Read Eastern Krahn :Hiblu' 9 Bible Online

:Hiblu' 9 - Eastern Krahn bible

:Hiblu' 9

¹:Yee' :zai' kuo 'ble or-a' 'jeh 'yor-eh-a' 'tele' 'do Nyorsoa-a' :weheh' :za 'da, 'dekorn: :dha nyor 'ye-a' Nyorsoa :weheh' :za-dih: dha yao 'zorn.

²:Yee' 'taa: 'por :gbalie, eh-: :po-eh:. 'De eh-a' :zai' :chuu:, mo-: an 'da-dih Gban 'i :ne :chuu. 'De on 'di :dao', 'do :wor 'nape :ne, 'dekorn: 'tebo :or 'bhlee on po-a 'o Nyorsoa ybei' dih, :eh :ne-a gban 'i, eh :ne-a 'o ken-:.

³:Yee' 'de 'yli-eh 'de, 'do :wor :chuu-a' 'sororn' no :ne, an 'da-dih-a :Chuu: :on :ne-a gban 'i :on :zi-a 'o :chuu⧾-a' klehkpeh-'.

⁴'De on 'di, 'do :wor 'slaa ken :za-dih-deh :ne, :eh no-a 'goo, :eh :korn-a 'o ken an po-dih-a deh⧾ :en po-a 'no 'jeh no 'yli, 'dekorn: kuo :gbloron' :on :ne-a 'goo kle-' dih. 'De mor :yabo' :or no-a 'goo, 'mana :ne-a 'de 'di, or :ne 'de :gbloron' :dao' 'di. Elorn'-a'a: deh⧾ :tba-tu: :on :me-dih:-a ken dih-: 'dekorn: sobu'⧾ :en no-a deh⧾ 'por⧾ 'de :Mose'-a' 'tele' 'chle-eh: ken dih-: en-' klehkpeh, me-: :ne 'de :ke.

⁵:Yee' 'do :gbloron' :dao' ken, 'do :wor deh⧾ 'sororn' :en 'ble-a :kpabuh'⧾, on ma-a, :en :nyna-a 'o Nyorsoa-a' 'gor bo dih, en :ne. :Yee' 'do :dha Nyorsoa 'ma-dih:-a nyor⧾-a' deh⧾-zon⧾-a' dhih bo, 'do :wor en-' :kpabuh'⧾ :dao', en 'jli 'dlu. Jorwor: eh :se dha :dha :daa :a :se-' deh⧾-a' klehkpeh ken dih zela: i.

⁶:Yee' 'ka-: deh⧾-a' klehkpeh :daa, en no mu-a', 'de Nyorsoa-a' 'slaa: :za-nyor⧾-a pa 'de 'taa: 'por :gbalie :dao', eh-a' :zai' :chuu 'di, zorn 'o zorn, on 'ye an-a' 'slaa: :za :koan no.

⁷Jorwor: :yor :or no-a Nyorsoa-a' 'slaa: :za-nyor⧾-a' nyor :klaba' :due' 'klein', or-: pa 'de :chuu: :on :ne-a gban 'i, :on :zi-a 'o :chuu⧾-a' klehkpeh-' 'di. 'De mor or no 'de-a' pa-a' kpor :due' 'do zon 'di 'klein'. :Mor or :taa 'de pa, :yee' nimi or 'dhu-dih-a Nyorsoa gban 'i, eh-a' nyomor or-: or kpa, 'do or-a' 'jeh 'yor-eh-a' dhih-: 'dekorn: deh⧾-zon:⧾ nyor⧾ no-a, on se-a 'i yubo: en-' dhih-:.

⁸Deh⧾-a' klehkpeh :daa, me-: Gban 'i :ne :Zulu :yi-dih:-', 'de an torne :a-uh, :ka :gwie: :eh mu-a 'de :Chuu: :on :ne-a gban 'i, :on :zi-a 'o :chuu⧾-a' klehkpeh-' :on :ne-a 'de Nyorsoa 'bli yai', eh :se-a 'i kan-dih: i, :mor eh 'dhu :zai' :gbalie :dao' :eh no-a kuo soa, eh se blu.

⁹En-' klehkpeh :daa, me-: 'o :en :to-dih: :a 'i, ti :a :ne-a ken :naa, :ka 'nyii'-deh:⧾ nyor⧾-a 'nyi-a Nyorsoa-: 'dekorn: Nyorsoa-a' gban 'i 'dhu-deh⧾-: en se-a 'beh-dih: en 'ye-eh' no, 'de nyor⧾ :an za-or :weheh', an-a' :porluh⧾ 'ye :ao', en se-uh-a zabe :kpon-dih:.

