Read Eastern Krahn 1 :Timehte' 4 Bible Online

1 :Timehte' 4 - Eastern Krahn bible

1 :Timehte' 4

¹:Yee' Nyorsoa-a' :Zulu-a za-eh' 'weh, 'de eh 'si 'de nyor⧾ :dou'⧾-' dih, on 'da nyor⧾ :noo'-a mu 'Klae-a' dhih 'jeh-' :po-eh 'kpuh ya :to, 'do :de 'bor-dih-ti 'i. :Yee' an mu 'o 'kwla 'ye-dih-deh:⧾ :en bo-dih-a nyor⧾ dih, en-' nyor⧾ deh :torne-eh klei' :zi.

²Nyor⧾ deh :torne-eh: :daa, eh 'wluh 'de sih 'tmo-nyor:⧾ :an bo-dih-a nyor⧾ dih bo, :on :korn-a :porluh⧾ 'meh-a.

³Nyor⧾ :dao', mo-: 'o, :on dhe nyor⧾ 'tele' 'i, on :ne-' 'bli 'ti-dih:. An-a' 'jeh :dao', mo-: 'da :gwlor-nyor⧾-a' :di-' dii-deh:⧾ :nee' :nee', Nyorsoa no-a. Nyorsoa no dii-deh:⧾ :dao' 'weh, nyor⧾ 'ye-ih' di, nyor⧾ :on po-or dhih 'jeh-', 'de :on yubo:-a dhih-a' 'yor-eh, :mor on :wlu 'de Nyorsoa bo, on po or-a' 'zio, :yee' an di-ih'.

⁴Deh⧾-a' klehkpeh Nyorsoa no-a, en :nmor-: 'yi. Eh-a' dhih, nyor se :korn or 'ye deh 'bor. :Mor nyor :wlu 'de Nyorsoa bo, :mor or po or-a' 'zio, :yee' or di-ih'.

⁵Deh no-eh, Nyorsoa-a' wlu-: 'dekorn: or-a' 'zio :po-eh-: eh-: no-eh, 'de en :nmor 'yi dih, 'do di-a' bo, 'do Nyorsoa ybei'.

⁶:Yee' deh⧾ :daa, :mor :on :torne-ih 'Klae :de-di'-boi', :yee' :an mu :Yusu' 'Klae-a' 'bhoi-yu: 'jeh :no. :An mu-eh nyor⧾ 'i :to-dih: :ka :on ku-a dih, 'de wlu⧾ :en kor-a 'Klae 'i-: 'dekorn: nyor⧾ deh :torne-eh: 'jeh :on zi-a 'o klei' 'di-:.

⁷:Tehn-dih: sih :manua: :or se-a Nyorsoa deh-' 'ye-eh 'nyi, or-a' bla-a' bo dih, :or se-a deh 'di :ne. Jorwor: :torne: :an-a' 'jeh deh, :on 'ye 'yi 'sleh-nyor no 'do Nyorsoa bo.

⁸Ple-dih :an-a' 'tiei 'ye 'o 'si, eh :nmor-: 'yi :mloror'. Jorwor: 'yi 'sleh-deh⧾-a' no-a' 'do Nyorsoa ybei', eh-: 'kpa deh ken, 'do :an-a' 'kmo :ne-eh-a' klehkpeh bo, :eh mu-a 'de :yi-: 'dekorn: :yeh :daa-:.

⁹Dhih :daa, 'an yi-a :za 'da, dhih 'jeh :oo', 'de nyor⧾ 'beh-dih: on 'ye-ih' :gwlii' dhe.

¹⁰:Yee' :a vorn-', 'de :a no :koan 'gabaa. Deh no-eh, :a dhe :a-a' 'kmo :ne-Nyorsoa :gwlii', :or 'dhu-a :gwlor-nyor⧾-a' klehkpeh, an-a' 'puh-dih-nyor-'. Jorwor: nyor⧾ :on po-or dhih 'jeh-', mo-: or 'puh-dih 'jeh ka.

¹¹:Torne: nyor⧾ deh⧾ :daa 'de 'chore-'. :Yee' 'nyi-uh 'tele' on 'ye-ih' no.

¹²:An-a' 'worn-:-', nyor-a' :vlehn-' :on, :an-a' 'yu-yu-dhih. Jorwor: :an-a' :wlu-a'-: noo-deh⧾-: :an-a' nyor⧾-a' :ybeh-a'-: 'Klae-a' dhih 'jeh-' :po-eh-: 'dekorn: :an-a' :vlehehn' :gweh-eh-: me-: 'ye 'yi :to-dih-deh⧾ no, 'do dhih 'jeh-' :po-nyor⧾ ybei', on 'ye 'o :an-a' gor klei' zi.

¹³:Yee' zlo Nyorsoa-a' wlu 'de nyor⧾ bo. Po Nyorsoa-a' tubo-wlu⧾ 'de nyor⧾ bo. :Torne: nyor⧾ deh. Deh⧾ :daa, me-: :on 'ye no, :on 'ye 'dlu bo kpa :chio'lo:, 'de 'on 'ye 'de a bo yi.

¹⁴'Nyii'-deh: Nyorsoa-a' :Zulu 'nyi-a :on, :eh :yi-dih:-a Nyorsoa-a' wele-eh: :po-nyor⧾-', ti 'chore-a' nyor⧾ :klaba'⧾ tba-a :on son⧾ ken dih, :an-a' :bla-dih:-eh' worn.

¹⁵Po 'de 'kpih, :on 'ye deh⧾ :daa no. :Yee' :za :an-a' 'jeh 'kwla, 'do deh⧾ :daa, en-' no-a' bo, 'de nyor⧾-a' klehkpeh, on 'ye :an-a' noo-deh⧾-a' ku-a' 'ye.

¹⁶'Dhu :an-a' 'jeh-: 'dekorn: deh :an torne-a nyor⧾-: :dhororn'. Kpa deh⧾ :daa, en-' no-a' 'dlu bo. Deh no-eh, :mor :on no-ih, :yee' :an mu nyor⧾ :an to-a :on :dou'⧾ bo-: 'dekorn: :an-a' 'jeh-: 'puh-dih:.