Read Eastern Krahn Jeen: 2 Bible Online

Jeen: 2 - Eastern Krahn bible

Jeen: 2

¹:Yee' 'an 'Klae :de-di'-boi'-a:, :ka a po-a :a-a' :Gwlor :baa' :Yusu' 'Klae-a' dhih dhih 'jeh, :or :korn-a dhih 'beh-a 'i, a-a' :za-' :gwie-for :due'.

²:Mor eh 'dhu, bhaan-nyor: :or pa-a 'tiei: :nmaa'e-', 'de :or :po-a 'goo-bor-yor-eh :jii-eh-', 'de or 'ye 'de a 'bli 'gbon-dih: 'da yi, 'de nyor :or se-a deh-a' :za-da 'ble, 'de :or pa-a 'saan-zon⧾-', 'de or 'ye 'de yi :ke,

³:yee' :mor a 'ye :yor :or pa-a 'tiei: :nmaa'e deh-', 'de a 'ye 'de or bo :wlu, a 'ye :ao', Ken :dhe-deh: 'jeh neh :wor :dhe dih, 'do :on bo o, :mor a :wlu 'de nyor :or se-a deh-a' :za-da 'ble bo, :Nyna 'o :dao' dih, 'de mor a 'ye :ao', :Dhe dih dha 'bluhbor 'do 'an buh⧾ 'bhun,

⁴:yee' :mor a no :ao', :yee' a se 'de dih 'chleh 'de a 'klu-' :e? :Yee' eh :se :porluh⧾-zon:⧾ a 'ble-a, 'de a zi-a 'klii'-zabe :e?

⁵:Yee' a :to :dou'⧾, 'an 'Klae :dhih :kma :de-di'-boi'-a:. Eh :se nyor⧾ :gwlor-nyor⧾-a 'da-dih-a se deh-a' :za-da 'ble-nyor⧾, mo-: Nyorsoa se gan on 'ye bhaan-nyor⧾ no 'do or-a' dhih 'jeh-' :po-eh bo :e, 'de on 'ye Nyorsoa-a' nyor⧾ wlu 'ken :korn-eh 'zorn pa, :eh :korn-a dhih Nyorsoa po-a wlu :dhama'-' 'do nyor⧾ :on ybeh-or' bo :e?

⁶Jorwor: a :mor po se deh-a' :za-da 'ble-nyor yaa'e. Eh :se bhaan-nyor:⧾, mo-: :an se a dih 'nyeh :e? 'De :an se-a a dih 'kla, 'de :an se-a a 'de 'koti⧾-' dih kpa :e?

⁷Eh :se nyor⧾ :dao', mo-: :an se 'nyne :klaba' Nyorsoa 'nyi a-uh, 'bhun dih wlu-dih :e?

⁸:Mor eh 'dhu, a dhe 'o Nyorsoa-a' 'tele'-a' :klaba' neh dih 'jeh ka, :eh 'chle-eh 'de Nyorsoa-a' 'chlee-deh 'di, :eh no-a, :Ka :on no-a :an-a' 'jeh-a' :ybeh-a', 'ka-: :on 'ye nyor⧾ :on :ne 'ti-a :dha :due'-a' :ybeh-a' no :ke, :yee' 'yi 'sleh-deh: 'o a no.

⁹Jorwor: :mor eh 'dhu, a :za :gwie-for :due', :yee' a no deh-zon:. :Yee' 'tele' chehn a-a' zabe-: 'i, eh 'da, a :mor 'tele' :wa-nyor:⧾ 'o.

¹⁰Nyor-beh-nyor-beh: :or dhe-a 'o 'tele'⧾-a' klehkpeh dih, 'de :or wa-a eh-a' 'yor-eh :due', :yee' dhih kpon-or', :yee' or wa 'tele'⧾-a' klehkpeh 'weh.

¹¹Deh no-eh, nyor :or no-a, Nyor-a' :no-' 'nyne :zaan', or-a' 'jeh :dao', or-: 'da, Nyor-a' 'dba-:-' nyor, :ke. :Mor eh 'dhu a se 'nyne :zaan' no, 'de a 'ye nyor 'dba, :yee' a :mor 'tele' :wa-nyor:⧾ 'o 'gboror:.

¹²A :korn a 'ye :wlu, 'de mor a 'ye deh⧾ no, :eh gweh-a :ka nyor⧾ :on :korn-a zabe: Nyorsoa-a mu-a :zi, 'do 'tele' :eh zelie-a nyor⧾ 'zorn.

¹³Deh no-eh, nyor :or se-a nyor⧾-a' :wehlih: 'ye-eh :korn, :mor Nyorsoa :taa or-a' zabe zi, :yee' or :se-' or-a' :wehlih 'ye-: i :ke. Nyor⧾ :on :korn-a :wehlih, an-a' ple Nyorsoa-a' zabe: :zi-eh.

