Read Eastern Krahn 2 :Timehte' 1 Bible Online

2 :Timehte' 1 - Eastern Krahn bible

2 :Timehte' 1

¹'Mor :Poror' :or Nyorsoa 'da-a :or 'ye-a :Yusu' 'Klae-a'a: dboo-nyor no, 'de or-a' 'ton :korn ka 'di, or dbo 'on 'weh, 'on 'ye 'kmo :sie: :febeh' :a 'ble-a, :eh :yi-dih:-a :Yusu' 'Klae-', eh-a' tubo-wlu⧾ po, :ka Nyorsoa no-a eh-a' wlu :dhama'-' :po-eh.

²'Mor 'ye :on, :Timehte', :mor :or gweh-a 'an :dhih :kma-yu, 'de 'Klae-a' deh 'di. Mla-: :wehlih: :korn-eh-: 'dekorn: :porluh-a' dih 'pehn-eh-: 'do :on bo, :en 'wluh-a 'de Nyorsoa :or no-a :a :Baa'-: 'dekorn: :a-a' :Gwlor :baa' :Yusu' 'Klae-: bo.

³'On po Nyorsoa-a' 'zio, :or :korn-a 'bhoi-yu-deh: 'an no-a, 'de 'an :porluh se-a 'an 'jeh zabe :kpon-dih:, :ka 'on :bai'-a' :bai' no-a or-a' :weheh' :za-eh :ke. :Mor 'on :taa 'de Nyorsoa bo wlu, 'gwie-: :glaa'e-: :yee' 'an po 'de :an-a' 'nyne 'weh, 'de 'an po-or 'zio :an-a' dhih.

⁴Deh :an no-a 'vin-a', :an no-a 'mii dih 'wla-eh, eh :ne 'o 'on :gwlii' 'weh. Eh-: no-eh, 'de 'an 'bhorn 'on 'ye :on 'ye 'gabaa, 'de 'mona 'ye 'on-' dih 'yi-dih:.

⁵:An-a' Nyorsoa dhih 'jeh-' :po-eh: 'jeh :on 'ble-a, eh :ne 'o 'on :gwlii' 'weh. :An-a' 'na 'Loeh: :or no-a 'nynor-kpao', or-: po-ih dhih 'jeh-' :zai'. 'De :on 'de 'Nyuneh po-ih dhih 'jeh-' :ke. 'On yubo-eh', eh-a' 'jeh :dao', eh-: :on 'ble :ke.

⁶'Do deh :daa, eh-a' dhih, 'an po-dih :on dhih :gwluhuh' bo, 'nyii'-deh: Nyorsoa 'nyi-a :on, ti 'on tba-a :on son⧾ ken dih, po-eh :na 'kaen 'zorn, 'de eh-a' neh 'ye 'i kpon.

⁷Deh no-eh, Nyorsoa :se-' or-a' :Zulu :a-uh 'nyi, :a 'ye :fano ple. Jorwor: or-a' :Zulu: :dao', mo-: 'nyi :a 'kpih-: :ybeh-dih-eh-: 'dekorn: :a-a' 'jeh wlu 'ken :korn-eh, :a :ne-' deh-zon no-:.

⁸:Yee' eh-a' dhih, dhen-a' :no-' :on, 'do :a-a' :Gwlor :baa'-a' dhih-' :za-eh bo. 'De mor dhen-a' :no-' :on :ke, 'do 'an :kasue 'di :po-eh bo, or-a' dhih. Jorwor: no Nyorsoa-a' 'kpih, :on 'ye 'on bo 'kpa, :a 'ye 'kle 'ye, 'do Nyorsoa-a' tubo-wlu:⧾ 'jeh-a' dhih bo.

⁹Or 'puh-dih: :a 'weh. 'De or 'da :a-uh, :a 'ye or-a' :vlehehn'-' :gweh-nyor⧾ no. Eh :se deh⧾ :a no-a :dee', en-' dhih. Jorwor: or 'worn-dih-eh ken dih 'weh, or 'ye :a mla bo po. Mla :daa, :or :yi-dih:-a :Yusu' 'Klae-', or 'nyi-eh: :a 'weh, 'de jorwor: Nyorsoa-a mu 'bluhba :no.

¹⁰:Yee' or :to-dih: :a 'i 'weh :naa, 'de eh :yi-dih: :a-a' 'puh-dih-nyor: :Yusu' 'Klae-', ti or yi-a 'de, 'de or :za-a 'meh-a' gla, 'de or :ya-a: 'de 'kmo :sie: :febeh' 'do zorn-pli 'i, :eh :yi-dih:-a tubo-wlu:⧾ 'jeh :daa-'.

¹¹'Mor :or 'dhu-a :Poror'-', Nyorsoa gan 'on 'weh, 'on 'ye or-a' tubo-wlu⧾ po, 'de 'on 'ye :Yusu'-a'a: dboo-nyor no, 'de 'on 'ye nyor⧾ deh :torne-nyor no, 'do tubo-wlu:⧾ 'jeh :daa bo.

¹²Eh-: :korn dhih :oo', 'de 'an 'ye deh⧾ :daa, en-' 'kle :naa. Jorwor: dhen :se-' 'on no, 'do tubo-wlu:⧾ 'jeh :daa, en-' po-a' bo. Deh no-eh, 'on yubo: nyor 'on dhe-a :gwlii' 'weh. 'On yubo-eh' deh 'jeh, or 'beh-dih: deh or po-a 'de 'on 'kwa, or 'ye-eh' 'yli-eh bo 'dhu, 'de Nyorsoa-a' zabe: :zi-we-eh 'ye 'o nyni.

¹³Dhih 'jeh :on 'worn-a, 'de 'on :torne:-a :on, me-: :on 'ye 'o klei' zi, 'de dhih 'jeh-' :po-eh-: 'dekorn: :ybeh-dih-eh-: :en :Yusu' 'Klae 'nyi :a-uh, 'de en 'di.

¹⁴Gban i :ne :Zulu: :on 'ti-a 'de :a 'di, an-a' 'kpih, me-: a 'ye no, a 'ye bhaan-deh:⧾ :daa :en :po-eh 'de a 'kwa, 'yli-eh bo 'dhu.

¹⁵:On yubo-eh', :ka nyor⧾-a' klehkpeh :on :ne-a 'de 'Esea-bluhba ken, on po-a 'on dih. :Faya'lor-: 'dekorn: :Ehma'jinor-: on 'kpa 'o on klei' 'weh :ke.

¹⁶Jorwor: 'nyi :Gwlor :baa' 'ye :Oneh'sifor-a'a: 'gbu :wehlih. Deh no-eh, or po 'de 'an 'kpih, 'do kpor⧾ :dhulu' 'di. 'De mor eh :se-or' dhen :no-dih:, 'an :kasue 'di :ne-dhih.

¹⁷Jorwor: :yeh or 'si-a 'Wloon dih, :yee' or 'bhorn 'on 'kwla⧾-' dih :bhororn:, 'de or 'ye 'on.

¹⁸'Nyi :Gwlor :baa' no-eh, 'de Nyorsoa 'ye-or :wehlih 'ye 'do or-a' zabe: :zi-we-eh 'di. :On yubo-eh' deh 'jeh, :ka or no-a 'an bo 'kpa-eh, ti 'on :ne-a 'o :gwlor an 'da-dih-a 'Ehfesor 'di.