Read Eastern Krahn :Hiblu' 12 Bible Online

:Hiblu' 12 - Eastern Krahn bible

:Hiblu' 12

¹:A :mor :mloror', nyor⧾ :dhulu' :daa :on :to-dih:-a an-a' 'jeh 'yor-eh-a' dhih 'jeh-' :po-eh :a 'i, mo-: :ne :a 'de dih. :Yee' eh-a' dhih, a 'nyi :a :za 'o deh⧾-a' klehkpeh :en-' 'worn-a :a-a' no-a, deh⧾ :a :korn :a 'ye-a no :gwie 'i, 'dekorn: deh⧾-zon:⧾ :a :ybeh-a 'gabaa :en san-a :a dih-:. :Yee' deh :eh :ne-a 'o :a ybei' :a vorn-dih-a, a 'nyi :a 'ble-dih-eh 'dlu 'di dih :chio'lo:, 'de :a 'ye-eh' ken :yeh-dih:.

²A 'nyi :a pobo: 'de :Yusu' ya, :or no-eh, 'de :a po-a Nyorsoa-a' dhih dhih 'jeh-', :eh 'wluh-a 'de eh-a' glu 'dhu 'da, 'de :eh mu-a 'de eh-a' 'dlu-' :jla 'da. 'Mona: :or fuo-or 'ken 'de ybei', or-a' dhih, eh-: no-eh, 'de 'klorse tu 'i 'meh-dih-deh: nyor⧾-a 'da-dih-a dhen-meh-a', 'de eh :se-or' dhen :no-dih:, 'do-a' 'meh-dih: 'da. :Yee' :kana :naa, or :dhe dih 'de Nyorsoa-a' 'keen :kpala'-a' :dila-son bo.

³A :na-dih: deh⧾ :en :yi-dih-or ya dih :gwluhuh' dih, :ka deh⧾-zon:⧾ :no-nyor:⧾ :on 'nyeh-or', on no-a or-a' 'kle 'ye-dih-eh. :Yee' eh-a' dhih, a-a' :sea:-'. A mu 'dlu bo :chio'lo:.

⁴Deh⧾-zon:⧾ a 'dhu-a bo :vorn-eh, an-a' nyor 'see-eh 'zorn 'meh-dih.

⁵:Ka a 'dhu-a Nyorsoa-a' 'nynuu, :yee' a-a' 'ma-dih:-' bo, :ka or-a' wlu po-a a 'kpih bo, :on no-a, 'An 'yu, :mor :Gwlor :baa' 'dhu-dih: :on kplen, :yee' :an-a' 'da-dih:-eh' deh-yu. 'De mor :mor or 'da, :an no deh-zon:, :an-a' :porluh-a' 'kpa-:-' 'zorn.

⁶Deh no-eh, nyor⧾ :yuh :Gwlor :baa' :ybeh-a, mo-: or 'dhu-dih kplen. 'De nyor⧾ :yuh :on :korn-a dhih or 'worn-dih-a ken dih, :on 'ye-a or-a'a: 'nynuu no, mo-: or 'ble-dih sene'eh 'de, :mor on no deh-zon.

⁷:Mor a :taa 'kle 'ye, a-a' :sea:-'. A 'duo-eh' eh 'ye a-a' kplen 'dhu-dih-eh no. Deh no-eh, :ka :baa'-a no-a 'yu-a' dhih, 'ka-: 'o Nyorsoa no a-a' dhih :ke. Dha 'yu 'wluh :or :korn :baa' se-or kplen 'dhu-dih :eh?

⁸Nyorsoa-a 'dhu-dih or-a'a: 'nynuu-a' klehkpeh kplen. :Yee' eh-a' dhih, :mor or se a kplen 'dhu-dih:, :yee' a se or-a'a: 'nynuu: :dhih 'o. A :mor nyor :noror' 'nynuu: 'o.

⁹'De mor a :na-dih: :a :bai' :on no-a :gwlor-nyor⧾, an-a' dhih :gwluhuh' dih. :Mor on 'dhu-dih: :a kplen, :yee' :a 'ye-uh deh-' 'weh 'do eh bo. :Yee' :a :Baa' :or :ne-a 'de yai', :mor or 'dhu-dih: :a kplen, :yee' dha or-a' deh-' 'ye-eh-a mu :na-dih: :eh, :eh mu-eh :no, 'de :a 'ye-a 'kmo :sie: :febeh' 'ble?

