Read Eastern Krahn Ehfesor-chlee-deh: 2 Bible Online

Ehfesor-chlee-deh: 2 - Eastern Krahn bible

Ehfesor-chlee-deh: 2

¹:Yee' Nyorsoa-a' 'tele'-a' wa-a'-: 'dekorn: a-a' deh⧾-zon⧾-: me-: no-eh 'de nyor 'beh-dih: or 'ye :ao', a 'meh-' :dee', 'do Nyorsoa ybei'.

²:Yee' 'do ti :dao' 'i, a zi 'o 'kmo-a' 'kulu-kplen klei'. A dhe 'o 'ku :on :korn-a 'kwla 'ye-dih-deh⧾ wlu 'ken, an-a' 'tele' dih. 'Ku :dao', mo-: :korn nyor⧾ :an-a' dhe-a 'o Nyorsoa-a' 'tele' dih wlu 'ken :naa.

³Keen', 'ka-: :a-a' klehkpeh :a :ne :ke :dee'. :Ka :a-a' :porluh⧾-a 'bhorn-a :a 'ye-a 'kmo-' :ne-eh no, 'ka-: :a no :dee'. 'De :a no deh⧾-zon:⧾ :a-a' :gwlor-nyor-tu-: 'dekorn: :a-a' 'dlu 'di dih :na-dih-deh⧾-: en 'bhorn-a :a 'ye-a' no. :Yee' :ka :a 'dhu-a deh⧾-zon:⧾ :no-nyor⧾-' :ka :gwlor-nyor⧾-a' klehkpeh :ne-a, :yee' :a :korn :a 'ye Nyorsoa-a' 'chehn-yuba 'ye :ke :dee'.

⁴Jorwor: Nyorsoa :or :korn-a :wehlih 'gabaa-: 'dekorn: or-a' :ybeh-eh: :klaba' or 'ble-a 'do :a bo-:

⁵or-: no-eh, 'de :a mor-: 'Klae-: :a :ne-dih: 'kmo-' :dha :due' :neheh', ti :a gweh-a 'meheh'-nyor⧾ 'do or ybei', or-a' 'tele'-a' waa-dhih. Or-a' mla, or-: no-eh, 'de a 'puh.

⁶'De Nyorsoa 'duo: :a mor-: 'Klae-: ya-' :dha :due', 'de :a :ne-dih: 'kmo-' :dha :due' :neheh', 'de or :ne :a mor-: :a 'ye 'de Nyorsoa 'bli yai' wlu 'ken :korn.

⁷Or no deh :daa 'weh, 'de eh 'ye-eh' no 'de nyor⧾-a' klehkpeh 'ye-eh' yubo: :ka or-a' mla :kolu' :ne-a, 'de nyor se-a or-a' 'yba-dih-eh 'beh-dih:, 'do ti-a mu-a 'de :yi 'di. Or :yi-dih: :Yusu' 'Klae-', 'de or :to-dih: :a or-a' :porluh-a' 'yi dih :nmor-eh: :a 'i.

⁸:Yee' Nyorsoa-a' mla :oo' :or no-eh, 'de a 'puh, :eh :yi-dih:-a dhih 'jeh-' :po-eh-'. Eh se 'de a-a' 'yor-eh bo 'wluh, jorwor: Nyorsoa-a' 'nyii'-deh: 'o.

⁹'Puh-a' :daa or :se 'de a-a' 'yor-eh-a' :koan bo 'wluh, 'de nyor-beh-nyor-beh :ne-' or-a' 'jeh 'i 'beh-dih:.

¹⁰Deh no-eh, :yeh :a :ne-a :naa, Nyorsoa :oo', or-: no-eh 'de :a :ne :ao'. :A 'ye :koan: 'jeh nor no :dhih 'o, eh-: :korn dhih 'de Nyorsoa :yi-dih: :Yusu' 'Klae-' 'de or no :a-uh. :Koan: 'jeh :nor :daa, Nyorsoa po-or: 'kpa :dee' see :a 'ye-or' no.

¹¹A yubo-eh', :ka a :se-a :Jueh'-nyor:⧾, 'de a 'wluh-dih-eh. Jorwor: :yuh :on 'meh-a :bhlororn' 'de nyor⧾ 'ye-eh' yubo: :ka on 'dhu-a Nyorsoa-nyor⧾-', an-a' 'jeh :dao', mo-: :an 'da-dih a, se Nyorsoa yubo-nyor⧾. Deh no-eh a :se-' :bhlororn' 'meh-eh: :dao', :eh :korn-a 'de :gwlor-nyor⧾-a' yau bo no.

