Read Eastern Krahn Ehfesor-chlee-deh: 4 Bible Online

Ehfesor-chlee-deh: 4 - Eastern Krahn bible

Ehfesor-chlee-deh: 4

¹:Yee' 'mor :Poror' :or no-a :kasue-nyor 'do :Gwlor :baa'-a' dhih bo, 'an bale a 'weh, Nyorsoa 'da a 'weh, a 'ye or-a' nyor⧾ no, :yee' a :ne 'kmo :ka or-a' nyor⧾ :ne-a.

²:Yee' 'do ti-a' klehkpeh bo, a :ya a-a' 'jeh ya. A no 'yi :kpon-eh-nyor⧾. A kpon a-a' :porluh dih. A :to-dih: a-a' :ybeh-dih-eh a 'bei' 'i, 'do a-a' :porluh⧾-a' dih :ku-dih-eh bo, 'do an-a' noo-kplen bo.

³A po 'de 'kpih deh 'jeh, a 'ye deh⧾-a' klehkpeh no, a 'ye ken dih kpon-dih-eh: Nyorsoa-a' :Zulu 'nyi-a a-uh 'dlu bo kpa. Or-a' :Zulu: :dao', mo-: no-eh, 'de a 'ble wlu-' dih 'worn-eh, :eh po-a a :dha :due'.

⁴:Yee' :ka a-a' klehkpeh, a 'ble-a Nyorsoa-a' :Zulu :due', :yee' a-a' klehkpeh a no yau :due' 'de 'Klae-' :ke. 'Ka-: eh :ne :ke, a dhe deh :due' :gwlii' :eh :korn-a dhih Nyorsoa 'da a-uh.

⁵'De mor :ke :a 'ble :Gwlor :baa' :due' 'i-a' :due' gbai. 'De :a-a' dhih 'jeh-' :po-eh :ne :due'. 'De :a-a' 'ni 'dlu :po-eh :ne :due' :ke.

⁶Nyorsoa :due' 'i-a' :due' 'klein', :or no-a :Baa' 'do nyor⧾-a' klehkpeh bo, :or no-a nyor :klaba' 'do nyor⧾-a' klehkpeh 'dlu. 'De or :yi-dih: :a-a' klehkpeh-', or no :koan, 'de or :ne :a-a' klehkpeh-'.

⁷'Klae 'nyi :a-a' :due' :due' 'nyii'-deh:⧾ 'doror: 'dor, 'de or se 'kwa dih :kmu.

⁸Eh-: :korn dhih Nyorsoa-a' 'chlee-deh 'da, Ti or mu-a 'de yai', :yee' nyor⧾ or du-a, mo-: or :kpa-dih: 'de, 'de or 'nyi :gwlor-nyor⧾ 'nyii'-deh⧾.

⁹:Yee' deh or-a' yai' :mu-eh :bleh-dih: 'i :eh? Eh :bleh-dih: 'i or yi 'bluhbor: :zai' 'noror :gwlebo.

¹⁰:Yee' 'do eh-a' dha, nyor :or :ne-a :due' :or yi-a 'noror 'bluhbor, or-: 'o, :or mu 'o yao :gwlii', 'de or zi, or mu 'de yao 'de :dha :dhorno', 'de or 'ye deh⧾-a' klehkpeh-' dih :ne.

¹¹Or-: :ne-a :due', or-: 'o, :or 'nyi :gwlor-nyor⧾ :koan: 'doror: 'dor. Or :za :noo', on 'ye or-a' dboo-nyor⧾ no, :noo' 'ye or-a' wele-eh: :po-nyor⧾ no, :noo' 'ye Nyorsoa-a' tubo-wlu:⧾ 'jeh deh⧾-' dih kpa, :noo' 'ye 'chore-a' nyor⧾ :na-dih-nyor⧾ no, 'de :noo' 'ye nyor⧾ deh :torne-nyor⧾ no.

