Read Eastern Krahn 1 :Timehte' 6 Bible Online

1 :Timehte' 6 - Eastern Krahn bible

1 :Timehte' 6

¹:Yee' nyor⧾-a' klehkpeh :on no-a 'ge-nynuu, on :korn on 'ye an-a'a: nyor⧾ :klaba'⧾ :on korn-uh-a wlu 'ken, deh-' 'ye-eh-a' klehkpeh 'nyi, 'de nyor⧾ :ne-' Nyorsoa-: 'dekorn: :a-a'a: nyor⧾ deh :torne-eh-: deh⧾-zon⧾ 'bhun dih :za-dih:.

²:Yee' 'ge-nynuu: :yuh 'Klae-a' dhih 'jeh-' :po-nyor⧾ korn-a wlu 'ken, an-a' :no-', :A-a' 'Klae :de-di'-boi' :oo', :on :dhe dih. 'De an-a' :vlehn-uh'. Jorwor: 'ge-nynuu: :dao', on :korn on 'ye an-a'a: nyor⧾ :klaba'⧾ :dao', an-a' :koan no deh 'jeh neh, eh 'ye 'o :zi. Deh no-eh, an-a'a: nyor⧾ :klaba'⧾ :dao', :an 'ye-dih-a :koan: an no-a deh 'i, an-a' 'Klae :de-di'-boi' :oo'. 'De on no an-a' :dhih :kma-nyor⧾ :ke. Deh⧾ :daa, me-: :on 'ye-uh' :torne:. :Yee' 'neh-uh ken, on 'ye-ih' no.

³:Yee' :mor nyor :torne: nyor⧾ sih-deh⧾, 'de or-a' nyor⧾ deh :torne-eh :ne :a-a' :Gwlor :baa' :Yusu' 'Klae-a' 'yi 'sleh-deh: or torne-a nyor⧾, en 'ye :ao', en se :gwie :due' kpa, 'de sih-deh:⧾ :dao', en :ne-Nyorsoa-deh se :gwie :due' kpa :ke,

⁴:yee' nyor :dao', or 'beh-dih or-a' 'jeh 'i yaa'e. 'De or se deh-' dih 'worn-eh 'ble. Or-a' 'dlu se 'o :gwie 'i :ne. Deh :due' or 'bhorn-a, eh-: 'dhu, :zaa'-: 'dekorn: :dhlumeh' :po-eh-: 'do wlu⧾-a' dhih bo. :Yee' deh⧾ :daa, en ya 'de :gwlehehn'-: jeh-a'-: 'jlei: :zie-dih-eh-: deh⧾ 'yli-eh 'zorn dih :bla-eh: 'de 'kulu: ka 'di-:

⁵'dekorn: jeh-a' :or se-a 'dlu-' :jla 'da :korn-: 'de nyor⧾ :on :korn-a 'dlu⧾ se-a 'i 'sleh, 'nyne-'. Nyor⧾ :dao', on se dhih-a' 'yor-eh yubo: :neheh'. An-a' :porluh⧾ 'da, Nyorsoa-deh, :mor deh :oo', nyor⧾-a no, :eh 'ye nyor⧾ :bhan-dih:.

⁶Keen', Nyorsoa-deh-a bhan-dih nyor⧾ 'weh, jorwor: eh :se 'kmo-a' bhan-a'. :Ka eh no-a nyor⧾ :bhan-dih-eh, eh-: 'dhu, eh no-eh', 'de :an-a' :porluh-a' 'pehn-dih, 'do deh :on 'ble-a bo.

⁷Ti :a 'ye-a 'noror yao 'zorn yi, :a :se 'de deh :ya. :Yee' :mor :a :taa de mu, :a se 'beh-dih: :a 'ye deh kpa.

⁸'Do eh-a' dha, :ka eh :ne :ao', :mor :a 'ble dii-deh⧾-: 'dekorn: paa-deh⧾-: :yee' :a-a' :porluh⧾ :korn en 'ye dih 'pehn.

⁹Jorwor: nyor⧾ :an 'bhorn-a bhan-a', an-a' 'bhororn'-deh:⧾ :dhulu' :en 'dhu-a :bobo-deh⧾-: 'dekorn: nyor⧾ 'kor-dih-deh⧾-: me-: no-eh, 'de an 'kpa 'de dih 'dhen-eh-a' pluh 'worn :gbor. 'Bhororn'-deh:⧾ :daa, me-: mu-uh ya :ya, 'de en 'ye-uh' 'kor-dih:, 'de on 'ye gbe :zie:.

¹⁰Deh no-eh, 'wlii-dhih: :kma-eh:, eh-: 'dhu, deh⧾-zon⧾-a' klehkpeh :en :ne-a dha yao 'zorn, en-' ji-buh-'. Nyor⧾ :noo', mo-: :korn 'wlii-porluh: 'beh 'i 'gabaa, mo-: 'dhu eh-a' dhih, :on :to 'Klae-a' dhih 'jeh-' :po-eh 'kpuh ya. 'De on :ya an-a' 'jeh 'kle 'ye-eh: :dhulu' bo.

