Read Eastern Krahn Ehfesor-chlee-deh: 3 Bible Online

Ehfesor-chlee-deh: 3 - Eastern Krahn bible

Ehfesor-chlee-deh: 3

¹:Yee' 'do eh-a' dha, 'mor :Poror', 'an wlu 'de Nyorsoa bo 'do a-a' dhih bo, 'mor :or :Yusu' 'Klae no-eh, 'de :or 'dhu-a :kasue-nyor-', 'do a :mor :or :se-a :Jueh'-nyor:⧾, a-a' dhih.

²Keen' a 'worn-ih' 'jeh ka, :ka eh 'dhu-a 'de Nyorsoa-a' mla 'di-', or 'nyi-a 'on :koan: :daa 'on 'ye-or' no 'do a bo.

³Nyorsoa :to-dih: or-a' 'slan or 'dhu-a 'on-: 'i, 'de 'on 'chle deh-beh 'do eh 'bhun 'noror 'chlee-deh: :daa 'di.

⁴:Yee' :mor eh 'dhu, a mu deh 'on 'chle-a :zlo, :yee' :ka 'on no-a 'slan :or kor-a 'Klae 'i, or-a' dih 'worn-eh, :yee' 'ka-: a mu eh-a' dih 'worn-a' :no :ke.

⁵'Do ti :en zi-a 'di, 'slan :daa, or :se-' :gwlor-nyor⧾ :gwluhuh' zela-eh:. Jorwor: :kana :naa Nyorsoa no-eh' 'de or-a' :Zulu :to-dih-or or-a' nyor⧾ :on :dhe-dih-eh 'for 'i 'do or bo 'i, :on 'dhu-a or-a' dboo-nyor⧾-: 'dekorn: or-a' wele-eh: :po-nyor⧾-:.

⁶'Slan :daa, or-: :dhe dih. :Yusu' 'Klae-a' dhih, Nyorsoa-a' tubo-wlu:⧾ 'jeh no-eh, 'de nyor⧾ :on :se-a :Jueh'-nyor:⧾, on 'ble 'for 'de :dhama'-' :po-wlu:, Nyorsoa po-a :dhama'-' 'de :Jueh'-nyor⧾ bo 'di. 'De or no-eh, on no nyor :due'.

⁷Nyorsoa :no-dih: 'on 'bhoi-yu: 'do tubo-wlu:⧾ 'jeh :daa bo, :en no-a 'nyii'-deh: or 'nyi-a 'on, :en :yi-dih:-a or-a' 'kpih-'.

⁸Keen' :mloror' 'mor :or no 'zeehn-a' 'zeehn 'do Nyorsoa-a' nyor⧾-a' klehkpeh 'zorn, 'de or 'nyi 'on :koan: :daa, 'on 'ye 'de nyor⧾ :on :se-a :Jueh'-nyor⧾ :gwluhuh' zela: :ka 'Klae no-eh, 'de :a 'ble-a :bhorlie' :dhulu', :eh nyor se-a zlo-a' 'beh-dih:,

⁹'de 'on 'ye-eh' no 'de nyor⧾-a' klehkpeh 'ye-eh' 'ye :ka Nyorsoa-a mu-a or-a' 'slan or 'dhu-a, or-a' :koan: :no-dih-eh :no. Nyorsoa :or no-a deh⧾-a' klehkpeh-a' noo-nyor, or 'zile: deh :daa 'weh 'do or :porluh ken :chio'lo: 'do ti :dhorno'⧾ :en zi-a 'di :dee'.

¹⁰Deh no-eh, ti :a :ne-a ken :naa, or 'bhorn or 'ye 'chore :yi-dih: 'de or 'ye or-a' :toror' 'doror: 'dor, 'enjor-nyor:⧾ :on :ne-a 'de or 'bli yai' 'i :to-dih:, :yuh :on :korn-a deh⧾ wlu 'ken-: 'dekorn: :yuh :on :korn-a 'kpih-:.

¹¹Or no deh⧾ :daa 'weh, :ka or no-a en-' 'dhu-a' :eh 'wluh-a 'de eh-a' glu 'dhu 'da. :A-a' :Gwlor :baa' :Yusu' 'Klae, or-: or :yi-dih:-' 'de en :no-eh:.

¹²:A-a' 'Klae :ne-eh-: or-a' dhih 'jeh-' :po-eh-: me-: no-eh, 'de :a :ku :gwluhuh', :a :za :fano :gwlii', 'de :a mu 'o Nyorsoa ybei'.

¹³:Yee' eh-a' dhih, 'an bale a 'weh, a-a' :porluh⧾ :nee' 'zorn 'kpa, :mor 'on 'ye 'kle 'do a-a' dhih bo. A 'ye 'o deh 'ye :dhih 'o, 'de 'an 'ye 'kle.

¹⁴:Yee' eh-: :korn dhih, 'an 'jli dih 'do 'koor-dlu⧾ ken 'do :a :Baa' Nyorsoa ybei'.

¹⁵'De or bo, 'do :wor deh⧾-a' klehkpeh-: 'dekorn: nyor⧾-a' klehkpeh-: :on :ne-a 'de or 'bli yai'-: 'dekorn: dha yao 'zorn-: an-a' :febeh' 'wluh.

¹⁶'An bale Nyorsoa 'weh, 'de or-a' :bhorlie' :dhulu' 'di, or-a' :Zulu 'ye a 'kpih 'nyi, 'de a 'di.

¹⁷'De 'an bale-or :neheh', 'de 'Klae 'ye 'o a :porluh⧾ ken 'ti, :eh :yi-dih:-a dhih 'jeh-' :po-eh:-'. 'An bale-or 'de deh⧾-a' klehkpeh a mu-a :no, en 'ye :ybeh-dih-eh 'i kor,

¹⁸'de a mor-: 'dekorn: Nyorsoa-nyor⧾-a' klehkpeh-: a 'ye 'kpih 'ble, :en mu-eh :no, 'de a 'ye-eh' yubo: deh 'jeh, :ka 'Klae no-a a-a' :ybeh-eh 'gabaa, :eh :zi-a 'o ken dih.

¹⁹'An bale Nyorsoa 'weh :neheh', a 'ye :ka 'Klae no-a a-a' :ybeh-a' 'gabaa, a 'ye-eh' yubo:, :ybeh-eh-a' :yeh nyor se-a 'zorn :gweh-eh 'beh-dih:. Deh :daa, eh-: :korn dhih 'an bale Nyorsoa, a 'ye or-a' kplen-a' klehkpeh-' dih 'yi-dih:.

²⁰Nyorsoa 'beh-dih: or 'ye deh⧾ :doru' no, 'de or-a' 'kpih :en no-a :koan 'de :a 'di, en 'ye 'o :yih :a dhele-or dih-: 'dekorn: :yih :a na-dih-a :gwluhuh' dih-' :zi.

²¹Dhih-a' 'i 'beh-a' 'do or bo :eh :yi-dih:-a 'chore-: 'dekorn: :Yusu' 'Klae-: 'do ti-a' klehkpeh bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.