Read Eastern Krahn :Hiblu' 4 Bible Online

:Hiblu' 4 - Eastern Krahn bible

:Hiblu' 4

¹:Yee' Nyorsoa-a' wlu :dao' or po-a :dhama'-' :eh :mor :a mu :dha nyor⧾-a forn-dih-a 'do or bo :mu, on :ne-' 'gboror:. :Yee' eh-a' dhih, a 'nyi :a 'wla :gwluhuh' dih, 'de a-a' nyor :ne-' 'zorn :sie:.

²Deh no-eh, :a 'worn Nyorsoa-a' tubo-wlu:⧾ 'jeh 'weh :ka :a :bai'-a' :bai' no-a :ke. On 'worn tubo-wlu:⧾ :dao' 'weh, jorwor: eh :se-uh' 'o deh po. Deh no-eh, :yeh on 'worn-ih'-a, :yee' on :se-ih' dih kpon 'de dhih 'jeh-' :po-eh 'di.

³Jorwor: :a :mor :or po-eh dhih 'jeh-', :a mu :forn-a' :dao' 'ye-: :ka or no-a eh-a' :za-a', or 'da, Eh po 'on-' 'chehn. Eh-: :korn dhih 'on po wlu :dhama'-' 'gabaa, 'on 'da, On :se-' 'bluhba: 'on 'nyi-uh-a :dee', on 'ye-a' :forn, 'de or ken dih 'si-:. Keen' :mloror' or :za deh :daa-' 'weh 'suh, jorwor: or-a'a: :koan :gweh 'i, :eh 'wluh-a 'o ti or :no-dih:-a 'bluhba.

⁴:Yee' 'de Nyorsoa-a' 'chlee-deh-a' :dha :noror', 'do :wor eh :za-dih: 'we-eh-a' :meheh' 'sorn neh dhih-' :eh 'dhu-a, Nyorsoa :forn-' 'do 'we-eh-a' :meheh' 'sorn neh 'di, 'do :koan-a' klehkpeh or no-a, or-a' dhih bo.

⁵Dhih :daa en :za-eh: de 'weh :neheh', :en 'dhu-a, On :se-' 'bluhba: 'on 'nyi-uh-a :dee', on 'ye-a' :forn, 'de or ken dih 'si-:.

⁶:Yee' nyor⧾ :on 'worn-a tubo-wlu:⧾ 'jeh :daa :zai', on :se-' :forn-a' :dao' 'ye, deh no-eh, on se 'o Nyorsoa-a' 'tele' dih dhe. Jorwor: nyor⧾ :noo', mo-: or 'worn-dih-eh ken dih, :on 'ye :forn-a' :dao' 'ye.

⁷:Yee' 'do eh-a' dha, or tba 'we-eh: :dele', :eh or 'da-dih-a 'Zean'-we-eh. 'Do ti :dhorno'⧾ :en zi-a 'di, or :yi-dih: :Debe', 'de or za-ih' 'de or-a' 'chlee-deh 'di, :eh 'on :za-a-' 'tior' 'de a bo, :eh 'dhu-a, :Mor eh 'dhu, a 'worn Nyorsoa-a' wlu 'zean', :yee' a-a' :kmu-dih:-' a-a' :porluh⧾.

⁸:Yee' :mor eh 'dhu :Jasua' no-eh, 'de :forn-a' :korn-a wlu Nyorsoa po-a :dhama'-' :dee', 'de nyor⧾ 'ye :forn, :yee' Nyorsoa :se-' 'we-eh: :neheh' dhih-' :za i :dee' 'de ybei'.

⁹:Yee' 'do eh-a' dha, :forn-a' :noror', :or gweh-a Nyorsoa-a' :gwlee-we-eh, or-: :sie: 'o 'do Nyorsoa-a' nyor⧾ bo 'gboror:.

¹⁰Deh no-eh, :mor nyor 'ye :forn-a' :dao', :or :korn-a wlu Nyorsoa po-a :dhama'-', :yee' :koan: or no-a, or-: :korn :forn-a' :oo' or 'ye, :ka Nyorsoa no-a, 'de or :forn-a 'do or-a' :koan or no-a bo :ke.

¹¹:Yee' eh-a' dhih, a 'nyi :a po 'de 'kpih, :a 'ye :forn-a' :dao' 'ye, 'de :a-a' nyor :ne-eh' :sea-dih: :ka :a :bai'-a' :bai' no-a, 'de on :sea-dih-eh. Deh no-eh, on se 'o Nyorsoa-a' 'tele' dih dhe.

¹²Nyorsoa-a' wlu :ne-' 'kmo, 'de on 'ble 'kpih. On 'nma, :eh :zi 'o :bhla 'jlehn :eh 'ble-a worn⧾ 'sororn'. An pa 'de :gwlor-nyor 'di, 'de an zela :febeh'-: 'dekorn: :zulu-: 'i. An zela 'do 'kpa⧾-a' 'yi 'dhu-dih: 'da-: 'i, 'de an yeh-dih 'kpa-a' :zami' ken. 'De an zi deh⧾ :gwlor-nyor⧾-a 'bhorn-a-: 'dekorn: deh⧾ an na-dih-a :gwluhuh' dih-: en-' zabe.

¹³Eh se deh :korn :eh 'ye-a Nyorsoa dih 'zile:. Deh⧾-a' klehkpeh or no-a, en :nyeh ken, 'de en kan-dih: 'i 'do or ybei'. 'De mor 'do or ybei', 'do :wor :a :korn :a 'ye deh⧾-a' klehkpeh :a no-a, en-' dhih ken dih zela:.

¹⁴:Yee' a 'nyi :a kpon dhih 'jeh-' :po-eh dih, :a-a' worn :za-a-', :a no-a, :a po-eh dhih 'jeh. Deh no-eh, :a 'ble Nyorsoa-a' 'slaa: :za-nyor⧾-a' nyor :klaba' :due' :or 'kpa-a deh ken, :or 'dhu-a Nyorsoa-a' 'Yu :Yusu'-' :or mu-a 'o Nyorsoa ybei'-a' 'yor-eh.

¹⁵:A-a' Nyorsoa-a' 'slaa: :za-nyor⧾-a' nyor :klaba' :daa, :mor :a se 'kpih ken :ne, :yee' :a-a' :wehlih-a: no-or. 'De mor or 'dhen-eh: dih 'weh :ke, :ka :a no-a. Jorwor: or :mor :mloror', or :se-' deh-zon no :a-a' ka 'i.

¹⁶:Yee' eh-a' dhih, a 'nyi :a 'ble :gwluhuh' :ku-eh :naa, :a 'ye Nyorsoa-a' 'keen :kpala' dih 'koan'-dih:. Deh no-eh, 'do :wor mla :ne. 'De mor 'do :wor :a mu :wehlih 'ye-eh-: 'dekorn: mla-: 'ye-dih:, en 'ye :a-' :za-dih:, ti :a :korn :a 'ye-a' :za-dih-eh:.