Read Eastern Krahn :Fele'pa-chlee-deh: 2 Bible Online

:Fele'pa-chlee-deh: 2 - Eastern Krahn bible

:Fele'pa-chlee-deh: 2

¹:Yee' a-a' 'Klae-a' :ne-a', eh po 'de a-a' 'kpih 'weh :e? Or-a' :ybeh-eh dhe a :porluh⧾ 'di dih 'weh :e? A mor-: Nyorsoa-a' :Zulu-: a 'woorn-dih: wlu-' dih 'weh :e? 'Klae :torne: a :gwluhuh' :nmor-eh-: 'dekorn: nyor⧾ :wehlih 'ye-eh-: 'weh :e?

²:Yee' :mor eh :ne :ao', :yee' a no-eh, 'on 'ye 'mona-' dih 'yi-dih:, 'do a-a' :gwluhuh' :due' 'ble-eh bo-: a-a' :ybeh-dih-eh :due' 'ble-eh bo-: a-a' :porluh :due' 'ble-eh bo-: 'dekorn: a-a' :gwluhuh' dih :na-dih-eh :due' 'ble-eh bo-:.

³Deh⧾-a' klehkpeh a mu-a :no, a-a' :zi-' a-a' 'jeh 'yor-eh dhih, 'de a-a' 'ble-:-' :porluh:⧾ :klaba'⧾. Jorwor: a :ya a-a' 'jeh ya 'do a 'bei' bo. :Yee' a 'ye a 'bei' deh-', eh 'ye 'o a-a' 'jeh 'yor-eh-' :zi.

⁴A-a' :zi-' a-a' :due'-' dhih. Jorwor: a zi a 'bei'-a' dhih :ke.

⁵:Yee' 'nyi a-a' noo-kplen :ne :Yusu' 'Klae-a' noo-kplen goor-dih:.

⁶Keen' :mloror' :Yusu' no Nyorsoa, 'de or-a' 'jeh-a' tu 'di, jorwor: or :se-' vorn, or-: Nyorsoa-: on 'ye 'beh-dih:.

⁷Jorwor: or 'tali: or-a' nyor :klaba'-deh-: dih, 'de or po 'de or-a' 'jeh 'bhoi-yu-tu 'di, 'de :ka :gwlor-nyor :ne-a, or :ne :ao' :ke.

⁸:Yee' :yeh or :yi-dih:-a 'de :gwlor-nyor-tu 'di, :yee' or :ya or-a' 'jeh-: ya, 'de or dhe 'o Nyorsoa-a' wlu dih, or 'worn-dih: or-a' 'jeh 'yor-eh-a' 'meheh'-dhih:, :eh no-a dhen-meh-a' 'do tu 'i :sloror'.

⁹:Yee' eh-a' dhih, eh-: no-eh, 'de Nyorsoa 'duo-or ya-', or 'ye nyor :klaba' no 'do deh⧾-a' klehkpeh 'dlu. 'De or 'nyi-or 'nyne, :en :ne-a 'o 'nyne-a' klehkpeh 'dlu bo.

¹⁰:Yee' :Yusu'-a' 'nyne-a' deh-' 'ye-eh-a' dhih, eh-: no-eh, 'de nyor⧾-a' klehkpeh :on :ne-a 'de Nyorsoa 'bli yai'-: dha yao 'zorn-: 'dekorn: 'de :gwlebo-: an mu 'koor-dlu⧾ yi glu :bla 'do or ybei'.

¹¹:Yee' eh-: no-eh :ke, 'de :meo⧾-a' klehkpeh 'ye-eh-' :za, :ka :Yusu' 'Klae 'dhu-a :Gwlor :baa'-', 'do :a :Baa' Nyorsoa-a' dhih-a' 'i 'beh-a' bo.

¹²:Yee' :a 'bli-nyor⧾-a:, a dhe 'o 'an wlu dih 'weh, 'do ti-a' klehkpeh bo, ti 'on :ne-a 'o a bo. :Yee' :kana :naa, :yeh 'on :tehn-a bo :naa, :yee' a :korn a 'ye 'o 'an wlu dih dhe, eh 'ye 'o :zai' neh-' :zi. :Yee' a kpa noo-deh:⧾ :en mu-a a 'puh-dih: 'dlu bo, 'do Nyorsoa-a' :fano-a' ple-a'-: 'dekorn: or-a' deh-' 'ye-eh-: bo.

¹³Deh no-eh, Nyorsoa :oo', or-: no :koan 'do a-a' :porluh⧾ ken, eh 'ye-eh' no, 'de a 'ye or-a' :porluh-a' dih 'pehn-deh-a' no-a' 'bhorn, 'de a 'ye-eh' no :ke.

¹⁴Deh⧾-a' klehkpeh a mu-a :no, a-a' :wlu-dih:-' worn dih, 'de mor a-a' :jeh-' :ke,

¹⁵'de a 'ye Nyorsoa-a' 'nynuu 'dhu-eh: :on se-a dhih 'bhun :ne, 'de :on :gweh-a :vlehehn'-', 'de 'Klae :ne-' a 'klii'-deh 'bhun 'ye-dih:, keen' :mloror' a 'ti 'de deh⧾-zon:⧾ :no-nyor:⧾ :on se-a 'i 'sleh 'nyne-'. Jorwor: a :korn a 'ye fan 'de on 'nyne-', :ka 'chuh :dhlaen: :en :ne-a 'de yai', en no-a fan-a',

¹⁶:mor a :taa-uh-a Nyorsoa-a' wlu :an 'nyi-a nyor⧾ :febeh' 'nyi. :Mor a no deh⧾ :daa, :yee' eh mu 'an buh⧾ 'i 'beh-dih: 'do 'we-eh: 'Klae-a mu-a 'de :ya 'di. Eh-: mu-eh :no, 'de nyor⧾ 'ye-eh' yubo: :ka 'yi :kma :koan: 'on no-a, or :se-a :koan: 'plo.