¹¹Jorwor: :mor :or 'dhu-a Nyorsoa-nyor-', :an-a' :po-' deh⧾ :daa son 'di. Jorwor: po 'de 'kpih, :on 'ye 'yi 'sleh-nyor no, :on 'ye Nyorsoa-nyor: 'jeh nor no, :on 'ye 'Klae-a' dhih 'jeh-' :po-eh 'ble, :on 'ye :ybeh-dih-eh 'ble. :An-a' :sea:-', jorwor: :kpoehn: 'i.

¹²Vorn vorn-a' 'jeh nor, 'do 'Klae-a' dhih 'jeh-' :po-eh bo. Kpon 'kmo :sie: :febeh' dih, :eh :korn-a dhih Nyorsoa 'da :on, ti :on :nyna-a 'o :gwlor-nyor:⧾ :dhulu' ybei' dih, 'de :on zela-eh ken dih deh 'jeh, :ka :on 'worn-dih:-a :Yusu' 'Klae-a' dhih.

¹³'Do Nyorsoa :or 'nyi-a deh⧾-a' klehkpeh :febeh' ybei'-: 'dekorn: :Yusu' 'Klae ybei'-: :or zela:-a or-a' 'jeh-a' dhih ken dih deh 'jeh, 'do 'Pantior: Pale' ybei', 'an 'bhorn

¹⁴:on 'ye 'o 'tele' :daa dih dhe, 'do 'yi 'sleh ka 'di, 'de nyor⧾ :ne-' :on dhih 'bhun 'ye, 'de eh 'ye 'we-eh: :a-a' :Gwlor :baa' :Yusu' 'Klae-a mu-a 'de :ya ken :yeh-dih:.

¹⁵:Yusu'-a' 'de :yi-eh:, Nyorsoa :or no-a :bhorlie'-Nyorsoa, 'de :or :ne-a :due', :or no-a nyor⧾ wlu 'ken :korn-nyor, :or no-a 'Keen 'do 'keen-boi'-a' klehkpeh bo, 'de :or no-a :Gwlor :baa' 'do :gwlor :bai'-a' klehkpeh bo, or-a' 'jeh :dao', or-: mu-eh :no, 'de eh 'ye :no-eh:, 'do ti eh :korn eh 'ye-a' :no-dih-eh 'di.

¹⁶Or :due' gbai, :or-a' 'meh. Or 'ti 'de zorn-pli-', :dha nyor se-a dih 'koan'-dih-eh 'beh-dih:. Nyor 'see-or 'ye :zai'. 'De mor nyor se 'beh-dih: or 'ye-or' 'ye. Deh-' 'ye-eh-: 'dekorn: 'kpih-: en :korn 'de or bo, :ka ti-a mu-a 'dlu-' :tehn. 'Ka-: eh 'ye :ne.

¹⁷:Yee' 'nyi bhaan-nyor:⧾ :on bhan-a :naa 'tele', dha yao 'zorn, on :ne-' on 'bei' :vlehn, 'de on :ne-' an-a' deh :gwlii' :dhe-eh 'de bhan-a' bo po. Deh no-eh, bhaan-deh⧾ :se :gwlii' :dhe-deh:. Jorwor: 'nyi-uh 'tele', on 'ye an-a' deh :gwlii' :dhe-eh 'de Nyorsoa bo po, :or se-a 'kwa dih :kmu, 'de :or 'nyi-a :a deh⧾-a' klehkpeh, :en 'ye-a :a-a' :porluh⧾ dih 'pehn-dih:.

¹⁸'Nyi bhaan-nyor:⧾ :dao' 'tele', on 'ye deh⧾ 'jeh no, 'de an-a' deh⧾ 'jeh :no-eh: :dao', en 'ye 'o dih :zi. 'De on :sor :kmu 'kwa dih, an-a' :porluh⧾ 'ye worn :nmor 'do nyor⧾ bo, 'do ti-a' klehkpeh bo.

¹⁹:Yee' :mor on no deh⧾ :dao', :yee' an dhe bhaan-deh⧾ dih, 'de ybei', 'do an-a' 'jeh bo, 'de on 'ye 'kmo-' :ne-eh: :eh no-a 'kmo-' :ne-eh: 'jeh 'ye, 'jeh ka.

²⁰:Yee' :Timehte', deh Nyorsoa po-a 'de :on 'kwa, :on 'ye-a' 'yli-eh bo 'dhu, :yee' 'dhu-eh 'yli-eh bo deh 'jeh neh. :An-a' :po-' :an-a' 'jeh 'de deh⧾ :daa 'di, :en no-a, :bobo-dhih-a' polo-eh: :en se-a Nyorsoa deh-' 'ye-eh 'nyi-: 'dekorn: dhobo-eh: :eh se-a :toror' 'di :ne-:, :eh nyor⧾ :noo'-a 'da-dih-a :gwluhuh' dih :florn-eh.

²¹:Gwluhuh' dih :florn-eh: :daa, :eh :ne :ao', eh-: nyor⧾ :noo' 'da on 'ble. :Yee' 'do eh-a' dha, on se 'o 'Klae-a' dhih 'jeh-' :po-eh-a' :gwie 'i :ne :neheh'. :Yee' Nyorsoa po a-a' klehkpeh mla bo o.