Read Eastern Krahn :Gale'tia-chlee-deh: 4 Bible Online

:Gale'tia-chlee-deh: 4 - Eastern Krahn bible

:Gale'tia-chlee-deh: 4

¹:Yee' deh 'an za-a-', eh-: :dhe dih. Nyor-kpalu-yu: :or :korn-a :or 'ye-a or :baa'-a' :kororn-deh⧾ kpa, :yee' :ka nyor⧾-a no-a 'ge-yu-a' dhih, 'ka-: an no or-a' dhih :ke, ti or no-a 'yu-yu, keen' :mloror', or-: :korn deh⧾-a' klehkpeh.

²:Yee' nyor⧾ :noo', mo-: :an pobo 'o or bo dih, 'de :noo'-a 'dhu or-a'a: :kororn-deh:⧾ :dao' 'yli-eh bo, :mor ti or :baa' chehn-a, en nyni 'o, 'de or 'ye-ih' 'ye.

³:Yee' 'ka-: :a :ne :dee' :ke. :A no 'ge-nynuu: 'do 'kwla 'ye-dih-deh:⧾ :en :korn-a 'bluhba: :daa wlu 'ken bo :dee', 'de jorwor: :a mu dhih-a' 'yor-eh yubo:.

⁴Jorwor: :yeh ti Nyorsoa 'da-a, en nyni-a 'o, :yee' or dbo or-a' 'jeh 'yor-eh-a' 'Yu 'weh 'noror yao 'zorn. 'De or :yi-dih: 'nynor-kpao'. Or 'ti 'de :Jueh'-nyor⧾ 'nyne-' :on :ne-a 'o :Mose'-a' 'tele' 'zorn,

⁵'de or 'ye :a-a' klehkpeh :or :ne-a 'o 'tele' :dao' 'zorn zelie:, 'de :a 'ye Nyorsoa-a' 'nynuu no.

⁶:Yee' eh 'ye :a 'i :to-dih-eh:, :ka :a 'dhu-a or-a' 'nynuu-', eh-: :korn dhih Nyorsoa dbo or-a' 'Yu-a' :Zulu, on 'ye :a-a' :porluh⧾ wlu 'ken :korn. Or-a' :Zulu: :daa, mo-: :an no-eh, 'de :mor :a :taa Nyorsoa 'da, :a no, 'On-ba:, 'On-ba:.

⁷:Yee' eh-a' dhih, a :se 'ge-nynuu: :neheh'. Jorwor: a no Nyorsoa-a' 'nynuu:. :Yee' :ka a 'dhu-a or-a' 'nynuu-', :yee' or mu a deh⧾-a' klehkpeh or 'ble-a 'do or-a' 'nynuu bo a-uh 'nyi-: :ke.

⁸:Yee' :zai' :dee', a se Nyorsoa yubo:. Eh-: no-eh, 'de a no 'ge-nynuu 'do 'kwla 'ye-dih-deh⧾ bo, :en :se-a Nyorsoa.

⁹:Yee' :ka a yubo:-a Nyorsoa :naa, keen', Nyorsoa yubo: a-uh 'weh, :yee' :eh :korn dhih, a 'bhorn a 'ye dih 'bili: 'de 'kwla 'ye-dih-deh:⧾ :dao' :en :korn-a nyor⧾ wlu 'ken :korn-eh: se-a 'kpih 'ble, :en se-a 'o Nyorsoa-' :zi, 'de :en se-a deh-' 'dhu-eh:, 'de en bo :neheh' :eh? :Eh :korn dhih, a 'bhorn a 'ye en-' 'ge-nynuu: :no-eh de :za :neheh' :eh?

¹⁰A :za 'o 'we :nee'-: 'chuh⧾ :nee'-: ti :nee'-: 'dekorn: zon⧾ :nee'-: me-: a 'ye deh-'.

¹¹'An na-dih a-a' dhih :gwluhuh' dih, 'de :koan-a' klehkpeh 'on no-a 'do a bo, or :ne-' deh 'plo no.

