Read Eastern Krahn :Gale'tia-chlee-deh: 3 Bible Online

:Gale'tia-chlee-deh: 3 - Eastern Krahn bible

:Gale'tia-chlee-deh: 3

¹:Yee' a :mor :Gale'tia-nyor:⧾ :daa, :or se-a :toror' 'di :ne, :or :za 'o a-a' 'dlu⧾ :gwie 'i :eh? 'Do a ybei'-a' 'yor-eh:, 'do :wor 'on :florn-dih-eh ken dih, :ka :Yusu' 'Klae 'meh-a 'do 'klorse tu 'i.

²A zela: 'on deh :due' :gwluhuh', deh a dhe-a 'o :Mose'-a' 'tele' dih, eh-: no-eh, 'de Nyorsoa-a' :Zulu :korn a-a' :porluh⧾ wlu 'ken :e? :Ae' deh a 'worn-a :eh kor-a 'Klae 'i, 'de a po-a dhih 'jeh-', eh-: 'o ke?

³:Eh no a-uh', 'de a se :toror' 'di :ne deh :dao' :eh? Nyorsoa-a' :Zulu-a' 'kpih, me-: a 'dhu-dih: Nyorsoa-deh glu. :Yee' a 'bhorn a 'ye-eh' 'dlu-' jla, 'de a-a' 'jeh-a' 'kpih 'di :e?

⁴:Yee' 'kle on 'ye-dih: a-uh, a :se 'o deh 'ye-: i :e? A :se 'o deh 'ye-: i 'jeh ka :e?

⁵:Yee' deh⧾ :Mose'-a' 'tele' 'da-a, a 'ye-a' no, 'de a no-a, eh-: :korn dhih Nyorsoa 'nyi a or-a' :Zulu a-uh, 'de or no deh⧾ :kolu'⧾ 'de a 'nyne-' :e? :Ae' deh a 'worn-a :eh kor-a 'Klae 'i, 'de a po-a dhih 'jeh-', eh-: 'o ke?

⁶A :na-dih: 'Eble'hehn-a' dhih :gwluhuh' dih, :ka Nyorsoa-a' 'chlee-deh no-a eh-a' :za-a', eh no-a, Or po Nyorsoa-a' dhih dhih 'jeh, 'de or-a' dhih 'jeh-' :po-eh no-eh, 'de Nyorsoa 'da-dih-or 'yi 'sleh-nyor.

⁷:Yee' deh a 'ye-a' yubo:, eh-: 'dhu, nyor⧾ :on po-a Nyorsoa-a' dhih dhih 'jeh, :ka 'Eble'hehn no-a, mo-: 'dhu 'Eble'hehn-a' 'wluhuh'-nynuu deh 'jeh.

⁸Nyorsoa-a' 'chlee-deh za-eh' 'weh :dee' see, eh 'da, nyor⧾ :on :se-a :Jueh'-nyor:⧾, an-a' Nyorsoa-a' dhih 'jeh-' :po-eh:, eh-: mu-eh :no, 'de or 'ye-uh' 'yi 'sleh-nyor⧾ 'da-dih:. Eh-: :korn dhih 'de Nyorsoa sie ti de, 'de or po or-a' tubo-wlu:⧾ 'jeh 'de 'Eble'hehn bo, or 'da, :Mor 'an mu-' :yi-dih:, 'de 'on 'ye nyor⧾-a' klehkpeh :on :ne-a dha 'bluhba ken :bhorlie' bo po.

⁹:Yee' nyor⧾-a' klehkpeh :on po-a Nyorsoa dhih 'jeh-', :ka 'Eble'hehn no-a, mo-: or mu :bhorlie' bo :po, :ka or no-a 'Eble'hehn-a' dhih.

¹⁰:Yee' nyor⧾ :on dhe-a :Mose'-a' 'tele' dih :dhe-eh :due' :gwlii', on :ne 'o Nyorsoa-a' 'chlo 'zorn. Deh no-eh, Nyorsoa-a' 'chlee-deh 'dae:, Nyor :or se-a 'o deh⧾-a' klehkpeh :en 'chle-eh 'noror :Mose'-a' 'chlee-deh 'di, en-' 'tele'⧾-a' klehkpeh dih dhe, :yee' on :ne 'o or-a' 'chlo 'zorn.

