Read Eastern Krahn :Hiblu' 13 Bible Online

:Hiblu' 13 - Eastern Krahn bible

:Hiblu' 13

¹A kpa a-a' :ybeh-dih-eh 'dlu bo :chio'lo:, :ka 'Klae :de-di'-boi' :korn on 'ye-a :ybeh-dih-eh no.

²A 'ye-eh' bo, a 'ye 'duhba⧾ 'de a 'bli 'gbu⧾ 'di dih :ko-dih:. Nyor⧾ :noo' :noo', mo-: no-eh, 'de on :ko-dih: 'enjor-nyor⧾ 'de on 'bli 'gbu⧾ 'di dih. Jorwor: on se-eh 'i yubo: :ka on 'dhu-a 'enjor-nyor⧾-'.

³A :na-dih: nyor⧾ :on :ne-a :kasue 'di, an-a' dhih :gwluhuh' dih, :eh gweh-a :ka on :ne a :ne-a :kasue 'di. A :na-dih: :yuh nyor⧾-a no-a dhih-', an-a' dhih :gwluhuh' dih, :eh gweh-a :ka on :ne a gble-a an-a' 'kle 'ye-eh.

⁴:Gwlor-nyor⧾-a' klehkpeh :korn on 'ye 'bli 'ti-dih-eh deh-' 'ye. 'Nynor-: yibeor-: an-a' nyor-a' :korn-' 'tmeor⧾. Deh no-eh, Nyorsoa-a mu nyor⧾ :an korn-a 'tmeor⧾-: 'dekorn: :yuh :an no-a 'nyne :zaan'-: an-a' zabe 'i :chehn.

⁵A 'bor 'wlii-dhih: :kma-eh. Jorwor: a 'nyi a-a' :porluh⧾ 'pehn-dih 'do deh a 'ble-a bo. Deh no-eh, Nyorsoa 'dae:, 'On :se-' a bo dih :tehn-dih: i. 'De mor 'on :se-' a dih 'tali: i.

⁶:Yee' :ka Nyorsoa :za-a deh :daa-', :yee' :a 'beh-dih: :a 'ye :gwluhuh' :ku, :a 'ye :ao', :Gwlor :baa', or-: 'dhu :a-a' :za-dih-nyor-'. Eh-a' dhih :fano :se-' :a :no i. Deh :gwlor-nyor⧾-a mu :a-' :no-dih: :eh?

⁷A :na-dih: a-a' nyor⧾ :na-dih-nyor:⧾ :on po-a Nyorsoa-a' tubo-wlu⧾ 'de a bo, an-a' dhih :gwluhuh' dih. A :na-dih: 'kmo on :ne-a :zai', 'de an mu-a 'meh-:, an-a' dhih :gwluhuh' dih. :Ka on no-a Nyorsoa-a' dhih dhih 'jeh-' :po-eh, 'ka-: a 'ye no :ke.

⁸:Ka :Yusu' 'Klae :ne-a zama, 'ka-: or :ne 'zean', 'ka-: or mu :ne, :ka ti-a mu-a 'dlu-' :tehn.

⁹A-a' 'worn-:-' nyor⧾ deh :torne-eh: 'doror: 'dor, :eh :ne 'Klae-a' neh se a :gwie :due' kpa, eh-a' :za 'o a :gwie 'i. Eh :nmor-: 'yi, Nyorsoa-a' mla 'ye-eh' no, 'de :a-a' :porluh⧾ 'ye dih ku. Jorwor: dii-deh⧾-a' 'tele' dih :dhe-eh se eh-a' no-a' 'beh-dih:. Nyor⧾ :an dhe-a 'o dii-deh⧾-a' 'tele' dih, eh se an-a' :za-dih-eh 'beh-dih:.

¹⁰:A 'ble 'slaa ken :za-dih-deh: 'jeh :neh :eh :korn-a ken :mor deh 'wluh-a, :Jueh'-nyor⧾-a' 'slaa: :za-nyor:⧾ :an za-a 'slaa 'do 'taa: 'por :gbalie 'zorn, on se-a :korn on 'ye-a' di.

¹¹:Jueh'-nyor⧾-a' Nyorsoa-a' 'slaa: :za-nyor⧾-a' nyor :klaba'-a kpa nimi⧾-a' nyomor 'de Gban 'i :ne :chuu: :on :zi-a 'o :chuu⧾-a' klehkpeh 'di, on 'ye-or' Nyorsoa gban 'i 'dhu-dih: 'do deh⧾-zon⧾-a' dhih bo. Jorwor: 'do :gwlor worn 'i, 'do :wor an po-dih nimi⧾ :dao', or-a' 'meheh'-ku⧾-a' 'jeh 'yor-eh 'yli.

¹²Eh-: :korn dhih :Yusu' 'meh-dih: 'o :gwlor worn 'i :ke, 'de or-a' 'jeh 'yor-eh-a' nyomor 'ye-eh' no, 'de :gwlor-nyor 'ye 'for 'i :dhe-dih-eh: 'do Nyorsoa bo.

