Read Eastern Krahn 2 :Timehte' 2 Bible Online

2 :Timehte' 2 - Eastern Krahn bible

2 :Timehte' 2

¹:Yee' 'an 'yu, :Timehte', :mor :mloror', :on :korn :on 'ye dih ku, 'do mla :Yusu' 'Klae po-a :on bo, or-a' dhih.

²:Yee' deh⧾ :on 'worn-a, 'on :za-a-', 'do nyor⧾ :dhulu' ybei', me-: :on :korn :on 'ye 'de nyor⧾ :noo' 'kwa po, :yuh nyor⧾ dhe-a :gwlii', 'de :on 'beh-dih:-a on 'bei'-a' deh :torne-eh.

³:Mor :an-a' 'kle 'ye-ti nyni 'o, :yee' ku 'di dih, :ka :Yusu' 'Klae-a' sorye'-yu: 'jeh nor no-a.

⁴:Mor sorye'-yu :ne 'o :koan 'i, :yee' or-a' no :koan: nyor⧾ :yuh :se-a sorye' an no-a. Deh no-eh, or 'bhorn or 'ye or-a'a: :janbe-a' :porluh dih 'pehn-dih:.

⁵Nyor :or :ne or 'be-: an dhobo-a dih 'do ple-a' 'di, :mor or 'ye or 'be du, 'de or 'ye geli' :za-dih-deh 'ye, :yee' or :korn or 'ye 'o ple-a' 'tele' klei' zi.

⁶Gle :no-nyor: :or no-a :koan 'gabaa 'de or 'bli 'gle, or-: :korn or 'ye or-a'a: gle-a' :tehn 'i-deh di.

⁷Deh⧾ 'an zela-a :on :gwluhuh', po-ih 'de :on 'dlu 'di. Deh no-eh, :Gwlor :baa'-a mu-eh :no, :on 'ye en-' klehkpeh-a' dih 'worn.

⁸:Yee' a :na-dih: :Yusu' 'Klae-a' dhih :gwluhuh' dih, :or Nyorsoa :za-a: 'de nma-dih-deh 'di, 'de :or 'dhu-a :Debe' 'di-a' 'yu-'. Eh-: :korn tubo-wlu:⧾ 'jeh :oo', 'an po.

⁹Tubo-wlu:⧾ 'jeh 'an po-a, en-' dhih 'an 'ye 'kle, 'de on :san-dih: 'on 'chen-dubu'⧾ :sloror', :eh gweh-a :ka nyor :or no-a deh-zon. Jorwor: Nyorsoa-a' wlu :se-' 'chen-dubu'⧾ :san-dih-eh:.

¹⁰:Yee' eh-a' dhih, 'on ku 'di dih 'weh, 'do 'kle 'ye-eh-a' klehkpeh bo, 'do nyor⧾ Nyorsoa gan-a, an-a' dhih bo, on 'ye 'puh-a' :or :yi-dih:-a :Yusu' 'Klae-' 'ye, :or :ya-a: 'de dhih-a' 'i 'beh-a', :or :sie:-a 'kmo.

¹¹:Yee' dhih :en no-a dhih 'jeh, me-: :dhe dih. :Mor :a :ne :Yusu' 'meh-dih: :dha :due', :yee' :a mu :dha :due' 'kmo-' :ne-dih: :ke.

¹²:Mor :a se sea, :yee' or :ne :a mor-: :a mu nyor⧾ wlu 'ken :korn. :Mor :a dhobo or-a' dhih-', :yee' or mu :a-a' dhih-' dhobo: :ke.

¹³Deh :a :korn :a 'ye-a' no 'do 'Klae bo, :mor :a se-eh no, :yee' or :mor :mloror', or mu or-a' neh :no 'do :a bo :chio'lo:. Deh no-eh, or se or-a' 'jeh-a' dhih-' dhobo-eh 'beh-dih:.

¹⁴:Yee' :po-dih: :an-a'a: nyor⧾ dhih :daa :gwluhuh' bo. 'Dhu-uh 'slen 'do Nyorsoa ybei', an-a' :po-' :dhlumeh' 'do wlu⧾-a' dhih bo. Eh :se 'o a deh 'jeh :po i. Jorwor: deh :due' eh no-a, eh 'kor-dih nyor⧾ :an to-a a :dou'⧾ bo 'weh.

¹⁵Po 'de 'kpih :on 'ye nyor no, Nyorsoa 'ye :an-a' dhih ken dih 'worn-dih:, :on 'ye :koan: :no-nyor: :or dhen se-a :korn en 'ye-a' no gweh, 'de :or no-a nyor :or torne-a nyor⧾ Nyorsoa-a' wlu, :on no-a dhih-a' 'yor-eh, 'de 'yi 'sleh ka 'di.

