Read Eastern Krahn Ehfesor-chlee-deh: 1 Bible Online

Ehfesor-chlee-deh: 1 - Eastern Krahn bible

Ehfesor-chlee-deh: 1

¹'Mor :Poror' :or Nyorsoa 'da-a :or 'ye-a :Yusu' 'Klae-a'a: dboo-nyor no 'de or-a' 'ton :korn ka 'di, 'mor 'ye a-uh, a :mor 'dhu-a Nyorsoa-nyor:⧾ :on :ne-a 'de 'Ehfesor-gwlor 'di, 'de :or no-a :dhehehn-nyor⧾ 'de :Yusu' 'Klae-a' deh 'di.

²Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae bo.

³Dhih-a' 'i 'beh-a' :korn 'de Nyorsoa bo, :or 'dhu-a :a-a' :Gwlor :baa' :Yusu' 'Klae :Baa'. Deh no-eh, :ka :a :ne-a 'Klae-', :yee' or po :a :bhorlie' bo 'weh, 'for⧾-a' klehkpeh bo, 'de or-a' deh 'di, :bhorlie' :eh 'wluh-a 'de or 'bli yai', eh-: or no.

⁴'De mor :yeh 'bluhba 'ye-a' :no-eh:, :yee' Nyorsoa gan :a 'weh see :a 'ye or-a'a: nyor⧾ no, 'do :a mor-: 'Klae-: :a-a' :dha :due' 'kpa-eh: bo, 'de :a 'ye :vlehehn'-' :gweh-nyor⧾ no 'do or ybei' :on se-a dhih 'bhun :ne. Or :ybeh :a-uh' 'weh. Eh-: no-eh,

⁵'de or gan :a-uh :dee' see 'do or-a' 'jeh bo, :a 'ye or-a'a: 'nynuu no :eh :yi-dih:-a :Yusu' 'Klae-'. Eh-: no or-a' 'mona-deh: or 'bhorn-a or 'ye-a' no.

⁶A 'nyi :a po Nyorsoa-a' 'nyne ya, 'do or-a' dhih-a' 'i 'beh-mla bo :or no-a 'nyii'-deh or 'nyi-a :a-uh yaa'e :eh :yi-dih:-a or-a' :dhih :kma-yu-'.

⁷'De 'Klae-a' 'meh-a' 'di, 'do :wor :a-a' deh⧾-zon⧾-a' dhih 'ma-dih-eh: bo, 'de :a zelie-eh:. 'De Nyorsoa-a' mla :dhulu' 'di, 'do :wor or :no-dih-eh.

⁸'Do or-a' :toror' klehkpeh 'di-: 'dekorn: or-a' deh-' dih 'worn-eh 'di-: 'do :wor or :po-dih: :a mla :dhulu' :daa bo.

⁹:Yee' deh 'Klae no-a, eh-: no-eh, 'de Nyorsoa :to-dih: or-a' 'slan, or 'dhu-a :dee' see, :a 'i.

¹⁰Deh :daa Nyorsoa 'dhu-a, or mu-eh 'i :gweh :mor ti nyni 'o. Eh-: mu deh⧾-a' klehkpeh or no-a :dha :due' :ya, :yih :en :ne-a 'de or 'bli yai'-: 'dekorn: :yih :en :ne-a dha yao 'zorn-:. 'Klae or-: :ne 'o en 'dlu.

¹¹Nyorsoa no deh⧾-a' klehkpeh 'weh, :ka or no-a eh-a' 'dhu-a'. 'De or gan :a-uh :dee' see, :a ye or-a' 'jeh 'yor-eh-a' nyor⧾ no, 'do :a-a' 'Klae-a' :ne-a' bo 'dekorn: :ka or 'bhorn-a eh 'ye-a' :ne.

¹²:Yee' a 'nyi :a :mor :or no-a :zai'-nyor⧾ :or dhe-a 'Klae :gwlii', :a po Nyorsoa-a' dhih-a' 'i 'beh-a' 'nyne ya.

¹³:Yee' ti a 'worn-a tubo-wlu:⧾ :daa :en no-a dhih-a' 'yor-eh, :yee' a no Nyorsoa-a' nyor⧾ :ke, :en no-a tubo-wlu:⧾ 'jeh :daa :en :ya-a: 'de 'puh-a' 'do a bo. A po 'Klae-a' dhih dhih 'jeh-' 'weh. Eh-: :korn dhih Nyorsoa 'nyi or-a' Gban 'i :ne :Zulu a-uh, :on :korn-a wlu or po-a :dhama'-', eh 'ye a 'i :to-dih: :ka a :korn-a 'de or bo.

