Read Eastern Krahn 1 'Tehsolo'nika-chlee-deh: 5 Bible Online

1 'Tehsolo'nika-chlee-deh: 5 - Eastern Krahn bible

1 'Tehsolo'nika-chlee-deh: 5

¹:Yee' 'an 'Klae :de-di'-boi'-a:, 'on se :korn 'on 'ye a bo 'chle, 'do ti deh⧾ :daa en mu-a :no-dih-eh 'di.

²Deh no-eh, a-a' 'jeh 'yor-eh:, a yubo-eh' :ka 'ylii'-nyor⧾-a no-a 'de yi-a', 'ka-: 'we-eh: :Gwlor :baa'-a mu-a 'de :ya eh mu :ne.

³:Mor nyor⧾ 'da, Vorn-a' se :ne, :a 'puh-', :yee' 'yli :a bla-a 'i, on :ne 'de an-a' 'jeh 'worn 'ye-eh 'di 'gabaa. :Ka 'kwli-a no-a 'nynor-a' ken :ge-dih-eh, 'ka-: eh mu 'de yi-a' :no. :Yee' on :se-' eh-a' 'zorn-a' 'wluh-eh 'beh-dih: i.

⁴Jorwor: a :mor :mloror', 'an 'Klae :de-di'-boi'-a:, a se 'de :kule-' :ne. :Yee' 'we-eh: :dao', eh se :korn eh 'ye a ken :ge-dih: :ka 'ylii'-nyor no-a.

⁵A-a' klehkpeh, a no nyor⧾ :on :korn-a 'de zorn-pli bo, 'de a :korn 'de zorn bo :ke. :A se 'de glu-: 'dekorn: :kule-: bo :korn.

⁶:Yee' eh-a' dhih, a 'bor 'mo-a' :ka nyor⧾ :noo'-a no-a. A 'nyi :a :sorn-'. A 'nyi :a :korn :a-a' 'jeh wlu 'ken, :a :ne-' deh-zon no.

⁷:Mor glu gor, 'de nyor⧾-a 'mo. 'De mor :mor glu gor, 'de nyor⧾-a 'na nomor, 'de nomor-a no-uh.

⁸Jorwor: :a :mor :mloror', :a :korn 'noror zorn bo. :Yee' :a :korn :a 'ye :a-a' 'jeh wlu 'ken :korn, :a :ne-' deh-zon no. A 'nyi :a 'ble dhih 'jeh-' :po-eh-: 'dekorn: :ybeh-dih-eh-: eh 'ye :a-a'a: deh nyor kan-dih-a 'o :gwlii' 'de or vorn-a no. A 'nyi :a dhe-eh :gwlii' :eh :mor Nyorsoa-a mu :a 'puh-dih: :gbor :gbor, eh 'ye deh nyor 'dhu-a 'dlu, 'de deh-a' tba-or no.

⁹Nyorsoa :se-' :a gan :a 'ye 'kle 'ye 'do or-a' 'chehn-yuba 'zorn, jorwor: :a 'ye 'puh-a' :or :yi-dih:-a :a-a' :Gwlor :baa' :Yusu' 'Klae-' 'ye :dhih 'o, eh-: :korn dhih or gan :a-uh.

¹⁰:Yusu' 'meh-' 'do :a-a' dhih bo. 'De 'we-eh: or mu-a 'de :ya, :mor :a-a' :yeh 'meh, 'de mor :a-a' :yeh :ne 'kmo, or :ne :a 'ye 'kmo :dha :due' :ne-dih:.

¹¹:Yee' 'do eh-a' dha, a po 'de a 'bei'-a' 'kpih :due' :due'. :Yee' a :za-dih-uh' :ka a no-a :naa.

