Read Eastern Krahn 2 'Tehsolo'nika-chlee-deh: 2 Bible Online

2 'Tehsolo'nika-chlee-deh: 2 - Eastern Krahn bible

2 'Tehsolo'nika-chlee-deh: 2

¹:Yee' :a-a' :Gwlor :baa' :Yusu' 'Klae-a' de :yi-deh-: 'dekorn: :a-a' :dha :due' 'kpa-eh 'do or bo-: 'an bale a 'weh, 'an 'Klae :de-di'-boi'-a:,

²:mor nyor⧾ :noo' 'da, 'We-eh: :dao', eh nyni 'o :weh, 'de nyor⧾ :noo' 'ye :ao', Nyorsoa-a' :Zulu: zela-uh :gwluhuh' :eh :mor eh nyni 'o :weh, 'de :noo' 'ye :ao', :a :mor 'chle 'chlee-deh: :or za-ih' :eh :mor eh nyni 'o :weh, a-a' 'worn-:-' nyor⧾ :dao', an-a' :za 'o a-a' 'dlu⧾ :gwie 'i :wleh o, 'de a-a' :ple-' :fano :ke.

³A-a' 'worn-:-' nyor-a' :bo-dih:-' a dih klehkpeh klehkpeh. Deh no-eh, 'we-eh: :daa, eh 'see 'de yi kele'a:. :Mor ti :dao', en 'ye 'o nyni, :yee' nyor⧾ :dhulu'-a mu Nyorsoa worn :bla-dih:, 'de on 'ye-or 'kpuh ya :to, 'de 'kulu-nyor: Nyorsoa-a mu-a gbe :zie:, or 'ye 'bluhba 'i 'wluh-dih:, 'de jorwor: 'we-eh: :dao', eh 'ye 'o nyni.

⁴Or mu deh⧾-a' klehkpeh nyor⧾-a 'da-dih-a nyorsoa⧾, bo :vorn, :korn mor deh-beh-deh-beh: nyor⧾-a za-a :weheh'-:. Or mu-eh :no, or 'ye en-' klehkpeh 'dlu :ne. Or mu :mu 'de or 'ye 'de Nyorsoa-a' 'sla 'zorn dih :dhe :sloror', 'de or 'ye or-a' 'jeh Nyorsoa 'da-dih:.

⁵A se 'beh-dih: a 'ye deh⧾ :daa :gwluhuh' bo :po-dih: :e? Ti 'on :ne-a 'o a bo, 'on :se-' a deh⧾-a' klehkpeh :daa :gwluhuh' zela: :e?

⁶:Yee' a-a' klehkpeh, a yubo-eh' deh :eh :ne-a 'o, 'de deh :daa, eh 'see-a no-eh kele'a:. 'Do 'we-eh: eh :korn eh 'ye-a' :no-dih-eh 'di, :mor eh nyni 'o, :yee' 'kulu-nyor: :dao', or mu 'bluhba 'i 'wluh-dih:.

⁷:Yee' 'kulu-kplen: nyor⧾-a' 'ye-a, en no en-' :koan 'weh :naa. Jorwor: deh, eh-: kan-dih: 'o :gwie 'i, 'de 'kulu-nyor: :daa, or 'see 'bluhba 'i 'wluh-dih. :Mor deh :dao', eh 'wluh 'o :gwie 'i, :yee' or mu 'bluhba 'i 'wluh-dih:.

⁸:Yee' 'do ti :dao' 'i, 'kulu-nyor: :dao', or mu 'bluhba 'i 'wluh-dih:. Jorwor: :mor :Gwlor :baa' :Yusu' 'yle, or-a' :pobor' :or 'wluh-a 'de or 'worn, or-: or mu :no or 'ye-or' 'dba. Or-a' yi-a'-a mu dhih-a' 'i 'beh-a' 'ble-: 'gabaa, eh-: mu-eh :no 'de 'kulu-nyor: :dao', or 'ye gbe :zie:.

⁹:Yee' 'kulu-nyor: :dao', or mu 'de 'ku-a' 'kpih :ya, 'de or 'ye deh⧾ :kolu'⧾-: nyor⧾ 'i :to-dih-deh⧾-: 'dekorn: nyor⧾ 'di dih 'ma-dih-deh⧾-: en 'ye nyor⧾ dih :bo-dih:.

¹⁰Or mu 'kulu-deh:⧾ 'doror: 'dor :no, or 'ye nyor⧾ :an mu-a gbe :zie: dih :bo-dih:. Deh :korn-a dhih an mu-a gbe :zie:, eh-: 'dhu on se dhih-a' 'yor-eh: :en mu-uh-a 'puh-dih: :ybeh.

¹¹Eh-: no-eh 'de Nyorsoa no-eh, 'de on zi :gwie 'i, 'de on po nyor⧾ dih :bo-dih-deh⧾ dhih 'jeh-'.

¹²:Yee' eh-a' dhih, nyor⧾-a' klehkpeh :on se-a dhih-a' 'yor-eh dhih 'jeh-' po, 'de :an no-a 'mona 'do deh⧾-zon⧾-a' no-a', Nyorsoa-a mu an-a' zabe 'i :chehn.

¹³:Yee' 'an 'Klae :de-di'-boi'-a:, :a :korn :a 'ye Nyorsoa-a' 'zio po, 'do ti-a' klehkpeh bo, 'do a-a' dhih bo, a :mor :or :Gwlor :baa' :ybeh-a. Deh no-eh, Nyorsoa gan a 'weh :zai', a 'ye 'puh, :eh 'wluh-a 'de eh-a' glu 'dhu 'da. 'De Nyorsoa-a' :Zulu-a' 'kpih 'ye-eh' no, a 'ye 'for 'i :dhe-dih-eh: 'do or bo, 'do a-a' dhih-a' 'yor-eh-a' dhih 'jeh-' :po-eh bo.

¹⁴Nyorsoa-a' tubo-wlu:⧾ 'jeh :a po-a 'de a bo, me-: or :yi-dih:-', 'de or 'da a-uh 'do deh :daa bo, a 'ye a-a'a: 'for 'ble 'de :a-a' :Gwlor :baa' :Yusu' 'Klae-a' dhih-a' 'i 'beh-a' 'di.

¹⁵:Yee' eh-a' dhih, 'an 'Klae :de-di'-boi'-a:, a :nyna dih deh 'jeh, a 'ye dhih-a' 'yor-eh: :a :torne: a-uh, 'do tubo-wlu:⧾ :po 'da-: 'dekorn: 'chlee-deh:⧾ :a dbo-a a bo dih-: a 'ye-ih' dih kpon.

¹⁶:Yee' :a-a' :Gwlor :baa' :Yusu' 'Klae-a' 'jeh 'yor-eh-: 'dekorn: :a :Baa' Nyorsoa :or :ybeh-a :a-uh-: 'de :or 'nyi-a :a 'kpih, :en no-eh, 'de :a se-a sea-a' :korn-: 'de :or 'nyi :a deh :gwlii' :dhe-eh: 'jeh 'de or-a' mla 'di-:

¹⁷'nyi or po 'de a-a' 'kpih, 'de eh 'ye a-' :za-dih:, a 'ye noo-deh:⧾ 'jeh ne no, 'de mor a 'ye dhih 'jeh ne-' :za :ke, 'do ti-a' klehkpeh bo.