¹⁰:A-a' 'jeh 'yor-eh :bai' :on :ne-a dha 'bluhba ken, an 'dhu-dih :a kplen 'do ti-kpor-bei 'di, ti :a no-a 'nynuu: :nyene', :yeh :eh 'sleh-a 'i 'do on bo, eh-: an no. Jorwor: :mor Nyorsoa no-eh, :yee' or no-eh', eh 'ye :a-' :za-dih: :dhih 'o, 'de :a 'ye 'for 'ble 'de or-a' gban 'i :ne-tu 'di.

¹¹:Yee' :mor :a :taa kplen 'dhu-dih-eh, :yee' eh puhba :a dih, eh-a' :no-dih: :a 'mona. Jorwor: 'de ybei', nyor⧾ :on 'dhu-dih-eh kplen, 'de :on :po-eh: 'o :gwie 'i de, an-a' geli' :za-dih-deh-a mu wlu-' dih 'worn-eh-: 'dekorn: 'yi 'sleh-deh-a' 'kmo-' :ne-dih-eh-: :no.

¹²:Yee' eh-a' dhih, a :ku-dih: a-a' son worn 'i dih o. 'De mor, a po 'de :yle :bo-tanu⧾ o.

¹³A :na :gwie: :eh 'sleh-a 'i bo, 'de a-a' :nea-buh⧾ :ne 'de de dih 'kpa, jorwor: en 'ye 'bor.

¹⁴:Yee' a vorn a :ne nyor⧾-a' klehkpeh 'ye ken dih kpon-dih:. 'De mor a 'nyi a vorn, a 'ye nyor⧾ :on :dhe-dih-eh 'for 'i no, 'do Nyorsoa bo. Deh no-eh, nyor :or se-a or-a' 'jeh 'for 'i :dhe-dih: 'do or bo, :yee' or :se-' :Gwlor :baa' 'ye-: i.

¹⁵A 'ye-eh bo :naa, 'de a-a' nyor :ne-' Nyorsoa-a' mla :sea-dih:. 'De mor or :ne-' 'we-buo gweh, 'de or-a' worn :nyni-eh :ne-' nyor⧾ :dhulu'-a' 'kmo :ne-eh 'kor-dih:.

¹⁶A-a' nyor-a' 'kpa-:-' 'de 'tmeor:⧾ :korn-eh 'di, :korn mor se Nyorsoa deh-' 'ye-: :ka 'Isor no-a, :or 'dhu-a 'soma'-ni-dhih, 'de :or plo-a or-a'a: nyor :klaba'-deh.

¹⁷A yubo-eh', :yeh ti :zi-dih:-a 'o ken dih, :yee' or 'bhorn or 'ye or :baa'-a' :bhorlie' 'ye :dee'. Jorwor: or :baa' :se-eh' or 'nyi, deh no-eh, ti zi-'. 'De mor deh 'Isor no-a, or-a' 'yor-eh se eh-a' dih 'bili-eh 'beh-dih: :neheh', keen' :mloror' or 'vin-' ti or 'bhorn-eh 'kwla⧾-' dih.

¹⁸:Yee' eh :se deh nyor⧾-a 'tuh-a dih bo, a :se-' yi, :ka 'Ezlea-nyor⧾ no-a, ti on yi-a 'o 'Sanae-tluh bo, :on 'kpa-a neh-', 'de :kule-kpan: :klaba'-: 'dekorn: :pobor' :dhulu'-: en :ne-a 'o ken.

¹⁹'De :vuwor' 'wor, 'de nyor⧾-a 'worn wlu 'de mor. :Yeh on 'worn-a wlu :dao', :yee' an bale-', on :ne-' wlu :noo' 'worn :neheh'.

²⁰Deh no-eh, on se 'o 'tele' :daa, eh-a' dih :dhe-eh 'beh-dih:, :eh no-a, Eh-a' :yeh 'dhu nimi-', eh 'tuh tluh :daa dih, :yee' on :korn on 'ye-eh' sobu'⧾ dih :tba-dih:, eh 'ye 'meh.

