh' no-a or-a'a: dboo-nyor 'de :Jueh'-nyor⧾ bo :ke.

⁹:Yee' 'Jeen-: :Piteh'-: 'dekorn: :Jororn'-: :on nyor⧾-a 'da-dih-a 'chore-a' :zi-tu⧾, on yubo-eh 'i :ka Nyorsoa zela: 'on :gwluhuh', or no-a 'an-a: :koan: 'on 'ye-a no, or-: 'o. Eh-: no-eh, 'de on 'tuh 'de 'mor-: :Bana'ba-: :a 'kwa dih. Eh-: po-eh 'i :ka on :ne :a no-a deh :due'. 'De eh 'worn-dih-eh ken dih, 'mor-: 'dekorn: :Bana'ba-: :a 'ye :koan no 'de nyor⧾ :on :se-a :Jueh'-nyor⧾ 'nyne-', 'de on 'ye :koan no 'de :Jueh'-nyor⧾ 'nyne-' :ke.

¹⁰Deh :due' on dhele: :a dih, eh-: 'dhu, on 'da, A-a' 'ma-dih:-' se deh-a' :za-da 'ble-nyor:⧾ :on :ne-a 'noror :a :mor :Jueh'-nyor⧾ 'nyne-', an-a' dhih bo o. 'De mor, eh-: no deh 'an :porluh-a sin, 'on 'ye no :dee' see.

¹¹:Yee' ti :Piteh' yi-a :gwlor an 'da-dih-a 'Antior 'di, :yee' or-: 'mor-: :a dhe-dih: ybei' dih, 'de 'on :wlu 'de or bo. Deh no-eh, deh or no-a, eh no deh-zon: 'jeh ka.

¹²:Yee' :tehn 'i :dee', or :ne nyor⧾ :on :se-a :Jueh'-nyor:⧾, an kpuhba son⧾ ybei'. Jorwor: :yeh nyor⧾ :on 'wluh-a 'de 'Jeen bo, 'de on yi-a 'de, :yee' or :jli-dih-eh: de. Or-a' 'worn, or :ne an-a' :di-dih: deh :dha :due' :neheh', 'de or :tehn-dih-uh bo dih. Deh no-eh, or ple nyor⧾ :an 'neh-a :bhlororn' 'meh-deh ken, an-a' 'yli.

¹³:Yee' :Jueh'-nyor⧾-a' :noo' :on :sie:-a 'o, :on no-a 'Klae :de-di'-boi', on 'kpa 'o :Piteh' klei' 'weh :ke, 'de an ple nyor⧾-a' 'yli. :Bana'ba-a' 'jeh :ke, or 'kpa-uh-: bo :ke, 'de an ple nyor⧾-a' 'yli.

¹⁴:Yee' :yeh 'on 'ye-a deh⧾ an no-a, 'de en se-a 'o dhih-a' 'yor-eh: :en :ne-a 'de Nyorsoa-a' tubo-wlu:⧾ 'jeh 'di, en-' :gwie 'i :ne, :yee' 'on :wlu-' 'de :Piteh' bo 'do 'Klae-a' dhih 'jeh-' :po-nyor⧾-a' klehkpeh ybei', 'on 'da, :Mor :Jueh'-yu: 'o. Jorwor: :ka nyor⧾ :on :se-a :Jueh'-nyor:⧾, an-a' 'kmo :ne-a, 'ka-: :on :ne. :Yee' :eh :korn dhih :an 'kpa-dih nyor⧾ :on :se-a :Jueh'-nyor⧾ 'kpih, on 'ye 'o :Jueh'-nyor⧾ 'bli-deh⧾-a' 'tele' dih dhe :eh?

¹⁵:Yee' :a :mor :Jueh'-nyor⧾-a' 'kpa :oo'. :A :se nyor⧾ :on :se-a :Jueh'-nyor:⧾ :yuh :Jueh'-nyor⧾-a 'da-dih-a deh⧾-zon:⧾ :no-nyor⧾.

¹⁶'De mor :a yubo-eh' :gwlor-nyor-a' :Yusu' 'Klae-a' dhih 'jeh-' :po-eh:, eh-: no-eh, 'de Nyorsoa 'da-dih-or 'yi 'sleh-nyor. Eh :se deh :Mose'-a' 'tele' 'da-a, :mor or no-eh :gbor :deh. :A-a' 'jeh :ke, :a po :Yusu' 'Klae-a' dhih dhih 'jeh-' 'weh, 'de Nyorsoa 'ye :a 'yi 'sleh-nyor⧾ 'da-dih: 'do :a-a' 'Klae-a' dhih 'jeh-' :po-eh bo. Eh :se deh :Mose'-a' 'tele' 'da-a :mor :a no-eh :gbor :deh. Deh no-eh, eh :se nyor :korn-Nyorsoa 'ye-a 'yi 'sleh-nyor 'da-dih: 'do :Mose'-a' 'tele' dih :dhe-eh bo.

¹⁷:Yee' :mor eh 'dhu :a vorn Nyorsoa 'ye :a 'yi 'sleh-nyor⧾ 'da-dih: 'do :a-a' 'Klae-a' :ne-a' bo, :yee' :a 'worn-dih-eh ken dih 'weh, :ka :a 'dhu-a deh⧾-zon:⧾ :no-nyor⧾-', :ka nyor⧾ :noo' :ne-a. :Mor eh :ne :ao', :yee' a 'bhorn a 'ye :a :gwluhuh' zela: :eh :mor 'Klae :oo', or-: no-eh, 'de deh⧾-zon⧾-a no-eh :e? 'Kei:.

¹⁸:Mor 'on 'kpa 'tele' 'on wa-a, eh-a' dih :dhe-eh ken :dele' ka, :yee' 'on :to-dih-eh nyor⧾ 'i, :ka 'on no-a deh-zon: :no-nyor 'jeh ka.

¹⁹:Mose'-a' 'tele'-a' 'jeh 'yor-eh:, eh-: no-eh, 'de 'on se 'o eh-a' 'kpih 'zorn :ne :neheh', 'de 'on 'ye 'kmo-' :ne 'do Nyorsoa bo. 'On gweh 'meheh'-nyor: 'do eh bo. 'Mor-: 'Klae-: :a 'meh-dih: 'o tu 'i.

²⁰'De eh :se 'mor-: :or se 'kmo-' :ne :dele' ka. Jorwor: 'Klae, or-: 'ti 'noror 'on 'di :naa. 'Kmo :daa 'on :ne-a :naa, 'on :ne-dih: Nyorsoa-a' 'Yu-a' dhih 'jeh-' :po-eh-a' 'kmo, :or :ybeh-a 'on-', 'de :or :za-a or-a' :febeh' 'kwla, 'do 'an dhih bo.

²¹'On :se-' Nyorsoa-a' mla 'kpuh ya :to i. Jorwor: :mor eh 'dhu :Mose'-a' 'tele'-a' dih :dhe-eh 'bleh 'bleh, eh-: no-eh, 'de Nyorsoa 'da-dih nyor⧾ 'yi 'sleh-nyor⧾, :yee' dhih 'Klae 'meh-a, en se 'nyne :korn.