Read Eastern Krahn 1 :Timehte' 5 Bible Online

1 :Timehte' 5 - Eastern Krahn bible

1 :Timehte' 5

¹:Yee' :an-a' :kma-dih:-' wlu 'i, 'do nyor⧾ :bholuh⧾ bo. Jorwor: :ka :an no-a :on :baa'-a' 'slen 'dhu-eh, 'ka :wor :on 'ye an-a' 'slen 'dhu-eh no :ke. :Ka :an no-a :an-a' 'de-di'-nyor-kpalu-a' deh-' 'ye-eh, 'ka :wor :on 'ye :on 'bei' :goba'⧾-a' deh-' 'ye-eh no :ke.

²:Ka :an no-a :on 'de-a' deh-' 'ye-eh, 'ka :wor :on 'ye 'nynor⧾ :on :gweh-a :an-a' 'wluh-a' deh-' 'ye-eh no :ke. :Ka :an no-a :an-a' 'de-di'-nynor⧾-kpao'⧾-a' deh-' 'ye-eh, 'ka :wor :on 'ye 'nynor⧾-kpao'⧾-nynuu-a' deh-' 'ye-eh no :ke, 'de :porluh-a' :vlehehn'-' :gweh ka 'di, klehkpeh klehkpeh.

³:Yee' :dhoba: 'nynor⧾ :on :korn-a son⧾ se-a 'o nyni 'jeh ka, pobo: 'o on bo dih.

⁴Jorwor: :mor or 'ble 'nynuu-:, 'dekorn: 'die'-nynuu-: :yee' 'nynuu: :dao', :tehn 'i-deh: on :korn on 'ye-a' 'chean', 'do an-a' Nyorsoa-a' :weheh' :za-deh 'di, eh-: 'dhu, on 'ye an-a' 'jeh-a'a: 'cheh 'yli-eh bo 'dhu. :Mor on no deh :daa, :yee' kpa :oo', an za, 'do on 'de-: on :baa'-: 'dekorn: an-a' 'na-boi'-: bo. Deh :daa, eh-: 'pehn-dih Nyorsoa-a' :porluh dih.

⁵:Dhoba: 'nynor, :or :korn-a son se-a 'o nyni 'jeh ka, 'de :or :ne-a 'o or-a' 'jeh bo, 'nynor :or :ne :ao', or dhe Nyorsoa :gwlii'. 'De or kpa or-a' bo :wlu-eh 'dlu bo, or bale-or 'gwie-: :glaa'e-: or 'ye-or' :za-dih:.

⁶Jorwor: :dhoba: 'nynor :or 'kpa-a 'kmo bo, :or 'pehn-dih:-a or-a' 'jeh-a' :porluh dih, keen' :mloror', or-: :dao', or :ne 'kmo 'weh, jorwor: or 'meh-'.

⁷Zela: nyor⧾-a' klehkpeh deh⧾ :daa :gwluhuh', 'de nyor :ne-uh' dhih 'bhun 'ye.

⁸:Yee' nyor :korn or 'ye or-a'a: 'wluh-a-nyor⧾ 'yli-eh bo 'dhu, :yuh :on :ne-a 'de :or 'bli 'gbu, mo-: or 'ye-eh' bo dih no 'gabaa. :Mor or se-eh no, :yee' or :to 'Klae-a' dhih 'jeh-' :po-eh 'kpuh ya. :Yee' or :zi 'o nyor :or se-a dhih 'jeh-' :po-eh 'ble 'weh.

⁹:Mor :dhoba: 'nynor-a' zon⧾ se :kwlaa :meheh'lo ken :yeh-dih:, :yee' :an-a' :po-' or-a' 'nyne 'de 'chlee-deh: :eh :korn-a 'di, :an po-a :dhoba: 'nynor⧾-a' 'nyne. :Mor :on 'ye 'nynor-a' 'nyne po, :yee' 'nyi or no 'nynor :eh 'wluh-a 'o ti or-a'a: yibeor 'meh-a, :or 'see-a yibeor: :noror' korn.

¹⁰:Yee' 'nyi or no 'nynor :or 'ble-a 'nyne 'jeh, 'do deh⧾ 'jeh ne-a' no-a' bo-: :eh po-a 'nynor :or pobo-a 'o or-a'a: 'nynuu bo dih-: 'nynor :or za-a or-a'a: 'gbu 'kwla 'de 'duhba⧾ bo-: 'nynor :or-a' ple-a or-a' 'jeh ya :ya-eh, 'do Nyorsoa-nyor⧾-a' :za-dih-eh bo-: 'nynor :or za-dih-a nyor⧾-', :mor on :taa 'kle 'ye-: 'dekorn: 'nynor :or 'duo:-a or-a' ti-a' klehkpeh-', 'do deh⧾ 'jeh :ne 'doror: 'dor-a' no-a' bo-:.

¹¹:Yee' 'nynor⧾ :gbolo'⧾ :on :korn-a yibeor-boi' 'meh-a, :an-a' :po-' 'de an-a' 'nyne, 'de 'chlee-deh: :dao' 'di. Deh no-eh, :mor an-a' nyor-kpalu: :porluh 'beh 'i, on :zi 'o :porluh on 'ble-a 'do 'Klae bo, :yee' an 'bhorn on 'ye nyina 'ti :neheh'.

¹²Eh-a' dhih, :yee' on :ya 'de zabe: :zi-eh: 'do an-a' 'jeh bo. Deh no-eh, deh :korn-a wlu on po-a :dhama'-' 'de 'Klae bo, on :se-eh' no.

