Read Eastern Krahn 2 :Timehte' 3 Bible Online

2 :Timehte' 3 - Eastern Krahn bible

2 :Timehte' 3

¹:Yee' 'an 'bhorn :on 'ye-eh' yubo:, 'do :de 'bor-dih-we 'di, deh⧾-a mu 'i :kma.

²:Gwlor-nyor⧾-a mu an-a' 'jeh-a' :due'-a' dhih :zi. An mu 'wlii-a' dhih :kma. An mu an-a' 'jeh dhih bo :po. An mu an-a' 'jeh 'i 'beh-dih:. An mu 'jlei 'worn 'yi-:. On :se 'o on 'de-: 'dekorn: on :baa'-: an-a' wlu dih :dhe i. 'Zio :po-eh se 'de on 'worn :ne, 'de an-a' 'ye Nyorsoa-a' gban 'i :ne-deh⧾ deh-'.

³An mu 'galo: :korn. On :se-' :wehlih :gwlii' :ne i. An mu on 'bei' deh⧾-zon⧾ 'bhun dih :za-dih:. On :se-' an-a' 'jeh wlu 'ken :korn i, 'do deh⧾-zon:⧾ :no-eh bo. An-a' :porluh⧾-a mu worn :nyni. An mu deh 'jeh 'nyeh-:.

⁴An mu :bhuli' dih 'yi-dih:. On :se-' deh 'kor-dih-eh :ple i. An mu :nya-dih-eh-' dih 'yi-dih:. An mu 'kmo bo 'kpa-: on 'ye-uh' :ybeh, eh 'ye 'o Nyorsoa-' :zi.

⁵An mu an-a' 'jeh Nyorsoa-nyor⧾ 'da-dih:. Jorwor: an mu or-a' 'kpih :vlehn. Nyor⧾ :dao', :on :ne :ao', :tehn-dih-uh bo dih o.

⁶Nyor⧾-a' 'jeh :dao', mo-: 'o, :an po-dih nyor⧾ 'sleh dih, 'de :an pa nyor⧾ 'bli 'gbu⧾ 'di dih. 'De :an bo-dih 'nynor⧾-kpao'⧾ dih, :yuh :korn-a :porluh:⧾ se-a dih ku, 'de :an-a' :gwle-a 'o nyor⧾-a' wlu dhih 'jeh-' :po 'da, 'de an korn-uh wlu 'ken. 'Nynor⧾-kpao'⧾ :dao', deh⧾-zon:⧾ an no-a, en-' bhali-a bla-uh'. 'De an-a' 'bhororn'-deh⧾-zon:⧾ 'doror: 'dor-a na-dih-uh 'kle.

⁷An 'bhorn on 'ye deh 'chean' 'do ti-a' klehkpeh bo. Jorwor: on se 'beh-dih: on 'ye dhih-a' 'yor-eh dih 'worn.

⁸:Ka nyor⧾ 'sororn' an 'da-dih-a 'Jana-: 'dekorn: 'Janble-: on no-a, 'de on vorn-a :Mose' bo, 'ka :wor nyor⧾ :dao', :an bo-dih-a nyor⧾ dih, an no :ke, an vorn dhih-a' 'yor-eh bo. 'De an-a' 'dlu⧾ se 'i 'sleh. 'De on se dhih 'jeh-' :po-eh: 'jeh neh 'ble.

⁹Jorwor: on :se-' deh-' :na i. Deh no-eh, nyor⧾-a mu-eh 'ye-:, :ka on no-a :bo-a'. Deh :korn-a 'be no-a 'Jana-: 'dekorn: 'Janble-:, eh-: 'o.

¹⁰Jorwor: :mor :mloror', :on yubo: 'an nyor⧾ deh :torne-eh bo dih 'weh. :On yubo: 'an noo-deh⧾-: deh 'an 'bhorn-a 'on 'ye-a' no 'noror 'kmo bo-: 'an dhih 'jeh-' :po-eh-: 'an :porluh-a' dih :kpon-eh-: 'an nyor⧾-' :ybeh-eh-: 'dekorn: deh 'an-a' 'worn, 'an-a' sea-:.

¹¹'De :on yubo: :ka nyor⧾ no-a 'an 'kle 'ye-dih-eh, 'de 'on 'ye-a 'an 'jeh worn 'gabaa. Deh⧾-a' klehkpeh :en :yi-dih:-a 'on ya dih, 'do :gwlor⧾ an 'da-dih-a 'Antior-: :Iko'nia-: 'dekorn: 'Lesla-: 'di, :on yubo-ih'. Jorwor: :Gwlor :baa' zelie: 'on 'weh, 'do deh⧾-a' klehkpeh :daa 'zorn.

¹²:Yee' nyor⧾-a' klehkpeh :on :korn-a 'de :Yusu' 'Klae bo, :an 'bhorn-a :on 'ye-a' 'kmo :on 'pehn-dih:-a Nyorsoa-a' :porluh dih 'kmo-' :ne-dih:, nyor⧾-a' 'jeh :dao', nyor⧾-a mu-uh 'kle 'ye-dih:.

¹³:Yee' 'do ti :ne-a :due' 'di, 'kulu-nyor⧾-: 'dekorn: nyor⧾ dih :bo-dih-nyor⧾-: an-a' deh⧾-zon:⧾ :no-eh-a mu 'de de dih 'kpa-:. An mu nyor⧾ dih :bo-dih:, 'de nyor⧾ 'ye-uh' dih :bo-dih: :ke.

¹⁴Jorwor: :mor :mloror', deh⧾ :a :torne:-a :on, :on po-a dhih 'jeh-' 'gabaa, 'nyi en :sie: :on. Deh no-eh, :on yubo: :yuh :korn-a 'kwa :on 'chean'-dih-a deh⧾ :daa 'weh.

¹⁵:Eh 'wluh-a 'de :an-a' 'yu-yu-bla, :on yubo: Nyorsoa-a' gban 'i :ne-chlee-deh 'weh, :eh 'beh-dih:-a :eh 'ye-a :on :toror' 'nyi, :on 'ye-a :Yusu' 'Klae-a' dhih dhih 'jeh-' po, :on 'ye-a' 'puh.

¹⁶Deh⧾-a' klehkpeh :en 'chle-eh 'de Nyorsoa-a' 'chlee-deh 'di, Nyorsoa :oo', or-: za-ih'. 'De en :korn :koan 'do nyor⧾ deh :torne-eh bo, 'do 'yi zi-deh⧾-a' 'bhun dih :wlu-dih-eh bo, 'do nyor⧾-a' :gwie-' :po-eh bo, 'dekorn: :ka nyor⧾ 'ye-a' 'yi 'sleh-deh⧾-a' 'kmo-' :ne-dih-eh no, eh-a' nyor⧾ :jii-eh 'i dih :po-eh-:.

¹⁷'De nyor :or :korn-a 'de Nyorsoa bo, or 'ye 'kpa :po-eh: deh 'jeh, 'do :koan: 'jeh-a' klehkpeh-a' no-a' bo.