Read Eastern Krahn :Kolorsi'-chlee-deh: 1 Bible Online

:Kolorsi'-chlee-deh: 1 - Eastern Krahn bible

:Kolorsi'-chlee-deh: 1

¹'Mor :Poror' :or Nyorsoa 'da-a :or 'ye-a :Yusu' 'Klae-a'a: dboo-nyor no, 'de or-a' 'ton :korn ka 'di. 'Mor-: 'dekorn: :a-a' 'Klae :de-di' :Timehte'-: :a :mor 'ye a-uh,

²a :mor :or 'dhu-a Nyorsoa-nyor⧾ 'de :Kolorsi'-gwlor 'di, 'de :or no-a :a-a' :dhehehn: :de-di'-boi' 'de 'Klae-a' deh 'di. Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa' bo.

³:Yee' 'do ti-a' klehkpeh bo, :a po Nyorsoa-a' 'zio :or no-a :Baa' 'do :a-a' :Gwlor :baa' :Yusu' 'Klae bo, :mor :a :taa 'de or bo wlu, 'do a-a' dhih bo.

⁴Deh no-eh, :a 'worn a-a' dhih 'jeh-' :po-eh: a 'ble-a 'de :Yusu' 'Klae-' eh-a' 'nyne 'weh 'dekorn: :ybeh-eh: a 'ble-a 'do Nyorsoa-nyor⧾-a' klehkpeh bo.

⁵:Yeh tubo-wlu:⧾ 'jeh :en no-a dhih-a' 'yor-eh, en yi-a 'de a bo :zai', a 'worn-ih' :ka eh 'dhu-ih'-a mor-' :en :ya-a: 'de deh :gwlii' :dhe-eh 'do a bo. :Yee' 'do eh-a' dha, a-a' dhih 'jeh-' :po-eh-: 'dekorn: :ybeh-dih-eh-: en 'wluh 'de deh a dhe-a :gwlii' bo, :eh :dhe-eh dih 'de Nyorsoa 'bli yai' 'do a bo.

⁶Tubo-wlu:⧾ 'jeh :daa, me-: :en ya 'de :bhorlie' :chio'lo:, 'de eh gweh 'bluhba-a' klehkpeh 'dlu, :ka eh :ne-a 'noror a 'nyne-' 'do :tehn 'i-we-eh: a 'worn-dih:-a Nyorsoa-a' mla-a' 'nyne, 'de a yubo:-a dhih-a' 'yor-eh: :en kor-a mla :dao' 'i.

⁷:Ipa'fa: 'o, or-: zela: a :gwluhuh' 'do Nyorsoa-a' mla-a' dhih bo, :or no-a :a 'be 'bhoi-yu :or :korn-a dhih :kma-a, 'de :or no-a :dhehehn-nyor 'de 'Klae-a' :koan 'di 'do :a 'gor bo.

⁸:Ybeh-dih-eh: Nyorsoa-a' :Zulu 'nyi-a a-uh, or zela: eh-a' dhih ken dih 'weh 'noror :a bo.

⁹:Yee' 'do eh-a' dha, :a wlu 'de Nyorsoa bo 'do a-a' dhih bo 'do ti-a' klehkpeh bo, :eh 'wluh-a 'o ti :a 'worn-a a-a' 'nyne. :A dhele Nyorsoa-: dih or 'ye a deh 'i yubo-eh-' dih 'yi-dih:, 'de a 'ye or-a' 'ton :korn-deh yubo:. Nyorsoa-a' :Zulu:, mo-: :an no-eh, 'de a 'ble :toror'-: 'dekorn: deh-' dih 'worn-eh-: 'de mo-: :ne-a :due', mo-: no-eh, 'de a yubo: Nyorsoa-a' 'ton :korn-deh.

