Read Eastern Krahn Ehfesor-chlee-deh: 5 Bible Online

Ehfesor-chlee-deh: 5 - Eastern Krahn bible

Ehfesor-chlee-deh: 5

¹:Yee' :ka a 'dhu-a Nyorsoa-a' :dhih :kma-nynuu, :yee' deh⧾ or no-a, me-: a 'ye no :ke.

²'De mor 'nyi :ybeh-dih-eh :na-dih: a-a' 'kmo :ne-eh, :ka 'Klae no-a :a-a' :ybeh-eh, 'de or :za-a or-a' :febeh' 'kwla 'do :a-a' dhih bo, :eh no-a gban 'i 'dhu-dih-deh: :eh 'pehn-dih:-a Nyorsoa-a' :porluh dih.

³:Yee' :ka a no-a Nyorsoa-a' nyor⧾, :yee' eh se 'i 'sleh nyor 'ye 'tmeor:⧾ :korn-eh-: se :vlehehn'-' :gweh-: deh⧾-a' klehkpeh-a' 'klan :korn-eh-: a 'ye en-' deh-beh no. A-a' :no-ih', 'de nyor⧾ 'plo :ne-' a 'nyne-' 'si, 'do en-' deh 'bhun.

⁴'De mor eh se 'yi dih :nmor a 'ye 'de 'za⧾ po, 'de a 'ye :bobo-dhih-' :za, a 'ye :goba'-dhih-zon⧾ 'wluh :en kor-a 'nynor-: yibeor-: deh 'i. Jorwor: deh a 'ye-a' no, eh-: 'dhu, a po Nyorsoa-a' 'zio.

⁵:Yee' a yubo-eh', nyor⧾ :an korn-a 'tmeor⧾-: :yuh se-a :vlehehn'-' :gweh 'do Nyorsoa ybei'-: 'dekorn: nyor⧾ :on :korn-a deh⧾-a' klehkpeh 'klan-: on se 'for 'ble 'de 'Klae-: 'dekorn: Nyorsoa-: an-a' nyor⧾ wlu 'ken :korn-eh 'di. Deh :korn-a dhih 'klan :korn-nyor⧾ :se-a' 'de :ne i :ke, eh-: 'dhu, deh⧾-a' klehkpeh-a' 'klan :korn-eh no deh⧾ :nee'-a' :weheh' :za-eh-a' 'for.

⁶A-a' 'worn-:-' nyor⧾-a' :no-' wlu⧾ :en se-a deh 'di :ne, 'de an-a' :bo-dih:-' a dih, deh⧾ :daa, en-' dhih. Deh no-eh, deh⧾ :daa en-' dhih :oo' Nyorsoa-a' 'chehn-yuba-a mu 'noror nyor⧾ :on se-a 'o or-a' 'tele' dih dhe bo 'bili:.

⁷:Yee' 'do eh-a' dha, a mor-: 'dekorn: nyor⧾-a' 'jeh :dao'-: a-a' nena:-' bo.

⁸A-a' 'jeh 'yor-eh: :ne 'de :kule-' :dee'. Jorwor: :ka a no-a :Gwlor :baa'-a' nyor⧾ :naa, :yee' a :ne 'de zorn-pli-'. :Yee' eh-a' dhih, 'nyi a :ne 'kmo :eh gweh-a :ka nyor⧾ :ne-a 'de zorn-pli-'.

⁹Deh no-eh, zorn-pli: 'o, me-: :an ya 'de 'bi 'jeh ne-a' po-a', :en no-eh, 'de nyor⧾-a no-a deh⧾ 'jeh-: :yih :en 'sleh-a 'i-: 'dekorn: dhih-a' 'yor-eh-:.

¹⁰A vorn a 'ye deh :eh 'pehn-dih-a :Gwlor :baa'-a' :porluh dih yubo:.

¹¹'De mor a-a' :po-' deh⧾ :en se-a deh 'di :ne son 'di, :yih nyor⧾ :noo'-a no-a :en no-a deh⧾ :en :korn-a 'de :kule-' bo. Jorwor: a no-eh, 'de nyor⧾ 'ye deh⧾ :dao' yubo: :ka en no-a deh⧾-zon⧾.

¹²Deh⧾ an 'zile-a 'de an no-a, en no dhen-deh:⧾ nyor⧾ 'ye en-' dhih-' :za-a' 'jeh :sloror'.

¹³:Yee' :mor eh 'dhu deh⧾-a' klehkpeh :daa, en yi 'o zorn-pli-', :yee' :gwlor-nyor⧾ yubo-eh' deh en 'dhu-eh:-'.

¹⁴Deh no-eh, zorn-pli: 'o, me-: :to-dih: :a deh⧾-a' klehkpeh 'i :ka en :ne-a. Eh-: :korn dhih 'de nyor⧾ :noo' 'da, :Sorn-', 'moo'-nyor:. 'Wluh 'de nma-dih-deh 'di. :Yee' 'Klae-a' zorn-pli-a mu :fan 'do :on ken.

¹⁵:Yee' 'do eh-a' dha, a 'wla :gwluhuh' dih :ka a no-a 'kmo-' :ne-eh. A-a' :ne-' 'kmo :ka nyor :or se-a deh 'i yubo:. Jorwor: a gweh :toror' :korn-nyor.

¹⁶Ti-a' klehkpeh a 'ble-a :naa, 'nyi a :no-dih-ih :koan, nyor-a' :zi-dih:-' ti, deh no-eh, ti-zon:⧾ 'o, :a :ne ken :naa.