¹²:Yee' a-a' 'Klae :de-di'-boi'-a:, :a bale a 'weh, a 'ye nyor⧾ :an no-a :koan 'de a 'nyne-' deh-' 'ye deh 'jeh. Mo-: :an na-dih a-uh, 'de :Gwlor :baa'-a' deh 'di, 'de :an zela a :gwluhuh' :ka a 'ye-a 'kmo-' :ne-eh no.

¹³A 'nyi-uh deh-' 'ye-eh-a' klehkpeh. :Yee' a ybeh-uh' :ke, 'do :koan: an no-a bo. :Yee' a kpon-dih: ken dih 'de a 'nyne-' :ke.

¹⁴:Yee' :a 'neh a ken, a :mor :or 'dhu-a :a-a' 'Klae :de-di'-boi'-', a zela: nyor⧾ :on vlan-a :gwluhuh', on 'ye vlaan-deh⧾-a' no-a' 'bor. Nyor⧾ :on :fano :ne-a 'o :gwlii', a za-uh :fano :gwlii'. A :za-dih: nyor⧾ :on se-a dih ku-'. A kpon :porluh dih, 'do nyor⧾-a' klehkpeh bo.

¹⁵A 'ye-eh' bo, nyor :ne-' deh-zon kpa-' :za-dih:. Jorwor: 'do ti-a' klehkpeh bo, a 'ble-dih-eh 'o a :gwlii' a 'ye deh⧾ 'jeh ne no 'do a 'bei' bo, 'dekorn: nyor⧾-a' klehkpeh-:.

¹⁶A 'yi-dih: 'mona-' dih 'do ti-a' klehkpeh bo.

¹⁷A :wlu 'de Nyorsoa bo 'do ti-a' klehkpeh bo.

¹⁸A po Nyorsoa-a' 'zio 'de deh⧾-a' klehkpeh 'di. Eh-: or 'bhorn 'de :a-a' 'kmo :ne-eh 'di, :eh kor-a :Yusu' 'Klae 'i.

¹⁹Nyor-a' :kan-' Nyorsoa-a' :Zulu 'i.

²⁰Nyor-a' :vlehn-' Nyorsoa-a' wele-eh: :po-eh.

²¹A 'dhen deh⧾-a' klehkpeh. :Yee' :yeh :eh :nmor-a 'yi dih, a dhe-eh dih.

²²'De mor a :tehn-dih: deh⧾-zon⧾ 'doror: 'dor bo dih.

²³'Nyi Nyorsoa :or 'nyi-a :a wlu-' dih 'worn-eh: or no-eh, a 'ye 'for 'i :dhe-dih-eh: 'do or bo, 'de deh⧾-a' klehkpeh 'di. :Yee' 'nyi or no-eh, 'de a-a' 'kmo :ne-eh-: a-a' :porluh⧾-a' klehkpeh-: 'dekorn: a-a' yau-: en :sor :ne deh-zon 'bhun, 'do 'we-eh: :a-a' :Gwlor :baa' :Yusu' 'Klae-a mu-a de :ya 'di.

²⁴Nyor :or 'da-a a-uh, or 'beh-dih: or 'ye-eh' no. Deh no-eh, or no :dhehehn-nyor:.

²⁵:A-a' 'Klae :de-di'-boi'-a:, a :wlu 'de Nyorsoa bo 'do :a-a' dhih bo.

²⁶A kpa 'de :a-a' 'Klae :de-di'-boi'-a' klehkpeh :bhluun'⧾-', a 'ye-uh' :gble-dih: 'de :porluh⧾-a' :vlehehn'-' :gweh ka 'di.

²⁷:Yee' 'an bale a 'weh, 'de :Gwlor :baa'-a' 'nyne 'di, a 'ye 'chlee-deh: :daa zlo, 'de 'Klae-a' dhih 'jeh-' :po-nyor⧾-a' klehkpeh bo.

²⁸'Nyi :a-a' :Gwlor :baa' :Yusu' 'Klae-a' mla :ne 'o a-a' klehkpeh bo o.