¹³:Yee' eh-a' dhih, a 'nyi :a mu 'de or bo :gwlor worn 'i, on 'ye :a dhen :no-dih: :ke, :ka on no-a or-a' dhen :no-dih-eh.

¹⁴Deh no-eh, :a se gwlor 'ble dha 'bluhba ken :or :korn-a 'di :a mu-a 'ti-: :ka ti-a mu-a 'dlu-' :tehn. Jorwor: :a pobo 'de 'kwi :gwlor :or mu-a :ne, 'de ybei', or-a' :gwie 'i.

¹⁵:Yee' eh-a' dhih, a 'nyi :a po Nyorsoa-a' 'nyne ya, 'do ti-a' klehkpeh bo. Eh-: no :a-a' 'slaa: :za-dih-deh: :eh :yi-dih:-a :Yusu'-'. A 'nyi :a no-eh, 'do or-a' 'nyne ya :po 'da.

¹⁶Nyor-a' 'ma-dih:-' bo, a 'ye deh⧾ 'jeh ne no, 'do a 'bei' bo, 'de deh⧾ a 'ble-a, a 'ye-uh' :za-dih: :due' :due'. Deh no-eh, :a-a' deh⧾ 'jeh :ne :a no-a, en mu Nyorsoa-a' :porluh dih 'pehn-dih:. :Yee' en mu 'slaa: :za-dih-deh :gweh 'do or bo.

¹⁷A dhe 'o nyor⧾ :an na-dih-a a-uh, an-a' 'tele' dih. :Yee' a :ya a-a' 'jeh ya 'do on 'zorn. Mo-: :an 'dhu a 'yli-eh bo 'do ti-a' klehkpeh bo. Deh no-eh, eh mu 'we-eh :korn, :koan: :or :po-eh 'de on 'kwa, an mu :ka on no-a or-a' no-a', eh-a' dhih bo zela: 'do Nyorsoa ybei'. :Mor a dhe 'o an-a' 'tele' dih, :yee' an mu an-a' :koan :no, 'de 'mona: ka 'di. Jorwor: :mor a se-eh no, :yee' an-a' :porluh⧾-a mu 'zorn 'kpa-:. 'De mor eh mu-eh :no, a :se 'o deh 'ye-: i.

¹⁸A kpa Nyorsoa bo :wlu-eh 'dlu bo, 'do :a-a' dhih bo. :A yubo-eh', :a-a' :porluh⧾ :se-' :a zabe :kpon-dih:, 'de mor :a 'bhorn :a 'ye 'yi 'sleh-deh no 'do ti-a' klehkpeh bo.

¹⁹'An bale a 'weh deh 'jeh neh, a 'ye 'de Nyorsoa bo :wlu, or 'ye-eh' no, 'on 'ye 'dhobo:, 'on 'ye 'de a bo deka yi.

²⁰Nyorsoa :or 'nyi-a nyor⧾ wlu-' dih 'worn-eh, or-: :za-a: 'de :a-a' :Gwlor :baa' :Yusu' 'de nma-dih-deh 'di. :Yusu' :dao', or gweh 'blae'⧾-a' 'yli-eh bo 'dhu-nyor: :klaba'. 'De or-a' 'meh-a' :dao', or-: no-eh, 'de kuo :or mu-a 'kmo :ne :ka ti-a mu-a 'dlu-' :tehn, 'de or :ne.

²¹'Nyi Nyorsoa 'nyi a deh⧾-a' klehkpeh :en no-a deh⧾ 'jeh, :en mu-eh :no, 'de a 'ye-a or-a' 'ton :korn-deh no. Deh :eh 'pehn-dih-a or-a' :porluh dih, eh-: or 'ye :Yusu' 'Klae-' :yi-dih: or 'ye no 'de :a 'di. Dhih-a' 'i 'beh-a' 'do :Yusu' bo :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

²²:Yee' 'an 'Klae :de-di'-boi'-a:, 'an bale a 'weh, a 'ye tubo-wlu:⧾ :daa :en no-a 'de nyor⧾-a' 'kpih :po-wlu⧾ :dou'⧾ bo :to, 'de :porluh⧾-a' dih :kpon-eh 'di. Deh no-eh, 'chlee-deh: :daa 'on 'chle-a a bo, eh se 'dlu-' :tehn.

²³:Yee' 'an 'bhorn a 'ye-eh' yubo: :ka :a-a' 'Klae :de-di' :Timehte' 'wluh-a 'de :kasue 'di :weh. :Mor eh 'dhu or 'dhobo: or 'si dih :dha 'on bo, :yee' or :ne 'an mu a 'ye 'da :yi.

²⁴A zela: a-a' nyor⧾ :na-dih-nyor⧾-: 'dekorn: Nyorsoa-nyor⧾-a' klehkpeh :on :sie:-a 'o :gwluhuh', :a :mor 'ye an-a' klehkpeh o. 'Klae :de-di' :on 'wluh-a 'Etole, on 'da, mo-: 'ye a-uh :ke o.

²⁵'Nyi Nyorsoa-a' mla :ne 'o a-a' klehkpeh bo o.