Read Eastern Krahn :Fele'pa-chlee-deh: 4 Bible Online

:Fele'pa-chlee-deh: 4 - Eastern Krahn bible

:Fele'pa-chlee-deh: 4

¹:Yee' 'an 'Klae :de-di'-boi'-a:, 'on :ybeh a 'weh, 'de 'an 'bhorn 'on 'ye a 'ye 'gabaa. A :mor :korn dhih :oo', 'de 'an no 'mona, 'de a 'beh-dih: 'an buh⧾ 'i. :Yee' :a 'bli-nyor⧾-a:, a :nyna dih deh 'jeh, 'do :Gwlor :baa'-a' deh 'di.

²:Yee' 'an bale 'Yodia-: 'dekorn: :Sehnte'ki-: on 'ye wlu-' dih 'worn-eh :korn, 'de :Gwlor :baa'-a' deh 'di.

³:Yee' 'on 'be :koan: :no-nyor: :or :ne 'an no-dih-a :koan :dha :due' 'gabaa, 'an bale :on 'weh, :on 'ye 'o 'nynor⧾-kpao'⧾ :daa bo dih pobo:, on 'ye wlu-' dih 'worn-eh:. On 'worn, on :za-dih: 'on-' 'gabaa, :mor 'on :taa Nyorsoa-a' tubo-wlu:⧾ 'jeh po, 'mo-: 'Klehmeh-: 'dekorn: 'on 'bei' :koan: :no-nyor:⧾ :noo'-: :on :korn-a 'nyne :ne-a 'de 'kmo :sie: :febeh'-a' 'chlee-deh 'di.

⁴A no 'mona 'do ti-a' klehkpeh bo, 'de :Gwlor :baa'-a' deh 'di. 'An mu-eh-' :za :neheh', a no 'mona.

⁵A no deh⧾ 'do nyor⧾-a' klehkpeh bo, 'de on 'ye-eh' 'ye, :ka a :kpon-eh 'i. Deh no-eh, :Gwlor :baa'-a' de :yi-ti-a 'koan'-: bo.

⁶A-a' :porluh⧾-a' 'beh-dih:-' a 'worn dih, 'do deh-beh-deh-beh-a' dhih bo. Jorwor: a :wlu 'de Nyorsoa bo, 'de deh⧾-a' klehkpeh 'di. Deh⧾-a' klehkpeh a mu-or dih dhele:-: 'dekorn: :yih :korn-a dhih a mu-or bale:-: a no-eh, 'de or-a' 'zio :po ka 'di.

⁷:Yee' :ka a :korn-a 'de :Yusu' 'Klae bo, Nyorsoa-a mu a :porluh-a' dih 'pehn-eh 'nyi-: :eh :gwlor-nyor⧾ se-a-' dih 'worn-eh 'beh-dih: klehkpeh klehkpeh. Eh-: mu a-a' :porluh⧾-: 'dekorn: a-a' 'dlu 'di dih :na-dih-deh⧾-: wlu 'ken :korn.

⁸:Yee' eh-a' klehkpeh-a' 'dlu-' :jla 'da, 'an 'Klae :de-di'-boi'-a:, a :na-dih: deh⧾ :daa :gwluhuh' dih, :en 'dhu-a, deh⧾ :en no-a dhih-a' 'yor-eh-: deh⧾ :en no-a deh-' 'ye-deh⧾-: deh⧾ :en 'sleh-a 'i-: deh⧾ :en :gweh-a :vlehehn'-: deh⧾ :en :nmor-a 'yli-eh ken dih-: 'dekorn: deh⧾ :en 'ble-a 'nyne 'jeh-:. Deh⧾-a' klehkpeh :en :nmor-a 'yi dih-: 'dekorn: deh⧾ nyor⧾ 'beh-dih:-a on 'ye-a' dhih bo po-: me-: a :korn a 'ye :gwluhuh' dih :na-dih:.

⁹:Yee' deh⧾ a 'chean'-a-: a :za 'noror 'on 'kwa-: 'de deh⧾ a 'worn-a 'noror 'on bo-: 'dekorn: :yih a 'ye-a 'on, 'an no-a-: me-: a 'ye no. :Yee' Nyorsoa :or 'nyi-a nyor⧾ :porluh-a' dih 'pehn-eh, or mu 'o a bo :ne.

