Read Eastern Krahn :Hiblu' 8 Bible Online

:Hiblu' 8 - Eastern Krahn bible

:Hiblu' 8

¹:Yee' deh⧾ :a :za-a-', en-' 'kpa :wor 'dhu, :a 'ble eh :bo-nyor: :ke, :or no-a Nyorsoa-a' 'slaa: :za-nyor⧾-a' nyor :klaba', :or :dhe-a dih 'de Nyorsoa :or 'ble-a 'kpih 'do deh⧾-a' klehkpeh 'dlu, or-a' 'keen :kpala'-a' :dila bo, 'de or 'bli yai'.

²Or no or-a'a: 'slaa: :za :koan 'weh, 'de :chuu: :on :ne-a gban 'i, :on :zi-a 'o :chuu⧾-a' klehkpeh-' di, :on :ne-a 'de 'taa: 'por :gbalie 'jeh neh 'di, :eh :Gwlor :baa'-a' 'jeh 'yor-eh po-a, :eh :se-a :gwlor-nyor⧾-a' son.

³Nyorsoa-a' 'slaa: :za-nyor⧾-a' nyor⧾ :klaba'⧾-a' klehkpeh :po-eh: 'o 'weh, on 'ye-or' 'nyii'-deh⧾ 'nyi, 'de mor on 'ye or-a'a: gban 'i 'dhu-dih-deh⧾ :to. :Yee' eh-a' dhih, :a-a' Nyorsoa-a' 'slaa: :za-nyor⧾-a' nyor :klaba' :korn or 'ye deh 'ble, or 'ye-a Nyorsoa 'nyi :ke.

⁴:Mor eh 'dhu or :ne dha yao 'zorn :dee', :yee' or :se-' Nyorsoa-a' 'slaa: :za-nyor :no i :dee' klehkpeh klehkpeh. Deh no-eh, Nyorsoa-a' 'slaa: :za-nyor:⧾ mo-: :on :ne dha :naa, :an 'nyi Nyorsoa 'nyii'-deh⧾ :ka :Jueh'-nyor⧾-a' 'tele' no-a mu-a'.

⁵An no an-a' Nyorsoa-a' 'slaa: :za :koan: 'do :dha :or :ne-a gban 'i, :eh 'dhu-a :dha :or :ne-a 'de Nyorsoa 'bli yai', or-a' 'kafluh⧾. 'Ka-: eh :ne :ke 'do :Mose' bo. :Yeh or yi-a :gbalie :eh no-a kuo :po 'da, :yee' Nyorsoa zela-or-: :gwluhuh', or 'da, 'Dhu-eh :dhororn', :on 'ye deh⧾-a' klehkpeh no, eh :ne :gbalie 'on :to-dih:-a :on 'i 'do tluh 'dlu, en 'ye goor-dih:.

⁶Jorwor: :kana :naa, Nyorsoa-a' 'slaa: :za :koan: :or 'beh-a 'i, :or :zi-a 'o nyor⧾ :on :ne-a dha yao 'zorn, an-a' nor-', or-: Nyorsoa 'nyi :Yusu'. 'Ka-: eh :ne :ke, kuo :Yusu' no-a, 'de :or :ne-a 'o Nyorsoa-: 'dekorn: or-a'a: nyor⧾ 'nyne bo, or-: no kuo 'jeh nor, :or :zi 'o :zai' nor-'. Deh no-eh, deh 'jeh :neh :eh :zi-a 'o :zai' neh-', eh-: :korn wlu Nyorsoa po :dhama'-' 'do kuo :daa, or-a' :po 'da, :yeh nyor⧾-a mu-a deh 'i 'ye-:.

⁷:Yee' :mor eh 'dhu :zai' kuo no deh⧾-a' klehkpeh or :korn or 'ye-a' no :dee', :yee' kuo-a' 'sororn' nor se :korn or 'ye 'de yi :dee'.

⁸Jorwor: Nyorsoa zela: or-a'a: nyor⧾ :gwluhuh', ti on no-a deh-zon, or 'da, Ti-a mu 'o :nyni, 'de 'Ezlea 'di-: 'dekorn: 'Juda 'di-: on :ne 'on 'ye kuo :dele' po. 'Ka-: 'mor :or 'dhu-a :Gwlor :baa'-', 'on 'da.

⁹Kuo :dao' or :ne :yor on :bai'-a' :bai' :ne 'on po-a, 'do 'we-eh: 'on 'gba-uh-a :jii-eh 'i, 'on za-uh-a 'Iye, en :se-' goor-dih: i. Kuo :dao', on :bai' :ne 'on po-a, on :bai' :se 'o or-a' 'tele' dih dhe. Eh-: no-eh, 'de 'on za-uh son bo.

¹⁰Jorwor: kuo 'Ezlea 'di :ne 'an mu-a :po, 'do ti :en mu-a 'de :yi 'di, or-: :dhe dih. 'Ka-: 'mor :or 'dhu-a :Gwlor :baa'-', 'on 'da. 'An mu 'an 'tele'⧾ 'de on 'dlu 'di :po, 'de 'on 'ye-ih' 'chle 'do on :porluh⧾ ken. 'Mor-: mu an-a' Nyorsoa :no, 'de on 'ye 'an-a: nyor⧾ no.

¹¹:Yee' 'de ybei', nyor :se-' or-a' :dha :due' 'ti-nyor-: :eh beh or-a' 'de-di'-: :gwluhuh' zela: i, or 'ye :ao', Yubo: :Gwlor :baa'. Deh no-eh, :eh 'wluh-a 'de se 'nyne :korn-nyor⧾ bo-: 'de :eh :yeh-dih:-a 'nyne :korn-nyor⧾ ken-: an-a' klehkpeh, an mu-eh yubo: :ka 'on 'dhu-a an-a' Nyorsoa-'.

¹²:Mor on zi deh 'i, 'an mu an-a' :wehlih 'ye-:. 'On :se-' an-a' deh⧾-zon⧾-a' dhih :gwluhuh' dih :na-dih: i :neheh'.

¹³:Yeh Nyorsoa :za-a kuo :dele' :dao', or-a' dhih-', :yee' eh-: no-eh, 'de :zai' nor no 'soa'. 'De mor deh :eh no-a 'soa', 'de :eh se-a :koan :korn, eh :se 'o :gwle i, eh 'ye 'ma.