¹²:Yee' 'an 'Klae :de-di'-boi'-a:, 'an bale a 'weh. :Ka 'on :ne-a, 'ka-: a 'ye :ne. Deh no-eh, :ka a :ne-a, 'ka-: 'on :ne :naa. A :se-' 'on deh-zon 'bhun no, eh-a' 'gor :se 'o :sie: :zai'.

¹³A yubo-eh', 'an kormu-eh:, eh-: no-eh, 'de 'on po Nyorsoa-a' tubo-wlu:⧾ 'jeh, ti 'on yi-a 'de a bo :zai'.

¹⁴Keen' :mloror' 'an kormu-eh 'worn, eh 'ye-dih a 'kle 'gabaa. Jorwor: a :se 'on :vlehn, 'de mor a :se 'on 'kpuh ya :to. Jorwor: :ka a mu-a Nyorsoa-a' 'enjor-a' dih :kpon-eh :no :dee', 'ka-: a no 'an dih :kpon-eh. 'De mor :ka a mu-a :Yusu' 'Klae-a' dih :kpon-eh :no :dee', 'ka-: a no 'an dih :kpon-eh :ke.

¹⁵A 'yi-dih: 'mona-' dih :dee'. Jorwor: dha a-a' 'mona :ne :naa :eh? 'On yubo-eh', :mor eh 'dhu, no ka se :ne :dee', a 'beh-dih: a 'ye 'de a-a' 'jeh 'yor-eh-a' 'yli :za, a 'ye-ih' 'on 'nyi 'weh :dee'.

¹⁶:Yee' dhih 'an zela-a a dhih-a' 'yor-eh :gwluhuh', eh-: :korn dhih a 'nyeh-a 'on-' :naa :eh?

¹⁷:Yee' nyor⧾ :yuh :dao', :an 'neh-a :Mose'-a' 'tele'-deh ken 'gboror:, :porluh: on 'ble-a on 'ye-a a jli 'de on bo, mo-: 'beh 'i. Jorwor: deh on 'ble-dih:-a 'dlu 'di dih, eh se 'yi dih :nmor 'do a bo. Deh :due' an 'bhorn-a, eh-: 'dhu, on 'ye a-: 'mor-: :a-' gble, 'de a-a' :porluh⧾-a' klehkpeh 'ye 'de on bo :ne.

¹⁸Eh :nmor-: 'yi nyor-a' :porluh: or 'ble-a 'do deh bo, on 'ye 'i 'beh, 'do ti-a' klehkpeh bo. Eh :se :mor 'on :ne 'o a bo :due' :deh. Jorwor: 'nyi deh-a' 'jeh :dao', eh :ne 'o :gwie 'i.

¹⁹:Yee' :dele' ka, 'an 'nynuu-a:. :Mor 'nynor :taa :gbano: :za-da yi, :ka 'de or 'di-a no-a 'fean'-a', eh-: 'on gweh :ke 'do a-a' dhih bo. 'De 'on 'di-a: 'fean'-' 'do a-a' dhih bo, a 'ye 'Klae-a' klei' :zi-nyor⧾ no 'jeh ka, 'de jorwor: 'de 'ye 'bor.

²⁰'An :porluh-a sin-', 'on 'ye 'de a bo :ne :naa, 'de 'on :ne-' :ao' :wlu-a' no 'de a bo :neheh'. 'An :porluh :gba ya 'do a-a' deh bo.

²¹:Yee' 'nyi 'on dhele: a :mor :yuh :an 'bhorn-a :on 'ye-a 'o :Mose'-a' 'tele' 'zorn :ne dih, dhih eh :za-a-', a :se-ih' 'worn :e?

²²Eh 'dae:, 'Eble'hehn 'wluh nyor⧾-kpalu⧾-nynuu 'sororn'. 'Nynor :or no-a 'ge-nynor, or-: 'wluh :due'. 'De 'nynor :or :se-a 'ge-nynor:, or 'wluh 'sororn' nor.