¹⁴:Yee' :ka :a 'ble-a or-a' Gban 'i :ne :Zulu: :dao', :yee' a 'nyi :a yubo-eh :ka :a mu-a deh :korn-a wlu or po-a :dhama'-' 'de or-a' nyor⧾ bo 'ye-:. Eh-: no-eh, 'de :a yubo-eh deh 'jeh, :ka or mu-a nyor⧾ :on 'dhu-a or-a'a: nyor⧾-' zelie:. A 'nyi :a po or-a' dhih-a' 'i 'beh-a' 'nyne ya.

¹⁵:Yee' eh-a' dhih, :yeh 'on 'worn-a :ka a no-a :Gwlor :baa' :Yusu'-a' dhih 'jeh-' :po-eh-: 'dekorn: :ybeh-eh: a 'ble-a 'do Nyorsoa-nyor⧾-a' klehkpeh bo-:

¹⁶:yee' 'an-a' 'worn 'an-a' 'bor Nyorsoa-a' 'zio :po-eh 'do a-a' dhih bo. 'De :mor 'on :taa 'de Nyorsoa bo wlu, 'an po 'de a-a' 'nyne 'weh.

¹⁷'De 'an dhele Nyorsoa dih :or no-a :a-a' :Gwlor :baa' :Yusu' 'Klae-a' Nyorsoa, :or no-a dhih-a' 'i 'beh :Baa', or 'ye a or-a' :Zulu a-uh 'nyi, :an mu-eh :no, 'de a 'ye-a :toror' :korn, 'de on 'ye-a a Nyorsoa 'i :to-dih: :ke, 'de a 'ye-or' dih 'worn deh 'jeh.

¹⁸:Yee' 'an dhele-or dih :neheh', or 'ye a deh-' dih 'worn-eh 'nyi, 'de deh a 'ye-a' :gwlii' dhe :eh :korn-a dhih or 'da a-uh 'de a 'ye-eh' yubo:. 'De a 'ye or-a' dhih-a' 'i 'beh :bhorlie' :dhulu', :or :korn-a wlu or po-a :dhama'-' or no-a or mu or-a'a: nyor⧾ 'nyi-: 'de a 'ye eh-a' dhih dih 'worn deh 'jeh.

¹⁹'De 'an dhele-or dih, :ka or-a' 'kpih no-a 'i 'beh-a', 'de :en no-a :koan, 'de :a :mor :or po-or dhih 'jeh-' 'di, 'de a 'ye-ih' dih 'worn deh 'jeh. 'Kpih :dao' :en no-a :koan 'de :a 'di, me-: :ne-a :due' me-: 'o :en 'dhu dhih-a' 'i 'beh-kpih-',

²⁰:en Nyorsoa no-a, ti or :za 'de 'Klae 'de nma-dih-deh 'di, 'de or dhe-or 'o 'do or-a' :dila-son bo dih, 'de or 'bli yai'.

²¹'Klae :ne 'o nyor⧾ wlu 'ken :korn-nyor⧾-: nyor⧾ :na-dih-nyor⧾-: nyor⧾ :klaba'⧾-: 'dekorn: 'kpih-a' klehkpeh :nee'-: :en :ne-a 'o yao :gwlii'-: :yih :ne-a 'noror 'zorn-: or-: :ne 'o en-' klehkpeh 'dlu. 'Nyne or 'ble-a 'do :koan: or no-a bo, en-' dhih 'beh-: 'i, en :zi 'o 'nyne-a' klehkpeh-'. Eh :se ti :yih :a :ne-a ken :naa :due', en-' dhih se 'i 'beh, jorwor: ti :yih-a: mu-a 'de :yi :ke o.

²²'De mor Nyorsoa po 'o deh⧾-a' klehkpeh 'do or :buhbuh⧾ 'zorn. 'De or no-eh 'de or no nyor :klaba' 'do deh⧾-a' klehkpeh :en :ne-a 'de 'chore bo.

²³'Chore, eh-: 'dhu 'Klae-a' yau-'. 'De 'chore 'yi-dih-or dih, :or no-a nyor :or deh⧾-a' klehkpeh 'yi-dih:-a dih.