Read Eastern Krahn :Hiblu' 10 Bible Online

:Hiblu' 10 - Eastern Krahn bible

:Hiblu' 10

¹:Yee' :Mose'-a' 'tele' :daa :eh 'nyi-eh :Jueh'-nyor⧾, eh no deh⧾ 'jeh :ne, :en mu-a 'de :yi, en-' 'kafluh:⧾. Eh :se en-' 'jeh 'yor-eh:. :Yee' eh-a' dhih, 'tele' :daa, eh se 'beh-dih:, eh 'ye nyor⧾ :an 'koan'-dih-a Nyorsoa dih, 'de :on 'ye-or' :weheh' :za, 'yi 'sleh-nyor⧾-' no 'do Nyorsoa gban 'i 'dhu-eh: :dhulu' bo, :eh :ne-a :due', an no-a zon 'o zon 'di.

²:Yee' :mor eh 'dhu nyor⧾ :dao', :an za-a Nyorsoa :weheh' deh :dao', on :gweh :vlehehn'-' 'jeh ka 'do Nyorsoa ybei' :dee', :yee' an-a' :porluh⧾ :se-uh' zabe :kpon-dih: i :dee', 'do deh⧾-zon:⧾ an no-a bo. :Yee' Nyorsoa gban 'i 'dhu-eh mu 'bor-: :dee'.

³Jorwor: :ka eh :ne-a :naa, Nyorsoa gban 'i 'dhu-deh: :daa, eh no-eh', 'de nyor⧾-a po-dih an-a' deh⧾-zon⧾ :gwluhuh' bo, 'do zon 'o zon 'di.

⁴Deh no-eh, :blii'-gblor-a' nyomor-: 'dekorn: 'gbalor-a' nor-: en se 'beh-dih: en 'ye nyor⧾-a' deh⧾-zon⧾-a' dhih jla.

⁵Eh-: :korn dhih, ti 'Klae-a yi-a 'noror yao 'zorn, :yee' or :wlu-' 'de Nyorsoa bo, or 'dae:, :On :se-' 'slaa: :za-dih-deh⧾-: 'dekorn: 'nyii'-deh⧾-: 'bhorn. Jorwor: :on no-eh', 'de 'on 'ble yau.

⁶'Slaa: :za-dih-deh:⧾ nyor⧾-a po-a 'yli-: :an-a' gban 'i 'dhu-dih-deh:⧾ 'do deh⧾-zon⧾-a' dhih bo-: :mlee' se 'beh-dih: en 'ye :an-a' :porluh dih 'pehn-dih: 'gboror:.

⁷'De 'Klae 'da :neheh', 'Mor-: :dhe dih, Nyorsoa. 'An mu :an-a' ken dih 'worn-dih-deh :no, :ka :Mose'-a' 'tele'-chlee-deh no-a 'an dhih-a' :za-a'.

⁸:Yee' :tehn 'i-deh: 'Klae 'da, Nyorsoa, :an-a' :porluh :se-' dih 'pehn, 'do 'slaa: :za-dih-deh⧾-: 'nyii'-deh⧾-: 'slaa: :za-dih-deh:⧾ nyor⧾-a po-a 'yli-: 'dekorn: :an-a' gban 'i 'dhu-dih-deh:⧾ 'do deh⧾-zon⧾-a' dhih bo-:. 'De mor :on :se-ih' 'bhorn :ke. Keen' :mloror' 'Klae :za deh :daa-' 'weh, jorwor: deh⧾ :daa en :no-eh:-' 'do :Mose'-a' 'tele'-a' dih :dhe-eh dhih bo.

⁹:Yee' 'Klae 'dae: :neheh', 'Mor-: :dhe dih, Nyorsoa. 'An mu :an-a' ken dih 'worn-dih-deh :no. :Yee' Nyorsoa :za 'o 'slaa: :za-dih-deh⧾-: 'dekorn: gban 'i 'dhu-dih-deh⧾-: :gwie 'i 'weh, 'de or po 'o :neheh'.

¹⁰:Yee' :ka :Yusu' 'Klae no-a deh Nyorsoa 'bhorn-a or 'ye-a' no, eh-: no-eh, 'de or-a' 'jeh 'yor-eh-a' 'kwla :za-eh: or no-a 'do kpor :due' 'di 'klein', eh :dhe-dih: :a 'for 'i, 'do Nyorsoa bo.

¹¹:Yee' :Jueh'-nyor⧾-a' Nyorsoa-a' 'slaa: :za-nyor⧾-a no an-a'a: :koan 'do zorn 'o zorn 'di, 'de an 'nyi Nyorsoa gban 'i 'dhu-dih-deh:⧾ :ne-a :due' 'do kpor⧾ :dhulu' 'di. Jorwor: en se 'beh-dih: en 'ye nyor⧾-a' deh⧾-zon⧾-a' dhih jla.

¹²Jorwor: 'Klae :mloror', or 'dhu Nyorsoa gban 'i 'do deh⧾-zon⧾-a' dhih bo kpor :due' 'klein', :ka ti-a mu-a 'dlu-' :tehn. 'De or :dhe dih 'de Nyorsoa-a' :dila-son bo.