¹¹:Yee' eh zela-eh-: ken dih 'weh :naa, :eh :mor Nyorsoa-a' 'da-dih: nyor 'yi 'sleh-nyor 'do :Mose'-a' 'tele'-a' dih :dhe-eh bo. Deh no-eh, Nyorsoa-a' 'chlee-deh 'dae: :ke, Nyor Nyorsoa 'da-dih-a 'yi 'sleh-nyor 'do or-a' dhih 'jeh-' :po-eh bo, :yee' or-: mu 'kmo-' :ne.

¹²:Mose'-a' 'tele'-a' dih :dhe-eh-: 'dekorn: Nyorsoa-a' dhih 'jeh :po-eh-: en :se-' :gwie :due' kpa. Jorwor: Nyorsoa-a' 'chlee-deh 'da, Nyor :or dhe-a 'o :Mose'-a' 'tele'⧾-a' klehkpeh dih, :yee' or-: mu 'kmo-' :ne.

¹³Jorwor: 'Klae 'ye :a zelie: 'do 'chlo :Mose'-a' 'tele' po :a bo 'zorn :dhih 'o, eh-: :korn dhih Nyorsoa po-or 'chlo bo, 'do :a 'gor bo 'do or-a' 'klorse tu 'i :kor-dih-eh bo. Deh no-eh, Nyorsoa-a' 'chlee-deh 'da, Nyor⧾-a' klehkpeh :on :kor-dih-eh 'o tu 'i, on :ne 'o Nyorsoa-a' 'chlo 'zorn.

¹⁴'Klae no deh :daa 'weh 'de :bhorlie' :eh :korn-a wlu Nyorsoa po-a :dhama'-' 'do 'Eble'hehn bo, eh 'ye :Yusu' 'Klae :yi-dih:, 'de nyor⧾ :on :se-a :Jueh'-nyor:⧾, on 'ye-eh' 'ye. 'De mor :ke :a-a' Nyorsoa-a' dhih 'jeh-' :po-eh 'ye-eh' no, 'de or-a' :Zulu: :on :korn-a wlu or po-a :dhama'-', or 'ye-uh :a 'nyi.

¹⁵:Yee' 'Klae :de-di'-boi'-a:, deh⧾ :en :no-eh 'do ti-a' klehkpeh bo, me-: 'an mu Nyorsoa-a' :dhama'-' :po-wlu 'yi :po-dih:. :Mor nyor⧾ 'sororn' 'worn-dih: deh-' dhih ken dih, 'de on 'ye-eh son ken po, nyor se 'beh-dih: or 'ye-eh wa, 'de mor or 'ye-eh deh :neheh' ken po.

¹⁶:Yee' :dhama'-' :po-wlu:⧾ Nyorsoa po-a, or po-ih' 'de 'Eble'hehn-: 'dekorn: or-a'a: 'die'-yu-: bo. Nyorsoa-a' 'chlee-deh se :ao', 'die'-nynuu:, :eh :bleh-dih:-a 'i, nyor⧾ :dhulu'. Jorwor: eh 'da, nyor :due' 'klein'. :Yee' nyor-a' 'jeh :dao', or-: 'dhu 'Klae-'.

¹⁷:Yee' deh 'an 'da-a, eh-: :dhe dih. Nyorsoa-: 'dekorn: 'Eble'hehn-: on po kuo. 'De Nyorsoa po wlu :dhama'-' :eh :mor deh or 'da-a, or mu-eh :no. :Yee' :Mose'-a' 'tele' :yeh zon⧾-a' :kehehn' :nyieh :kwlaa taan zi-a 'de :eh 'ye-a' 'de yi, eh se 'beh-dih: eh 'ye kuo :dao' wa, 'de mor eh 'ye Nyorsoa-a' :dhama'-' :po-wlu ya gba.

¹⁸:Yee' :a 'beh-dih: :a 'ye Nyorsoa-a' 'nyii'-deh 'ye, 'do :Mose'-a' 'tele' dih :dhe-eh bo :e? :Mor eh 'dhu eh mor-', :yee' eh :se deh :korn-a dhih Nyorsoa po-a wlu :dhama'-' 'da. Jorwor: :ka Nyorsoa po-a wlu :dhama'-', 'de or-a' mla 'di, or 'ye-a 'Eble'hehn 'nyii'-deh: :dao' 'nyi, eh-: :korn dhih :oo', 'de or 'nyi-eh 'Eble'hehn.