¹⁴:Yee' 'an 'Klae :de-di'-boi'-a:, :mor nyor 'da, or-: dhih 'jeh-' :po-nyor: 'o, 'de or 'ye :ao', or se eh-a' :koan no, :yee' deh 'i-deh: eh mu-or 'o :po :eh? Dhih 'jeh-' :po-eh-a' :yeh :dao', eh 'beh-dih: eh 'ye-or' 'puh-dih: :e?

¹⁵:Mor eh 'dhu a-a' 'Klae :de-di'-boi', an-a' nyor se paa-deh 'ble, 'de mor or se dii-deh 'ble,

¹⁶:mor eh 'dhu a-a' nyor :due' 'da 'de or bo, 'Wla :gwluhuh' dih o. :Chehbe' :ne-' :on no o. :Yee' di deh 'jeh neh o. :Mor or 'da :ao', 'de or 'ye :ao', or se-or deh-beh 'nyi, :yee' deh 'jeh-a' :yeheh or no 'do or bo :eh?

¹⁷:Yee' :mor a 'ble dhih 'jeh-' :po-eh :due' 'klein', 'de a 'ye :ao', a se eh-a' :koan no, :yee' eh 'meh-'.

¹⁸Jorwor: nyor :noror' mu :ao' 'da-: 'de 'on bo, :Mor :mloror', :on 'ble dhih 'jeh-' :po-eh:. Jorwor: 'mor :mloror', 'an no :koan. :Yee' 'mor :or 'dhu-a 'Jeen-', 'an mu :aa 'da-: 'de nyor-a' 'jeh :dao' bo, :Torne: :an-a' dhih 'jeh-' :po-eh 'on, :eh se-a :koan 'bhun :ne, :yee' 'an mu 'an-a: dhih 'jeh-' :po-eh :on :torne: :ka 'an no-a eh-a' :koan-a' no-a'.

¹⁹:On po-eh-' dhih 'jeh :ka Nyorsoa :ne-a :due' 'klein'. :Goo:. 'De mor 'kwla 'ye-dih-deh⧾-a' 'jeh :ke, en po-eh-' dhih 'jeh, 'de :fano-a no-ih, 'de en-' 'tiei-a tleh.

²⁰:Mor :daa :or 'ble-a :porluh :due', 'an mu-eh :on :torne: :ka dhih 'jeh-' :po-eh: :eh se-a :koan 'bhun :ne, :yee' eh no-a deh 'plo.

²¹Eh :se :a :bai'-a' :baa' :or 'dhu-a 'Eble'hehn-', Nyorsoa se-or 'yi 'sleh-nyor 'da-dih:, 'do deh or no-a bo :e, :ka or no-a or-a'a: 'yu Ase'-a' 'duo-eh, 'de or po-or 'o 'slaa ken :za-dih-deh ken, or 'ye-or' 'slaa :za-dih:?

²²A 'ye :ka or-a' Nyorsoa-a' dhih 'jeh-' :po-eh-: 'dekorn: or-a' noo-deh⧾-: en no-dih-a :koan :dha :due', 'de or-a' Nyorsoa-a' dhih 'jeh-' :po-eh :gweh-a 'zorn, 'do deh or no-a bo,

²³:ka Nyorsoa-a' 'chlee-deh no-a eh-a' :za-a', eh no-a, 'Eble'hehn po Nyorsoa-a' dhih dhih 'jeh, eh-: :korn dhih 'de Nyorsoa 'da-dih-or 'yi 'sleh-nyor. :Yee' Nyorsoa 'da-dih-or or-a' :ybeh-dih-nyor:.

²⁴A 'ye :ka Nyorsoa 'da-dih-a nyor 'yi 'sleh-nyor, 'do or-a' noo-deh⧾ bo, 'de :eh :se-a or-a' dhih 'jeh-' :po-eh :due' 'klein'.

²⁵:Yee' 'de deh :ne-a :due' 'di :dao', 'Wlea: :sloror' :or no-a :bhaa'-nynor, Nyorsoa 'da-dih-or 'yi 'sleh-nynor:, 'do deh or no-a, or 'nyi-a nyor⧾ :Jasua' dbo-a, :on mu-a :Jehliko'o pobo: 'da, 'pehn-da, 'de or :dbo-dih-uh-a :gwie: 'sluh bo, on 'ye-a' ple.

²⁶:Ka :mor yau: :on se-a :zulu 'ble, :yee' on 'meh-a, 'ka-: dhih 'jeh-' :po-eh :ne :ke. :Mor eh se :koan 'bhun :ne, :yee' eh 'meh-'.