Read Eastern Krahn :Fele'pa-chlee-deh: 3 Bible Online

:Fele'pa-chlee-deh: 3 - Eastern Krahn bible

:Fele'pa-chlee-deh: 3

¹:Yee' eh-a' klehkpeh-a' 'dlu-' :jla 'da, 'an 'Klae :de-di'-boi'-a:, a no 'mona, :ka a :korn-a 'de :Gwlor :baa' bo. Eh se 'i :kma 'do 'on bo, 'on 'ye deh⧾ :ne-a :due' 'chle :neheh' 'de a bo, :ka 'on no-a :zai'. Me-: mu-eh :no, 'de a 'ye deh-' dih 'worn deh 'jeh, 'de a :ne 'o :gwie 'i 'wluh.

²A 'dhu a-a' 'jeh :dhororn' 'do gbe⧾ :dao' bo, :an no-a deh⧾ :en se-a 'o :gwie 'i :ne, 'de :an chehn-dih an-a' 'jeh-a' yau dih, :an 'meh-a :bhlororn'.

³:A :mor 'o, :or 'dhu :bhlororn' 'meh-nyor:⧾ 'jeh no-'. Deh no-eh, :a za Nyorsoa-a' :weheh' 'weh, 'de or-a' :Zulu-a' 'kpih 'di. 'De mor :Yusu' 'Klae, or-: 'beh-dih: :a-a' buh⧾ 'i. :A :se-' :gwlor-nyor⧾-a' noo-deh⧾ :gwlii' dhe,

⁴keen' :mloror', 'an 'jeh, 'on 'beh-dih: 'on 'ye-ih' :gwlii' dhe :dee'. :Mor nyor 'da or 'ble deh⧾ :doru', or no-a, me-: no-eh, 'de or 'puh, :yee' 'an 'jeh :ke, 'on 'ble deh⧾ :doru', :en :korn-a dhih 'on 'ye-a' 'an 'jeh 'i 'beh-dih: :ke, :eh zi-or'.

⁵:Yeh 'on 'wluh-a, :yee' 'do 'we-eh-a' :meheh' na neh 'di, 'do :wor 'on 'meh-dih: :bhlororn'. 'Mor 'Ezlea-yu: 'o, :or 'wluh-a 'o 'Behnjemeh-a' 'cheh-dlu 'i. 'On no :Hiblu'-yu-a' 'kpa. 'Do :Jueh'-nyor⧾-a' 'tele'-a' dih :dhe-eh bo, 'mor :Falasi'i-yu: 'o :ke.

⁶'An Nyorsoa-a' :weheh' :za :porluh: mo-: 'beh 'i, eh-: no-eh, 'de 'an 'ye-dih 'chore 'kle :dee'. 'On 'sleh-: 'i :dee', 'do :Mose'-a' 'tele' dih :dhe-eh bo 'gabaa. Eh se nyor :korn, :or 'ye-a 'on 'tele' dih :kpon-dih: :dee'.

⁷Jorwor: deh⧾-a' klehkpeh :dao' 'on no-a, :en 'kpa deh ken :dee' 'do 'on bo, me-: 'an 'da-dih se deh ken 'kpa-deh⧾ :naa, 'do 'Klae-a' dhih bo.

⁸Eh :se deh⧾ :dao', en-' dhih :due'. Jorwor: 'on 'duo: deh⧾-a' klehkpeh-' 'weh, en 'ye :ao', en se deh ken 'kpa 'do 'on bo :naa. Deh no-eh, 'an :Gwlor :baa' :Yusu' 'Klae-a' yubo-eh 'kpa deh ken 'gabaa, eh zi-ih'. :Yee' or-a' dhih :oo', 'on po deh⧾-a' klehkpeh 'kwla, 'de 'on 'duo-ih', en 'ye :gbehne no, 'de 'on 'ye 'Klae kpa,

⁹'de or-: 'mor-: :a 'ye nyor :due' no. :Yee' eh :se :Mose'-a' 'tele' 'on dhe-a 'o dih, eh :se-eh no, 'de Nyorsoa :se-' 'on 'yi 'sleh-nyor 'da-dih:. Jorwor: deh 'on po-a 'Klae-a' dhih dhih 'jeh-', eh-: no-eh, 'de or 'da-dih: 'on 'yi 'sleh-nyor. Deh no-eh, dhih 'jeh-' :po-eh: 'o, eh-: no-eh, 'de Nyorsoa 'da-dih: :a 'yi 'sleh-nyor⧾.

