Read Eastern Krahn :Falimor' 1 Bible Online

:Falimor' 1 - Eastern Krahn bible

:Falimor' 1

¹'Mor :Poror' :or no-a :kasue-nyor 'do :Yusu' 'Klae-a' dhih. 'Mor-: 'dekorn: :a-a' 'Klae :de-di' :Timehte'-: :a :mor 'ye :on, :Falimor', :mor :or 'dhu-a :a-a' :dhih :kma-nyor-', 'de :or no-a :a 'be :koan: :no-nyor,

²:korn :a-a' 'Klae :de-di'-nynor-kpao' :Afi'a-: :korn :Aki'pa: :or no-a :a 'be sorye'-yu 'de 'Klae-a' deh 'di-: 'dekorn: 'chore-nyor:⧾ :an 'gbon-dih-a 'de :on 'bli 'gbu-:.

³Mla 'do a bo, 'dekorn: wlu-' dih 'worn-eh-: :eh 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo.

⁴:Yee' 'an po 'an Nyorsoa-a' 'zio 'do :on bo. :Mor 'on :taa 'de or bo wlu, :yee' 'an po 'de :an-a' 'nyne 'weh, 'do ti-a' klehkpeh bo.

⁵Deh no-eh, 'on 'worn :an-a' dhih 'jeh-' :po-eh :on 'ble-a 'de :Gwlor :baa' :Yusu'-a' deh 'di, eh-a' 'nyne 'weh, 'dekorn: :ybeh-eh: :on 'ble-a 'do Nyorsoa-nyor⧾-a' klehkpeh bo-:.

⁶'An wlu 'de Nyorsoa bo :on 'ye 'yaa: :mor :on :taa :an-a' dhih 'jeh-' :po-eh-a' dhih-' za 'de nyor⧾ bo, 'de :on 'ye deh-' dih 'worn-eh-a' klehkpeh 'ble, 'do deh⧾ 'jeh ne-a' klehkpeh :a 'ble-a, :en :yi-dih:-a 'Klae bo.

⁷:An-a' :ybeh-eh: 'yi-dih: 'on 'mona-' dih 'gabaa, 'de eh po 'de 'an 'kpih :ke. Deh no-eh, :mor :or 'dhu-a 'an 'de-di'-', :mor 'o, :or no-eh, 'de Nyorsoa-nyor⧾ 'yi-dih: 'mona dih.

⁸Keen' :mloror' 'on 'beh-dih: 'on 'ye dih :nyna, 'on 'ye :on 'tele' 'nyi, 'de 'Klae-a' 'nyne 'di, :on 'ye deh :on :korn :on 'ye-a' no, :on 'ye-eh' no.

⁹Jorwor: :ybeh-dih-eh-a' dhih :oo', 'an bale :on. :Yee' 'mor :or 'dhu-a :Poror'-', :or no-a nyor :bholuh, 'de :or no-a :kasue-nyor, :Yusu' 'Klae-a' dhih :naa :ke,

¹⁰'an bale :on 'weh, 'do 'an-a: 'yu :Oni'sima-a' dhih bo, :or :ne 'on 'dhu-a 'yu-: :baa'-: deh glu, dha 'an :kasue 'di :ne-ti-'.

¹¹:Tehn 'i :dee', or se deh ken 'kpa 'do :on bo. Jorwor: :kana :naa or :za-dih:-' deh ken 'kpa-nyor: 'do mor-: 'dekorn: 'mor-: :a bo.

¹²:Yee' 'an dbo-or-: de, 'de :on bo, :eh gweh-a :ka 'an dbo-a 'an 'jeh-a' :porluh 'de :on bo.

¹³'An 'bhorn 'on 'ye-or dih dhe 'noror 'on bo :dee', 'de or 'ye 'o :an-a' 'gor bo 'kpa-dih:, or 'ye 'on-' :za-dih:, :ka 'on :ne-a :kasue 'di :naa, 'do Nyorsoa-a' tubo-wlu:⧾ 'jeh-a' dhih bo.

¹⁴Jorwor: 'on :se-' 'bhorn, 'on 'ye deh-beh-deh-beh no, :eh :korn-a dhih :on se-a ken dih 'worn-dih:. 'On :se-' 'bhorn 'on 'ye :on 'kpih :kpa-dih:, :on 'ye deh 'jeh no. Jorwor: 'an 'bhorn eh 'ye 'o :an-a' 'jeh :porluh ken 'wluh.

¹⁵Eh gweh :on 'ye-or 'ble :dele' ka klehkpeh klehkpeh :dhih 'o, eh-: no-eh, 'de Nyorsoa no-eh, 'de or :tehn-dih: :on bo dih, 'do ti-kpor-bei 'di.

¹⁶:Yee' dha ti :daa bo, or :se 'ge-yu: 'klein'. Jorwor: or 'kpa deh ken :naa, :eh :zi 'o 'ge-yu-'. Or no :a-a' :dhih :kma :de-di' 'de 'Klae-'. Or no 'an :dhih :kma-nyor:. 'De or no :an-a' :dhih :kma-nyor, :eh :zi 'o 'on-'. Deh no-eh, or no :on 'be :gwlor-nyor:, 'de or no :an-a' 'de-di' 'de :Gwlor :baa'-a' deh 'di.

¹⁷:Yee' 'do eh-a' dha, :mor :on 'duo: 'on-', 'de 'on 'ye :an-a' :dha :due' :na-dih-nyor-' 'dhu-eh:, :yee' 'duo-or-' :ke, :ka :an mu-a 'on-' 'duo-eh: no :dee'.

¹⁸:Mor eh 'dhu, or no :on deh-zon bo :dee' see, 'de or 'ye :an-a' kpa 'ble, :yee' po 'o eh-a' kpa :dao' 'do 'on 'dlu.

¹⁹'Mor :or 'dhu-a :Poror'-', 'an no 'an 'jeh 'yor-eh-a' son, 'an 'chle deh :daa. 'On 'da 'an mu-eh :on deka 'nyi-:. Jorwor: :an-a' 'ma-dih:-' bo, :ka :on 'ble-a 'an kpa, 'do :an-a' :febeh'-a' dhih bo.

²⁰:Yee' 'do eh-a' dha, :on :korn 'gen, 'an 'Klae :de-di', no deh :daa 'do 'on bo, 'do :Gwlor :baa'-a' dhih bo. Po 'on 'mona :gwlii', 'do 'Klae-a' deh 'di.

²¹:Ka 'an 'chle-a deh⧾ :daa, 'on yubo-eh', :an mu deh⧾ 'an dhele-a dih :no. :Yee' 'on yubo-eh' deh 'jeh, :an mu-eh :no, eh 'ye 'o :yih 'an 'da-a :zi.

²²:Yee' deh :due' :neheh', po :chuu 'kpa 'do 'on bo. Deh no-eh, 'on dhe-eh-: :gwlii', Nyorsoa-a mu a-a' bale-wlu 'worn-:, or 'ye 'on 'de :kasue 'di :za, 'on 'ye 'de a bo yi :neheh'.

²³:Ipa'fa:, :or :ne 'on :ne-a 'noror :kasue 'di, 'do :Yusu' 'Klae-a' dhih bo, or 'da, or-: 'ye a-uh.

²⁴:Yee' 'ka-: 'Make-: 'Alita'kor-: 'Dima-: 'dekorn: 'Lu-: :on :ne 'an no-dih-a :koan :dha :due', on 'da, mo-: 'ye a-uh :ke o.

²⁵:Gwlor :baa' :Yusu' 'Klae-a' mla :ne 'o a-a' klehkpeh bo o.