¹⁶:Tehn-dih: :an-a' 'jeh :bobo-dhih-a' polo-eh: :en se-a deh 'di :ne bo dih, 'de :en se-a Nyorsoa deh-' 'ye-eh 'nyi. Deh no-eh, nyor⧾ :on :ne-a 'de en 'di, an-a' Nyorsoa bo dih :tehn-dih-eh mu ken dih 'kpuhba: :chio'lo:.

¹⁷An-a' nyor⧾ deh :torne-eh: :dao', eh gweh 'pa :or-a' 'bor-a, 'de :or gweh-a nyor⧾-a' yau-a' klehkpeh 'dlu. Nyor⧾ 'sororn' :an torne nyor⧾ deh⧾ :en :ne :ao', an-a' 'nyne :wor :Ame'na-: 'dekorn: :Fali'ta-:.

¹⁸Nyor⧾ :daa, on 'wluh 'o dhih-a' 'yor-eh-a' :gwie 'i 'weh. An 'tmo sih. On 'da 'meh :sorn-' deh zi :weh. Nyor :se 'de nma-dih-deh 'di 'wluh-: i :neheh'. :Mor on 'da :ao', :yee' an 'kor-dih nyor⧾ :noo'-a' dhih 'jeh-' :po-eh 'weh.

¹⁹Jorwor: 'chore Nyorsoa po-a glu, eh :se 'i gbua-deh:. Eh 'chle-eh:-' 'do eh ken, eh 'da, :Gwlor :baa' yubo: :yuh :on :korn-a 'de or bo 'weh. :Yee' eh 'da :neheh', Nyor⧾-a' klehkpeh :on no-a, mo-: :Gwlor :baa'-a' nyor⧾ :oo', on :korn on 'ye an-a' deh⧾-zon⧾ 'kpuh ya :to.

²⁰'De 'gbu :klaba' 'di, 'di :di-dih-deh:⧾ :en :ne-a 'de, en :sie-dih: 'zorn dih. On :no-dih: :nee' 'sebla-:, 'dekorn: 'goo-:. 'De on :no-dih: :nee' meh-: 'dekorn: tu⧾-:. :Nee' :korn ti, 'de an 'duo-ih', an no-dih-ih :koan-'. 'De :nee' :ne 'o, an no-dih-ih :koan-' 'do ti-a' klehkpeh bo.

²¹:Mor eh 'dhu, nyor 'tali: or-a' deh⧾-zon⧾ dih, 'de or 'ye :vlehehn'-' :gweh, :yee' or mu 'di :di-dih-deh: :eh :korn-a ti, 'de nyor⧾-a no-dih-a :koan :gweh. Or mu 'for 'i :dhe-dih-eh: 'do Nyorsoa bo, or 'ye :koan :korn 'do or bo. :Yee' or mu buh⧾ ken :ne, or 'ye :koan: 'jeh :nor 'doror: 'dor no.

²²:Timehte', :tehn-dih: 'nynuu: :gbolo'⧾-a' 'bhororn'-deh⧾-zon⧾ bo dih. Nyor⧾ :an za-a :Gwlor :baa'-a' :weheh', 'de :porluh⧾-a' :vlehehn'-' :gweh ka 'di, mo-: :on 'ye bo :na, a 'ye 'yi 'sleh-deh⧾-: dhih 'jeh-' :po-eh-: :ybeh-dih-eh-: wlu-' dih 'worn-eh-: a 'ye-ih' 'de ple.

²³:An-a' 'kpa-:-' nyor⧾ bo, a-a' dhobo:-' :bobo-dhih-: 'dekorn: se deh 'i yubo-dhih-:. Deh no-eh, :on yubo-eh', :ka en ya-a 'de jeh-a'.

²⁴:Yee' :Gwlor :baa'-a' 'bhoi-yu :ne nyor⧾-a' :jeh-'. Jorwor: or-a' :porluh :korn on 'ye 'yi dih :nmor, 'do nyor⧾-a' klehkpeh bo. :Yee' or :korn or 'ye nyor⧾ deh :torne-nyor: 'jeh nor no, :or kpon-a :porluh dih 'do nyor⧾ bo.

²⁵:Mor or :taa nyor⧾ :an vorn-or bo, deh :jii-eh 'i dih po, or :korn or 'ye 'i :kpoehn:. Nyor se yubo:, nyor⧾ :dao', Nyorsoa-a mu-eh :no, on 'ye-' dih 'bili:, 'de on 'ye dhih-a' 'yor-eh yubo:,

²⁶on 'ye an-a' 'jeh bo yi, on 'ye 'de 'ku :on kpon-uh-a :dee', on 'ye-a' an-a' 'ton :korn-deh no, on 'ye ple, on 'ye 'de an-a' pluh 'worn 'wluh.