¹²Or no deh⧾ :daa 'weh or 'ye Nyorsoa-a' nyor⧾ 'kpa po, 'de on 'ye :koan: nyor⧾ :an zi-a 'o or klei' an no-a, on 'ye-or' no, 'de 'Klae-a' nyor⧾ :on 'dhu-a or-a' yau, on 'ye :kmu.

¹³'De :a-a' ken dih kpon-dih-eh 'ye ken dih kpon-dih-eh: 'jeh no, 'de :a-a' dhih 'jeh-' :po-eh 'di-: 'dekorn: :a-a' Nyorsoa-a' 'Yu-a' deh-' dih 'worn-eh 'di-:. 'De :a 'ye 'yu-yu-deh:⧾ :no-eh 'bor, 'de :a 'ye 'Klae-a' kplen-a' klehkpeh-' dih 'yi-dih:.

¹⁴:Yee' :a-a' :gweh-' 'nynuu: :nyene' :neheh', :an po-a nyor⧾ deh :torne-eh-a' klehkpeh, dhih 'jeh-', :eh nyor⧾ sih-deh:⧾ :torne-nyor⧾-a ya-a 'de, 'de nyor⧾ 'sleh dih :po-dih: ka 'di, :eh gweh-a 'dho yobo'-a' 'duh⧾-a kpa-a, en ya-a de, 'de :pobor'-a bla-a 'for⧾-a' klehkpeh bo dih.

¹⁵:Yee' :a :korn :a 'ye ku 'de 'Klae-a' deh⧾-a' klehkpeh 'di :or :ne-a 'o 'chore-a' klehkpeh 'dlu. A :za dhih-a' 'yor-eh-' 'de a-a' 'jeh 'nyne bo, 'de :ybeh-dih: ka 'di. Me-: :a mu-' :yi-dih: 'de :a 'ye ku.

¹⁶:Yee' :ka or :korn-a deh⧾-a' klehkpeh :en :ne-a 'o yau 'bhun wlu 'ken, eh-: no-eh, 'de yau-a' klehkpeh on :po-eh: :dha :due'. 'De an-a' 'yi 'dhu-dih-deh:⧾, me-: kpon-uh dih. :Yee' :mor yau-a' 'for⧾-a' klehkpeh no an-a' :koan on :korn on 'ye-a' no, :yee' yau-a' klehkpeh an mu :ku 'de :ybeh-dih-eh 'di, 'de on 'ye :kmu 'do an-a' 'jeh bo.

¹⁷:Yee' 'de :Gwlor :baa'-a' 'nyne 'di, 'an 'dhu a 'slen, nyor⧾ :on se-a Nyorsoa yubo:, 'kmo on :ne-dih:-a 'kmo, nyor-a' :kpa-uh' 'dlu bo. Nyor⧾ :dao', deh⧾ an-a' :porluh⧾-a na-dih-a :gwluhuh' dih, en se deh 'di :ne.

¹⁸'De an-a' deh-' dih 'worn-eh :ne 'de :kule-'. 'Kmo :sie: :febeh' Nyorsoa 'nyi :a-uh, on se 'for 'ble 'de eh 'di. Deh no-eh, on se deh yubo:, 'de an-a' :porluh⧾ :kmu, on :se-' 'bhorn on 'ye deh yubo:.

¹⁹Deh-a' :no-dih-uh dhen :dele' ka. On :za an-a' 'jeh 'kwla, 'de 'pebe' 'i 'kpa-eh bo. Deh⧾ 'doror: 'dor :en se-a :vlehehn'-' :gweh, me-: an-a' :porluh⧾-a sin, on 'ye no.

²⁰Eh :se-eh :mor a :se-' 'chean' 'de :Yusu' 'Klae-a' deh 'di.

²¹Keen', a 'worn or-a' dhih-: dih. :Ka a 'dhu-a or-a' klei' :zi-nyor⧾ :naa, on :torne: a dhih-a' 'yor-eh: :en :ne-a 'de or-a' deh 'di 'weh.

