Read Eastern Krahn :Kolorsi'-chlee-deh: 2 Bible Online

:Kolorsi'-chlee-deh: 2 - Eastern Krahn bible

:Kolorsi'-chlee-deh: 2

¹:Yee' a 'nyi 'on zela: a :gwluhuh' :ka 'on no-a :koan: :no-eh 'gabaa 'do a bo-: 'dekorn: nyor⧾ :on :ne-a 'Lolesi'a-gwlor 'di-: :korn mor nyor⧾-a' klehkpeh :on 'see-a 'an nyior-tu 'ye :zai'-:.

²'On no-eh, eh 'ye 'de an-a' 'kpih po, 'de an-a' klehkpeh 'ye :dha :due' 'kpa 'de :ybeh-dih-eh 'di, 'de on 'ye deh-' dih 'worn-eh-a' klehkpeh 'ye, :eh no-a :bhorlie' :kolu' 'do on bo, :eh mu-eh :no, 'de on 'ye-a Nyorsoa-a' 'slan yubo:, :or 'dhu-a 'Klae-a' 'yor-eh-'.

³Or-: no :koeh'eh: :eh kan-dih 'o :dha Nyorsoa 'zile:-a or-a' bhaan-deh⧾-a' klehkpeh :en 'dhu-a deh-' dih 'worn-eh-: 'dekorn: :toror'-:.

⁴:Yee' 'do eh-a' dha, 'an zela a :gwluhuh', a-a' 'worn-:-' nyor-a' :bo-dih:-' a dih, 'de or-a' :za 'o a :gwie 'i, :ka deh⧾ an za-a-', en-' :yeh no 'yi dih :nmor-eh.

⁵Keen' :mloror' 'an nyior-tu se 'de a bo :ne, jorwor: 'an :porluh⧾-a' klehkpeh :ne 'de a bo 'weh. :Yee' 'mona-a: no 'on, :ka a-a' 'kmo :ne-eh :ne-a 'o :gwie 'i, 'de mor a no-a dih :nyna-eh deh 'jeh 'de a-a' 'Klae-a' dhih 'jeh-' :po-eh 'di.

⁶:Ka a 'worn-dih:-a :Yusu' 'Klae-a' dhih, or 'ye-a a-a' :Gwlor :baa' no, :yee' a :ne-dih-or 'kmo, 'do ti-a' klehkpeh bo.

⁷A kor a-a' 'jeh 'do :Yusu' 'bhun. 'Nyi a-a' 'kmo :ne-eh-a' klehkpeh tba 'o or ken dih. :Yee' a ku-dih 'de or-a' dhih 'jeh-' :po-eh 'di, :ka on no-a a-a' deh :torne-eh. :Yee' a po or-a' 'zio 'do ti-a' klehkpeh bo.

⁸A 'dhu-eh 'yli-eh bo, :gwlor-nyor⧾ :ne-' 'kmo-a' :toror' no, :or se-a deh 'di :ne, 'de on :ne 'o a 'yi 'sleh :gwie 'i :za, a :ne-' 'ge-nynuu no :neheh'. Deh no-eh, nyor⧾ :noo', mo-: :an no 'kmo-a' :toror' 'de :an torne nyor⧾ deh⧾ :en 'wluh-a 'de 'nai' bo-: 'dekorn: 'kwla 'ye-dih-deh⧾-: :en :korn-a nyor⧾ wlu 'ken dha yao 'zorn-:. Eh :se 'de 'Klae bo, en :se-' 'wluh.

⁹Deh no-eh, Nyorsoa-a' 'kwla :gweh-eh-a' klehkpeh :ne 'de 'Klae-a' nyior-tu 'di.

¹⁰:Yee' :ka a :ne-a 'Klae-' :naa, :yee' Nyorsoa 'nyi a 'kmo :ne-eh: 'jeh neh 'weh klehkpeh klehkpeh. 'De 'Klae :ne 'o nyor⧾ wlu 'ken :korn-nyor⧾-a' klehkpeh-: 'dekorn: 'kpih-a' klehkpeh :en :ne-a 'o yao :gwlii'-: :yih :ne-a 'noror 'zorn-: 'dlu.

¹¹:Yee' :ka a :ne-a 'Klae-', :yee' a 'meh-: :bhlororn'. Eh :se :bhlororn' 'meh-eh: :yeh :gwlor-nyor⧾-a' son-a no-a, jorwor: :yeh 'Klae :ya-a: 'de :oo', :eh 'dhu-a a-a' :gwlor-nyor-tu-a' 'bhororn'-deh⧾-zon⧾-a' 'gegeye 'zorn 'wluh-eh.

¹²:Yee' ti a :po-eh 'ni 'dlu, :yee' a mor-: 'dekorn: 'Klae-: eh gweh :ka a nma-dih-eh: dih :dha :due'. :Yee' 'de 'ni 'dlu :po-eh 'di, eh gweh or-: a mor-: a 'wluh 'de nma-dih-deh 'di 'weh, 'do a-a' dhih 'jeh-' :po-eh bo, 'de Nyorsoa-a' 'kpih 'di :or :za-a: 'de 'Klae 'de nma-dih-deh 'di.

