Read Eastern Krahn Talor' 1 Bible Online

Talor' 1 - Eastern Krahn bible

Talor' 1

¹'Mor :Poror' :or no-a Nyorsoa-a' 'bhoi-yu, 'de :or no-a :Yusu' 'Klae-a'a: dboo-nyor, 'mor 'ye :on, Talor'. Or dbo 'on 'weh, 'on 'ye nyor⧾ Nyorsoa gan-a, an-a' dhih 'jeh-' :po-eh 'kpih ken po, 'de dhih-a' 'yor-eh: :en :ne-a 'de :a-a'a: Nyorsoa-deh 'di, on 'ye-ih' yubo:.

²Dhih 'jeh :po-eh: :daa-: 'dekorn: dhih-a' 'yor-eh: :daa-: en 'wluh 'de 'kmo :sie: :febeh'-a' :gwlii' :dhe-eh bo, :eh :korn-a wlu Nyorsoa, :or-a' 'tmo-a sih, or po-a :dhama'-', 'de jorwor: 'bluhba-a mu-a :no-eh.

³'Do ti 'jeh 'i :oo', 'do :wor Nyorsoa :or no-a :a-a' 'puh-dih-nyor, or :florn-dih: or-a' tubo-wlu⧾ ken dih 'noror :a bo :eh :yi-dih:-a or-a' tubo-wlu:⧾ :po-eh: :daa, or po-a 'de 'on 'kwa, 'de or 'nyi-a 'on 'tele', 'on 'ye-ih'-a po.

⁴'An 'chle :on bo, Talor', :mor :or gweh-a 'an 'jeh-a'a: 'yu, :a-a' 'Klae-a' dhih 'jeh-' :po-eh-a' dhih. Mla-: 'dekorn: :porluh-a' dih 'pehn-eh-: 'do :on bo, :en 'wluh-a 'de Nyorsoa :or no-a :a :Baa'-: 'dekorn: :Yusu' 'Klae :or no-a :a-a' 'puh-dih-nyor-: bo.

⁵:Yee' deh :korn-a dhih, 'de 'on :sie:-a 'de :on 'Klii-bluhba ken, 'an 'bhorn :on 'ye deh⧾ :en se-a 'i :gweh, :on 'ye-ih' 'i gweh, :on 'ye 'chore-nyor:⧾ :klaba'⧾ kpala'⧾ 'i po, 'de gwlor⧾ 'di dih, :ka 'on no-a :an-a' :gwluhuh' zela-eh.

⁶'Chore-a' nyor :klaba' se :korn or 'ye dhih 'bhun :ne. Or :korn or 'ye 'nynor :due' :korn 'klein'. Or-a'a: 'nynuu :korn on 'ye 'Klae-a' dhih dhih 'jeh-' po. On se :korn on 'ye 'nyne-zon⧾ 'ble, :eh :mor nyor se an-a' wlu 'ken :korn-eh 'beh-dih:, 'de mor an-a' dhe 'o on 'de-: 'dekorn: on :baa'-: an-a' wlu dih.

⁷:Yee' :ka Nyorsoa-a' :koan :po-eh 'de 'chore-a' nyor⧾ :na-dih-nyor 'kwa, :yee' or se :korn or 'ye dhih 'bhun :ne. Or-a' :no-', or :due' or-: yubo: deh 'i. Or se :korn or 'ye 'chehn-' :ne. Or-a' :no-' nomor 'na-nyor. Or se :korn or 'ye deh⧾ 'kor-dih-nyor no. Or se :korn or 'ye 'wlii-dhih :due' zi.

⁸Jorwor: or :korn or 'ye or-a'a: 'gbu 'kwla :za 'do 'duhba⧾ bo. Or :korn or 'ye deh 'jeh-' :ybeh. Or :korn or 'ye or-a' 'jeh wlu 'ken :korn, or :ne-' deh-zon no. Or :korn or 'ye 'yi 'sleh-nyor no, :or :dhe-dih-eh 'for 'i 'do Nyorsoa bo. Or :korn or 'ye :gwluhuh' dih :florn.

