Read Eastern Krahn :Kolorsi'-chlee-deh: 4 Bible Online

:Kolorsi'-chlee-deh: 4 - Eastern Krahn bible

:Kolorsi'-chlee-deh: 4

¹:Yee' a :mor 'ble-a 'ge-nynuu, a 'ble a-a'a: 'ge-nynuu 'de 'yi 'sleh ka 'di. A-a' :ne-' :bhuli'-'. A :na-dih-eh :gwluhuh' dih, :ka a-a' 'jeh :ke, a 'ble-a Nyor :Klaba' 'de Nyorsoa 'bli yai'.

²A 'duo: a-a' ti-a' klehkpeh-' 'do Nyorsoa bo :wlu-eh bo. :Mor a :taa 'de or bo wlu, :yee' 'do :wor a-a' 'dlu 'di dih :na-dih-eh-a' klehkpeh 'ye :ne. A po or-a' 'zio :ke.

³A bale-or 'do :a-a' dhih bo :ke, 'de :kpaa' 'ye 'o 'wluh 'do :a bo, :a 'ye or-a' tubo-wlu⧾ po, :a 'ye 'slan :or kor-a 'Klae 'i, or-a' dhih-' :za. Deh no-eh, en-' dhih :oo', 'on :ne :kasue 'di :naa.

⁴:Yee' a :wlu 'de Nyorsoa bo, 'on 'ye :wlu :ka 'on :korn 'on 'ye-a wlu-a' no, 'de 'on 'ye-eh' ken dih zela: deh 'jeh, on 'ye-eh' dih 'worn.

⁵A no :toror' :korn-deh⧾ 'do nyor⧾ :on se-a 'Klae-a' dhih dhih 'jeh-' po ybei'. Ti-a' klehkpeh a 'ble-a, a :no-dih-ih :koan: 'jeh nor-' 'do on ybei'.

⁶:Yee' 'nyi deh a mu-a-' :za, a 'wla :gwluhuh' dih, 'de nyor⧾ 'ye a :dou'⧾ bo :to. 'De :mor nyor dhele a deh dih, 'de a 'ye eh-a' gbor :za-da yubo: 'de :dhehehn: ka 'di.

⁷:Yee' :Teki'kor: :or no-a :a-a' :dhih :kma-de-di', 'de :or no-a :dhehehn-koan: :no-nyor-: 'dekorn: :a 'be 'bhoi-yu-: 'de :Gwlor :baa'-a' deh 'di, or-: mu a tubo-wlu⧾-a' klehkpeh 'nyi-: 'do 'an dhih bo.

⁸Eh-: :korn dhih 'de 'an dbo-or 'de a bo, or 'ye 'de a-a' 'kpih po, 'de or 'ye a :gwluhuh' zela: :ka 'noror :a bo :ne-a.

⁹Or-: :Oni'sima-: mo-: :an mu 'de :yi-dih: :or no-a :a-a' 'Klae :dhih :kma-de-di', 'de :or no-a :dhehehn-nyor. Mo-: :an mu a deh⧾-a' klehkpeh :en mu-a 'dlu bo 'noror :a bo :gwluhuh' zela:.

¹⁰'Alita'kor: :or :ne 'on :ne-a 'noror :kasue 'di, or 'da, or-: 'ye a-uh. 'Make :or :ne :Bana'ba no-a 'de-di' :yi-nyor⧾-a' 'nynuu, or 'da or-: 'ye a-uh :ke o. A 'ye 'chlee-deh 'weh, 'do or-a' dhih bo, :eh zela:-a a :gwluhuh', a 'ye-or dih kpon, :mor or yi 'de a bo.

¹¹:Jasua' :or :korn 'nyne :nee' 'dhu-a 'Jehtor-', or 'da, or-: 'ye a-uh :ke o. Nyor⧾ taan :daa mo-: no :Jueh'-nyor⧾ 'klein' :on 'wluh 'de :Jueh'-nyor:⧾ :on po-a :Yusu'-a' dhih dhih 'jeh-' 'nyne-', 'de :on :ne 'an no-dih :koan :dha :due', 'do Nyorsoa-a' nyor⧾ wlu 'ken :korn-eh-a' dhih bo, 'de on 'worn, on dhe 'on :porluh 'di dih 'gabaa.

¹²:Ipa'fa 'da, or-: 'ye a-uh, :or no-a a-a' nyor :due' :ke, 'de :or no-a :Yusu' 'Klae-a' 'bhoi-yu. Or wlu 'de Nyorsoa bo 'weh 'do a-a' dhih bo, 'do ti-a' klehkpeh bo 'gabaa. Or dhele Nyorsoa-: dih, or 'ye-eh' no, 'de a 'ye-eh yubo: deh 'jeh, deh⧾ Nyorsoa 'bhorn-a a 'ye-a' no, 'de a 'ye en-' klehkpeh no deh 'jeh.

¹³'An 'jeh 'yor-eh: 'on 'beh-dih: 'on 'ye-eh' ken dih zela: :ka or no-a :koan: :no-eh 'gabaa 'do a bo, 'dekorn: nyor⧾ :on 'ti-a :gwlor⧾ an 'da-dih-a 'Lolesi'a-: 'dekorn: 'Yala'poli-:.

¹⁴'Lu :or no-a :a-a' kwein: :di-nyor 'de :or no-a :a-a' :dhih :kma-nyor, or-: 'Dima-: on 'da, mo-: 'ye a-uh.

¹⁵A zela: :a-a' 'Klae :de-di'-boi' :on :ne-a 'Lolesi'a, :gwluhuh', :a :mor 'ye-uh o, 'dekorn: :a-a' 'de-di'-nynor-kpao' :Nefa'-: :korn mor 'chore :eh 'gbon-dih-a 'de or 'bli 'gbu :ke-:.

¹⁶:Yee' :mor 'chlee-deh: :daa eh :zlo-eh: 'de a bo, :yee' a 'ye-eh bo, eh 'ye :zlo-eh: 'do 'chore :eh :ne-a 'Lolesi'a ybei'. 'De mor 'chlee-deh: 'Klae :de-di'-boi' :on :ne-a 'Lolesi'a, an mu-a a bo 'chle-:, a zlo-eh :ke.

¹⁷A zela: :Aki'pa :gwluhuh', or 'ye-eh' bo 'ye, :koan: :or 'nyi-eh or-uh, 'de :Gwlor :baa'-a' deh 'di, or 'ye-or 'i gweh.

¹⁸'Mor :or 'dhu-a :Poror'-', 'an 'jeh 'yor-eh-a' son, mo-: 'on no, 'de 'on 'chle-a 'yee'-wlu:⧾ :daa bo, 'mor 'ye a-uh. Nyor-a' 'ma-dih:-' 'an dhih bo, :ka 'on :ne-a 'noror :kasue 'di. 'Nyi Nyorsoa-a' mla :ne 'o a bo o.