¹³:Yee' a-a' deh⧾-zon⧾-a' dhih-: 'dekorn: :ka a no-a nyor⧾ :on :se-a :Jueh'-nyor:⧾ :on se-a :Mose'-a' 'tele' 'ble-: eh-: no-eh, 'de a gweh 'meheh'-nyor⧾ 'do Nyorsoa ybei' :dee'. Jorwor: :kana :naa, Nyorsoa no-eh' 'de a mor-: 'Klae-: a :ne-dih: :dha :due' 'kmo-' :naa. Or 'ma-dih: :a-a' klehkpeh, :a-a' deh⧾-zon⧾-a' dhih-: bo.

¹⁴Deh⧾-a' klehkpeh :en kpon :a-uh, 'do :a-a' :Mose'-a' 'tele'-a' waa-dhih, me-: Nyorsoa :za 'o :a 'dlu, 'de or :kor-dih-ih 'o, 'klorse tu 'i.

¹⁵:Yee' 'do 'klorse :tu :dao' 'i, 'do :wor 'Klae :za-dih: 'kwla 'ye-dih-deh:⧾ :en 'ble-a 'kpih-: 'dekorn: :yih :en :korn-a nyor⧾ wlu 'ken-: gla. 'Do :wor or :torne-eh :gwlor-nyor⧾-a' klehkpeh :ka en :gweh-a worn.

¹⁶:Yee' 'do eh-a' dha, a-a' 'worn-:-' nyor-a' :po-' 'tele'⧾ :dhulu' 'do deh a mu-a :di-: a mu-a 'na-: 'we-eh: 'for 'i :dhe-dih-eh 'do zon 'di 'do Nyorsoa-a' :weheh' :za-eh bo-: 'dhu gor 'do 'we-eh: 'nynor :dele' :nyna-a bo-: 'dekorn: Nyorsoa-a' :gwlee-we-eh bo-:.

¹⁷Deh⧾-a' klehkpeh :daa :en :ne :ao', deh⧾ :en mu-a 'de :yi, en-' 'yi :to-dih-deh: 'o. Jorwor: eh-a' 'kpa :wor 'dhu 'Klae-'.

¹⁸Eh 'ble nyor⧾ :noo', mo-: 'da an ya an-a' 'jeh ya, 'de an za 'enjor-nyor⧾ :weheh'. Deh⧾ :daa, me-: :no-dih-uh 'mona. :Mor an-a' 'yli-eh 'kpa deh 'i, :yee' an 'duo: an-a' 'jeh-' 'weh, on 'ye nyor⧾ :klaba'⧾ no. Nyor⧾ :dao', :ka :gwlor-nyor⧾-a no-a :gwluhuh' dih :na-dih-eh, 'ka-: an no :gwluhuh' dih :na-dih-eh :ke, 'de an 'beh-dih an-a' 'jeh 'i. 'De dhih an 'beh-dih-a an-a' 'jeh 'i, en se 'nyne :korn. A-a' 'worn-:-' nyor⧾ :dao', an-a' :za 'o a-a' geli' :za-dih-deh-a' :gwie 'i.

¹⁹Nyor⧾ :dao', on 'tali: 'Klae-a' son-: dih, :or 'dhu-a yau-a' 'dlu-' :on 'dhu-a or-a' 'chore-'. 'Klae :korn yau wlu 'ken, 'de or 'nyi-uh dii-deh. Or po-uh :dha :due' 'do an-a' 'yi 'dhu-dih-deh⧾-a' klehkpeh-: bo. 'De an ku :ka Nyorsoa-a 'bhorn-a on 'ye-a' ku-a' no.

²⁰:Yee' :ka a gweh-a :ka a :ne 'Klae 'meh-dih:-a :dha :due', 'de a 'wluh-a 'o 'kwla 'ye-dih-deh:⧾ :en :korn-a 'bluhba: :daa wlu 'ken, en-' 'kpih 'zorn, :yee' :eh :korn dhih, 'de a :ne 'kmo :eh gweh-a :ka nyor :korn-a 'de 'kmo :daa bo 'gboror: :eh? :Eh :korn dhih a :ya a-a' 'jeh ya 'do 'tele'⧾ :daa 'zorn :eh? :En 'dhu-a,

²¹Nyor-a' :kpon-' deh⧾ :yih :daa dih, nyor-a' 'dhen-:-' :yih :daa worn, 'de mor nyor-a' 'tuh-:-' :yih :daa dih.

²²'Tele'⧾-a' klehkpeh :daa, en kor deh⧾ :mor nyor⧾ :no-dih-ih-a :koan, :yee' :en :korn-a ti :jla-a 'i. 'Tele'⧾ :daa, en no 'tele'⧾ :en 'wluh-a 'de :gwlor-nyor⧾ 'worn, 'de an torne-ih nyor⧾.

²³'Tele'⧾ :daa, :en :ne :ao', en gweh :ka deh⧾ :ne-a :toror' 'di :dee'. Nyor⧾ :an torne-a nyor⧾ deh⧾ :daa, an-a' 'jeh-a' 'yor-eh-a'a: 'tele'⧾ :oo' an po, :ka nyor⧾ 'ye-a Nyorsoa-a' :weheh' :za-eh no. 'De on 'da, an ya an-a' 'jeh ya. 'De deh⧾ an-a' yau-a 'bhorn-a, an-a' 'worn, an-a' no-ih. Jorwor: 'tele'⧾-a' klehkpeh :daa, en se 'kpih :korn en 'ye yau-a' 'bhororn'-deh⧾ 'borboa' 'i po.