Read Eastern Krahn :Hiblu' 11 Bible Online

:Hiblu' 11 - Eastern Krahn bible

:Hiblu' 11

¹:Yee' :mor :a po-eh dhih 'jeh-', :yee' :a yubo-eh' :eh :mor deh :a dhe-a :gwlii', :a mu-eh 'ye-:. 'De mor :a yubo-eh' deh⧾ :a-a' 'yli-eh se-a 'ye, en :ne-' 'jeh ka.

²:Yee' :a :bai'-a' :bai' po Nyorsoa-a' dhih-' dhih 'jeh. Eh-: no-eh, 'de Nyorsoa 'worn-dih: an-a' dhih ken dih.

³:Yee' :a-a' Nyorsoa-a' dhih dhih 'jeh-' :po-eh:, eh-: no-eh, 'de :a 'worn-eh dih :ka Nyorsoa no-a or-a' wlu, 'de or no-a 'bluhba-: yao-: 'dekorn: deh⧾-a' klehkpeh :en :ne-a 'de en 'di-:. Deh⧾ nyor⧾-a' 'ye-a, me-: or 'duo:-', 'de or no :yih nyor⧾-a 'ye-a.

⁴'Ebo po Nyorsoa-a' dhih-' dhih 'jeh. Eh-: no-eh, 'de or-a' Nyorsoa-a' gban 'i 'dhu-dih-deh :nmor 'yi dih, eh :zi 'o 'Kein-a' neh-'. 'De mor eh-: no-eh, 'de Nyorsoa 'worn-dih: or-a' dhih ken dih, :ka or 'dhu-a 'yi 'sleh-nyor-'. Deh no-eh, Nyorsoa-a' 'jeh 'yor-eh: or-: 'worn-dih: or-a' 'nyii'-deh-a' dhih ken dih. Or-a' dhih 'jeh-' :po-eh:, eh-: no-eh, 'de deh or no-a, eh-a' kuna' :sie: 'kmo 'gboror:, keen' :mloror' or 'meh-'.

⁵'Inor po Nyorsoa-a' dhih-' dhih 'jeh. Eh-: no-eh, 'de or :se-' 'meh. 'De or :kpa-eh: 'de Nyorsoa 'bli yai', 'de nyor :se-or' 'ye :neheh'. Deh no-eh, Nyorsoa kpa-or-: yai'. 'De mor Nyorsoa-a' 'chlee-deh 'dae:, 'Inor 'pehn-dih: Nyorsoa-a' :porluh-: dih. Eh-: no-eh, 'de Nyorsoa kpa-or 'de yai'.

⁶Nyor :or se-a Nyorsoa-a' dhih dhih 'jeh-' po, or se 'beh-dih: or 'ye Nyorsoa-a' :porluh dih 'pehn-dih:. Deh no-eh, nyor-beh-nyor-beh: :or yi-a 'noror Nyorsoa bo, or :korn or 'ye-eh' dhih 'jeh-' po :gbor :gbor :ka or :ne-a 'kmo, 'de mor eh 'dhu or mor-', :or za-a nyor⧾-a' klehkpeh :an 'bhorn-or 'kwla⧾-' dih geli'.

⁷:Noa' po Nyorsoa-a' dhih-' dhih 'jeh. Eh-: no-eh, 'de or :to Nyorsoa-a' 'slen or 'dhu-or :dou'⧾ bo, :en 'dhu-a deh⧾ :en mu-a :no-eh 'de ybei'. Or dhe 'o Nyorsoa-a' 'tele'-: dih, 'de or kor 'ni ken-meheh, eh-: no-eh, 'de or-: or-a'a: 'cheh-: on 'puh. Or-a' dhih 'jeh-' :po-eh: :dao', eh-: no-eh, 'de Nyorsoa chehn 'bluhba-a' zabe 'i, 'de or 'da-dih-or 'yi 'sleh-nyor.

⁸'Eble'hehn po Nyorsoa-a' dhih-' dhih 'jeh. Eh-: no-eh, 'de ti Nyorsoa 'da-or, or 'ye-a 'bluhba: :or :korn-a wlu or po-a :dhama'-' 'do or bo, or 'ye-a 'de or ken mu, 'de or dhe 'o or-a' wlu dih, or mu 'de. Keen' :mloror', :dha or mu-a, or se 'o yubo:, jorwor: or 'wluh 'o or 'bli 'bluhba ken 'weh, or mu-' 'suh.

