Read Eastern Krahn 1 :Timehte' 2 Bible Online

1 :Timehte' 2 - Eastern Krahn bible

1 :Timehte' 2

¹:Yee' :tehn 'i-deh:, 'an bale :on 'weh, wlu 'de Nyorsoa bo 'do :gwlor-nyor⧾-a' klehkpeh bo. Bale-or 'do an-a' dhih bo, or 'ye-uh' :bhorlie' bo po. :Yee' po-or 'zio 'do an-a' dhih bo.

²:Yee' :wlu 'de or bo, 'do 'keen-boi'-: 'dekorn: nyor⧾ wlu 'ken :korn-nyor⧾-a' klehkpeh-: an-a' dhih bo, eh 'ye-eh' no, :a 'ye 'kmo 'jeh :on 'ble-a wlu-' dih 'worn-eh, 'de :on se-a 'worn dih 'beh-dih-eh 'ble, 'kmo-' :ne-dih:, 'de Nyorsoa-a' deh-' 'ye ka-: 'dekorn: noo-deh:⧾ :en 'sleh-a 'i-: 'di.

³Deh :daa, eh-: :nmor 'yi dih, 'de :eh 'pehn-dih Nyorsoa :or no-a :a-a' 'puh-dih-nyor, or-a' :porluh dih.

⁴Or no nyor :or 'bhorn-a :gwlor-nyor⧾-a' klehkpeh on 'ye-a' 'puh, 'de mor on 'ye-a' dhih-a' 'yor-eh: :en kor-or 'i yubo:.

⁵Deh no-eh, Nyorsoa :due' gbai, :yee' 'yu :due', or-: :ne 'o :gwlor-nyor⧾-: 'dekorn: Nyorsoa-: an-a' gwea. 'Yu :dao', or-: 'dhu :Yusu' 'Klae-', :or no-a :gwlor-nyor,

⁶:or :za-a or-a' 'jeh 'kwla :or 'ye-a' 'meh, :or 'ye-a' :gwlor-nyor⧾-a' klehkpeh zelie:. Nyorsoa :to-dih: :a deh :daa 'i, 'do ti 'jeh 'i.

⁷Eh-: :korn dhih :oo', 'de Nyorsoa gan 'on, 'on 'ye or-a'a: tubo-wlu:⧾ :po-nyor-: 'dekorn: :Yusu'-a'a: dboo-nyor-: no, 'on 'ye nyor⧾ :on :se-a :Jueh'-nyor:⧾, 'on 'ye-uh' deh⧾ :en kor-a 'Klae-a' dhih 'jeh-' :po-eh 'i-: 'dekorn: or-a' dhih-a' 'yor-eh-: :torne:. 'On :se-' sih 'tmo. Dhih 'jeh :oo', 'an za-a-'.

⁸:Yee' 'an 'bhorn :mor nyor⧾-kpalu⧾ :taa 'de Nyorsoa bo wlu 'de 'chore-', :yee' 'nyi on no :vlehehn'-' :gweh-nyor:⧾ :an to-a an-a' son⧾ 'de or bo. 'De an-a' :wlu-' 'de or bo, 'de 'chehn ka 'di. 'De mor on :ne nyor⧾-a' :jeh-'.

⁹:Yee' 'an 'bhorn :ke, 'nynor⧾-kpao'⧾ 'ye an-a' deh-' :pa son :dhororn' 'dhu. 'An 'bhorn on 'ye deh-' pa 'de deh-' 'ye ka 'di. On se :korn on 'ye an-a' 'mii :bheh-dih: 'gabaa, 'de nyor⧾ :ne-uh' dih 'ye, 'de on se :korn on 'ye 'tiei: :en 'kpa-a deh ken 'gabaa, :eh :zi-a 'o ken dih-' pa.

¹⁰Jorwor: on :korn on 'ye noo-deh:⧾ 'jeh ne no, me-: :korn :en 'ye an-a' :bheh-dih-deh⧾ no. Eh-: 'dhu 'yi 'sleh-deh-' 'do 'nynor⧾ :on no-a, :an za-a Nyorsoa-a' :weheh' bo.

¹¹:Yee' 'nyi 'nynor⧾-kpao'⧾ :ya an-a' 'jeh ya, 'de on 'ye deh 'chean', 'de bhloror ka 'di.

¹²'On :se-uh' 'tele' 'nyi, on 'ye nyor⧾ deh :torne:, 'de mor on 'ye 'kpih 'ble, 'do nyor⧾-kpalu⧾ 'dlu. On :korn on 'ye 'dhuan no.

¹³Deh no-eh, 'Adan, or-: :no-eh: :zai', 'do 'Ii ken.

¹⁴Eh :se 'Adan:, 'ku :se-' dih :bo-dih:. 'Nynor-kpao' :dao' :oo', or-: 'ku :bo-dih: dih, 'de or no deh-zon: :no-nyor.

¹⁵Jorwor: 'do :gbano: :za 'da, 'nynor⧾-kpao'⧾-a mu 'puh-:, :mor on kpa 'Klae-a' dhih 'jeh-' :po-eh-: :ybeh-dih-eh-: 'dekorn: :vlehehn'-' :gweh-eh-: 'dlu bo, 'de :dhehehn: ka 'di.