¹³'Do :wor or :ne :naa, or fuo Nyorsoa 'ken, Nyorsoa 'ye-eh' no, or 'ye nyor⧾ :on 'nyeh-or' ya :ya, 'de or 'ye-uh' buh⧾ ken dih tba.

¹⁴:Yee' Nyorsoa-a' gban 'i 'dhu-eh-a' kpor :due' :daa 'Klae no-a 'klein', eh-: no-eh, 'de nyor⧾ :on :dhe-dih-eh 'for 'i 'do Nyorsoa bo, on zelie-eh: 'do deh⧾-zon⧾-a' 'kpih 'zorn, :ka ti-a mu-a 'dlu-' :tehn.

¹⁵Gban 'i :ne :Zulu zela: deh⧾ :daa ken dih 'weh 'noror :a bo :ke, on 'da,

¹⁶:Gwlor :baa' 'dae:, Kuo on :ne 'an mu-a :po, 'do ti :en mu-a 'de :yi 'di, or-: :dhe dih. 'An mu 'an 'tele'⧾ 'do on :porluh⧾ ken :po, 'de 'on 'ye-ih' 'chle 'de on 'dlu 'di.

¹⁷'De or 'dae: :neheh', 'On :se-' an-a' deh⧾-zon⧾-: 'dekorn: an-a' 'kulu-deh⧾-: en-' dhih :gwluhuh' dih :na-dih: i :neheh'.

¹⁸:Yee' :mor eh 'dhu, en-' dhih 'ma-dih-eh: bo, :yee' Nyorsoa-a' gban 'i 'dhu-deh se :korn eh 'ye :no-eh:, 'do deh⧾-zon⧾-a' dhih bo :neheh'.

¹⁹:Yee' eh-a' dhih, 'an 'Klae :de-di'-boi'-a:, 'Klae-a' 'meh-a' no-eh', 'de :a 'beh-dih:, :a 'ye 'de :Chuu: :on :ne-a gban 'i, :on :zi-a 'o :chuu⧾-a' klehkpeh-' 'di pa, 'de :gwluhuh' :ku ka 'di.

²⁰Or :za :gwie: :dele' 'do :a bo, :eh mu-a 'de 'kmo :ne-eh: :dele' bo. :Yusu'-a' yau-a' dhih, eh-: no-eh, 'de :gwie: :dele' :dao', eh :yi-dih: 'de 'yli-eh: :eh bhele:-a ya 'di.

²¹:A 'ble Nyorsoa-a' 'slaa: :za-nyor: :klaba' :or :korn-a 'de Nyorsoa-nyor⧾-a' klehkpeh-a' dhih bo.

²²:Yee' eh-a' dhih, a 'nyi :a 'koan'-dih: Nyorsoa dih, 'de :porluh⧾-a' :vlehehn'-' :gweh ka 'di, 'de :a 'ye-or' :gwluhuh' :kpa-dih:, :eh 'wluh-a 'de :a-a' dhih 'jeh-' :po-eh bo. :Yee' 'nyi :a-a' :porluh⧾ :gweh :vlehehn'-', 'de en :ne-' :a zabe :kpon-dih:, 'de 'ni :eh :gweh-a :vlehehn'-', eh 'ye :a-a' yau worlor:.

²³:Yee' a 'nyi :a kpon deh :gwlii' :dhe-eh: :eh :korn-a dhih :a-a' 'jeh 'yor-eh za-a-' dih :glii:. Deh no-eh, :a yubo-eh' :mor Nyorsoa po deh-a' wlu :dhama'-', :yee' or no-eh' :gbor.

²⁴:Yee' :a :korn :a 'ye :a 'bei'-a' dhih zi, 'de on 'ye :a-a' ne-a' dhih zi :ke, 'de eh 'ye 'de a 'bei'-a' 'kpih po, 'de :ybeh-dih-eh-: 'dekorn: deh⧾ 'jeh ne-a' no-a'-: en 'ye 'de a 'nyne-' :ne.

²⁵:Ka nyor⧾ :noo'-a no-a, 'de on 'bor-a :dha :due' 'kpa-eh, 'do Nyorsoa-a' :weheh' :za 'da, a-a' :no-eh' :ke. Jorwor: a 'nyi :a po :a 'bei' 'kpih bo :due' :due', eh 'ye 'o ken dih zi, :ka a yubo-eh 'de 'we-eh: :Gwlor :baa'-a mu-a 'de :ya, eh 'koan'-a bo.

²⁶:Yee' :yeh :a yubo:-a dhih-a' 'yor-eh: :en :ne-a 'noror tubo-wlu:⧾ 'jeh :daa 'di :naa, 'de :a 'ye dhih 'yi dih tba, :a 'ye deh⧾-zon⧾-a' no-a' 'dlu bo kpa 'gboror:, :yee' Nyorsoa-a' gban 'i 'dhu-dih-deh: :neheh' se :ne 'do :a-a' deh⧾-zon⧾-a' dhih bo.