⁹Or-a' Nyorsoa-a' dhih 'jeh-' :po-eh:, eh-: no-eh, 'de 'bluhba: :or :korn-a dhih Nyorsoa po-a wlu :dhama'-' 'do or bo, 'de or 'ti 'o or ken, :ka 'duhba-yu 'i. Or 'ti 'de 'taa: 'por⧾ :gbalie 'di. 'Ka-: Ase'-: 'dekorn: 'Jekor-: on no :ke :on no-a nyor⧾ :on 'ye-a deh :korn-a wlu Nyorsoa po-a :dhama'-' :ke.

¹⁰Deh no-eh, 'Eble'hehn pobo 'de 'kwi :gwlor Nyorsoa po-a dih, 'de or po-a, or-a' :gwie 'i, 'kwi :gwlor :or mu-a :ne 'do ti-a' klehkpeh bo.

¹¹'Eble'hehn po Nyorsoa-a' dhih-' dhih 'jeh. Eh-: no-eh, 'de or 'beh-dih: or 'ye 'yu 'wluh, keen' :mloror' or-a' 'yu 'wluh-ti zi-', 'de mor :Selor' :sie: :zlama :dee'. Jorwor: or yubo-eh' deh :korn-a wlu Nyorsoa po-a :dhama'-', or mu-eh :no :gbor :gbor.

¹²Keen' :mloror' 'Eble'hehn gweh :ka nyor :or 'meh-a, jorwor: nyor-kpalu: :daa, or bhan-' 'do 'nynuu-a' 'nynuu bo. :Ka 'chuh :dhlaen: :en :ne-a 'de yai', en :dhie:-a, 'ka-: on :dhie:. :Ka yobo'-a' :bhehneh' nyor se-a zlo-a' 'beh-dih: eh :dhie:-a, 'ka-: on :dhie: :ke.

¹³Nyor⧾-a' klehkpeh :daa :a zlo-a, on po Nyorsoa-a' dhih-' dhih 'jeh :chio'lo:, 'de eh :yeh-dih: an-a' 'meheh'-ti ken. On :se-' deh :korn-a wlu Nyorsoa po-a :dhama'-', eh-a' ti ken :yeh-dih:. Jorwor: on sie eh-a' ti de, 'de on 'ye-dih-eh ybei'. :Yeh on 'ye-dih-eh ybei', :yee' an-a' :porluh⧾ 'pehn-: dih. 'De on 'da, :A no 'duhba⧾-: 'dawor'⧾-: dha 'bluhba ken.

¹⁴Nyor⧾ :an za-a deh⧾ :daa-', on zela-eh ken dih 'weh deh 'jeh, :ka an 'bhorn-a 'bluhba-dlu 'do an-a' 'jeh bo, on 'ye-a ken 'ti.

¹⁵On :se-' 'bluhba: on 'wluh-a 'de ken, or-a' dhih :gwluhuh' dih :na-dih:. :Mor eh 'dhu on no-eh :dee', :yee' deh :eh 'ye-uh'-a 'i kan, :mor an 'bhorn on 'ye de mu, eh se :ne.

¹⁶Jorwor: 'bluhba: 'jeh :nor :or :zi-a 'o :yor :dao', or-: :korn :gwie 'i an pobo, :or no-a 'bluhba: :or :ne-a 'de Nyorsoa 'bli yai'. Eh-: :korn dhih, eh-a' :no-dih: Nyorsoa dhen, on 'ye-or an-a' Nyorsoa 'da-dih:. Deh no-eh, or po 'kwi :gwlor 'do on bo.

¹⁷'Eble'hehn po Nyorsoa-a' dhih-' dhih 'jeh. Eh-: no-eh, 'de or kpa or-a'a: 'yu Ase', or 'ye-or 'slaa :za-dih: :dee', ti Nyorsoa 'dhen-or. Keen' :mloror' Nyorsoa po wlu :dhama'-' 'weh 'de or bo, :eh :mor or mu 'nynuu-a' 'nynuu 'wluh-:, jorwor: or 'worn-dih-eh ken dih 'weh 'gboror:, 'de or :ne buh⧾ ken, or 'ye or-a'a: 'yu :due' gbai :dao' 'slaa :za-dih: :dee',

¹⁸keen' :mloror' Nyorsoa zela-or :gwluhuh', or 'da, :An-a'a: 'yu Ase', or-: mu-eh :no, 'de :on 'ye 'nynuu-a' 'nynuu: :on :korn-a wlu 'on po-a :dhama'-' 'do :on bo 'wluh.

