Read Eastern Krahn 2 :Timehte' 4 Bible Online

2 :Timehte' 4 - Eastern Krahn bible

2 :Timehte' 4

¹:Yee' :mor :Yusu' 'Klae 'yle, 'de 'keen ka 'di, :yee' or mu 'meheh'-nyor⧾-: 'dekorn: 'kmo :ne-nyor⧾-: an-a' zabe :zi. Eh-: :korn dhih :oo', 'de 'an 'da :on, 'do or-: 'dekorn: Nyorsoa-: ybei',

²:on 'ye Nyorsoa-a' tubo-wlu⧾ po. :Ne buh⧾ ken, :on 'ye-eh' no, 'do ti-a' klehkpeh bo. :Mor nyor⧾ :taa-ih-a :dou'⧾ bo to-: 'de mor an-a' :yeh se-ih :dou'⧾ bo :to-: po-ih 'suh. Po 'o nyor⧾ :gwie 'i. :Wlu-dih: 'yi zi-deh⧾ 'bhun dih. Po 'de nyor⧾-a' 'kpih. :Mor :on :taa nyor⧾ deh torne, :yee' kpon :porluh dih.

³Deh no-eh, ti-a mu 'o :nyni, :gwlor-nyor⧾ :se-' nyor⧾ deh :torne-eh: 'jeh :dou'⧾ bo :to i. Deh :eh tba-a 'o on :gwlii' dih, eh-: an mu :no. Eh-: :korn dhih an mu nyor⧾ deh :torne-nyor:⧾ :dhulu' deh⧾-' dih :za, on 'ye deh⧾ an-a' :porluh⧾-a sin-a, on 'ye-a' no, on 'ye-ih' on :gwluhuh' zela:.

⁴Dhih-a' 'yor-eh: :en kor-a Nyorsoa 'i, an mu-ih 'kpuh ya :to, on 'ye sih :manua :dou'⧾ bo :to.

⁵Jorwor: :mor :mloror', 'dhu :an-a' 'jeh :dhororn' 'do :an-a' noo-deh⧾-a' klehkpeh bo. :Mor :on :taa 'kle 'ye, :yee' ku 'di dih. Nyor⧾ :an kpa-a Nyorsoa-a' tubo-wlu:⧾ 'jeh deh⧾-' dih, :koan: an no-a, or-: :on 'ye no :ke. :Yee' no :an-a' Nyorsoa-a' :koan-a' klehkpeh deh 'jeh.

⁶'Mor :mloror', ti nyni 'o 'weh, 'on 'ye 'an :febeh' Nyorsoa 'nyi, :eh gweh-a :ka nyor⧾-a za-a 'slaa. Ti nyni 'o 'weh, 'on 'ye dha yao 'zorn 'wluh.

⁷'On vorn vorn-a' 'jeh nor 'weh. 'On jla 'an-a: :koan 'weh. 'On kpa 'Klae-a' dhih 'jeh-' :po-eh 'dlu bo 'weh, 'on :nynia-dih-eh.

⁸:Yee' :yeh 'on :ne-a ken :naa, :gblaa' :or no-a geli' :za-dih-deh 'do 'yi 'sleh-nyor⧾ bo, or-: fuo 'on ken :naa. :Gblaa' :dao', or-: :Gwlor :baa' :or no-a 'yi 'sleh-zabe: :zi-nyor-a mu 'on geli' :za-dih: 'do Nyorsoa-a' zabe: :zi-we-eh 'di. 'De eh :se 'on :due'. Jorwor: nyor⧾-a' klehkpeh :an fuo-a or-a' de :yi-ti 'gabaa, or-: or mu-uh geli' :za-dih: :ke.

⁹:Yee' po 'de 'kpih, :on 'ye 'dhobo:, :on 'ye 'noror 'on bo yi.

¹⁰Deh no-eh, 'Dima po 'on-: dih. Or 'kpa 'kmo-a' deh⧾ bo. Or mu 'Tehsolo'nika. 'Klehseh mu :Gale'tia, 'de Talor' mu :Dama'tia.

¹¹'Lu :due', or-: :ne :daa 'on bo. Mu 'o 'Make, :on 'ye-or' 'de :ya. Deh no-eh, or :korn noo-deh: 'noror 'an :koan 'di.

¹²'On dbo :Teki'kor 'de 'Ehfesor.

¹³:Mor :on :taa 'de yi, :yee' :ya 'de 'an-a: 'korlor 'on :sie-dih:-a 'Kapor 'de :gwlor an 'da-dih-a 'Tloa. :Yee' :ya 'de 'an-a: 'chlee-deh⧾ :ke. Jorwor: :an-a' :sie: 'de :yih nyor⧾ :no-dih:-a nimi⧾-a' ku⧾ o.

¹⁴'Yu an 'da-dih-a 'Ehleza'na, :or no-a nene: :bla-nyor, deh-zon: or no-a 'on-', eh :ne-' 'dli 'gabaa. :Gwlor :baa'-a mu eh-a' kpa :za, 'do deh or no-a 'on-' bo.

¹⁵:Yee' eh-a' dhih, 'dhu :an-a' 'jeh :dhororn' :ke, 'do or bo o. Deh no-eh, tubo-wlu:⧾ :a po-a, or vorn-ih-: bo 'gabaa.

¹⁶Ti on 'ye-a' 'de 'on 'koti-' kpa :zai', 'de 'on 'ye-a 'an 'jeh dhih ken :za, :yee' nyor :se-' 'on bo 'kpa. An-a' klehkpeh, on sie 'de 'on 'weh. Nyorsoa-a' 'ye-uh:-' 'do eh bo.

¹⁷Jorwor: :Gwlor :baa' :ne 'de 'an 'for bo 'weh. Or 'nyi 'on 'kpih 'weh, 'de 'on po Nyorsoa-a' tubo-wlu⧾-a' klehkpeh, 'de nyor⧾ :on :se-a :Jueh'-nyor⧾ bo, 'de on 'ye-ih' 'worn. 'De Nyorsoa :za 'de 'on ji 'worn.

¹⁸:Yee' :Gwlor :baa'-a mu-eh :no 'kulu-deh se 'beh-dih: eh 'ye 'on bo yi, 'de or 'ye 'de or 'bli yai' 'on kpa :pehleh'peh:, :dha or :korn-a wlu 'ken. Dhih-a' 'i 'beh-a' 'do or bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

¹⁹:Yee' 'mor 'ye :Plosi'la-: :Akwi'la-: 'dekorn: :Oneh'sifor-a'a: 'gbu-:.

²⁰:Ila'tor :sie: 'de 'Korli-gwlor:-' 'weh. 'De 'on sie :Tlofi'ma 'de :Mali'ta. Deh no-eh, or kormu:-'.

²¹Po 'de 'kpih, :on 'ye 'de yi, 'de eh 'ye :chehbe'-a' ti no o. 'Yubilor-: 'Pudeh-: 'Lanor-: 'Klordia-: 'dekorn: 'Klae :de-di'-boi'-a' klehkpeh-: on 'da, mo-: 'ye :on.

²²:Gwlor :baa' :ne 'o :on bo. Or po a-a' klehkpeh mla bo o.