²⁷Jorwor: deh :eh :sie:-a 'o, eh-: 'dhu, :on 'ye Nyorsoa-a' zabe: :zi-eh :fuo: 'de :fano: ka 'di, 'dekorn: 'yi :kma-neh: :eh mu-a nyor⧾-a' klehkpeh :on 'nyeh-a Nyorsoa-' :sin-dih:, on 'ye-a' ya :gweh.

²⁸:Yee' :mor nyor se 'o :Mose'-a' 'tele'-a' dih :dhe-dhih 'worn-dih:, 'de nyor⧾ 'sororn', nyor⧾ taan, on 'ye-eh' ken dih zela: :eh :mor or no-eh' deh 'jeh, 'de zabe 'ye-or' kpon, :yee' an-a' 'ye or-a' :wehlih, 'de an 'dba-or.

²⁹:Yee' dha nyor :or vlehn-a Nyorsoa-a' 'Yu, 'de :or no-a, 'Klae-a' 'meh-a', :or no-a kuo, 'de :eh no-eh, 'de :a :dhe-dih-eh 'for 'i 'do Nyorsoa bo, or se deh 'di :ne, 'de :or po-a Nyorsoa-a' :Zulu: :an po-a nyor⧾ mla bo, wlu 'bhun, eh :bo-nyor: :dao', dha or-a' 'kle 'ye-eh: :eh mu-a 'o or 'dlu :po-eh, eh mu :na-dih: :eh?

³⁰Deh no-eh, :a yubo-eh' :ka eh 'dhu-a :Gwlor :baa'-' :or no-a, 'Mor :korn :or 'ye kpa :za. 'An mu nyor⧾ :an no-a deh⧾-zon⧾ 'do on 'bei' bo, 'kle 'ye-eh 'dlu :po. :Yee' or 'dae: :neheh', 'An mu 'an-a: nyor⧾-a' zabe :zi.

³¹:Yee' eh-a' dhih, eh mu 'yi :kma 'gabaa 'do nyor :or mu-a 'de 'kmo :ne-Nyorsoa-a' pluh 'worn 'kpa-: bo.

³²A :po-dih: deh :eh :no-eh 'do a bo, 'do ti :en zi-a 'di :gwluhuh' bo. 'Do ti :dao' 'i, :yeh a 'ye-a Nyorsoa-a' zorn-pli, :yee' a 'ye 'kle 'gabaa. Jorwor: a :se-' sea, 'de a-a' 'kle 'ye-eh: :dao' 'di.

³³:Yee' 'do ti :nee' 'di, nyor⧾ po a wlu⧾ 'bhun dih 'do :gwlor :gwea, 'de on 'ye-dih: a 'kle. 'De mor 'do ti :nee' 'di, a 'worn-dih-eh ken dih 'weh, a 'ye on 'bei' nyor⧾-a 'ye-dih-a 'kle deh :dao', an-a' 'kle 'ye-eh-' gble.

³⁴Nyor⧾ :on :po-eh: 'de :kasue 'di, on :ne a gble an-a' 'kle 'ye-eh 'weh. 'De mor :mor nyor⧾ :za a-a'a: :kororn-deh⧾-a' klehkpeh a 'kwa, a kpon :porluh⧾-: dih :chio'lo: 'de 'mona: ka 'di. Deh no-eh, a yubo-eh' a 'ble deh :eh 'kpa-a deh ken :eh :zi-a 'o deh⧾ :dao', 'de :eh mu-a 'kmo :sie: :ka ti-a mu-a 'dlu-' :tehn.

³⁵:Yee' eh-a' dhih, a kpa a-a' :gwluhuh' :ku-eh 'dlu bo. Deh no-eh, eh ya 'de geli' :za-dih-deh: :klaba'.

³⁶A :korn a 'ye :porluh⧾ dih kpon. Eh-: mu-eh :no, 'de a 'ye Nyorsoa-a' 'ton :korn-deh no, 'de a 'ye deh :korn-a wlu or po-a :dhama'-' 'ye.

³⁷Deh no-eh, Nyorsoa-a' 'chlee-deh 'dae:, Eh :se 'o :gwle i, nyor :or yi-a 'de, or 'ye dih 'si. Or :se-' ti :zi-dih: i.

³⁸Nyor Nyorsoa 'da-dih-a 'yi 'sleh-nyor, 'do or-a' dhih 'jeh-' :po-eh bo, :yee' or-: mu 'kmo-' :ne. Jorwor: :mor an-a' nyor 'bili:-' dih, 'de or 'ye Nyorsoa-a' deh dih 'tali:, Nyorsoa-a' :porluh :se-' dih 'pehn-: i 'do or bo.

³⁹:Yee' :a :se nyor⧾ :an 'tali-a Nyorsoa-deh dih, 'de :an 'ma-a. Jorwor: :a :mor :mloror', :a po 'Klae-a' dhih-' dhih 'jeh, 'de or 'puh-dih: :a-uh.