¹⁹:Yee' :eh :korn dhih 'da, 'de Nyorsoa 'nyi :Mose' 'tele' :daa :eh? 'Tele' :daa, eh 'kpa 'o kuo ken 'weh 'suh, 'de nyor⧾ 'ye deh⧾ an no-a, :en no-a deh⧾-zon⧾ yubo:, eh 'ye dih ku :chio'lo:, eh 'ye 'Eble'hehn-a' 'die'-yu: :or :korn-a dhih Nyorsoa po-a wlu :dhama'-' 'de or bo, or-a' ti ken :yeh-dih:. 'Enjor-nyor:⧾, mo-: 'nyi :Mose' 'tele' :daa, 'de or no gwea: :ne-nyor, or 'nyi-eh nyor⧾.

²⁰Jorwor: :mor eh 'dhu nyor :due' 'klein', :yee' gwea: :ne-nyor se :korn or 'ye 'o :ne. Jorwor: Nyorsoa :due', or-: po wlu :dhama'-' 'klein'.

²¹A 'bhorn a 'ye 'on :gwluhuh' zela:, :Mose'-a' 'tele'-: 'dekorn: wlu⧾ Nyorsoa po-a :dhama'-', en :se-' deh :due' 'da :e? 'Kei:. Jorwor: :mor eh 'dhu, Nyorsoa 'nyi :a 'tele' :eh 'beh-dih:-a :eh 'ye-a nyor⧾ :febeh' 'nyi :dee', :yee' Nyorsoa-a mu nyor⧾ 'yi 'sleh-nyor⧾ 'da-dih: 'do eh-a' dih :dhe-eh bo.

²²Jorwor: Nyorsoa-a' 'chlee-deh 'da, Nyor⧾-a' klehkpeh :on :ne-a dha yao 'zorn, on :ne 'o deh⧾-zon⧾-a' 'kpih 'zorn. :Yee' eh-a' dhih, deh :mor nyor po-a 'Klae-a' dhih dhih 'jeh-' or mu-a 'ye-: :eh :korn-a wlu :po-eh :dhama'-', eh 'nyi-eh: nyor⧾ :on po-a 'Klae-a' dhih dhih 'jeh-' 'weh.

²³:Yee' :yeh eh 'ye-a ti nyor⧾ 'ye-a 'Klae-a' dhih 'jeh-' :po-eh ken :yeh-dih:, :yee' :Mose'-a' 'tele' :daa, eh po :a :gbolo-eh buh-', 'de eh-a' 'worn :a-a' kpa 'dlu yai', 'de jorwor: 'Klae-a' dhih 'jeh-' :po-eh: :daa, Nyorsoa-a mu-eh :a 'i :to-dih:.

²⁴'Tele' :daa, eh-: :korn :a wlu 'ken :dee', 'de jorwor: 'Klae-a mu 'de :yi. 'Tele' no deh :daa 'weh, 'de :a-a' 'Klae-a' dhih 'jeh-' :po-eh 'ye-eh' no 'de ybei', 'de Nyorsoa 'ye :a 'yi 'sleh-nyor⧾ 'da-dih:.

²⁵:Yee' :kana :naa, 'Klae-a' dhih 'jeh-' :po-eh-a' ti nyni 'o :weh. :Mose'-a' 'tele' se :a wlu 'ken :korn :neheh'.

²⁶:Yee' a-a' klehkpeh, a-a' :Yusu' 'Klae-a' dhih 'jeh-' :po-eh:, eh-: no-eh, 'de a no Nyorsoa-a' 'nynuu.

²⁷A-a' klehkpeh, :or :po-a 'ni 'dlu 'de 'Klae-a' 'nyne 'di, a pa-or' 'weh.

²⁸:Yee' 'do eh-a' dha, deh-' :gble-eh se 'o :Jueh'-nyor⧾-: nyor⧾ :on :se-a :Jueh'-nyor⧾-: 'ge-nynuu-: :yuh :on :se-a 'ge-nynuu-: nyor⧾-kpalu⧾-: 'nynor⧾-kpao'⧾-: 'dekorn: an-a' klehkpeh 'nyne bo :ne. Deh no-eh, a-a' klehkpeh, a no deh :due' 'de :Yusu' 'Klae-'.

²⁹:Yee' :mor eh 'dhu, a :korn 'de 'Klae bo, :yee' a :mor 'Eble'hehn-a' 'die'-nynuu: 'o. 'De deh :korn-a wlu Nyorsoa po-a :dhama'-' 'do or-a' 'die'-nynuu bo, a mu-eh 'ye-: :ke.