¹³Jorwor: eh :se-eh :due'. An 'chean' vlan-a'. 'De an na 'o yaa'e dih. An no, mu 'gbu :noo' 'di, 'wluh 'de. Eh :se-eh :due', an-a' no. Jorwor: an chehn nyor⧾. 'De an po nyor⧾-a' dhih buh 'di. Deh⧾ on se-a :korn, on 'ye-a' wlu bo po, me-: an po wlu bo.

¹⁴:Yee' deh 'on 'da-a, eh-: :dhe dih. 'An 'bhorn 'nynor⧾ :gbolo'⧾ :on :korn-a yibeor-boi' 'meh-a, on 'ye nyina 'ti. 'De on 'ye 'nynuu 'wluh. 'De on 'ye an-a'a: 'gbu⧾ 'yli-eh bo 'dhu. 'De nyor⧾ :on 'nyeh-a :a-uh', on :ne-' ka 'ye, 'do :a-a' deh⧾-zon⧾ 'bhun dih :za-dih: 'da.

¹⁵Deh :korn-a dhih, 'de 'an za-a deh :daa-', eh-: :dhe dih. An-a' nyor⧾ :noo', mo-: 'wluh 'o 'Klae 'de, 'de an zi 'o 'ku klei'.

¹⁶:Yee' :mor 'Klae-a' dhih 'jeh-' :po-nynor 'ble :dhoba: 'nynor⧾ 'do or 'bli neh 'i, :yee' 'nyi or 'kpa-uh bo, 'de an-a' dhih :sor :po-eh 'o 'chore 'dlu, 'de 'chore 'ye :dhoba: 'nynor⧾ :yuh :on se-a deh-a' :za-da 'ble 'jeh ka, an-a' bo dih pobo-eh 'beh-dih:.

¹⁷'De mor :ke, 'chore-a' nyor⧾ :klaba'⧾ :an no-a :koan: 'jeh, 'do nyor⧾ :na-dih-eh bo, an-a'a: geli' :za-dih-deh: an mu-a 'ye-:, eh :korn eh 'ye ken 'dhu-eh:, eh 'ye 'o on 'bei'-' :zi. Nyor⧾ :an no-a :koan, 'do nyor⧾ deh :torne-eh bo-: 'dekorn: Nyorsoa-a' tubo-wlu:⧾ :po-eh bo-: mo-: :korn :on 'ye geli' :za-dih-deh: :daa 'ye.

¹⁸Deh no-eh, Nyorsoa-a' 'chlee-deh 'da, A 'bor :blii'-a' worn :san-eh, :mor eh :taa deh⧾-yor sonor 'do a bo. 'De eh 'da :ke, Nyor :or no-a :koan, or :bleh-dih-eh 'i, or 'ye or-a'a: geli' :za-dih-deh 'ye.

¹⁹:Yee' :mor nyor :ya 'de 'chore-a' nyor :klaba'-a' :jii-eh 'de :on bo, :an-a' :po-eh' dhih 'jeh-' 'suh. :Mor nyor⧾ 'sororn' taan dhe-eh ken dih :weh, 'de jorwor: :on 'ye-eh' dhih 'jeh-' po.

²⁰Jorwor: :mor or no-eh 'jeh ka, 'de or 'ye or-a' deh⧾-zon⧾-a' no-a' :dao' 'dlu bo kpa, :yee' za-eh' 'do 'chore ybei', 'de :yuh :sie:-a 'o, on 'ye :fano ple, on :ne-' deh-zon no :ke.

²¹'An 'da :on 'weh, 'do Nyorsoa-: :Yusu' 'Klae-: 'dekorn: 'enjor-nyor:⧾ or gan-a-: ybei', :on 'ye 'o deh⧾ :daa 'an za-a-', dih dhe. :An-a' 'chleh-: 'de dih. 'De mor deh⧾-a' klehkpeh :an mu-a :no, :an-a' :za-' :gwie-for :due'.

²²:Mor :on :taa nyor son⧾ ken dih tba, 'do Nyorsoa-a' :koan: :no-eh bo, :yee' 'wla :gwluhuh' dih, 'do eh-a' no 'da. :An-a' :zi-', eh-a' noo-dhih 'suh. :Yee' :ke, :an-a' 'kpa-:-' nyor⧾ bo, 'do deh⧾-zon:⧾ :no-eh bo. Jorwor: 'dhu :an-a' 'jeh :dhororn', :on 'ye :vlehehn'-' :gweh.

²³:An-a' 'na-:-' 'ni-a' 'plo :due' :neheh'. Jorwor: 'na 'glee-nomor-deh⧾-bei, 'de :on 'di-a' dhih bo-: 'dekorn: :an-a' kormu-eh: 'tihlih' 'tihlih'-a' dhih-: :ke.

²⁴Nyor⧾ :noo'-a' deh⧾-zon⧾ :nyeh ken. En mu on ybei', 'do :dha nyor⧾-a zi-dih-a zabe, 'de jorwor: an mu-ih ken dih :mu. Jorwor: nyor⧾ :noo'-a' deh⧾-zon⧾-a' 'ye-a' :kma 'i. Eh gwle 'o :weh, 'de jorwor: nyor⧾-a 'ye-ih.

²⁵'Ka-: deh 'jeh :no-eh-a' no ken :nyeh-eh :ke. 'De mor en-' :yeh se ken :nyeh :tehn 'i, en mu ken :nyeh :gbor :gbor.