Read Eastern Krahn :Kolorsi'-chlee-deh: 3 Bible Online

:Kolorsi'-chlee-deh: 3 - Eastern Krahn bible

:Kolorsi'-chlee-deh: 3

¹:Yee' :ka a :ne 'Klae 'wluh-dih:-a 'de nma-dih-deh 'di :dha :due', :yee' 'do eh-a' dha, deh⧾ :en :ne-a 'de Nyorsoa 'bli yai', 'do :wor a 'ye a-a' :porluh⧾ po, :dha 'Klae :dhe-a dih, 'do or-a' dhih-a' 'i 'beh :kpala' ken 'do Nyorsoa-a' :dila-son bo.

²Deh⧾ :en :ne-a 'de or bo yai', 'do :wor a-a' :porluh⧾-a' klehkpeh 'ye :ne. A-a' :porluh⧾-a' :ne-' dha :yih :en :ne-a dha yao 'zorn bo.

³Deh no-eh, a 'meh-', 'de 'Klae 'duo: a-a' :febeh'-', 'de or 'zile-eh 'de Nyorsoa bo.

⁴'Klae :or 'dhu-a :a-a' :febeh'-', ti or mu-a or-a' 'jeh nyor⧾ 'i :to-dih: :neheh' dha 'bluhba ken, :yee' :a mu 'o :ne, 'de :a 'ye 'for 'ble 'de or-a' dhih-a' 'i 'beh-a' 'di.

⁵:Yee' 'do eh-a' dha, a 'tali: a-a' 'kmo-a' 'bhororn'-deh⧾ dih, :en 'dhu-a, 'tmeor:⧾ :korn-eh-: se :vlehehn'-' :gweh-: :porluh-a' sin-a' 'do deh⧾-zon⧾-a' no-a' bo-: 'dekorn: deh⧾-a' klehkpeh-a' 'klan :korn-eh-: :eh no-a deh⧾ :nee'-a' :weheh' :za-eh-a' 'for.

⁶:Yee' nyor⧾ :an no-a deh⧾ :daa :en :ne :ao', Nyorsoa-a' 'chehn-yuba-a mu 'de on bo 'bili:.

⁷:Yee' :tehn 'i :dee', deh⧾ :dao', me-: a no, ti a :ne-a 'de 'kmo :dao' 'di.

⁸Jorwor: :kana :naa, a :korn a 'ye deh⧾-a' klehkpeh :daa dih 'tali:, :en 'dhu-a, 'chehn 'kpa-eh-: 'galo: :korn-eh-:. 'De mor 'jlei-wlu:⧾ :sloror' 'bor 'o a 'worn 'i :yi-dih-eh :ke, :korn mor 'worn dih :nyni-eh-:.

⁹A 'bor sih dih 'tmo-dih-eh. Deh no-eh, a po ku soa-: 'dekorn: an-a' noo-deh⧾-: dih,

¹⁰'de a pa ku :dele'-' :naa, a 'ye nyor :dele' no, :or Nyorsoa no-a, 'de or po a :dele'-' 'do ti-a' klehkpeh bo, :ka or :ne-a, a 'ye :ao' :ne, 'de eh 'ye-eh' no, or 'ye a or-a' deh-' dih 'worn-eh-a' klehkpeh 'nyi.

¹¹:Yee' deh Nyorsoa no-a, eh-: no-eh, 'de deh-' :gble-eh se 'o :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: 'nyne-' :ne :dele' ka. Nyor⧾ :on 'meh-a :bhlororn'-: 'dekorn: nyor⧾ :on se-a :bhlororn' 'meh-: deh-' :gble-eh se 'o on 'nyne-' :ne. 'Dawor'⧾-dlu:⧾ 'sluh⧾-: nyor⧾ :on se-a 'kwi deh 'i yubo:-: 'ge-nynuu-: nyor⧾ :on :se-a 'ge-nynuu-: 'Klae, or-: 'kpa deh ken, or-: :zi 'o an-a' klehkpeh-'. 'De mor, or-: :ne a-a' klehkpeh-'.

¹²:Yee' Nyorsoa :ybeh a-uh' 'weh, 'de or gan a-uh, a 'ye or-a' nyor⧾ :on :dhe-dih-eh 'for 'i no 'do or bo. :Yee' eh-a' dhih, a pa 'wla⧾ :en no-a, nyor⧾ :wehlih 'ye-eh-: :porluh-a' 'yi dih :nmor-eh-: an-a' 'jeh ya :ya-eh-: 'yi :kpon-eh-: 'dekorn: :porluh-a' dih :kpon-eh-:.

