Read Eastern Krahn Ehfesor-chlee-deh: 6 Bible Online

Ehfesor-chlee-deh: 6 - Eastern Krahn bible

Ehfesor-chlee-deh: 6

¹:Yee' a :mor 'wluhuh'-nynuu-a:, :ka a :korn-a 'de :Gwlor :baa' bo, :yee' a dhe 'o a 'de-: 'dekorn: a :baa'-: an-a' wlu dih. Eh-: no 'yi 'sleh-deh a 'ye no.

²:Zai'-tele' :eh :korn-a wlu :po-eh: :dhama'-', :mor nyor no-a, :yee' or mu-a 'o deh 'ye-:, eh-: :dhe dih. A 'ye a 'de-: 'dekorn: a :baa'-: deh-',

³'de deh⧾-a' klehkpeh 'ye 'yi dih :nmor 'do a bo, 'de a 'ye 'kmo-' :gwle dha 'bluhba ken.

⁴A :mor 'nynuu :bai'-a:, nyor-a' :no-' deh 'do a-a'a: 'nynuu 'bhun :eh se-a 'i 'sleh, 'de eh :ne-uh' 'chehn-' po. Jorwor: :Gwlor :baa'-a' nyor⧾-a' kplen-: 'dekorn: 'slen-: me-: a 'ye-uh' 'dhu-dih:, 'de on 'ye 'de en 'di :ku-dih:.

⁵:Yee' a :mor 'ge-nynuu-a:, a dhe 'o a-a'a: nyor⧾ :klaba'⧾-a' wlu dih, :on :ne-a dha yao 'zorn, 'de deh-' 'ye ka 'di-: 'dekorn: an-a' :fano: :ple-eh 'di-:. 'De mor 'nyi eh tba 'de a 'di dih, :ka a mu-a 'Klae-a' dhih :no :ke.

⁶Eh :se :mor an-a' 'yli-eh :ne 'o a ken, 'de a 'ye-eh' no :deh, :eh gweh-a :ka a 'bhorn-a on 'ye-a' a dhih bo po :deh. Jorwor: 'do a-a' :porluh⧾-a' klehkpeh bo, a no deh Nyorsoa 'bhorn-a a 'ye-a' no, :ka a no-a 'ge-nynuu :naa 'do 'Klae bo :ke.

⁷A no a-a'a: 'ge-yu: :koan :due' :due', 'de 'mona: ka 'di, :eh gweh-a :ka nyor no-a :Gwlor :baa'-a' 'bhoi-yu, :eh :se-a 'o :gwlor-nyor bo.

⁸A yubo-eh', :ka :Gwlor :baa'-a mu-a nyor⧾-a' klehkpeh geli' :za, 'ge-nynuu-: :korn mor :se 'ge-nynuu-: 'do :koan: 'jeh on no-a bo.

⁹:Yee' a :mor 'ble-a 'ge-nynuu, a 'ye a-a'a: 'ge-nynuu deh-', 'de :ka :ne-a :due' 'di. A-a' :no-', a mu-uh deh 'bhun :no. A yubo-eh', :ka a mor-: 'dekorn: a-a'a: 'ge-nynuu-: a :korn-a 'de Nyor :Klaba' :due' bo :or :ne-a 'de Nyorsoa 'bli yai', :or-a' :za-' :gwie-for :due'.

¹⁰:Yee' eh-a' klehkpeh-a' 'dlu-' :jla 'da, a :ku-dih: a-a' 'kpih dih 'do :Gwlor :baa'-a' :ne-a' bo. 'Nyi or-a' dhih-a' 'i 'beh-kpih :ku-dih: a dih.

¹¹A pa Nyorsoa-a' ta-tiei-a' klehkpeh or 'nyi-a a-uh, 'de a 'ye 'ku-a nyor⧾ dih :bo-dih-eh 'i :nyna.

¹²Deh no-eh, eh :se :gwlor-nyor⧾-a' nyior-tu: :a :se-' bo vorn. Jorwor: :a vorn 'kwla 'ye-dih-deh:⧾ :en :ne-a 'o yao :gwlii'-: :yih :en :korn-a :kule wlu 'ken dha yao 'zorn-: 'dekorn: :yih :en :korn-a 'kpih-:.

¹³:Yee' 'do eh-a' dha, a pa Nyorsoa-a' ta-tiei-a' klehkpeh :naa. 'De :mor 'kulu-we-eh 'yle, 'de a :ne-' ken :za-dih:. :Yee' :mor a vorn :chio'lo:, 'de a 'ye :ao', a se sea, 'de a 'ye-eh' 'dlu-' jla, :yee' a mu 'o :dha a :nyna-a dih :nyna 'gboror:.