²¹Deh :eh :no-eh 'do 'Sanae-tluh ken, :Mose' 'ye-a, eh po-or' :fano: 'gabaa, 'de or 'da, 'An 'tiei-a tleh-'.

²²Jorwor: a :mor :mloror', a yi 'noror 'Zayorn-tluh bo, :or 'dhu-a :Julu'slehn: :or :ne-a 'de Nyorsoa 'bli yai', :or :korn-a 'de 'di, 'enjor-nyor:⧾ :on no-a 'wlu-a' 'wlu, on :ne-a, 'de :or 'dhu-a 'kmo :ne-Nyorsoa-a' 'kwi :gwlor-'.

²³:Yee' a yi 'noror 'chore-nyor:⧾ :on 'kpa-a :dha :due' bo :weh, 'de 'mona: ka 'di, 'de :on no-a Nyorsoa-a' :zai'-nynuu: :on :korn-a 'nyne 'chle-eh 'de Nyorsoa 'bli yai'. 'De a yi 'noror Nyorsoa bo 'weh :ke, :or no-a :gwlor-nyor⧾-a' klehkpeh, an-a' zabe: :zi-nyor. 'De mor a yi 'noror 'yi 'sleh-nyor⧾ bo 'weh, :on 'meh-a, 'de :on :ne-a 'de Nyorsoa bo, or no-a :vlehehn'-' :gweh-nyor⧾-'.

²⁴A yi 'noror :Yusu' bo 'weh :ke, :or no-eh, 'de kuo :dele' :ne-a 'o a mor-: 'dekorn: Nyorsoa-: 'nyne bo. 'De mor a yi 'noror or-a' nyomor bo 'weh, :or 'wla-a dih, nyomor :daa, :or po-a kuna' 'jeh nor, :or :zi-a 'o 'Ebo-a' nor-'.

²⁵:Yee' eh-a' dhih, a 'wla :gwluhuh' dih, 'de a 'ye nyor :or wlu-a :naa, :dou'⧾ bo :to. Nyor⧾ :on se-a tubo-wlu:⧾ :en 'wluh-a 'de Nyorsoa bo, :en :po-eh dha 'bluhba ken, 'do 'Sanae-tluh ken, :dou'⧾ bo :to, nyor⧾ :dao', on :se-' or-a' nyor⧾ 'kle 'ye-dih-eh 'dlu 'zorn :za. :Yee' dha eh mu :na-dih: :eh, :mor :a se :yor :or :ne-a 'de Nyorsoa 'bli yai', 'de :or wlu-a 'noror :a bo, :dou'⧾ bo :to?

²⁶Or-a' wlu, mo-: gbua: 'bluhba 'i, 'do ti :dao' 'i. Jorwor: :kana :naa, or po wlu :dhama'-', or 'da, :yeh mu-a 'de :yi, or :se-' 'bluhba :due' 'i gbua: i :dele' ka, jorwor: or mu 'bluhba-: 'dekorn: yao-: 'i gbua: :ke.

²⁷Wlu⧾ :daa :en no-a, or mu-ih 'i gbua: :dele' ka, me-: :to-dih: :a 'i, :ka deh⧾ :yih Nyorsoa no-a, en mu-a 'i gbua:, 'de en 'ye-a' 'o 'wluh, 'de deh⧾ :en se-a 'beh-dih: en 'ye-a' 'i gbua:, en 'ye-a' 'o :sie:.

²⁸:Yee' a 'nyi :a po Nyorsoa-a' 'zio. Deh no-eh, or 'nyi :a 'kpih, or :ne :a 'ye nyor⧾ wlu 'ken :korn, 'kpih :en :se-a' worn :gweh i. :Yee' eh-a' dhih, a 'nyi :a po or-a' 'zio, 'de :a 'ye-or :weheh' :za, 'de or-a' :porluh-a' dih 'pehn ka 'di, 'de or-a' :fano: :ple-eh-: 'dekorn: deh-' 'ye ka 'di-:.

²⁹Deh no-eh, :a-a' Nyorsoa gweh neh :eh sin-dih-a deh⧾, 'de en gweh-a ya.