¹⁰En-' klehkpeh :daa, deh :due' en kor-a 'i, eh-: 'dhu, dii-deh⧾-: 'naa'-deh⧾-: 'dekorn: 'de 'doror: 'dor ka 'di, nyor⧾ :noo'-a dle-a an-a' yau-a' deh⧾ :nee'-: an za an-a' 'jeh :kane' dih. En-' klehkpeh :daa, en no 'tele'⧾ :en :ne-a 'noror ken ka, 'de :en mu-a 'o :ne :chio'lo:, 'de jorwor: Nyorsoa 'ye-a' 'kmo :ne-eh: :dele' nyor⧾ 'nyi.

¹¹Jorwor: 'Klae 'yle :weh. 'De or no Nyorsoa-a' 'slaa: :za-nyor⧾-a' nyor :klaba' 'do deh⧾ 'jeh ne bo, :yih :ne-a dha :dee' see. 'Taa: 'por :gbalie :eh :korn-a 'di or :no-dih:-a or-a'a: 'slaa: :za :koan 'do :a bo, eh 'kpa deh ken, 'de eh :gweh :vlehehn'-', eh :zi 'o ken dih. Eh :se :yeh :gwlor-nyor⧾-a' son po-a, :eh :bleh-dih:-a 'i, eh :se deh⧾ Nyorsoa no-a dha 'bluhba ken, en-' deh.

¹²:Yee' ti 'Klae pa-a 'de 'taa: 'por :gbalie :dao' 'di, kpor :due' 'klein', 'de eh-a' :Chuu: :on :ne-a gban 'i, :on :zi-a 'o :chuu⧾-a' klehkpeh-' 'di, or :se-' 'gbalor-: 'dekorn: :blii'-: en-' nyomor kpa, or 'ye Nyorsoa gban 'i 'dhu. Jorwor: or-a' 'jeh 'yor-eh-a' nyomor, or-: or kpa, eh-: no-eh, 'de :a zelie-eh:, :ka ti-a mu-a 'dlu-' :tehn.

¹³'Gbalor-a' nyomor-: :blii'-gblor-a' nyomor-: 'dekorn: :blii'-yu: :eh sin-a, eh-a' :bhuhbuh'-: me-: Nyorsoa-a' 'slaa: :za-nyor⧾-a gba nyor⧾ :on :ne-a :kane' dih ya dih. Deh⧾ :dao' an no-a, eh-: za-uh :kane' dih 'noror ken ka.

¹⁴:Yee' dha 'Klae-a' nyomor-a mu :na-dih: :eh? 'Klae se jorwor: 'bhun :ne, 'de or :yi-dih: Nyorsoa-a' :Zulu: :on :ne-a 'do ti-a' klehkpeh bo-', or 'dhu-dih: or-a' 'jeh Nyorsoa gban 'i, 'de or-a' nyomor no-eh, 'de :a-a' :porluh⧾ :se-' :a zabe :kpon-dih:. :Yee' eh-: no-eh, 'de :a 'beh-dih: 'kmo :ne-Nyorsoa-a' 'bhoi-yu-deh: :no-eh, 'de :a 'bor deh⧾ :en kpa-a nyor⧾ 'de 'meh-a' bo-a' no-a'.

¹⁵:Yee' eh-a' dhih, 'Klae or-: no-eh, 'de kuo :dele' :ne, 'de nyor⧾ :yuh Nyorsoa 'da-a, :on 'ye-a :bhorlie' :daa :eh se-a 'dlu-' :jla 'da :korn, 'de :eh :korn-a wlu or po-a :dhama'-' 'ye, on 'ye-eh' 'ye. Deh :korn-a dhih deh :daa, eh 'beh-dih: eh 'ye-a' :no-eh:, eh-: 'dhu, 'Klae 'meh-', or 'ye nyor⧾ :on no-a deh⧾-zon⧾ 'do kuo soa 'zorn zelie:.

¹⁶:Yee' :mor nyor sie 'o wlu, or 'da, :Mor 'on 'meh, :yee' nyor :daa, or-: 'ye 'an :kororn-deh⧾ kpa o, :mor nyor :dao', or 'ye :kororn-deh:⧾ :dao' kpa, :yee' nyor⧾ :korn on 'ye-eh' yubo: :ka nyor :or sie-a 'o wlu, or 'meh-a deh 'jeh.

¹⁷Deh no-eh, :mor or :ne 'kmo, :yee' wlu :dao' or sie-a 'o, on 'see deh 'da. :Mor eh 'dhu or 'meh :weh, 'de jorwor: wlu or sie-a 'o, an 'da deh.

¹⁸'De :ka :ne-a :due' 'di, :mor deh se 'meh, :yee' :zai'-kuo: :dao', or se 'kpih ken :ne.