¹⁰:Yee' deh 'an 'bhorn-a, eh-: 'dhu, 'on 'ye 'Klae yubo: deh 'jeh, 'de 'on 'ye or-a' 'kpih :en za-or 'de nma-dih-deh 'di dih 'worn. 'De 'on 'ye 'for 'ble 'de or-a' 'kle 'ye-eh 'di, 'de 'on 'ye-or' gweh, 'do :ka or no-a 'meh-a' bo.

¹¹:Yee' 'on dhe-eh-: :gwlii' :ka :mor 'on 'meh-a, :yee' Nyorsoa-a mu-a 'de 'on nma-dih-deh 'di :za :ke.

¹²:Yee' 'on :se :ao', 'on 'ye deh⧾-a' klehkpeh :daa 'weh, 'de mor 'on :se :ao' 'on gweh-ih 'zorn :weh. Jorwor: 'an vorn-' 'gabaa, 'on 'ye deh⧾ :daa 'ye. Deh no-eh, en-' dhih :oo', :Yusu' 'Klae no-eh 'de 'on 'kpa 'de or-a' 'for bo.

¹³'An 'Klae :de-di'-boi'-a:, 'on yubo-eh', 'on 'see nyni 'gboror:. Jorwor: deh :due', 'an-a' 'worn, 'an-a' no-a, eh-: 'dhu, 'an-a' 'worn, 'an-a' pobo: deh⧾ :en zi-a ya. Jorwor: :yih :en :ne-a 'de 'on ybei', me-: 'an po 'kpih bo.

¹⁴'An vorn-' 'gabaa, 'on 'ye-eh 'dlu-' jla, 'de 'on 'ye eh-a' geli' :za-dih-deh 'ye, :eh :yi-dih:-a :Yusu' 'Klae-', :eh 'dhu-a, Nyorsoa 'da 'on 'weh, 'de or 'bli yai'.

¹⁵:A :mor :yor, :or ku-a dih, 'de Nyorsoa-deh 'di, 'ka-: :a :korn :a 'ye eh-a' :gwluhuh' dih :na-dih-eh no :ke. Jorwor: :mor a :na-dih-eh :gwluhuh' dih, 'de :ka :noror' 'di, :yee' Nyorsoa-a mu-eh ken dih :florn-dih: 'de a bo.

¹⁶Deh :eh no-a :kmaa-deh, eh-: 'dhu, deh⧾ 'jeh :ne :a kpon-a dih :dee', me-: :a 'ye dih kpon 'gboror:.

¹⁷:Yee' 'an 'Klae :de-di'-boi'-a:, a-a' klehkpeh, a zi 'o 'an 'gor klei'. :Yee' nyor⧾ :an no-a deh⧾ on 'ye-a 'de :a 'kwa, a pobo-uh ya.

¹⁸'On zela: a :gwluhuh' 'weh, 'do kpor⧾ :dhulu' 'di :zai', 'de 'an za-eh de, 'de 'viin' ka 'di :neheh', eh :korn nyor⧾ :dhulu', mo-: :korn 'kmo :ne-eh gweh 'Klae-a' tu 'i 'meh-dih-eh se deh-' 'dhu-eh: 'do on bo.

¹⁹Nyor⧾ :daa, 'do ti-a' 'dlu-' :jla 'da, an mu gbe :zie:. An-a' yau-a' 'bhororn'-deh:⧾, me-: 'dhu an-a' nyorsoa-'. 'De deh⧾ :en :korn :en 'ye-uh'-a' dhen-' dih po, me-: an no-dih :nya-dih-eh ken dih. 'Kmo-a' deh⧾ :due', me-: an na-dih :gwluhuh' dih.

²⁰Jorwor: :a :mor :mloror', :a no 'de Nyorsoa 'bli yai'-a' nyor⧾. :Yee' eh-a' dhih, :a-a' :porluh⧾-a sin-', 'de :a fuo :a-a' 'puh-dih-nyor, :or 'dhu-a :a-a' :Gwlor :baa' :Yusu' 'Klae-', or 'ye 'de Nyorsoa 'bli yai' 'wluh.

²¹Or mu-eh :no, :a-a' yau: :daa :on se-a deh ken 'kpa, on 'ye :za-dih: 'de on 'ye or-a' dhih-a' 'i 'beh-yau gweh. Or mu deh :daa :no, 'de or-a' 'kpih 'di, :en no-eh, 'de or 'beh-dih:-a or 'ye-a' deh⧾-a' klehkpeh :dha :due' po, 'de or 'ye-ih' wlu 'ken :korn.