¹⁰:Yee' 'an no 'mona: deh 'jeh neh, 'de :Gwlor :baa'-a' deh 'di. Deh no-eh, a na-dih 'an dhih :gwluhuh' dih :dele' ka :neheh'. Keen' :mloror', a na-dih 'an dhih :gwluhuh' dih 'weh :dee'. Jorwor: ti :se-' a 'nyi-eh: a 'ye-eh 'on 'i :to-dih:.

¹¹Eh :se 'on se deh 'ble, eh-: 'an 'bhorn, eh-a' dhih :oo', 'an za dhih :daa :deh. Deh no-eh, 'on 'chean' :porluh-a' dih 'pehn-eh 'weh, :ka eh-a' :yeh beh :eh 'ye :eh :ne.

¹²'On yubo: :ka :mor nyor-a' son :gweh-a, or :ne-a 'weh. 'De 'on yubo: :ka :mor nyor 'ble-a deh⧾ :dhulu', or :ne-a 'weh. 'On 'chean' :porluh-a' dih 'pehn-eh-a' :gwie⧾ 'weh, 'do ti-a' klehkpeh bo, dha :yor 'on :ne, :mor 'moeh-a' :yeh beh :eh se 'on no-: :mor 'moeh-a' :yeh beh :eh :taa 'on no-: 'an :yeh 'ble deh⧾ :dhulu'-: 'de mor 'an :yeh se deh 'ble-:.

¹³'On 'beh-dih: deh⧾-a' klehkpeh worn 'i 'weh, 'do 'kpih 'Klae 'nyi-a 'on bo.

¹⁴Jorwor: eh :nmor-: 'yi, 'de a :za-dih: 'on-', ti 'an 'ye-a 'kle :dee'.

¹⁵:Yee' a :mor :Fele'pa-nyor:⧾, a yubo-eh' deh 'jeh neh, ti 'on 'dhu-a Nyorsoa-a' tubo-wlu:⧾ 'jeh :po-eh glu :zai', 'de 'on 'ye-a 'Masordo'nia-bluhba ken 'wluh, 'chore :neheh' :se-' 'on bo 'kpa. A :due' gbai, a :mor 'kpa 'on bo, :or 'nyi 'on 'wlii.

¹⁶Deh no-eh, ti 'on :ne-a 'de 'Tehsolo'nika-gwlor:-' :sloror', a dbo 'on 'wlii bo, 'do kpor⧾ :dhulu' 'di, ti 'an son :gweh-a.

¹⁷Eh :se 'an 'bhorn 'nyii'-deh: :deh. Jorwor: 'an 'bhorn Nyorsoa 'ye a-a' :bhorlie' 'dlu 'yi-dih:, deh no-eh, a 'nyi nyor⧾ deh⧾.

¹⁸Deh⧾-a' klehkpeh 'on :korn 'on 'ye-a' 'ye, 'on 'ble-ih'. Keen', en :zi 'o :yih 'on :korn 'on 'ye-a' 'ye :dee' 'weh. 'Nyii'-deh⧾-a' klehkpeh a :dbo-dih:-a :Ipa'flordi'tor bo, 'on 'ye-ih'. Eh-: no-eh, 'de 'on 'ble deh⧾ :dhulu' :naa. 'Nyii'-deh:⧾ :daa, en gweh 'slaa: :za-dih-deh:⧾ :en po-a 'no 'jeh no, 'de Nyorsoa 'worn-dih:-a ken dih, 'de :en 'pehn-dih:-a or-a' :porluh dih.

¹⁹:Yee' 'an Nyorsoa-a' :bhorlie' :dhulu' or 'ble-a, :eh :yi-dih:-a :Yusu' 'Klae-', 'do :wor or mu deh :za, or 'ye 'o a bo dih pobo: :mor a-a' son⧾ :gweh.

²⁰Dhih-a' 'i 'beh-a' 'do Nyorsoa :or 'dhu-a :a :Baa' bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

²¹'Mor 'ye Nyorsoa-nyor⧾-a' klehkpeh, :on :korn-a 'de :Yusu' 'Klae bo. 'Klae :de-di'-boi' :yuh :on :ne-a 'noror 'on bo, on 'da, mo-: 'ye a-uh.

²²Nyorsoa-nyor⧾-a' klehkpeh 'da, mo-: 'ye a-uh. :Yee' :yuh :on :ne-a 'de 'Wloon-nyor⧾-a' 'keen 'bli 'gbu, on 'da, mo-: 'ye a-uh :yee: o.

²³'Nyi :Gwlor :baa' :Yusu' 'Klae-a' mla :ne 'o a-a' klehkpeh bo o. 'Ka-: eh 'ye :ne.