¹⁹:Yee' :tehn 'i-deh: :Mose' no-a, eh-: 'dhu, 'tele'⧾-a' klehkpeh Nyorsoa 'nyi-or, :en :ne-a 'de or-a' 'tele'-chlee-deh 'di, or po en-' wele-eh 'weh 'do nyor⧾-a' klehkpeh bo. 'De or 'duo: :blii'-gblor-a' nyomor-: 'dekorn: 'gbalor-a' nor-: me-: or zian-dih: 'ni, 'de or no 'yli-eh: an 'da-dih-a 'woo, eh-a' 'for :ne-a 'zoo-: 'dekorn: 'hesor-tu-a' 'te-mla⧾-: 'de or gba-ih :gwlor-nyor⧾-a' klehkpeh-: 'dekorn: 'tele'-chlee-deh-: ya dih.

²⁰'De or 'da, Nyomor :daa, or-: Nyorsoa :po-dih: kuo 'do or-: a mor-: 'nyne bo. Kuo :daa, or-: 'o Nyorsoa 'nyi a 'tele', a 'ye 'o dih dhe.

²¹:Yee' 'de :ka :ne-a :due' 'di, :Mose' gba nyomor 'do 'taa: 'por :gbalie :dao' ken-: 'dekorn: deh⧾-a' klehkpeh nyor⧾-a za-dih-a Nyorsoa :weheh' ya dih :ke.

²²Keen' 'jeh ka, 'ka-: :Mose'-a' 'tele' no mu-a', nyomor or-: no-eh, 'de deh⧾-a' :dha :dhulu'-a gweh :vlehehn'-' 'do Nyorsoa ybei'. 'De mor eh 'da, :Mor nyomor se dih 'wla, :yee' deh⧾-zon⧾-a' dhih :se-' bo 'ma-dih-eh: i.

²³:Yee' deh⧾ :daa :a :za-a-', deh⧾ :en :ne-a 'de Nyorsoa 'bli yai', en-' 'kafluh:⧾ 'o. :Yee' 'ka-: en :korn en 'ye :vlehehn'-' :gweh-eh no. Jorwor: en-' 'jeh 'yor-eh: :en :ne-a 'de or 'bli yai', me-: Nyorsoa gban 'i 'dhu-dih-deh: 'jeh :neh :eh 'kpa-a deh ken, :eh :zi-a 'o :zai' neh-', eh :korn eh 'ye :no-eh: 'do en bo.

²⁴Deh no-eh, 'Klae :se 'de :chuu: :gwlor-nyor⧾-a' son no-a, :on :ne-a gban 'i 'di pa, :on no-a :chuu: 'jeh no-a' 'kafluh. 'De Nyorsoa 'bli yai'-a' 'yor-eh:, 'do :wor or mu. 'De or :ne 'o Nyorsoa ybei', or wlu 'de or bo, 'do :a 'gor bo.

²⁵:Yee' Nyorsoa-a' 'slaa: :za-nyor⧾-a' nyor :klaba'-a pa 'de :Chuu: :on :ne-a gban 'i 'di, :on :zi-a 'o :chuu⧾-a' klehkpeh-' 'do zon 'di, 'de or kpa nimi-a' nyomor. Jorwor: 'Klae :se-' or-a' 'jeh Nyorsoa gban 'i 'dhu-dih: 'do kpor⧾ :dhulu' 'di. Jorwor: or no kpor :due' 'klein'.

²⁶:Yee' :mor eh se :ao' :ne, :yee' or mu 'kle 'ye-: :yee: :eh 'wluh-a 'de 'bluhba-a' glu 'dhu 'da :dee'. Jorwor: :kana :naa, ti :a :ne-a ken :en no-a :de 'bor-dih-ti, or yi-: 'de, 'do kpor :due' 'di 'klein', 'de or jla :a-a' deh⧾-zon⧾-a' dhih, 'do or-a' 'jeh 'yor-eh-a' Nyorsoa gban 'i 'dhu-dih-eh bo.

²⁷:Gwlor-nyor⧾-a' klehkpeh :korn on 'ye 'meh-a' kpor :due' no 'klein'. :Yee' :mor eh 'wluh 'o, :yee' Nyorsoa :korn or 'ye an-a' zabe zi.

²⁸:Yee' 'de :ka :ne-a :due' 'di, 'Klae :za-eh: 'kwla or 'ye gban 'i 'dhu-dih-eh: 'do kpor :due' 'di 'klein', 'de or 'ye nyor⧾ :dhulu'-a' deh⧾-zon⧾-a' dhih jla. Or mu deka :yi :neheh'. Jorwor: or :se-' deh⧾-zon⧾-a' dhih bo :yi i :neheh'. Or mu 'de :yi, or 'ye nyor⧾ :an fuo-or 'ken 'puh-dih:.