¹⁹'Eble'hehn :wlu-' 'de or-a' 'jeh :porluh ken, or 'da, Nyorsoa 'beh-dih: or 'ye 'de Ase' :za, or 'ye 'kmo :ne :neheh'. :Ka 'Eble'hehn no-a eh-a' :gwlii' :dhe-eh, 'ka-: eh :ne :kpeheh: 'do 'we-eh: :dao' 'di. Eh gweh :ka Nyorsoa :za-a: 'de Ase' nma-dih-deh 'di.

²⁰Ase' po Nyorsoa-a' dhih-' dhih 'jeh. Eh-: no-eh, 'de or po 'Jekor-: 'dekorn: 'Isor-: :bhorlie' bo, an mu-a 'ye-: 'de ybei'.

²¹'Jekor po Nyorsoa-a' dhih-' dhih 'jeh. Eh-: no-eh, 'de or po 'Joseh-a' 'nynuu: :on :ne-a 'sororn', :bhorlie' bo, ti or yi-a 'meh 'da. 'De or kor kor-a' tu dih, or za Nyorsoa :weheh' 'gboror:.

²²'Joseh po Nyorsoa-a' dhih-' dhih 'jeh. Eh-: no-eh, ti or yi-a 'meh 'da, 'de or :za 'Ezlea-nyor⧾-a' 'Iye 'wluh-dhih-', 'de or :sie-dih-uh 'tele', deh on 'ye-a or-a' 'meheh'-ku-a' 'kpa⧾ :no-dih:.

²³:Mose' 'de-: 'dekorn: or :baa'-: on po Nyorsoa-a' dhih-' dhih 'jeh. Eh-: no-eh, 'de on 'zile-or 'do 'chuh⧾ taan 'di, ti or 'wluh-a, :yeh on 'ye-a :ka or :nmor-a 'yi dih. Eh-a' dhih, on :se-' :fano ple, 'de on :bla-dih: 'keen-a' 'tele' worn.

²⁴:Mose' po Nyorsoa-a' dhih-' dhih 'jeh. Eh-: no-eh, :yeh or 'beh-a 'i, :yee' or :se-' 'worn, nyor⧾ 'ye-or 'Iye-nyor⧾-a' 'keen-a' 'nynor-kpao'-yu-a' 'yu 'da-dih:.

²⁵:Mose' 'da eh :nmor-: 'yi, nyor⧾ 'ye, or-: Nyorsoa-nyor⧾-: :dha :due' dhih-' :no-dih:, :eh :zi 'o or-a' :porluh 'ye dih 'pehn, 'do ti-kpor-bei 'di, 'de deh⧾-zon⧾ 'di.

²⁶'De or :wlu 'de or-a' 'jeh bo, or 'da, :Mor on :no-dih: 'on dhen 'do Nyorsoa-a' 'taan'-yu-a' dhih bo, eh 'kpa deh ken 'gabaa, :eh :zi 'o 'on 'ye bhaan-deh⧾-a' klehkpeh :en :ne-a 'Iye 'ye. Deh :korn-a dhih or :za-a deh :daa-' 'de or-a' 'jeh bo, eh-: 'dhu, or pobo 'de geli' :za-dih-deh: or mu-a 'ye-: 'de ybei', eh-a' :gwie 'i.

²⁷:Mose' po Nyorsoa-a' dhih-' dhih 'jeh. Eh-: no-eh, 'de or 'wluh 'Iye. Or :se-' 'keen-a' 'yuba-a' :fano ple. Deh no-eh, eh gweh :ka or 'ye-a Nyorsoa, :or nyor-a' 'ye-a. Eh-: :korn dhih, or :se-' sea.

²⁸:Mose' po Nyorsoa-a' dhih-' dhih 'jeh. Eh-: no-eh, 'de or no-eh, 'de nyor⧾-a 'dhu 'Meh-a' :bla-dih: 'dlu dih-gor. 'De or 'nyi-uh 'tele', on 'ye nyomor 'do an-a' :kpaa'⧾ ken tli, 'de 'enjor: :or ya-a 'de 'meh-a', or :ne-' 'Ezlea-nyor⧾-a' :zai'-nyor⧾-kpalu⧾-nynuu 'dba.

²⁹'Ezlea-nyor⧾ po Nyorsoa-a' dhih-' dhih 'jeh. Eh-: no-eh, 'de Yobo' :zaehn :gble-eh:-', 'de on :na or-a' 'bluhba-yli-eh ken dih, on 'dhan, :eh gweh-a :ka nyor-a na-a 'bluhba: 'jeh nor ken dih. Jorwor: :yeh 'Iye-nyor⧾-a yi-eh no 'da, :yee' 'ni kpa an-a' klehkpeh 'weh.

