Read Eastern Krahn 1 'Tehsolo'nika-chlee-deh: 3 Bible Online

1 'Tehsolo'nika-chlee-deh: 3 - Eastern Krahn bible

1 'Tehsolo'nika-chlee-deh: 3

¹:Yee' :a se-eh 'i :nyna-a' 'beh-dih: :neheh', :mor :a se a 'ye. Eh-: no-eh, 'de :a 'dhu 'i, :a-a' 'bleh 'bleh 'ye 'Atehn-gwlor 'di dih :dhe.

²'De :a dbo :Timehte' 'de a bo, :or no-a :a-a' 'Klae :de-di', 'de :or :ne :a no-a :koan 'do Nyorsoa bo, 'do tubo-wlu:⧾ 'jeh :en kor-a 'Klae 'i, en-' :po 'da. :A dbo-or', or 'ye 'de a-a' 'kpih po, 'de or 'ye-eh' no, a-a' dhih 'jeh-' :po-eh 'ye dih ku,

³'de 'kle 'ye-dih-eh: nyor⧾-a 'ye-dih a-uh, eh :ne-eh' no, 'de a-a' nyor :ne-' 'Klae-a' dhih 'jeh-' :po-eh dih 'tali:. A-a' 'yor-eh:, a yubo-eh', Nyorsoa-a za 'kle 'ye-eh: :eh :ne :ao' 'yli-eh dih, 'de eh yi 'o :a bo.

⁴'De mor ti :a :ne-a 'o a bo 'gboror:, :a sie ti de, 'de :a zela: a :gwluhuh', :ka nyor⧾-a mu-a :a 'kle 'ye-dih:. 'De a yubo-eh' 'jeh ka, 'ka-: eh :ne :kpeheh:.

⁵Eh-: :korn dhih, 'de 'on dbo :Timehte' 'de a bo. Deh no-eh, 'on :se-eh' 'i :nyna-a' 'beh-dih: :neheh'. 'On dbo-or' 'de a bo 'weh, or 'ye dhih 'jeh-' :po-eh: a 'ble-a 'de 'Klae-' 'ye. 'De 'an na-dih a-a' dhih :gwluhuh' dih, 'de 'ku :ne-' a dih 'dhen, a :ne-' deh-zon no, 'de :a-a' :koan-a' klehkpeh :a :no-dih:-a, 'de or :ne-' deh 'plo no.

⁶Jorwor: :Timehte' yi-: de :naa. 'De or :ya 'de kuna'⧾ 'jeh, 'do a-a' dhih 'jeh-' :po-eh-: 'dekorn: :ybeh-dih-eh-: bo. Or zela: :a :gwluhuh' 'weh :ka a na-dih-a :a-a' dhih :gwluhuh' dih deh 'jeh, 'de a 'bhorn-a a 'ye-a :a 'ye 'gabaa, :ka :a no-a 'de :a 'bhorn-a, :a 'ye a 'ye :ke.

⁷:Yee' 'do eh-a' dha, 'kle nyor⧾ 'ye-dih: :a-uh-: 'dekorn: 'worn dih 'beh-dih-eh-: en-' klehkpeh :daa :a 'ye-a, :yeh :a 'worn-a kuna'⧾ 'jeh :en 'wluh-a 'de a bo, :a-a' 'Klae :de-di'-boi'-a:, :yee' eh po 'de :a-a' 'kpih 'weh. A-a' dhih 'jeh-' :po-eh:, eh-: 'o :eh po 'de :a-a' 'kpih.

⁸:Yeh :a 'worn-ih'-a :ka a :nyna-a dih deh 'jeh 'de :Gwlor :baa'-a' deh 'di, :yee' :a van-dih: dih, 'de 'mona no :a-uh.

⁹:Yee' :kana :naa, :a po Nyorsoa-a' 'zio 'do a-a' dhih bo. :A po or-a' 'zio 'do 'mona: :a 'ble-a 'do or ybei' 'do a-a' dhih bo.

¹⁰'Gwie-: :glaa'e-: :a dhele-or dih 'do :a-a' :porluh⧾-a' klehkpeh bo, or 'ye-eh' no, 'de a :ne :a 'ye 'ye-dih: :neheh', 'de deh :yeh :sie:-a 'o 'do a-a' 'Klae-a' dhih 'jeh-' :po-eh 'di, 'on 'ye-eh a-uh :torne:.

¹¹:Yee' 'nyi Nyorsoa :or no-a :a :Baa', or-a' 'jeh 'yor-eh-: 'dekorn: :a-a' :Gwlor :baa' :Yusu'-: on po :gwie: :eh yi-a 'de a bo 'kpa, 'de :a 'ye 'de a bo yi.

¹²'Nyi :Gwlor :baa' no-eh, a-a' :ybeh-dih-eh 'ye ken dih 'kpuhba: 'de a 'nyne-: 'dekorn: nyor⧾-a' klehkpeh-:. A :ybeh-dih: 'gabaa, eh 'ye 'o ken dih :zi, eh 'ye :ka :a no-a a-a' :ybeh-dih-eh ken :yeh-dih:.

¹³:Yee' 'nyi or 'nyi a 'kpih, 'de :mor or 'yle, 'de nyor⧾-a' klehkpeh :on :korn-a 'de or bo, on 'ye-or 'de dih 'gola:, :yee' a :se-' dhih 'bhun :ne i, 'de a 'ye :vlehehn'-' :gweh 'do :a :Baa' Nyorsoa ybei'.