¹⁷A-a' dhih 'jeh-' :po-eh gweh 'slaa: :za-dih-deh: nyor⧾-a 'nyi-a Nyorsoa. :Yee' eh 'beh-dih: eh 'ye :no-eh:, 'de 'an 'meh-a' 'ye 'o a-a' 'slaa: :za-dih-deh ken 'kpa. :Mor eh no :ao' :dee', :yee' 'an :porluh-a mu dih 'pehn-:, 'de 'on 'ye a-a' klehkpeh bo 'kpa, :a 'ye 'mona :dha :due' :no-dih:.

¹⁸:Yee' a-a' 'jeh :ke, a-a' :porluh⧾ :korn en 'ye dih 'pehn, 'de a 'ye 'on bo 'kpa, :a 'ye 'mona :dha :due' :no-dih:.

¹⁹:Yee' 'on dhe-eh-: :gwlii', :Gwlor :baa' :Yusu'-a mu-eh ken dih 'worn-dih:, 'on 'ye 'dhobo:, 'on 'ye :Timehte' dbo 'de a bo, 'de 'an :porluh 'ye dih 'pehn, :mor 'on 'worn 'de a bo dih.

²⁰:Timehte' :due', or-: no nyor 'on 'ble, :or na-dih a-a' dhih :gwluhuh' dih 'gabaa.

²¹Nyor⧾-a' klehkpeh, an zi an-a' 'jeh 'yor-eh-a' dhih :due' 'klein'. An-a' 'worn, an-a' zi :Yusu' 'Klae-a' dhih.

²²Jorwor: a yubo-eh', :ka :Timehte' :to-dih:-a or-a' 'jeh :a 'i, :ka or 'dhu-a nyor 'jeh-'. Deh no-eh, or-: 'mor-: :a :no-dih: :koan :dha :due', 'do Nyorsoa-a' tubo-wlu:⧾ 'jeh-a' :po-eh bo, :eh gweh-a :ka :baa'-: 'dekorn: 'yu-: an no-dih-a :koan :dha :due'.

²³:Yee' 'do eh-a' dha, 'on dhe-eh :gwlii', 'on 'ye 'dhobo:, 'on 'ye-or 'de a bo dbo, :mor 'on yubo: :ka deh⧾-a mu-a :ne 'noror 'on bo.

²⁴:Yee' 'on :kpa-dih: :Gwlor :baa' :gwluhuh'. Eh-: no-eh, 'de 'on yubo-eh deh 'jeh, :ka 'an 'jeh 'yor-eh :se-a 'o :gwle i, 'on 'ye 'de a bo yi :ke.

²⁵Jorwor: 'mor :mloror' 'on 'da, eh no deh 'jeh, 'on 'ye :a-a' 'Klae :de-di' :Ipa'flordi'tor 'de a bo de dbo. Or no 'on 'be :koan: :no-nyor:, 'de or-: 'mor-: :a no 'Klae-a' sorye'. Or-a' 'jeh :dao', or-: 'dhu-a a-a' dboo-nyor-' a dbo-a 'noror 'on bo, :or 'ye-a 'o 'on bo dih pobo:.

²⁶'An dbo-or 'de a bo de. Deh no-eh, or 'bhorn or 'ye a-a' klehkpeh 'ye 'gabaa. 'De mor or-a' :porluh 'kpa-: 'zorn :ke. Deh no-eh, a 'worn or-a' 'nyne, on 'da, or puhba:-' :dee'.

²⁷Keen', or puhba:-' :dee'. Deh-beh: :sie: 'o :dee', or 'ye 'meh. Jorwor: Nyorsoa 'ye or-a' :wehlih 'weh. Eh :se 'do or :due' bo. Jorwor: 'do 'on bo :oo' :ke. Deh no-eh, Nyorsoa no-eh', 'de :porluh-a' 'zorn 'kpa-eh: :klaba' :dao' eh :se 'o 'on bo yi.

²⁸:Yee' eh-a' dhih, 'an :porluh-a sin-' 'gabaa, eh :zi 'o ken dih, 'on 'ye-or 'de a bo dbo. :Mor a 'ye-or :neheh', 'de a-a' :porluh⧾ 'ye dih 'pehn, 'de mor 'an :gwluhuh' dih :na-dih-eh 'ye ya yi :ke.

²⁹:Yee' eh-a' dhih, a kpon-or dih, 'de :Gwlor :baa'-a' ka 'di, 'de 'mona: ka 'di. :Ka or :ne-a, nyor⧾ :on :ne :ao', a 'dhu-uh 'o.

³⁰Deh no-eh, eh :sie: 'o deh-beh: or 'ye 'meh :dee', 'do 'Klae-a' :koan-a' dhih bo, 'de or 'ma-dih: or-a' 'jeh-a' :febeh'-a' dhih bo, 'do 'an bo 'kpa-eh bo, :eh a se-a no-a' 'beh-dih:.