Read Eastern Krahn :Gale'tia-chlee-deh: 6 Bible Online

:Gale'tia-chlee-deh: 6 - Eastern Krahn bible

:Gale'tia-chlee-deh: 6

¹:Yee' 'an 'Klae :de-di'-boi'-a:, :mor a 'ye nyor 'de or 'ye deh-zon no, :yee' a :mor :yor ku-a 'de Nyorsoa-deh 'di, a :mor :or 'ye-or' 'o :gwie 'i de po. Jorwor: a 'pehn-dih: wlu dih, 'de or bo. :Yee' a 'dhu a-a' 'jeh :dhororn' 'de deh or no-a, a :ne-' eh-a' no-a' 'bhorn :ke.

²:Yee' :mor a 'be :taa 'kle 'ye, :yee' a :za-dih-or-'. :Mor a :taa 'o no, :yee' 'tele' 'Klae :torne: a-uh, eh-: 'o a dhe 'o dih.

³:Mor nyor :or se-a deh-' 'dhu-eh:, 'de or 'ye or-a' 'jeh deh 'da-dih:, :yee' or bo-dih or-a' 'jeh 'weh.

⁴A-a' klehkpeh, a pobo: a-a' noo-deh⧾ ya :due' :due'. :Mor en :nmor 'yi dih, :yee' or 'beh-dih: or 'ye or-a' 'jeh 'i 'beh-dih: 'do deh or-a' 'jeh 'yor-eh no-a bo. Or-a' :po-dih:-' deh or no-a, or 'be :noror'-a' noo-deh 'i.

⁵Deh no-eh, nyor⧾-a' klehkpeh, on :korn on 'ye an-a' 'jeh-a' noo-deh⧾-a' 'gbeh⧾ 'ble :due' :due'.

⁶:Mor nyor :torne: a tubo-wlu:⧾ 'jeh :en kor-a 'Klae 'i, :yee' deh 'jeh :neh a 'ble-a, a :za 'o deh, a 'ye-or 'nyi.

⁷A-a' :bo-dih:-' a-a' 'jeh dih. Deh no-eh, Nyorsoa :se :goba'-dhih ken dih 'wluh-dih-nyor:. Deh nyor 'dhu-a, eh-: or mu 'kpan-:.

⁸:Mor nyor 'dhu deh⧾-zon⧾ or-a' :gwlor-nyor-tu-a 'bhorn-a, :yee' or mu 'meh-a' 'kpan-:. Jorwor: :mor nyor 'dhu deh⧾ Nyorsoa-a' :Zulu-a 'bhorn-a, :yee' or mu 'kmo :sie: :febeh' :eh 'wluh-a 'de :Zulu bo 'kpan-:.

⁹:Yee' 'do eh-a' dha, a 'nyi :a 'bor sea-a' 'do deh 'jeh-a' no-a' bo. Deh no-eh, :mor :a se sea, eh mu ti :korn, :a mu 'o deh⧾ 'jeh 'kpan-:.

¹⁰:Yee' eh-a' dhih, :dha :a 'ble-dih:-a ti, :a 'ye-a' deh no, 'nyi :a no deh 'jeh 'do nyor⧾-a' klehkpeh bo. Nyor⧾ :a 'ye-eh' bo dih no 'gabaa, mo-: 'dhu nyor⧾ :on :ne :a no-a deh :due' 'de :Yusu' 'Klae-a' dhih 'jeh-' :po-eh 'di.

¹¹:Yee' a pobo: 'chlee-deh⧾-a' 'yli :klaba'⧾ 'an no-a, 'an 'jeh 'yor-eh-a' son, 'an 'chle-a a bo ya.

¹²:Yee' nyor⧾ :an 'bhorn-a :on 'ye a 'kpih :kpa-dih:, 'de a 'ye-a :bhlororn' 'meh, an 'bhorn on 'ye an-a' 'jeh nyor⧾ 'i :to-dih: 'do deh⧾ :gwlor-nyor⧾-a 'ye-a deh-' bo. Deh :korn-a dhih an no-a deh⧾ :daa, eh-: 'dhu, on :se-' 'bhorn :mor on po :ka 'Klae 'meh-a 'do 'klorse tu 'i, eh-a' tubo-wlu⧾, 'de nyor⧾ :ne-uh' 'kle 'ye-dih:.

¹³'De mor :yuh-a' 'jeh :on 'meh-a :bhlororn', an-a' 'worn, an-a' dhe 'o :Mose'-a' 'tele' dih. Jorwor: an 'bhorn :mor on 'dba a :bhlororn' :weh, 'de on 'ye an-a' 'jeh 'i 'beh-dih:, on 'ye :ao', nyor⧾ :on :se-a :Jueh'-nyor:⧾, on 'worn-dih-eh ken dih 'weh, :a 'ye-uh' :bhlororn' 'dba.

¹⁴Jorwor: 'mor :mloror', :a-a' :Gwlor :baa' :Yusu' 'Klae-a' 'klorse tu 'i 'meh-dih-eh :due', eh-: :korn dhih 'an mu 'an 'jeh 'i 'beh-dih:. Deh no-eh, or-a' 'klorse :tu, mo-: no-eh, 'de 'kmo-a' deh⧾ no 'meheh'-deh⧾ 'do 'on bo, 'de 'on no 'meheh'-nyor 'do 'kmo bo.

¹⁵:Mor nyor 'meh :bhlororn' o, or se :bhlororn' 'meh o, 'koror'-deh se 'de eh 'di :ne. Deh :due' :eh 'kpa-a deh ken, eh-: 'dhu, 'nyi Nyorsoa po :on :dele'-' :neheh' :dele' ka.

¹⁶:Yee' :yuh :on :ne-dih:-a deh⧾ 'on :torne: a-uh 'kmo, 'nyi wlu-' dih 'worn-eh-: Nyorsoa-a' :wehlih: :korn-eh-: en :ne 'o on bo, mo-: 'dekorn: Nyorsoa-nyor:⧾ :noo'-a' klehkpeh-:.

¹⁷:Yee' :mor 'on 'ye jla, :eh 'wluh-a dha 'zean' 'bli, nyor-beh-nyor-beh:-a' 'beh-dih: 'on 'worn dih :neheh' o. Deh no-eh, fan :daa 'on 'ble-a 'do 'an yau 'bhun, eh :to-dih-eh nyor⧾ 'i, :ka 'on 'dhu-a :Yusu'-a' 'ge-yu-'.

¹⁸'Nyi :a-a' :Gwlor :baa' :Yusu' 'Klae-a' mla :ne 'o a-a' klehkpeh bo o, 'an 'Klae :de-di'-boi'-a:. 'Ka-: eh 'ye :ne.