Read Eastern Krahn Jeen: 3 Bible Online

Jeen: 3 - Eastern Krahn bible

Jeen: 3

¹:Yee' 'an 'Klae :de-di'-boi'-a:, a-a' :dha :dhulu'-a' :no-' nyor⧾ deh :torne-nyor⧾. Deh no-eh, a yubo-eh', :a :mor no-a nyor⧾ deh :torne-nyor⧾, Nyorsoa-a mu :a-a' zabe :zi 'gabaa, eh 'ye 'o nyor⧾ :noo' :zi.

²:A-a' klehkpeh, :a no deh⧾ :dhulu' 'i :zi-nyor:⧾. Jorwor: :mor nyor 'see deh 'i zi 'de or-a' :zaa-dhih 'di, :yee' or no nyor :or :gweh-a 'kwla 'de Nyorsoa-deh 'di, 'de or 'beh-dih: or-a' 'jeh-a' yau wlu 'ken :korn-eh 'weh.

³:A ya-dih dubu' 'de :soo'o 'worn. Eh-: no-eh 'de :a 'beh-dih: or-a' 'gbono-a' klehkpeh-' dih 'bili-eh.

⁴A pobo: 'ni ken-meheh: 'kawehn: :daa ya :ke, :ka eh no-a 'yi 'beh-eh, 'de :kmuu-pobor'-a kpa-eh. Jorwor: 'dho :bli-dih-deh-yu: eh-: 'sleh-dih-eh 'i, 'de eh mu :dha eh-a' :janbe-a 'bhorn-a eh 'ye-a' mu.

⁵'Ka-: 'o :meo :ne :ke. On no deh-yu-beh: 'do :gwlor-nyor⧾ 'bhun, jorwor: an za-' deh⧾ :klaba'⧾ an mu-a :no. A pobo: 'kwlae-gle: 'kpulu'eh: :daa ya, :nane'-eh-yu-a po-a 'yli.

⁶:Meo gweh neh :ke. 'Kpih on 'ble-a, en 'wluh 'de 'kulu-deh⧾ bo. On no :a-a' yau-a' deh, 'de an 'kor-dih :a-a' nyior-tu-a' klehkpeh. Neh :eh 'wluh-a 'de 'ku 'bli, eh-: an no, 'de nyor-a' :febeh'-a' klehkpeh gweh :ka deh :ne-a 'de neh-'.

⁷Nimi⧾-: neme-: 'dekorn: zimi-: :gwlor-nyor 'beh-dih: en-' klehkpeh-a' :dhaa-a' :za-eh 'weh, 'de mor or :gwle 'o, eh-a' no-a' 'weh.

⁸Jorwor: eh se nyor :korn, :or 'ye-a' :meo deh :torne:. :Meo no 'kulu-deh:. Nyor se an-a' wlu 'ken :korn-eh 'beh-dih:, :on gweh-a deh :eh 'yi-dih:-a gu-ni-' dih.

⁹:Meo: :ne-a :due', mo-: :a no :a po :a-a' :Gwlor :baa' :or no-a :a :Baa'-a' 'nyne ya. :Meo-a' 'jeh :dao', mo-: :a no, 'de :a po nyor⧾ Nyorsoa no-a 'de or-a' 'jeh-a' nyior-tu 'di 'chlo bo.

¹⁰'De worn :due' :dao' 'di, 'do :wor Nyorsoa-a' 'nyne ya :po-eh-: 'dekorn: nyor⧾ 'chlo bo :po-eh-: 'do :wor en 'wluh. 'An 'Klae :de-di'-boi'-a:, deh⧾ :daa en se-eh 'i :bleh-dih: en 'ye :ao' :ne.

¹¹'Ni 'jeh neh-: 'dekorn: 'torn-ni-: en 'beh-dih: en 'ye 'de tluh-a' 'jun :due' 'di 'wluh :e?

¹²'An 'Klae :de-di'-boi'-a:, yuh 'beh-dih: on 'ye :nyami'eh-bi :tlo :e? :Ae' 'nyoeh' 'ye gwehn :tlo ke? 'Kei:. 'De mor 'torn-ni-jun se 'de 'ni 'jeh neh-a' :ya-a' 'beh-dih: :ke.

¹³:Yee' nyor :or no-a :toror' :korn-nyor, 'de :or no-a deh-' dih 'worn-nyor 'de a 'klu-', 'nyi or-a' kplen 'jeh po eh-a' kuna', :en no-a deh⧾ or no-a 'de :toror' :korn-eh-: 'dekorn: 'de or-a' 'jeh ya :ya-eh 'di-:.

¹⁴Jorwor: :mor eh 'dhu, a-a' :porluh⧾ 'yi-dih: :gwlehehn' dih, 'de a 'ye a-a' 'jeh-a' dhih zi, 'do a :porluh⧾ ken, :yee' a 'bor a-a' 'jeh 'i 'beh-dih-eh, :eh :mor a :korn :toror'. :Mor a no-eh, :yee' a 'tmo sih.

¹⁵:Toror' :korn-eh-a' :yeh :dao', eh :se 'de Nyorsoa 'bli yai' 'wluh, jorwor: 'kmo-a' :toror' :korn-eh: 'o. Eh :se Nyorsoa-a' :Zulu-a' :neh, jorwor: 'ku-a' :neh 'o.

¹⁶:Dha :gwlehehn'-: :korn a-a' 'jeh-a' dhih :zi-eh-: en :ne-a, 'do :wor :zaa'za-: 'dekorn: deh⧾-zon⧾-a' klehkpeh-a' no-a' :gweh-dih:.

¹⁷Jorwor: :zai'-deh:, nyor⧾ :on 'ble-a :toror' :or 'wluh-a 'de Nyorsoa 'bli yai', on no nyor⧾ :on :gweh-a :vlehehn'-', 'de on se :zaa'za 'ble, on no 'yi :kpoehn-nyor:⧾, 'de an 'ye nyor⧾ bo. On 'yi-dih: nyor⧾ :wehlih 'ye-eh dih. Kplen 'jeh-a' klehkpeh, me-: :korn 'bi an tlo. An-a' :za :gwie-for :due'. 'De deh⧾ an za-a-', 'de an no-a, en tba 'de on 'di-: dih.

¹⁸Nyor⧾ :on no-a nyor⧾ 'yi zela-nyor⧾, se :zaa'za 'ble-a' 'yor :oo', an gba. :Yee' an mu 'yi 'sleh-deh⧾-a' 'bi 'kpan-:.