²³Jorwor: :yor or :ne 'nynor :or :se-a 'ge-nynor:, on 'wluh-a, or-a' neh :ne 'o 'dor, deh no-eh, Nyorsoa-a' 'yor-eh: or-: po or-a' wlu :dhama'-', 'de jorwor: or mu 'wluh-:.

²⁴Deh⧾ 'sororn' :daa, nyor 'beh-dih: nyor 'ye-ih' deh 'i :po-dih:. 'Nynor⧾ 'sororn' :daa, on :nyna 'o kuo-a' 'dlu⧾ :ne-a 'sororn', en-' 'gor bo dih. :Yee' :yor :korn-a 'nynuu 'wluh-dih:-a 'ge-nynuu-deh, or-a' 'nyne :wor :Haga'. 'De or :nyna 'o kuo :or :po-eh 'do tluh an 'da-dih-a 'Sanae-tluh ken, an-a' 'gor bo dih.

²⁵:Yee' :Haga' :nyna 'o 'Sanae-tluh: :on :ne-a :Ale'bia-bluhba ken 'di, an-a' 'gor bo dih. Nyor 'beh-dih: nyor 'ye-uh :Julu'slehn-a' 'zean' neh 'i :po-dih: :ke. Deh no-eh, :Julu'slehn-: 'dekorn: nyor⧾-a' klehkpeh :ne-a 'de or 'di-: on :ne 'de 'gegeye 'zean'.

²⁶Jorwor: :Julu'slehn: :or no-a Nyorsoa-a' gwlor, or se 'de 'gegeye :ne, 'de or-: no :a 'de.

²⁷Deh no-eh, eh 'chle-eh:-' 'de Nyorsoa-a' 'chlee-deh 'di, eh 'da, :Mor 'nynor :daa, :or :sie:-a :zlama, no 'mona, :on 'ye 'geh⧾ po, :mor :or 'kwli 'see-a no :zai'. Deh no-eh, 'nynor :or :po-eh 'zorn, or mu 'nynuu: :dhulu' 'ble-: or 'ye 'o 'nynor :or :korn-a yibeor se-or 'zorn :po :zi.

²⁸Jorwor: :kana :naa, 'an 'Klae :de-di'-boi'-a:, a no Nyorsoa-a' 'nynuu:. :Ka Ase' :ne-a, 'de or 'wluh-a 'do Nyorsoa-a' :dhama'-' :po-wlu 'ken, 'ka-: 'o a :ne ke.

²⁹:Yee' 'do ti :dao' 'i, nyor-kpalu-yu: :or :korn-a wlu se-a :dhama'-' :po-eh:, 'de :or 'wluh-a, or 'ye-dih :yor :or Nyorsoa-a' :Zulu-a' 'kpih no-eh, 'de :or 'ye-a' 'wluh 'kle. 'De mor 'ka-: 'o eh :ne 'zean' :ke.

³⁰Jorwor: :kaa Nyorsoa-a' 'chlee-deh 'da :eh? Eh 'dae:, Po 'nynor :dao' :or no-a 'ge-nynor-: 'dekorn: or-a'a: nyor-kpalu-yu-: 'zorn. Deh no-eh, 'nynor :or no-a 'ge-nynor, or-a'a: nyor-kpalu-yu se 'for 'ble 'do or :baa'-a'a: :kororn-deh⧾ 'ken. 'Nynor :or :se-a 'ge-nynor:, or-a'a: nyor-kpalu-yu:, or-: :korn :kororn-deh:⧾ :dao'.

³¹:Yee' 'an 'Klae :de-di'-boi'-a:, :a :se 'nynor :or no-a 'ge-nynor, or-a'a: 'nynuu:. Jorwor: 'nynor :or :se-a 'ge-nynor:, or-a'a: 'nynuu:, mo-: :a 'dhu-eh:-'.