¹³A 'bor a 'bei' 'chehn-' 'kpa-dih-eh. A 'ma-dih: a 'bei'-a' deh⧾-zon⧾-a' dhih bo, :mor eh 'dhu on no a deh-zon 'bhun. A 'ma-dih: an-a' deh⧾-zon⧾-a' dhih bo, :ka :Gwlor :baa' no-a, 'de or 'ma-dih:-a a-a' ne-a' dhih bo :ke.

¹⁴:Yee' :ybeh-dih-eh:, eh-: 'ye 'o deh⧾-a' klehkpeh :daa 'dlu :ne. Eh-: 'kpa deh ken. Eh-: po deh⧾-a' klehkpeh :dha :due', 'de ken dih mu-dih-eh: 'jeh 'di.

¹⁵Wlu-' dih 'worn-eh: 'Klae 'nyi a-uh, 'nyi eh :korn a-a' :porluh⧾ wlu 'ken. Eh-a' dhih :oo', Nyorsoa po a :dha :due' 'do yau :due' bo, a 'ye wlu-' dih 'worn-eh: :daa 'ble. :Yee' a po Nyorsoa-a' 'zio.

¹⁶'Nyi tubo-wlu:⧾ :kolu'⧾ :en kor-a 'Klae 'i, en :ne 'o a-a' :porluh⧾-a' klehkpeh ken. A :torne: a-a' 'jeh deh 'de a 'nyne-'. :Yee' a no :toror'-a' klehkpeh, a 'ye a 'bei' deh :jii-eh 'i dih po. A ble Nyorsoa-a' 'chlee-deh-a' 'duh⧾. :Yee' a ble Nyorsoa-a' 'zio :po-duh⧾. A ble 'duh⧾ Nyorsoa-a' :Zulu 'nyi a-uh, 'de or-a' 'zio :po ka 'di, 'do a :porluh⧾ ken.

¹⁷:Yee' deh⧾-a' klehkpeh a mu-a-' :za-: a mu-a :no-: a no en-' klehkpeh, 'de :Gwlor :baa' :Yusu'-a' 'nyne 'di. A :yi-dih-or-' a 'ye :a :Baa' Nyorsoa-a' 'zio po.

¹⁸:Yee' a :mor 'nynor⧾-kpao'⧾-a:, a :ya a-a' 'jeh ya 'do a-a'a: yibeor-boi' 'zorn. Deh no-eh, :ka a 'dhu-a :Gwlor :baa'-a' nyor⧾-', :yee' eh-: a :korn a 'ye no.

¹⁹:Yee' a :mor yibeor-boi'-a:, a :ybeh a-a'a: 'nynor⧾-'. Nyor-a' :kma 'i 'do on ken.

²⁰:Yee' a :mor 'wluhuh'-nynuu-a:, a dhe a 'de-: 'dekorn: a :baa'-: an-a' wlu dih, 'de deh⧾-a' klehkpeh 'di. Deh no-eh, eh-: 'pehn-dih :Gwlor :baa'-a' :porluh dih.

²¹:Yee' a :mor 'nynuu :bai'-a:, a-a' :chehn-' a-a' 'nynuu-a' 'kpih, 'de on :ne-' 'chehn-' 'kpa. Deh no-eh, eh mu-eh :no, an-a' :porluh⧾ 'ye 'zorn 'kpa.

²²:Yee' a :mor 'ge-nynuu-a:, a dhe 'o a-a'a: nyor⧾ :klaba'⧾-a' wlu dih, 'de deh⧾-a' klehkpeh 'di, :on :ne a :ne-a dha yao 'zorn. Eh :se :mor an-a' 'yli-eh :ne 'o a ken, 'de a 'ye-eh' no :deh, :eh gweh-a :ka a 'bhorn-a on 'ye a dhih bo po. Jorwor: 'nyi eh tba 'de a 'di dih, :ka a no-a :Gwlor :baa'-a' :fano: :ple-eh.

²³:Yee' deh⧾-a' klehkpeh a mu-a :no, a no-ih, 'do a-a' :porluh⧾-a' klehkpeh bo, :eh gweh-a :ka a no-a :koan 'do :Gwlor :baa' bo :eh :se-a 'o :gwlor-nyor bo.

²⁴A :na-dih-eh :gwluhuh' dih, :ka :Gwlor :baa'-a mu a eh-a' geli' :za-dih-deh a-uh 'nyi-: :eh or dhe-a dih 'do or-a' nyor⧾ bo. Deh no-eh, :Gwlor :baa' 'Klae, or-: :korn 'bhoi-yu-deh: a no.

²⁵'De mor deh⧾-zon:⧾ :no-nyor⧾-a' klehkpeh, an mu deh⧾-zon:⧾ on no-a, en-' geli' :za-dih-deh 'ye-: 'tene' :kpeen:. Deh no-eh, Nyorsoa-a' :za :gwie-for :due'.