¹⁰:A dhele :Gwlor :baa'-: dih, 'do deh :daa, eh-a' dhih bo, 'de a-a' 'kmo :ne-eh 'ye nyor⧾ :on :korn-a 'de or bo gweh, eh 'ye or-a' 'nyne dhih-a' 'i 'beh-a' 'nyi, 'de a 'ye deh⧾-a' klehkpeh :en mu-a or-a' :porluh dih 'pehn-dih: no. :Yee' a-a' 'kmo :ne-eh mu :koan: 'jeh-a' klehkpeh a no-a nyor⧾ 'i :to-dih:. :Yee' a mu :ku, 'de Nyorsoa-a' deh-' dih 'worn-eh 'di.

¹¹:A dhele Nyorsoa-: dih, a 'ye dih ku, 'do 'kpih-a' klehkpeh :en 'wluh-a 'de or-a' dhih-a' 'i 'beh-kpih 'di, 'de a 'ye deh⧾-a' klehkpeh 'i :nyna-a' 'beh-dih: 'de :porluh-a' dih :kpon-eh 'di, 'dekorn: 'de 'mona: ka 'di-:.

¹²A po :a :Baa' Nyorsoa-a' 'zio, :or no-eh, 'de a :bleh-dih-eh 'i, a 'ye-a 'for 'ble 'do deh Nyorsoa dhe-a dih 'do or-a'a: nyor⧾ bo, 'de or-a' nyor⧾ wlu 'ken :korn-eh-a' zorn-pli-'.

¹³Or zelie: :a 'weh 'do 'ku-a' :kule-a' 'kpih 'zorn, 'de or :ya 'de :a 'noror or-a' :dhih :kma-yu-a' nyor⧾ wlu 'ken :korn-eh 'zorn :pehleh'peh:.

¹⁴Or-a' 'Yu :dao', or-: no-eh, 'de or 'ma-dih: :a-a' deh⧾-zon⧾-a' dhih bo. Eh-: no-eh, 'de or zelie: :a-uh.

¹⁵'Klae :ne 'de Nyorsoa nyor⧾-a' 'ye-a, or-a' tu 'di. 'De mor or-: no :tehn 'i-yu, :or no nyor :klaba' 'do deh⧾-a' klehkpeh :en :no-eh 'dlu.

¹⁶:Yee' or-: Nyorsoa :yi-dih:-', 'de deh⧾-a' klehkpeh :en :ne-a 'de Nyorsoa 'bli yai'-: 'dekorn: dha yao 'zorn-: en :no-eh:, 'de :yih nyor⧾-a' 'yli-eh 'ye-a-: 'dekorn: :yih nyor⧾-a' 'yli-eh-a' 'ye-a-: :eh beh 'keen-boi'-: nyor⧾ :klaba'⧾-: nyor⧾ wlu 'ken :korn-nyor⧾-: 'dekorn: 'kpih-a' klehkpeh :en :ne-a 'o yao :gwlii'-: :yih :ne-a 'noror 'zorn-:. Or-: Nyorsoa :yi-dih:-' 'de or no deh⧾-a' klehkpeh-: 'dekorn: nyor⧾-a' klehkpeh-:. On :no-eh:-' 'do or-a' dhih bo.

¹⁷'Klae :ne-', 'de deh⧾-a' klehkpeh, en mu :no-eh. Or-: deh⧾-a' klehkpeh :yi-dih:-', 'de en :po-eh: deh⧾ en :korn-a-' dih, 'de en kpon-dih: dih.

¹⁸'Klae-a' yau: mo-: 'dhu 'chore-'. 'De 'chore :dao', or-: no eh-a' 'dlu. Or-: no-eh, 'de yau: :daa on :ne 'kmo. Or-: no :zai'-nyor :or 'wluh 'de nma-dih-deh 'di. Eh-: no-eh, 'de or no deh⧾-a' klehkpeh en-' 'dlu.

¹⁹Deh no-eh, Nyorsoa-a' 'yor-eh: 'worn-dih-eh ken dih, 'de or-a' 'kwla :gweh-eh-a' klehkpeh :ne 'de or-a' 'Yu-'.