¹²:Yee' a yubo-eh', 'do ti :dao' 'i, a mor-: 'Klae-: a :gble-eh:-' 'weh. A se 'de nyor⧾ Nyorsoa gan-a :on 'dhu-a 'Ezlea-nyor⧾-' bo :ne, 'de a no 'duhba⧾. A se 'for 'ble 'de kuo 'di, :eh 'dhu-a wlu or po-a :dhama'-' 'de or-a' nyor⧾ bo. :Yee' a 'ti dha 'bluhba: :daa ken 'weh 'suh, 'de a se deh :gwlii' :dhe-eh 'ble, 'de a se Nyorsoa yubo: :dee'.

¹³Jorwor: :kana :naa, a-a' :Yusu' 'Klae-' :ne-eh:, eh-: no-eh, 'de a :mor :or :tehn-a bo :dee', 'de 'Klae-a' gban 'i 'dhu-dih-eh 'do tu 'i, no-eh, 'de a 'koan'-dih: Nyorsoa dih.

¹⁴Deh no-eh, 'Klae-a' 'yor-eh: or-: :ya 'de wlu-' dih 'worn-eh: 'do nyor⧾ :on :se-a :Jueh'-nyor⧾-: 'dekorn: nyor⧾ :on 'dhu-a :Jueh'-nyor⧾-: 'nyne bo, 'do an-a' :dha :due' :po-eh bo, on 'ye nyor :due' no. Or-a' 'jeh 'yor-eh-a' yau: mo-: or no, 'de or :za 'o gba-dih-gba :or :ne-a 'o on 'nyne bo, 'de :or gble-uh-a :dee', :or no-eh, 'de on 'nyeh-eh-dih:-a :dee'.

¹⁵Or-a' yau: :ne-a :due', mo-: no-eh, 'de or gweh :Jueh'-nyor⧾-a' 'tele'⧾-a' klehkpeh dih 'de nyor :se-ih' 'o dih :dhe i :neheh'. Or no deh :daa 'weh, 'de eh 'ye-eh' no 'de nyor⧾-a' 'dlu⧾-kpor⧾ 'sororn' :daa, on 'ye :dha :due' 'kpa, en :ne or 'ye deh :due' no, :eh 'dhu-a wlu-' dih 'worn-eh-'.

¹⁶:Yee' or-a' tu 'i 'meh-dih-eh:, eh-: no-eh 'de nyor⧾ 'bor 'nyeh-eh-dih-eh. Or-a' tu 'i 'meh-dih-eh:, eh-: no-eh 'de nyor⧾-a' 'dlu⧾-kpor⧾ 'sororn' :daa, on no deh :due', 'de or ya-uh 'noror Nyorsoa bo de.

¹⁷:Yee' eh-a' dhih 'Klae 'yle, 'de or po tubo-wlu:⧾ :en 'ble-a wlu-' dih 'worn-eh 'de a :mor :or :se-a :Jueh'-nyor:⧾, :or :tehn-dih:-a Nyorsoa bo dih :dee'-: 'dekorn: :Jueh'-nyor:⧾ :on 'koan'-dih:-a Nyorsoa dih-: 'de on bo.

¹⁸:Yee' deh 'Klae no-a, eh-: no-eh, 'de :a-a' klehkpeh :or 'dhu-a :Jueh'-nyor⧾-: 'dekorn: :se :Jueh'-nyor⧾-: 'de :a :yi-dih: Nyorsoa-a' :Zulu: :ne-a :due'-', :on no-eh, 'de :a 'beh-dih:-a :a 'ye-a 'o :a :Baa' Nyorsoa ybei' dih :nyna.

¹⁹:Yee' 'do eh-a' dha, a :mor :or :se-a :Jueh'-nyor:⧾, a :se 'duhba:⧾ :dele' ka. A mor-: 'dekorn: Nyorsoa-a' nyor⧾-: a no 'bluhba :due'-' nyor⧾. 'De a no nyor⧾ :on :ne-a 'de Nyorsoa 'bli 'gbu-a' nyor⧾.

²⁰A-a' 'jeh :ke, 'gbu :Yusu'-a'a: dboo-nyor⧾-: 'dekorn: Nyorsoa-a' wele-eh: :po-nyor⧾-: on 'dhu-a glu, 'do :wor a :po-dih-eh: :ke. :Yusu' 'Klae-a' 'yor-eh: or-: no an-a' :zi-tu.

²¹:Yusu'-a' 'yor-eh:, or-: po 'gbu-a' klehkpeh :daa :dha :due', or-: kpon-uh dih, 'de or no-eh, 'de on ku, on no gban 'i :ne-sla: :on :dhe-dih-eh 'for 'i 'do :Gwlor :baa' bo.

²²:Yee' :ka a :ne-a 'Klae-', :yee' a mor-: 'dekorn: or-a' nyor⧾-a' klehkpeh-: 'Klae or-: no-eh, 'de a no 'gbu :yuh Nyorsoa-a' :Zulu 'ti-a 'de 'di.