⁹Or :korn or 'ye Nyorsoa-a' tubo-wlu:⧾ 'jeh, :en nyor⧾ dhe-a :gwlii', 'de on :torne:-a :a-uh, dih kpon :glii:, 'de or 'ye nyor⧾-a' 'kpih bo :po-eh 'beh-dih:, 'do nyor⧾ deh :torne-eh: 'jeh bo, 'de or 'ye :yuh :an vorn-a nyor⧾ deh :torne-eh: :daa bo, :gwluhuh' zela: :ka on se-a 'o :gwie 'i :ne.

¹⁰Deh no-eh, nyor⧾ :dhulu', mo-: :an bla-dih nyor⧾ worn. Nyor⧾-a' 'jeh :an no-a deh⧾ :dao', mo-: 'dhu :Jueh'-nyor⧾-a' :yuh, :on po-a 'Klae-a' dhih dhih 'jeh-', 'de :an 'neh-a :bhlororn' 'meh-deh ken. An no an-a' wlu⧾ :forbuh:⧾, an bo-dih nyor⧾ dih.

¹¹:Yee' Talor', :on :korn :on 'ye nyor⧾ :dao' 'borboa' 'i po. Deh no-eh, deh⧾ on se-a :korn, on 'ye-a' nyor⧾ :torne:, me-: an torne nyor⧾, me-: 'kor-dih nyor⧾ :dhulu'-a' dhih 'jeh-' :po-eh: :eh :ne-a 'de on 'bli 'gbu⧾ 'di dih. 'Wlii-a' dhih :due' :oo', an zi, eh-: :korn dhih an no :ao'.

¹²An-a' 'yor-eh-a' wele-eh: :po-nyor :due' :sloror', or-: :wlu, :or 'dae:, 'Klii-nyor⧾ no sih 'tmo-nyor:⧾, 'do ti-a' klehkpeh bo. On gweh 'yi :kma-nimi⧾. 'De on no vlaan-nyor⧾-a' :yuh :on nyni-a worn⧾ 'i.

¹³:Yee' dhih an-a' wele-eh: :po-nyor: :daa, or :za-a-', en no dhih-a' 'yor-eh:. :Yee' eh-a' dhih, :wlu 'de on bo deh 'jeh, 'de an-a' 'Klae-a' dhih 'jeh-' :po-eh 'ye 'kwla :gweh,

¹⁴'de on :ne-' :Jueh'-nyor⧾-a' sih :manua :dou'⧾ bo :to, :korn mor nyor⧾ :on po-a dhih-a' 'yor-eh dih, an-a' 'tele'-:.

¹⁵Nyor⧾ :on :gweh-a :vlehehn'-', deh⧾-a' klehkpeh, en :nmor-: 'yi 'do on bo, 'do Nyorsoa ybei'. Jorwor: nyor⧾ :yuh deh⧾-zon⧾ 'kor-dih:-a, 'de :on se-a dhih 'jeh-' :po-eh 'ble, deh-beh-deh-beh se 'yi dih :nmor 'do on bo, 'do Nyorsoa ybei'. 'De mor, an-a' 'dlu 'di dih :na-dih-deh⧾-: 'dekorn: an-a' :porluh⧾-: en 'kor-' 'do deh⧾-zon⧾ bo.

¹⁶On 'da on no nyor⧾ :on yubo:-a Nyorsoa. Jorwor: an-a' noo-deh⧾ :torne-eh :a 'weh, :ka on :se-a Nyorsoa-nyor:⧾. An-a' dhe 'o Nyorsoa-a' 'tele' dih, 'de or 'nyeh-uh'. On se deh-beh-deh-beh: :eh no-a deh 'jeh, eh-a' no-a' 'beh-dih:.