¹⁷:Yee' eh-a' dhih, a-a' :no-' :bobo-nyor⧾. Jorwor: a vorn a 'ye deh :Gwlor :baa'-a 'bhorn-a a 'ye-a' no, a 'ye-eh' yubo:.

¹⁸A-a' :no-' nomor 'na-nyor⧾, :eh mu-a a nyor⧾-gba-' :po. Jorwor: Nyorsoa-a' :Zulu-a' dih 'yi-dih-eh:, eh-: a 'ye 'dlu bo kpa.

¹⁹:Mor a :taa 'de a 'bei' bo wlu, :yee' a no Nyorsoa-a' 'chlee-deh-a' 'duh⧾-: 'dekorn: or-a' 'zio :po-duh⧾-:. :Yee' a ble 'duh⧾ Nyorsoa-a' :Zulu 'nyi a-uh. A ble 'duh⧾, a 'ye :Gwlor :baa'-a' 'nyne ya po 'do a :porluh⧾ ken.

²⁰:Yee' 'de :a-a' :Gwlor :baa' :Yusu' 'Klae-a' 'nyne 'di, a po :a :Baa' Nyorsoa-a' 'zio 'do ti-a' klehkpeh bo, 'do deh⧾-a' klehkpeh bo.

²¹A :ya a-a' 'jeh ya 'do a 'bei' 'zorn :due' :due'. Deh no-eh, 'Klae-a' :fano-a' ple-a', :dhih 'o, a no-eh.

²²:Yee' a :mor 'nynor⧾-kpao'⧾-a:, a :ya a-a' 'jeh ya 'do a-a'a: yibeor-boi' 'zorn, :ka a no-a a-a' 'jeh ya :ya-eh 'do :Gwlor :baa' 'zorn.

²³Deh no-eh, nyor-kpalu 'ble 'kpih 'do or-a'a: 'nynor 'dlu :ka 'Klae no-a, 'de or 'ble-a 'kpih 'do 'chore 'dlu :ke. 'De mor, 'Klae-a' 'jeh 'yor-eh:, or-: no 'puh-dih-nyor 'do 'chore bo, :eh 'dhu-a or-a' yau-'.

²⁴:Yee' 'do eh-a' dha, 'nynor⧾-kpao'⧾ :korn on 'ye an-a' 'jeh ya :ya 'do an-a'a: yibeor-boi' 'zorn 'do deh⧾-a' klehkpeh 'di, :ka 'chore-a no-a eh-a' no-a' :ke 'do 'Klae bo.

²⁵:Yee' a :mor yibeor-boi'-a:, a :ybeh a-a'a: 'nynor⧾-' :ke, :ka 'Klae no-a or-a'a: 'chore-a' :ybeh-a', 'de or :za-a or-a' :febeh' 'kwla, or 'ye-a' 'meh, 'do eh-a' dhih bo.

²⁶Or no deh :daa 'weh, 'de 'chore 'ye 'for 'i :dhe-dih-eh: 'do Nyorsoa bo, 'do or-a' tubo-wlu⧾-a' 'kpih bo. 'Ni, eh-: or no, 'de or worlor-eh, eh :gweh :vlehehn'-'.

²⁷Or no-eh', 'de 'chore 'ye 'o or ybei' dih :nyna, 'de eh-a' 'yi dih :nmor-eh 'di, :eh se-a fan 'bhun :ne, 'de :eh se-a 'pona:, deh-beh-deh-beh se-a 'o 'bhun :ne, 'de :eh 'sleh-a 'i 'do Nyorsoa ybei', :eh se-a dhih 'bhun :ne.

²⁸:Yee' nyor⧾-kpalu⧾ :korn on 'ye an-a'a: 'nynor⧾-' :ybeh :ka an no-a an-a' 'jeh 'yor-eh-a' yau-a' :ybeh-a' :ke. Nyor-kpalu: :or :ybeh-a or-a'a: 'nynor-', :yee' or :ybeh or-a' 'jeh-' 'weh :ke.

²⁹Eh se nyor :korn :or 'ye-a or-a' 'jeh 'yor-eh-a' yau 'nyeh. Nyor⧾-a' klehkpeh, an 'nyi an-a' yau dii-deh:, 'de an pobo 'o on bo dih :ka 'Klae-a no-a, :a :mor :or 'dhu-a or-a'a: 'chore, :a-a' dhih :ke,

³⁰deh no-eh, :a no or-a' yau: :daa, an-a' 'for :ke.

³¹:Ka Nyorsoa-a' 'chlee-deh no-a eh-a' :za-a', eh no-a, Eh-: :korn dhih, 'de 'nynor-: 'dekorn: nyor-kpalu-: an mu an-a' 'cheh dih 'tali:, 'de on 'ye :dha :due' 'ti. :Yee' mo-: :on :ne-a 'sororn', an mu nyor :due' :no.

³²:Yee' wlu⧾ :daa, me-: 'dhu 'slan :or 'kpa-a deh ken, :or 'wluh-a 'de Nyorsoa-a' 'chlee-deh: :dao' 'di, me-: 'on 'worn-' dih :ka en za-a 'Klae-: 'dekorn: or-a'a: 'chore-: an-a' dhih-'.

³³'De mor wlu⧾ :daa, en wlu-' 'de a bo :ke. :Yee' a :mor yibeor-boi'-a' klehkpeh, a :korn a 'ye a-a'a: 'nynor⧾-kpao'⧾ :ybeh, :ka a no-a a-a' 'jeh 'yor-eh-a' :ybeh-a'. 'De mor 'nynor⧾-kpao'⧾-a' klehkpeh, on :korn on 'ye an-a'a: yibeor-boi' deh-' 'ye :ke.