²⁰Or-a' 'Yu, or-: or :yi-dih:-' 'de or polo-eh, or 'ye deh⧾-a' klehkpeh-: 'dekorn: nyor⧾-a' klehkpeh-: :on :ne-a dha yao 'zorn-: 'dekorn: 'de or 'bli yai'-: deka :ya 'do or-a' 'jeh bo. Or-a' 'Yu-a' 'meh-a' 'do tu 'i, eh-: or :yi-dih:-', 'de or :ya 'de wlu-' dih 'worn-eh: :daa.

²¹:Tehn 'i :dee', a :tehn-dih: Nyorsoa bo dih, 'de or :za a :dou'⧾ bo, 'do deh⧾-zon⧾-: 'dekorn: deh⧾ a na-dih-a :gwluhuh' dih-: bo.

²²Jorwor: :kana :naa or-a' 'Yu-a' 'meh-a', eh-: no-eh, 'de Nyorsoa kpon a 'be-', eh 'ye-eh' no, a 'ye 'yi 'sleh-nyor⧾ no 'do or ybei', 'de dhih :sor :ne 'o a 'bhun, 'de dhih :ne-' a kpon 'do or ybei'.

²³A mu 'o Nyorsoa ybei' dih :nyna, :mor eh 'dhu a :taa a-a' dhih 'jeh-' :po-eh 'dlu bo kpa, 'de a 'ye dih ku, :ka 'gbu-a' :zi-tu :ne-a, 'de a 'ye :ao', a se 'o deh :gwlii' :dhe-eh-a' :gwie 'i 'wluh, :eh a :ne-a 'i, ti a 'worn-a Nyorsoa-a' tubo-wlu:⧾ 'jeh :zai', :en :po-eh 'de nyor⧾-a' klehkpeh bo :on :ne-a dha yao 'zorn. En-' dhih :oo', 'mor :or 'dhu-a :Poror'-', 'on no 'bhoi-yu.

²⁴:Yee' :kana :naa, 'mona-a: no 'on, 'do 'kle 'an 'ye-a :naa, 'do a-a' dhih bo. Deh no-eh, 'kle 'Klae 'ye-a 'do or-a' yau: :on 'dhu-a 'chore bo, 'kle-a' 'jeh :dao', eh-: 'an kpa 'dlu bo, 'de 'an :gwlor-nyor-tu 'di.

²⁵'De Nyorsoa no 'on 'bhoi-yu-' 'do or-a' 'chore bo. Or 'nyi 'on :koan: :daa, 'on 'ye-or' no 'do a-a' dhih bo. :Koan: :daa, or-: 'dhu, 'on 'ye or-a' tubo-wlu⧾-a' klehkpeh po,

²⁶:en no-a 'slan or 'zile:-a nyor⧾-a' klehkpeh dih, 'do ti :dhorno'⧾ :en zi-a 'di. Jorwor: :kana :naa, or za-or-: gbor 'de or-a'a: nyor⧾ bo.

²⁷Deh Nyorsoa-a 'bhorn-a, eh-: 'dhu, or 'ye or-a' 'slan, :or 'ble-a dhih-a' 'i 'beh-a' :klaba', or-a' nyor⧾ 'i :to-dih:, :or no-a 'slan 'do 'dawor'⧾-dlu⧾-a' klehkpeh bo. 'Slan :daa, or-: 'dhu, 'Klae :ne a-uh 'weh, 'de or-: :a dhe :gwlii' :ka :a mu 'for 'ble-: 'de Nyorsoa-a' dhih-a' 'i 'beh-a' 'di.

²⁸:Yee' 'do eh-a' dha, :a :za 'Klae-a' dhih-' 'weh 'de nyor⧾-a' klehkpeh bo. :A 'dhu-uh 'slen, 'de :a torne-uh deh, 'de :toror' klehkpeh 'di, 'de an-a' klehkpeh 'ye 'o Nyorsoa ybei' yi, on 'ye 'yi 'sleh-nyor⧾ no, 'de 'Klae-a' deh 'di.

²⁹:Yeh deh :daa, eh 'ye-a' :no-eh:, :yee' 'on no :koan: 'gabaa, :eh :zi 'o ken dih. Dhih-a' 'i 'beh-kpih: 'Klae 'nyi-a 'on, me-: 'on :no-dih: :koan: :daa-'.