Read Eastern Krahn 2 'Tehsolo'nika-chlee-deh: 1 Bible Online

2 'Tehsolo'nika-chlee-deh: 1 - Eastern Krahn bible

2 'Tehsolo'nika-chlee-deh: 1

¹'Mor :Poror'-: :Salor'-: 'dekorn: :Timehte'-: :a :mor 'ye a-uh, a :mor :or 'dhu-a 'chore :eh :ne-a 'Tehsolo'nika-gwlor 'di, :or :korn-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo.

²Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae bo.

³:Yee' 'an 'Klae :de-di'-boi'-a:, :a :korn :a 'ye Nyorsoa-a' 'zio po 'do ti-a' klehkpeh bo, 'do a-a' dhih bo. Eh :nmor-: 'yi :a 'ye :ao' no. Deh no-eh, a-a' dhih 'jeh-' :po-eh ku-: dih 'gabaa :naa. 'De :ybeh-dih-eh: a 'ble-a 'do a 'bei' bo :due' :due', 'de eh 'kpuhba ken dih.

⁴Eh-: :korn dhih, ti :a mu-a 'de Nyorsoa-a' 'chore-nyor⧾ 'nyne-' 'de :a po a dhih bo 'de on bo. Deh a ku-a dih, 'de a se-a sea 'de a-a' dhih 'jeh-' :po-eh 'di-: 'kle on 'ye-dih a-uh-: 'dekorn: a-a' 'jeh 'worn 'ye-eh-: :en :korn-a klehkpeh a :nyna-a 'i, eh-: :korn dhih :a po a dhih bo.

⁵En-' klehkpeh :daa en :to-dih: :a 'i, :ka Nyorsoa-a' zabe: :zi-eh 'sleh-a 'i. 'De deh⧾ :en :yi-dih:-a a ya dih, me-: mu-eh :no, 'de a 'ye :zlo-eh: 'de Nyorsoa-a' nyor⧾ wlu 'ken :korn-eh 'zorn :eh :korn-a dhih a 'ye-a 'kle.

⁶Deh :eh 'sleh-a 'i, eh-: Nyorsoa-a mu :no. Or mu nyor⧾ :on 'ye-dih-a a 'kle, 'kle 'ye-eh 'dlu :po.

⁷:Yee' a :mor :or 'ye-a 'kle-: 'dekorn: :a mor-: Nyorsoa-a mu-eh :no, :a-a' klehkpeh, :a 'ye 'kle 'ye-eh 'bor. Ti :Gwlor :baa' :Yusu'-: 'dekorn: or-a'a: 'kpih 'ble-enjor-nyor⧾-: an mu-a 'de Nyorsoa 'bli yai' 'wluh-:, 'do :wor or mu-eh :no-dih:.

⁸:Yee' neh :dhulu'-a mu 'o :ne, 'de or 'ye nyor⧾ :on se-a Nyorsoa-a' dhih 'worn-dih: 'kle 'ye-eh 'dlu po, 'dekorn: :yuh :on se-a 'o tubo-wlu:⧾ 'jeh :en kor-a :a-a' :Gwlor :baa' :Yusu' 'i, en-' 'tele' dih dhe.

⁹'Kle 'ye-eh: :eh mu-a 'o on 'dlu :po-eh, eh mu gbe :zie-eh :no, :eh se-a 'dlu-' :jla 'da :korn. 'De mo-: :Gwlor :baa'-: an mu 'i chehn-eh-dih: :ka ti-a mu-a 'dlu-' :tehn, 'de on 'ye or-a' dhih-a' 'i 'beh-a' 'kpih bo dih :tehn-dih:,

¹⁰'do 'we-eh: :dao' 'di, or mu-a 'de :ya. Or mu 'de :yi, or 'ye dhih-a' 'i 'beh-a' 'ye, 'de or-a' nyor⧾-a' klehkpeh 'kwa, 'de or 'ye deh-' 'ye-eh 'ye, 'de nyor⧾-a' klehkpeh :on po-or dhih 'jeh-' 'kwa. :Yee' a mu 'de on 'nyne-' :ne :ke. Deh no-eh, tubo-wlu:⧾ :a po-a 'de a bo, me-: a po dhih 'jeh-'.

¹¹Eh-: :korn dhih, :a wlu 'de Nyorsoa bo 'do ti-a' klehkpeh bo, 'do a-a' dhih bo. :A dhele :a-a' Nyorsoa dih, or 'ye a zlo 'do 'kmo or 'da-a a-uh, a 'ye-a 'kmo-' :ne-dih: bo. 'Nyi Nyorsoa-a' 'kpih no-eh, 'de deh⧾ 'jeh ne-a' klehkpeh a 'bhorn-a a 'ye-a' no, en 'ye :no-eh:. 'De en 'ye-eh' no, 'de :koan-a' klehkpeh a no-a, 'do dhih 'jeh-' :po-eh-a' dhih bo, a 'ye-or' 'i gweh.

¹²:Yee' eh-: mu-eh :no, 'de :a-a' :Gwlor :baa' :Yusu'-a' 'nyne 'ye dhih-a' 'i 'beh-a' 'ye 'de a 'kwa. 'De or 'ye-eh' no, a 'ye dhih-a' 'i 'beh-a' 'ye :ke. Deh no-eh, :a-a' Nyorsoa-: 'dekorn: :Gwlor :baa' :Yusu' 'Klae-: on po a mla :dhulu' bo.