¹⁴:Yee' a :nyna dih deh 'jeh, 'de dhih-a' 'yor-eh 'di, eh 'ye 'behleh no, a 'ye-eh' bo 'dhu. 'Yi 'sleh-deh:, eh-: 'ye a-a'a: :gwlii' :kan-dih-deh no.

¹⁵A :ne buh⧾ ken a 'ye Nyorsoa-a' tubo-wlu:⧾ 'jeh :en 'ble-a wlu-' dih 'worn-eh :po 'da mu. 'Nyi a-a' buh⧾ ken :ne-eh: :dao', eh no buh⧾-' :po-deh 'do a bo.

¹⁶:Yee' 'do ti-a' klehkpeh bo, a kpa dhih 'jeh-' :po-eh, eh 'ye a-a'a: 'yi :kan-dih-deh no. Deh no-eh, eh-: a mu :no, 'de a 'ye neh-a' klehkpeh :eh mu-a 'o 'ku-a'a: pluh-sehn mlai' 'wluh-: 'mo-dih:.

¹⁷A 'worn-dih: 'puh-a' Nyorsoa 'nyi-a a-uh or-a' dhih ken dih. Or-: no deh nyor⧾-a 'dhu-a 'dlu 'de deh-a' tba-a nyor⧾. 'De mor a 'worn-dih: Nyorsoa-a' wlu :on no-a or-a' :Zulu-a' :bhla 'jlehn-a' dhih ken dih :ke.

¹⁸A no deh⧾-a' klehkpeh :daa 'de Nyorsoa-a' bo :wlu-eh 'di. A dhele-or dih, or 'ye a-uh' :za-dih:. A :wlu 'de or bo 'do ti-a' klehkpeh bo 'de or-a' :Zulu-a' 'kpih 'di, :ka an no-a a-a' :na-dih-eh. :Yee' eh-a' dhih, a-a' 'mo-:-', 'de mor a-a' :sea:-'. A :wlu 'de or bo 'do ti-a' klehkpeh bo 'do or-a' nyor⧾-a' klehkpeh, an-a' dhih bo.

¹⁹'De mor a :wlu 'de or bo, 'do 'an dhih bo :ke, or 'ye 'on tubo-wlu⧾ 'nyi, :mor 'on :taa or-a' dhih-' :za 'da mu. 'De 'on 'ye 'slan :or kor-a Nyorsoa-a' tubo-wlu:⧾ 'jeh 'i, 'on 'ye-or ken dih zela:, 'de :gwluhuh' :ku ka 'di.

²⁰:Yee' :koan: :daa 'on no-a, eh-: no-eh, 'de 'on :ne :kasue 'di :naa. Jorwor: a bale: Nyorsoa, 'on 'ye :gwluhuh' :ku, :ka 'on :korn-a 'on 'ye-a' :ne, :mor 'on :taa tubo-wlu:⧾ 'jeh :daa po.

²¹:Yee' :Teki'kor: :or no-a :a-a' :dhih :kma-de-di'-: 'dekorn: :dhehehn-bhoi-yu-: 'de :Gwlor :baa'-a' deh 'di, or-: mu a tubo-wlu⧾-a' klehkpeh 'nyi-: 'do 'an dhih bo, 'de a 'ye-eh' yubo: :ka 'on :ne-a :naa, 'dekorn: deh 'an no-a.

²²Eh-: :korn dhih 'de 'an dbo-or 'de a bo, or 'ye a :gwluhuh' zela: :ka :a-a' klehkpeh, :a :ne-a :naa, 'de or 'ye 'de a-a' 'kpih po.

²³:Yee' 'nyi Nyorsoa :or no-a :a :Baa'-: 'dekorn: :a-a' :Gwlor :baa' :Yusu' 'Klae-: or 'nyi 'Klae :de-di'-boi'-a' klehkpeh wlu-' dih 'worn-eh: 'dekorn: :ybeh-dih-eh: :eh 'ble-a dhih 'jeh-' :po-eh-:.

²⁴'Nyi Nyorsoa-a' mla :ne 'o nyor⧾-a' klehkpeh :on :ybeh-a :a-a' :Gwlor :baa' :Yusu' 'Klae bo, 'de :ybeh-dih-eh: :eh se-a 'dlu-' :jla 'da :korn 'di.