Read Eastern Krahn :Hiblu' 5 Bible Online

:Hiblu' 5 - Eastern Krahn bible

:Hiblu' 5

¹:Yee' Nyorsoa-a' 'slaa: :za-nyor⧾-a' nyor⧾ :klaba'⧾-a' klehkpeh, 'de on 'bei' :gwlor-nyor⧾ 'nyne-', 'do :wor Nyorsoa za-uh, 'de or gan-uh, on 'ye or-a' :koan no 'do on 'bei' 'gor bo. :Koan: :dao', or-: 'dhu, Nyorsoa-a' 'nyii'-deh⧾-a' :to-a'-: 'dekorn: Nyorsoa gban 'i 'dhu-eh-: 'do deh⧾-zon⧾-a' dhih bo.

²:Yee' eh :bo-nyor:⧾ :dao', :ka on 'dhu-a :gwlor-nyor⧾-' :ke, 'de an zi-a deh 'i 'do ti :nee' 'di, :yee' on 'beh-dih: on 'ye nyor⧾ :on deh⧾ :kpe-dih:-a 'de 'di dih, 'de :an zi-a :gwie 'i, an-a' bo :wlu-eh yubo:.

³:Yee' :ka an-a' 'jeh 'yor-eh-a zi-a deh 'i :ke, eh-: :korn dhih, an-a' 'worn, an-a' 'dhu Nyorsoa gban 'i, 'do nyor⧾-a' deh⧾-zon⧾-a' dhih bo :due', jorwor: 'do an-a' 'jeh 'yor-eh-a' neh bo :oo' :ke.

⁴Nyor-a' gan or-a' 'jeh 'yor-eh 'do Nyorsoa-a' 'slaa: :za-nyor: :klaba'-deh bo, :eh 'ye-eh' no 'de nyor⧾ 'ye-or 'o 'dhu. Jorwor: Nyorsoa 'da nyor, 'de or no-eh, :ka Nyorsoa no-a, 'de or 'da-a Elorn'.

⁵'De :ka :ne-a :due' 'di, 'Klae :se-' or-a' 'jeh Nyorsoa-a' 'slaa: :za-nyor⧾-a' nyor :klaba' :no-dih: 'de or 'ye deh-' 'ye-eh 'ye. Jorwor: Nyorsoa-a' 'yor-eh:, or-: za-eh' 'de or bo, :or 'da, :Mor no 'an-a: 'Yu. 'De :eh 'wluh-a dha 'zean'-zorn: :daa 'bli, 'mor no :on :Baa'.

⁶'De or za-eh' 'weh 'de or-a' 'chlee-deh-a' :dha :noror' :ke, or 'dae:, :An mu Nyorsoa-a' 'slaa: :za-nyor :no, :ka ti-a mu-a 'dlu-' :tehn, :eh :korn-a 'be :Mehke'seleh no-a :ke.

⁷:Yee' ti :Yusu' yi-a dha yao 'zorn, or kan-dih: or-a' worn 'i, 'de or 'vin-dih: Nyorsoa 'i, or dhele-or dih, Nyorsoa :or 'beh-dih:-a :or 'ye-eh' no, 'de or :sor 'meh-a. :Ka or :ya-a or-a' 'jeh ya, 'de or 'ble-a Nyorsoa-a' :fano: :ple-eh, eh-: no-eh, 'de Nyorsoa 'worn or-a' wlu.

⁸Keen' :mloror', or-: Nyorsoa-a' 'Yu :oo', jorwor: 'de or-a' 'kle 'ye-eh 'di, 'do :wor or 'chean'-dih: deh Nyorsoa-a' wlu dih :dhe-eh 'dhu-eh.

⁹:Yee' :yeh or no-a deh⧾-a' klehkpeh or :korn or 'ye-a' no, :yee' or-: no nyor :or no-eh, 'de nyor⧾-a' klehkpeh :on dhe-a 'o or-a' 'tele' dih, an 'puh, an 'wluh 'de deh⧾-zon⧾-a' 'kpih 'zorn :ka ti-a mu-a 'dlu-' :tehn.

¹⁰'De Nyorsoa gan-or, or 'ye or-a' 'slaa: :za-nyor⧾-a' nyor :klaba' no, :eh :korn-a 'be :Mehke'seleh no-a :ke.

¹¹:A 'ble dhih :doru' :a 'ye-' :za 'noror dhih :daa 'di, jorwor: en-' ken dih zela-eh :kma 'i 'noror a bo. Deh no-eh, a-a' deh-' dih 'worn-eh :kma 'i.

¹²A :korn a 'ye nyor⧾ :an torne-a nyor⧾ deh no :blaa'a:. Jorwor: nyor :korn or 'ye-a deh⧾ nyor⧾-a 'chean'-a :zai' 'de Nyorsoa-a' tubo-wlu⧾ 'di, a :torne: 'gboror:. A gweh 'nynuu: :nyene', a se dii-deh:⧾ :en :kmu-a, en-' di-a' 'beh-dih:. Jorwor: nyene-ni:, me-: a :korn, a 'ye 'nya 'gboror:.

¹³Nyor :or 'nya-a nyene-ni, :yee' or-: 'yu :bleheh'eh: 'o 'gboror:. Or se 'beh-dih: or 'ye deh-zon-: deh 'jeh-: en-' bo dih zela-eh yubo:.

¹⁴'De :ka :noror' 'di, dii-deh:⧾ :en :kmu-a, en :korn 'de nyor⧾ :kolu'⧾ bo, deh⧾ on 'chean'-a, en 'beh-dih: en 'ye-eh' no, 'de on 'ye deh-zon-: deh 'jeh-: bo dih zela:.