Read Eastern Krahn :Hiblu' 3 Bible Online

:Hiblu' 3 - Eastern Krahn bible

:Hiblu' 3

¹:Yee' 'an 'Klae :de-di'-boi'-a:, a :mor :or :dhe-dih-eh 'for 'i 'do Nyorsoa bo, 'de or 'da-a :ke, a pobo: :Yusu' ya, :or Nyorsoa dbo-a :or 'ye-a or-a' 'slaa: :za-nyor⧾-a' nyor :klaba' no, 'do deh :a :za-a-', 'de :a po-a dhih 'jeh-' bo.

²:Yusu' no :dhehehn-nyor: 'do Nyorsoa :or gan-or, or 'ye-a or-a' :koan no bo, :ka :Mose' no-a 'de or no-a :dhehehn-nyor 'do Nyorsoa-a' nyor⧾-a' :na-dih-eh-a' :koan bo.

³Nyor :or po-a 'gbu, or-: :korn deh-' 'ye-eh: 'gabaa :eh :zi 'o 'gbu-a' 'jeh or po-a-'. 'De :ka :ne-a :due' 'di, :Yusu' :bleh-dih-eh-: 'i, or 'ye deh-' 'ye-eh: 'gabaa, eh 'ye 'o :Mose'-' :zi.

⁴Keen' :mloror', 'gbu⧾-a' klehkpeh, nyor⧾-a: po-ih. Jorwor: Nyorsoa, or-: no-eh, 'de deh⧾-a' klehkpeh, en :ne.

⁵:Mose' no :dhehehn-nyor: 'do Nyorsoa-a' nyor⧾-a' :na-dih: 'da, 'do or-a' 'bhoi-yu: :koan bo. 'De deh⧾ Nyorsoa-a mu-a-' :za, 'de ybei', me-: :korn dhih or zela ken dih.

⁶Jorwor: 'Klae no :dhehehn-nyor: 'do Nyorsoa-a' 'Yu-deh bo, 'de or-a'a: :koan :wor 'dhu, or 'ye 'de Nyorsoa-nyor⧾-a' klehkpeh-a' dhih bo :korn. :Mor eh 'dhu :a kpa :a-a' :gwluhuh' :ku-eh-: 'dekorn: deh :gwlii' :dhe-eh-: :eh :korn-a 'mona-a: no :a-uh 'dlu bo, :yee' :a :mor 'dhu Nyorsoa-nyor⧾-a' 'yor-eh-'.

⁷:Yee' eh-a' dhih, :ka Gban 'i :ne :Zulu no-a eh-a' :za-a', on no-a, :Mor eh 'dhu, a 'worn Nyorsoa-a' wlu 'zean',

⁸:yee' a-a' :kmu-dih:-' a-a' :porluh⧾, :ka a :bai'-a' :bai' no-a, ti on 'ye-a Nyorsoa worn :bla-dih: 'de :bhehneh'-bluhba ken, 'de on 'ye-or' 'dhen 'do 'we-eh: :dao' 'di.

⁹Nyorsoa 'da, 'Do :wor nyor⧾ :dao', on 'dhen-dih: 'on dih, keen' :mloror' on 'ye deh⧾ 'on no-a 'do on bo, 'do zon⧾-a' :kwlaa :nyieh 'di 'weh.

¹⁰:Yee' eh-a' dhih, 'on 'kpa-dih-uh 'chehn, 'de 'on 'da, An-a' 'dlu 'di dih :na-dih-deh⧾ se 'o :gwie 'i :ne, 'do ti-a' klehkpeh bo. 'De deh 'an 'bhorn-a on 'ye-a' no, an-a' 'worn-eh' dih.

¹¹Eh po 'on-' 'chehn. Eh-: :korn dhih 'on po wlu :dhama'-' 'gabaa, 'on 'da, On :se-' 'bluhba: 'on 'nyi-uh-a :dee', on 'ye-a' :forn, 'de or ken dih 'si-:.

¹²:Yee' 'an 'Klae :de-di'-boi'-a:, a 'wla :gwluhuh' dih, 'de nyor :ne-' 'de a 'nyne-' :ne, or :ne-' 'kulu: :porluh 'ble, 'de or :sor se 'o Nyorsoa-a' 'tele' dih dhe, :eh mu-eh :no, 'de or 'ye-a 'kmo :ne-Nyorsoa 'kpuh ya :to.

¹³Jorwor: deh :eh mu-eh :no, 'de deh⧾-zon⧾ :sor :bo-dih: a dih, 'de a-a' :porluh⧾ :sor :kmu-a' 'do Nyorsoa bo, eh-: 'dhu, a po a 'bei' 'kpih bo, zorn 'o zorn, 'de a 'bei' 'ye a 'kpih bo po :due' :due', :ka ti :daa Nyorsoa-a' 'chlee-deh 'da-a 'Zean' :a :ne-a ken :naa, en 'see-a 'dlu-' jla 'gboror:.

¹⁴Deh no-eh, :mor eh 'dhu :a kpon deh :gwluhuh' :kpa-dih-eh: :a 'ble-a dih :chio'lo: :eh 'wluh-a 'de eh-a' glu 'dhu 'da, 'de :a 'ye-eh 'dlu-' jla, :yee' :a mu 'Klae-a' bo nena-nyor⧾ :no.

¹⁵:Yee' Nyorsoa-a' 'chlee-deh 'da, :Mor eh 'dhu a 'worn Nyorsoa-a' wlu 'zean', :yee' a-a' :kmu-dih:-' a-a' :porluh⧾, :ka a :bai'-a' :bai' no-a, ti on 'ye-a Nyorsoa worn :bla-dih:.

¹⁶Deh 'i-deh-nyor:⧾ 'o, :on 'worn deh Nyorsoa :za-a-', 'de :on :bla-dih-or worn :eh? Eh :se nyor⧾-a' klehkpeh :Mose' 'ble-a kwa, 'de or :za-a: 'de 'Iye-bluhba ken :e?

¹⁷An-a' 'nyne :on Nyorsoa 'kpa-dih: 'chehn-' 'do zon⧾-a' :kwlaa :nyieh 'di :eh? Eh :se :yuh :on no-a deh⧾-zon⧾, 'de :on 'meh-a 'de :bhehneh'-bluhba ken :e?

¹⁸Ti Nyorsoa po-a wlu :dhama'-' 'gabaa, 'de or no-a, On :se-' 'bluhba: 'on 'nyi-uh-a :dee', on 'ye-a' :forn, 'de or ken dih 'si-:, :yee' an-a' 'nyne or 'da 'de bo :eh? Eh :se :yuh :on se-a 'o or-a' wlu dih dhe :e?

¹⁹:Yee' :a 'ye-eh' 'jeh ka, on :se 'de 'bluhba: :dao' ken dih 'si, deh no-eh, on :se-eh' dhih 'jeh-' po.