²²:Yee' 'do eh-a' dha, 'kmo a :ne-dih:-a 'kmo-' :dee', a 'bor an-a' 'kmo :ne-dih-eh :dele' ka, :on no-a 'kmo soa, :on :ne-a 'de a-a' noo-deh:⧾ soa bo. A-a' 'bhororn'-deh⧾-zon:⧾ :en bo-dih-a a dih :dee', me-: 'kor-dih a-uh.

²³:Yee' a-a' :porluh⧾-: 'dekorn: a-a' 'dlu 'di dih :na-dih-deh⧾-: en :korn en 'ye :dele'-' :ne.

²⁴'De a 'ye ku :dele'-' pa. Ku :dele' :daa Nyorsoa no-uh', 'de on gweh or-a' 'yor-eh. :Yee' a mu 'yi 'sleh-nyor⧾-: 'dekorn: nyor⧾ :on :dhe-dih-eh 'for 'i 'do or bo-: :no 'jeh ka.

²⁵:Yee' 'do eh-a' dha, sih 'tmo-eh se :ne :neheh'. 'Nyi nyor⧾-a' klehkpeh :za dhih 'jeh-' 'de an-a' 'Klae :de-di'-boi' bo. Deh no-eh, :a-a' klehkpeh, :a no deh :due' 'de 'Klae-'.

²⁶:Yee' :mor a 'kpa 'chehn-', a-a' 'worn-:-' a-a' 'chehn-' :no-eh' a-a' :no-' deh-zon. 'De mor a-a' 'chehn-' :gor-dih:-' glu.

²⁷'De mor, a-a' 'worn-:-' 'ku-a' 'ye-:-' a-a' ka.

²⁸:Yee' nyor :or 'yli-a, or 'bor 'yli-a'. 'Nyi or no or-a' son, or 'ye :koan: 'jeh nor no, 'de or 'ye nyor⧾ :on :korn-a son⧾ se-a 'o nyni, an-a' :za-dih-eh 'beh-dih:.

²⁹A-a' :nyni-' 'worn dih. Jorwor: a 'pehn-dih: wlu⧾ dih, wlu⧾-a' :yih :en 'beh-dih:-a :en 'ye-a 'de nyor⧾-a' 'kpih po-: en-' :yih :en 'beh-dih:-a :en 'ye-a nyor⧾ :porluh⧾ 'di dih dhe-: me-: a 'ye no. :Yee' :mor a no :ao', :yee' nyor⧾ :on :to-a a-a' wlu :dou'⧾ bo, eh mu-uh 'o deh :po.

³⁰A-a' :no-eh' 'de Gban 'i :ne :Zulu-a' 'zlu-:-' 'do a-a' dhih bo. Deh no-eh, Nyorsoa-a' :Zulu: :dao', mo-: or 'nyi a-uh, eh 'ye a 'i :to-dih:, :ka eh mu-a 'we-eh :korn, or 'ye-a a zelie:.

³¹Dhih 'bor 'de a 'di 'neh-eh, 'de 'chehn 'bor 'de a 'di dih :sin-dih-eh. A 'bor nyor⧾ 'yi dih 'wor-dih-eh, 'de a 'bor nyor⧾ deh⧾-zon⧾ 'bhun dih :za-dih-eh. A 'bor 'galo-deh⧾-a' klehkpeh-a' no-a'.

³²Jorwor: a 'ble :porluh-a' 'yi dih :nmor-eh. A 'ye a 'bei' :wehlih. :Mor on no a deh⧾-zon⧾ 'bhun, :yee' a 'ma-dih: an-a' deh⧾-zon⧾-a' dhih bo, :ka Nyorsoa no-a a-a' deh⧾-zon⧾-a' dhih bo 'ma-dih-eh :ke 'Klae-a' dhih.