³⁰'Ezlea-nyor⧾ po Nyorsoa-a' dhih-' dhih 'jeh. Eh-: no-eh, 'de gba-dih-gba :or bhin-a :Jehliko'o-gwlor, 'de or blu, ti on bhin-or 'do 'we :meheh' 'sorn 'di.

³¹:Bhaa'-nynor: an 'da-dih-a 'Wlea, or po Nyorsoa-a' dhih-' dhih 'jeh. Eh-: no-eh, 'de :yuh :on se-a 'o Nyorsoa-a' 'tele' dih dhe, 'de on :ne or :se-' :dha :due' 'meh-dih:. Deh no-eh, or kpon 'Ezlea-nyor:⧾ :on yi-a gwlor 'yli-eh 'zorn dih :bla 'da-: dih, 'de :porluh-a' dih 'pehn ka 'di.

³²'On 'beh-dih: 'on 'ye 'dlu bo mu, 'on 'ye 'Gilion-: 'Sansin-: 'Bala-: 'Jehta-: :Debe'-: Sameo'-: 'dekorn: Nyorsoa-a' wele-eh: :po-nyor⧾-: an-a' dhih-' :za :dee'. Jorwor: ti 'on 'ble-a, en se 'i :dhie:.

³³:Yee' an-a' klehkpeh :daa, on po Nyorsoa-a' dhih-' dhih 'jeh. Eh-: no-eh, 'de an-a' :due' :due' vorn 'bluhba⧾-dlu⧾ bo, 'de on du-ih. Deh :eh 'sleh-a 'i, eh-: on no, 'de on 'ye deh :korn-a wlu Nyorsoa po-a :dhama'-'. :Yee' an-a' :noo' kan :gbolo⧾-a' worn⧾-: 'i.

³⁴'De on 'mo-dih: neh :eh wan-a :jlu :jlu, 'de on ple, on 'dhan 'de nyor⧾ :an 'bhorn-a :on 'ye-uh'-a :bhla 'jlehn 'i 'dba-dih: 'kwa dih. Keen' :mloror' on se :kmu :dee', jorwor: on :za-dih:-' :kmuu-nyor:⧾. On no nyor⧾ :on :kmu-a 'de tuh-', 'de on du 'bluhba:⧾ 'sluh⧾-a' sorye'.

³⁵'Nynor⧾-kpao'⧾ :noo' po Nyorsoa-a' dhih-' dhih 'jeh. Eh-: no-eh, 'de an-a'a: nyor⧾ :on 'meh-a, on yi 'kmo-' bo de :neheh'. Jorwor: nyor⧾ :noo' :se-eh' ken dih 'worn-dih:, on 'ye zelie-eh:, 'de nyor⧾ 'ye-dih-uh 'kle :ye-dihih:, 'de on 'meh, eh 'ye-eh' no, :mor on 'wluh 'de nma-dih-deh 'di, on 'ye 'kmo 'jeh no-' :ne, :on 'ye 'o :zai' no-' :zi.

³⁶On :wla-dih: :noo' :noo', 'de on bla-uh. On po :noo' 'chen-dubu'⧾ son⧾-', 'de on po-uh :kasue 'di.

³⁷On :tba-dih-uh sobu'⧾ dih, 'de on 'meh. On no 'soror, 'de on :za :noo' :tile⧾ 'sororn'. On 'dba-dih: :noo' :bhla 'jlehn⧾ 'i. 'Blae'⧾-: 'dekorn: 'gbalor⧾-: en-' ku⧾, me-: :noo'-a pa-'. On se deh-a' :za-da 'ble, 'de nyor⧾ 'ye-dih-uh 'kle, on no-uh dhih-'.

³⁸Nyor⧾ :daa, 'de :bhehneh'-bluhba ken-: tluh⧾ ken-: me-: an na-' dih. 'De wor⧾ 'di-: 'dekorn: 'bi 'di dih-: me-: an 'pehn dih :ke. Nyor⧾ 'jeh :no :daa, on se-eh 'i :bleh-dih: on 'ye 'de 'kmo-a' nyor⧾ 'nyne-' 'ti.

³⁹Nyorsoa 'worn-dih: nyor⧾ :daa, an-a' dhih 'jeh-' :po-eh-a' dhih ken-: dih. Jorwor: an-a' nyor :due' :sloror' :se-' deh :korn-a wlu Nyorsoa po-a :dhama'-' 'ye.

⁴⁰Deh no-eh, Nyorsoa 'dhu deh 'jeh :neh 'do :a bo :eh :zi 'o :zai' neh-'. Eh-: 'dhu, mo-: 'dekorn: :a mor-: :a 'ye Nyorsoa-a' :bhorlie'-a' klehkpeh 'ye :dha :due'.